Азанааҭ уманы ашкол уаналго: Гагратәи ашкол аҟны ахәыҷқәа аџьаус шрыларааӡо

293
(ирҿыцуп 16:46 27.03.2021)
Апандемиа иацыз аԥкрақәа анырра шыҟарҵазгьы, цәыббра инаркны иахьа уажәраанӡа Гагратәи абжьаратә школ №1 аџьаус арҵаҩы Ахра Бебиа илшаз рацәоуп ахәыҷқәа ари амаҭәар ахь агәыбылра рылааӡаразы. Уи ирҵаҩраҿы имоу аихьӡарақәа ртәы Саида Жьиԥҳа ланҵамҭаҿы.

Ахра Бебиа илшаз рацәоуп ахәыҷқәа аџьаус амаҭәар ахь агәыбылра рылааӡаразы. Атеориа дырҵареи, шәкы инеиҳаны аргыларатә маругақәеи аидырҭәалагеи (сварка) рнапаҟны аагареи, аихеи, амҿи, афымцеи аус арыдулашьа дырбареи уҳәа ирацәаӡоуп аҷкәынцәа ирызнеигахьоу.

Саида Жьиԥҳа, Sputnik

Гагратәи абжьаратә школ №1 аџьаус арҵаҩы Ахра Бебиа ари азанааҭ дазҟазацәҟьоуп. Иара Харьковтәи аполитехникатә институт амашьынаргыларатә факультет доушьҭымҭоуп. Убри азоуп хыԥхьаӡара рацәала аргыларатә маругақәа инапаҟны изааиуа. Аурок аҟны арҵаҩы ихы иаирхәоит иахьатәи ҳаамҭа иашьашәалоу лабҿабатәи ацхыраагӡақәагьы. Аџьаус акабинет еиқәыршәоуп иахәҭоу амаҭәахәқәа рыла. Араҟа иуԥылоит шәкы инеиҳаны амҿи, аихеи, афымцатә маҭәахәқәеи аус рыдуларазы амаругақәа. Иаҳҳәозар, амҿтәи ахыгатәи уасҭага, апарпанта, ахьархь, ажьаҳәа, арыҭәа, ашьалашьын, аҵәымӷ, абру, ашәагацаха, арҵәига, афымцатә еидырҭәалага, акылҵәага. Еиқәыршәоуп ахьчагатә сабрадақәа рыла. Аурок цонаҵы арҵаҩи аҵаҩцәеи аргыларатә ԥыраҳәақәа ныҟәыргоит.

© Sputnik / Саида Жьиԥҳа
Аџьаус аурок Гагратәи абжьаратә школ №1 аҟны

"Аџьаус амаҭәар абас аинтерес аҵаны ари ашкол аҟны имҩаԥаҳамгеижьҭеи акрааҵуан. Аинвестпрограмма инақәыршәаны ҳашкол маҭәахәылагьы ианеиқәдыршәоз аџьаус акабинетгьы ишахәҭаз еибыҭан. Ахәыҷқәа гәахәарыла аурок ахь иааиуеит. Атеориа иазԥҵәоу аамҭа ашьҭахь апрактикахь ҳаиасуеит. Иҳамоуп алшара авидеонҵамҭақәа дырбара, убас амаругақәа рнапаҟны инаганы амаҭәарқәа реибыҭара. Ахәыҷқәа сылаԥш шырхугьы, иҟалар алшоит аӡәы машәыршәа инапы ԥиҟаргьы. Убри аҭагылазаашьазгьы иццаку ацхыраара аиҭаразы амедицинатә маҭәашьарқәа рыла ҳаиқәшәоуп", - иҳәоит аџьаус арҵаҩы Ахра Бебиа.

© Sputnik / Саида Жьиԥҳа
Ахра Бебиа

Апандемиа аԥырхага рынаҭазаргьы, аамҭа кьаҿ иалагӡаны арҵаҩы ицхыраарала ахәыҷқәа ашкол азы аҟәардәқәа фба ҟарҵахьеит.

"Сара бзиа избоит ари амаҭәар, избанзар ашкол салгаанӡа исҵаша рацәахоит. Иансызҳалак, даҽа занааҭк алсхыргьы, аҩны исыхәоит. Аишәа ма аҟәардә ҟасҵар сылшоит, афымцатә цәаҳәақәа блыр, исыԥсахуеит", - иҳәоит афбатәи акласс аҵаҩы Инал Сыҷынаа.

