Гал аҭыԥантәи ахаланапхгараҭарақәа рахь алхрақәа ишырзыҟаҵоу иалацәажәеит

18
(ирҿыцуп 15:46 18.03.2021)
Иахьатәи аамҭазы Гал араион аҿы 900-ҩык абжьыҭара азин рымоуп, алхрақәа мҩаԥгахоит 11 алхырҭатә округ рҿы.

АҞӘА, хәажәкыра 18 - Sputnik. Гал араион ахадараҿы 2021 шықәса мшаԥы 11 рзы имҩаԥысраны иҟоу аҭыԥантәи ахаланапхгараҭарахь алхрақәа ишырзыҟаҵоу иалацәажәеит. Аԥсны ахада ихаҭарнакцәеи, араион алхратә комиссиеи, ақыҭақәа рхадацәеи еиԥылеит ҳәа аанацҳауеит араион ахадара.

Аиԥылара алахәылацәа алхрақәа маншәаланы имҩаԥысырц азы ргәаанагарақәа рҳәеит, ажәалагалақәа ҟарҵеит.

Гал аҭыԥантәи ахаланапхгараҭарахь алхрақәа ишырзыҟаҵоу иалацәажәеит

Аԥсны ахада Иусбарҭа аиҳабы ихаҭыԥуаҩ Зураб Қаџьаиа иҳәеит алхрақәа араионқәа зегьы рзы аҵакы шрымоу, аха Гал араион азы еиҳагьы ишҷыдоу избанзар ара 2009 шықәса раахыс урҭ шымҩаԥымсыц.

"Аԥсны атәылауаа рхақәиҭреи рзини атәыла Аконституциа ианыԥшуеит. Дарбанызаалак ҳтәылауаҩ, идинхаҵара, имилаҭра, идунеихәаԥшышьа ирыҿмырԥшыкәа атәылаз хра имоуп. Ҳара Аԥсны иқәынхо зегьы рзы абзиара алҳаршалароуп. Агәра згоит ҳаидгыланы, профессионалла ҳус ҳазнеины еиуеиԥшым ахырхарҭақәа зегьы рҟны аҭагылазаашьа ҳарманшәалап ҳәа" - иҳәеит Қаџьаиа.

Гал араион ахада Константин Ԥлиа иазгәеиҭеит алхрақәа рҵакы шдуу, иҳәеит араион аԥсҭазаара аҭышәынтәалара ишазыхынҳәуа.

Аиԥылара алахәылацәа азааҭгыланы ирылацәажәеит алхрақәа рымҩаԥгашьа аԥҟарақәеи аспектқәеи. Ирзааҭгылан иҟоу асиақәа, анаԥшыҩцәа реилазаара.

Иахьазы Гал ашәҟәы иҭаргалахьеит аԥшьгаратә гәыԥқәа фба акандидатцәа рықәыргыларазы.

Гал араион алхратә комиссиа ахантәаҩы Игор Амҷба Sputnik иазеиҭеиҳәеит 900-ҩык ауаа абжьыҭара азин шрымоу. Убри инадҳәаланы ишыӡбоу адепутатцәа рхыԥхьаӡара жәеизаҩык ҳәа ишьақәыргылазарц. Аконституциа уи азин ҟанаҵоит. Ақыҭақәа рҿы иҟалоит алхырҭатә округқәа фба, ақалақь аҿы – хәба.

18

Ажьиԥҳа аҭыԥантәи адепутатцәа рзы: рҵарагьы ыҟазароуп, аԥсшәагьы рдыруазароуп

5
Тҟәарчал араион алхратә комиссиа алахәыла Рита Ажьиԥҳа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны аҭыԥантәи ахаланапхгараҭаратә усбарҭақәа рахь алхрақәа реихшьаала ҟалҵеит.
Раионк аԥсҭазаараҟынтә: Ажьиԥҳа ахаланапхгараҭарақәа рахь алхрақәа ирызкны

Аԥсны аҭыԥантәи ахаланапхгараҭарахь алхрақәа мҩаԥысит мшаԥы 11 рзы.

