Атуроператорцәа еиҭарҳәеит сынтәатәи аԥхынразы Аԥсны аԥсшьара заҟа иаԥсахо

6
(ирҿыцуп 17:04 29.03.2021)
Заанаҵтәи аԥсшьарҭа ҭыԥқәа рҿаҵара акциа хәажәкыра 31 рзы ихыркәшахоит, аекспертцәа ргәаанагарала иара хра аманы имҩаԥысит.

АҞӘА, хәажәкыра 29- Sputnik. Атуроператорцәа 2021 шықәсазтәи аԥхынра Аԥсны ахгара 20% рыла Адлер аасҭа имариахоит, 25% –Ҟрым аасҭа ҳәа азгәарҭоит. Абри атәы аанацҳауеит Урыстәыла атуроператорцәа р-Ассоциациа апортал.

Заанаҵтәи аԥсшьарҭа ҭыԥқәа рҿаҵара акциа хәажәкыра 31 рзы ихыркәшахоит. Атуроператор "Дельфин" адыррала заанаҵтәи аҿаҵарақәа рҳәаа иҭакны 50% атурқәа харҭәаауп, "TUI Россия" адыррала – 30-40%.

Аекспертцәа рыхәҭак иазырыԥхьаӡоит Аԥсны заанаҵтәи аҿаҵарақәа мшаԥымзазгьы имҩаԥыслоит ҳәа. Ари атенденциа иацхраауеит анҭыҵтә хырхарҭақәа рыҟамзаара, Краснодартәи атәылаҿацәи Ҟрыми ркурортқәа рҟны ахәқәа рыҳаракра.

Амилаҭтә туроператор "АЛЕАН" аекспертцәа адырра ҟарҵоит 15-процент аҭирақәа ишрыцлаз Аԥснытәи ахырхарҭаҿы, "Дельфин" адиректор Сергеи Ромашкин иазгәеиҭоит 40-процент атурқәа рҭаххара ишацлаз.

Атуроператор "Интурист" ахаҭарнакцәа ражәақәа рыла Аԥсны заанаҵтәи аҿаҵарақәа рхышәаҵышәа 3,5 еизҳаит.

Убри аан експертцәақәак агәаанагара рымоуп асезон алагамҭазы ахәԥсақәа ирыцлоит ҳәа.

"Атурқәа рыхәԥсақәа ирыцлар ҟалоит 5%, иреиҳамкәа, аотельқәа зтәу аԥсшьаҩцәа рыдрыԥхьаларц азы", - рҳәоит TUI Россиа аекспертцәа.

"Интурист" аекспертцәа ирҳәоит асезон аан апакеттә турқәа рыхәԥсақәа ирыцлоит ҳәа, Шәачаҟа авиабилеҭқәа рыхәԥса аҳаракра инадҳәаланы.

Атуроператорцәа ринформациала Аԥсны асасааирҭақәеи апансионатқәеи 2021 шықәсазтәи асезон азы stop sale нарышьҭуеит.

Атуроператор АЛЕАН аекспертцәа ирҳәоит stop sale ишаҵанакуа аклассқәа "люкс" ма "полулюкс".

2021 шықәсазы еиҳа иҿарҵо акурортқәа ирыҵаркуеит Гагра, Пицунда, Афон ҿыц. Бжьаратәла урыстәылаа 8 - 11 мшы рыԥсы ршьоит. TUI аекспертцәа иазгәарҭоит сынтәа 10 - 14 мшы аԥсшьара еиҳа ишаҿарҵахьо.