Ииашаҵәҟьаны, аџьаус арҵаҩы Ахра Бебиа иазгәеиҭеит, ахәыҷқәа ашкол иалгаанӡа занааҭк аҳасабала амҿи, аихеи, афымцеи аус арыдулара рҵарц шрылшо.

"Ари аԥсҭазаараҟны зегьы профессорцәахаӡом. Аӡәы дуасҭахароуп, ҽаӡәы дыргылаҩхароуп, егьи афымцазҟазара илҵроуп. Убри аҟнытә аџьаус аурок аҿы ироуа адыррақәеи аԥышәеи наҟ-наҟ ицхыраагӡахоит. Иахьа афымцатә лашарбагагьы зхала иззымԥсахуа ахаҵагьы дубап. Ажәакала, аџьа ауаҩы дааӡоит", - иажәа иациҵоит арҵаҩы.

© Sputnik / Саида Жьиԥҳа
Аџьаус аурок Гагратәи абжьаратә школ №1 аҟны

Иҟоуп аҷкәынцәа амҿаҟны амашьынақәеи абџьари ҭаԥызҟҟо. Ахра Бебиа иаликааит аџьаус амаҭәар еиҳа изықәҿиауа аҷкәынцәа, урҭ иреиуоуп афбатәи акласс аҵаҩцәа Инал Сыҷынаа, Иасон Ҳагба, Миха Занҭариа, Арсоу Кәакәасқьыр, Асҭамыр Џьакониа, ажәеизатәи акласс аҵаҩцәа Нарҭ Кьахьыриԥеи Алан Булиеи.

"Аџьаус аурок амҩаԥгара акәамаҵамақәа рацәаӡаны иамоуп. Ахәыҷқәа аус здырулаша амҿтәы ма аихатәы маҭәахәқәа рыхәҭаҷқәа заанаҵы еиқәыршәатәуп. Абраҟа даара дсыцхраауеит ашкол адиректор Хана Гәынԥҳа. Лара иҳагхо маҭәахәык ма маругак ҟалар, иҳауаанӡа лгәы ҭынчӡам. Исывагылоуп анхамҩа-бзазаратә ҟәша аусзуҩцәа Денис Гәлариа, Ҭамаз Папба, абаҩрҵәыра арҵаҩы Раџь Ҳаџьымба. Иҭабуп ҳәа иасҳәоит убас зуасҭарҭаҟнытә амҿтәы хәҭаҷқәа ҳазҭо ҳҩыза Ҭемыр Ажьиба", - ҳәа инаҵишьит Ахра Бебиа.

Мчыбжьык аџьаус амаҭәар иазԥҵәоуп 12 сааҭ. Ари аурок рымоуп ахәбатәи инаркны ажәеизатәи налаҵаны аклассқәа. Аҷкәынцәа Ахра Бебиа иакәзар аус рыдызуло, аӡӷабцәа рҵаҩыс дрымоуп Ирма Агрԥҳа. Даргьы акарантин акырӡа ирԥырхагахеит. Аха уеизгьы рнапаҟны агәыри арахәыци ааргеит. Акьанџьақәа рзы амаҭәа хәыҷқәа рӡахуеит. Уажәы арҵаҩы ақәҵашьа длырбоит. Раԥхьаҟа ишьҭоуп аԥашьеи афатә аҟаҵашьеи рҵара. Аӡӷабцәа рыкласс еиқәыршәоуп аӡахыга машьынкақәа рыла, ирымоуп агәыр, арахәыц, амаркатыл уҳәа анапҟазараҿы зда ихәарҭам амаругақәа.

"Хара имгакәа ҳашкол иазхаша аҩнымаҭәеи ашколтә формеи ҳнапы иҵаҳхыртә еиԥш иҟалоит", - ҳәа илафуеит аџьаус арҵаҩцәа.

293
Милиция

Аԥсны арепатриациазы уаанӡатәи аминистр Беслан Дбар иԥшаара рылаҳәоуп

1
(ирҿыцуп 16:26 23.04.2021)
Аԥсны Апрокуратура хада ашьаусԥшааратә усбарҭа ашьаус хацнаркит Арепатриациа уаанӡатәи аминистр Беслан Дбар иганахьала Аԥсны азакәанԥҵара анагӡашьа ахылаԥшразы аусбарҭа Апрокуратура хадахь инанашьҭыз аматериалқәа рҵаҵӷәала.