"Адепутатрахь иқәгылаз акандидатцәа ҩажәаҩык рахьынтә 15-ҩык алхын. Иманшәаланы еилагарада имҩаԥысит алхрақәа. 5196- ҩык ашәҟәы иҭагалаз алхыҩцәа рҟынтәи 2052 -ҩык алхрақәа рхы рыладырхәит. Уи аԥхьа иҟаз ас еиԥш алхрақәеи дареи еиҿурԥшуазар, усҟан 2800-ҩык ыҟан алхыҩцәа. Актәи аилатәара мҩаԥысраны иҟоуп иааиуа ашәахьаҽны мшаԥы 19 рзы. 15-ҩык адепутатцәа рахьынтә ҩыџьа аҳәса ыҟоуп. Уи аԥхьа иҟаз адепутатцәа рахьынтә ҩыџьа ықәгылан, руаӡәк ҩаԥхьа далырхит, уи Тҟәарчалтәи араионтә хәышәтәырҭа аиҳабы Лали Гаргәылиа лоуп", - лҳәеит Ажьиԥҳа.

Ажьиԥҳа лгәаанагара лҳәеит аҭыԥантәи ахаланапхгараҭарақәа рахь инеиуа адепутатцәа зеиԥшразар акәу.

5

Аԥсны Атәанчахәытә фонд аҿы ашәарақәа зеиԥҟьо атәы рҳәеит

3
(ирҿыцуп 20:14 14.04.2021)
Аԥсны Атәанчахәытә фонд Аԥсны атәылауаа рҿаԥхьа руал 55 миллион мааҭ ыҟоуп. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы.

АҞӘА, мшаԥы 14 - Sputnik. Аԥсуа тәанчахәқәа ршәара апандемиа аамҭа иахҟьеит, избанзар 2020 шықәсазы Атәанчахәытә фонд 130 миллион мааҭ амоуӡеит. Абри атәы радио Sputnik иазеиҭеиҳәеит Аԥсны Атәанчахәытә фонд ахантәаҩы Денис Гәылариа.

2020 шықәсазы акоммерциатә еиҿкаарақәа ашәахтәқәа рықәырхит апандемиа инадҳәаланы. Ари афонд ахь аԥаранашьҭра анырра анаҭеит.

Ахантәаҩы иажәақәа рыла Атәанчахәытә фонд ахь аԥара назмышьҭуаз акоммерциатә еиҿкаарақәа рымацара ракәым, аҳәынҭқарратә еиҿкаарақәагьы рыдҵақәа нарыгӡомызт.

Убас ауал ду ақәны иҟоуп АУН "Амшынеиқәафымцамч", иҳәеит Гәылариа.

"Аха дара ишьақәырӷәӷәоу аграфик ҳзаарышьҭит, ирҳәеит ЕгрыГЕС аусура ишалагалак Атәанчахәытә фонд ахь ахыԥхьаӡаларақәа ишрылаго", - иҳәеит Гәылариа.

Иахьазы реиҳа ауал ду зықәны иҟоу еиҿкаароуп АУН "Амшынеиқәафымцамч".

Ашәарақәа еиҵахоит иара убасгьы ареспубликаҿы аԥсуа тәанчахәы зауа рхыԥхьаӡара иацло иахьалагаз ҳәа иҳәоит Гәылариа.

2020 шықәса алагамҭаз ари ахыԥхьаӡара 6656-ҩык инаӡозар, шықәса анҵәамҭазы 8592-ҩык ҟалеит.

Иахьа Атәанчахәытә фонд аамҭа-аамҭала ашәарақәа мҩаԥнагоит. Аԥхьа иззыршәо категорианы иҟоу Аԥсны жәлар реибашьра аинвалидцәа роуп.

"56 миллион мааҭ ауал ҳақәуп. Ари хәажәкырамза иатәуп. Аха иара есыҽны еиҵахоит. Раион-раионла аԥарақәа ҳшәоит. Аибашьра иадҳәало акатегориақәа рҿаԥхьа Аҟәа, Аҟәа араион, Очамчыратәии Тҟәарчалтәии араионқәа рҟны ҳуал ҳшәеит, иаанханы иҟоуп Гагреи Гәылрыԥшьи араионқәа", - иҳәеит афонд ахантәаҩы.

Гәылариа иажәақәа рыла Афонд ахь аԥаралагалара адинамика аныԥшуа иалагеит. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы ҳәа иҳәоит иара.

3