АҞӘА, хәажәкыра 21 – Sputnik, Бадри Есиава. Аԥснытәи абоксиор Харитон Агрба абжьарабжатә капан аҿы техникатә нокаутла Адунеизегьтәи абоксиортә ассоциациа (WBA Continental) ачемпион ититул даиааит хәажәкыра 20 рзы Москва.
Агрба диндаҭлон кубатәи аспортсмен Албер Рохас, убри аан уаанӡа уи венесуелатәи аспортсмен Еснеикера Корреа диндаҭлоит ҳәа рҳәахьан. Уи дшырыԥсахуаз атәы еилкаахеит аицлабра мышкы шагыз.
Ақәԥара ишалагазҵәҟьа Агрба аԥыжәара иго далагеит. Иара индаҭлаҩ аконтржәыларақәа ҟаиҵартә аҭагылазаашьа ииҭомызт, ӷәӷәала диҿагылон. Кубатәи абоксиор уиаҟара изқәиҭым атактика ааникыло далагеит - иара уажәы-уажә инапқәа лаишьҭуан, ихы-иҿахьы аахақәа аниоуаз, дԥышәырччон, кыраамҭа аринг акәакь аҿы дгылон.
Агрба ари ахымҩаԥгашьа иара ишизеиӷьхаша ихы иаирхәеит. Аҩбатәи араунд аан арефери аиқәԥара ааникылеит. Харитон Агрба техникатә нокаутла аиааира игеит рҳәеит аӡбаҩцәа. Имҩаԥигахьоу аицлабрақәа хәба рҟынтәи ари ахәбатәи иааироуп.
Харитон Агрба 25 шықәса ихыҵуеит. Диит Гагра. Иара европатәи ахәмаррақәа рҟны араӡны даԥсахахьеит, 2012, 2018 шықәсқәа рзы Урыстәыла ачемпионатқәа рҟны ҩынтә аԥхьахә иоухьеит, профессионалла 2019 шықәсазы раԥхьаӡа дықәгылеит, хәынтә дықәԥахьеит, рыхәынтә раан даиааит, ҩынтә - аиндаҭлара хыркәшахаанӡа.
Ажьырныҳәа 2021 шықәсазы иара дықәгылон Мурат Гассиев икоманда даланы, усҟан иара Радмир Абдурахманов дииааит ԥшь-раундк рылҵшәақәа рыла апрофессионалтә бокс азы атурнир "Лига Ставок. Кубок Матч! Боец" аҿы, уи Шәача имҩаԥысуан.