АҞӘА, мшаԥы 23 - Sputnik. Аԥсны арепатриациазы уаанӡатәи аминистр Беслан Дбар иԥшаара рылаҳәоуп ҳәа аанацҳауеит Апрокуратура хада апресс-маҵзура.

Апрокуратура хада аусҭҵааратә усбарҭа иара убасгьы ирыланаҳәоит ИАЕ ИАЕ "РемСтрой2012" адиректор Амиран Лакербаиагьы иԥшаара рылаҳәоуп ҳәа.

Ашьаусԥшаара адыррақәа рыла, Дбар амаҵзуратә ԥаршеитә усмҩаԥгатәқәа ҟаиҵеит, гәыԥҩык ауаа - ЗҲәА "РемСтрой 2012" адиректор Амиран Лакербаиеи Арепатриациазы афонд атехникатә хылаԥшра анџьныр Денис Ақаҩбеи иареи - заанаҵ еицәажәаны мҽхакы ҭбаала абиуџьеттә ԥарақәа рӷьычра хықәкыс иҟаҵаны мцҳәарала, ишԥаршеиз заанаҵ идырны ишьақәиргылеит амаҵзуратә документқәа.

Аԥсны Апрокуратура хада ашьаусԥшааратә усбарҭа ашьаус хацнаркит хәажәкыра 23 рзы. Аҟәатәи ақалақьтә ӡбарҭа Арепатриациаз уаанӡатәи аусзуҩ Денис Ақаҩба иганахьала аҩнтәы рбаандаҩра иқәнаҵеит лаҵара 23 рҟынӡа.

Иара убас шәаԥхьар ҟалоит:

1

Урыстәылатәи агранатаршәыҩцәа ацәҟьарақәа ирықәкны ихысуан

4
(ирҿыцуп 14:32 23.04.2021)
Аԥсны иҟоу Аладатәи арратә округ арратә ҟәшақәа аӡынразтәи рҵара-гәаҭаратә уснагӡатәқәа мҩаԥыргоит. Амчыбжь анҵәамҭазы арратә база адырра ахәшьара ықәдыргылоит. Ауснагӡатәқәа ирыдыԥхьалоуп 1,5 нызқьҩык аруаа, 500 ак арратә техника.

АҞӘА, мшаԥы 23 - Sputnik. Аԥсны иҟоу Урыстәылатәи Аладатәи арратә округ агранатаршәыҩцәа еиҭаҵуази еиҭамҵуази ацәҟьарақәа ирықәкны ихысуан агәаҭара аҳәаақәа ирҭагӡаны. Абри атәы аанацҳауеит аокруг апресс-маҵзура.

Аполигонқәа Нагвалоуи Ҵабали рҟны аррамаҵзурауаа "аӷа" иеибашьыга машьынақәа рсахьа змаз ацәҟьарақәа иреихсуан 350 метра набжьаны. Ацәҟьарақәа секундк 10 метрак рҟынӡа ирццакын.

Абри аан ахархәара рыҭан: анапылатә гранатаршәгақәа РПГ-7, акәылӡы кылызжәо агранатақәа ПГ-7ВЛ, агранатаршәга АГС-17.

Амшын аԥшаҳәаҿы ауснагӡатәқәа рымҩаԥгараан аԥша аӷьеы иасуан, секундк ала 20 метра инаӡон. Аруаа рхысраан ари азгәаҭара рыман.

Урыстәыла ар ргәаҭара мҩаԥысуеит Аладатәи арратә округ ар ркомандаҟаҵаҩ Александр Дворников инапхгарала. Аҽазыҟаҵарақәа мҩаԥысуеит 2021 шықәсазтәи аплан инақәыршәаны. Аҽазыҟаҵарақәа ирылархәуп Амшынеиқәатә флоти Каспитәи афлоти. Аҽазыҟаҵарақәа рыхәшьара мҩаԥыргоит арратә усбарҭа анапхгаҩцәа рыла ишьақәгылоу акомиссиа. Игәарҭоит ар реиҿкаашьа, анормативқәа рынагӡашьа, роперативтә зыҟаҵара аҩаӡара.

4