Иара убас шәаԥхьар ҟалоит:

6

Ажьиԥҳа аҭыԥантәи адепутатцәа рзы: рҵарагьы ыҟазароуп, аԥсшәагьы рдыруазароуп

5
Тҟәарчал араион алхратә комиссиа алахәыла Рита Ажьиԥҳа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны аҭыԥантәи ахаланапхгараҭаратә усбарҭақәа рахь алхрақәа реихшьаала ҟалҵеит.
Раионк аԥсҭазаараҟынтә: Ажьиԥҳа ахаланапхгараҭарақәа рахь алхрақәа ирызкны

Аԥсны аҭыԥантәи ахаланапхгараҭарахь алхрақәа мҩаԥысит мшаԥы 11 рзы.

"Адепутатрахь иқәгылаз акандидатцәа ҩажәаҩык рахьынтә 15-ҩык алхын. Иманшәаланы еилагарада имҩаԥысит алхрақәа. 5196- ҩык ашәҟәы иҭагалаз алхыҩцәа рҟынтәи 2052 -ҩык алхрақәа рхы рыладырхәит. Уи аԥхьа иҟаз ас еиԥш алхрақәеи дареи еиҿурԥшуазар, усҟан 2800-ҩык ыҟан алхыҩцәа. Актәи аилатәара мҩаԥысраны иҟоуп иааиуа ашәахьаҽны мшаԥы 19 рзы. 15-ҩык адепутатцәа рахьынтә ҩыџьа аҳәса ыҟоуп. Уи аԥхьа иҟаз адепутатцәа рахьынтә ҩыџьа ықәгылан, руаӡәк ҩаԥхьа далырхит, уи Тҟәарчалтәи араионтә хәышәтәырҭа аиҳабы Лали Гаргәылиа лоуп", - лҳәеит Ажьиԥҳа.

Ажьиԥҳа лгәаанагара лҳәеит аҭыԥантәи ахаланапхгараҭарақәа рахь инеиуа адепутатцәа зеиԥшразар акәу.

5

Аԥсны Атәанчахәытә фонд аҿы ашәарақәа зеиԥҟьо атәы рҳәеит

3
(ирҿыцуп 20:14 14.04.2021)
Аԥсны Атәанчахәытә фонд Аԥсны атәылауаа рҿаԥхьа руал 55 миллион мааҭ ыҟоуп. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы.

АҞӘА, мшаԥы 14 - Sputnik. Аԥсуа тәанчахәқәа ршәара апандемиа аамҭа иахҟьеит, избанзар 2020 шықәсазы Атәанчахәытә фонд 130 миллион мааҭ амоуӡеит. Абри атәы радио Sputnik иазеиҭеиҳәеит Аԥсны Атәанчахәытә фонд ахантәаҩы Денис Гәылариа.

2020 шықәсазы акоммерциатә еиҿкаарақәа ашәахтәқәа рықәырхит апандемиа инадҳәаланы. Ари афонд ахь аԥаранашьҭра анырра анаҭеит.

Ахантәаҩы иажәақәа рыла Атәанчахәытә фонд ахь аԥара назмышьҭуаз акоммерциатә еиҿкаарақәа рымацара ракәым, аҳәынҭқарратә еиҿкаарақәагьы рыдҵақәа нарыгӡомызт.

Убас ауал ду ақәны иҟоуп АУН "Амшынеиқәафымцамч", иҳәеит Гәылариа.

"Аха дара ишьақәырӷәӷәоу аграфик ҳзаарышьҭит, ирҳәеит ЕгрыГЕС аусура ишалагалак Атәанчахәытә фонд ахь ахыԥхьаӡаларақәа ишрылаго", - иҳәеит Гәылариа.

Иахьазы реиҳа ауал ду зықәны иҟоу еиҿкаароуп АУН "Амшынеиқәафымцамч".

Ашәарақәа еиҵахоит иара убасгьы ареспубликаҿы аԥсуа тәанчахәы зауа рхыԥхьаӡара иацло иахьалагаз ҳәа иҳәоит Гәылариа.

2020 шықәса алагамҭаз ари ахыԥхьаӡара 6656-ҩык инаӡозар, шықәса анҵәамҭазы 8592-ҩык ҟалеит.

Иахьа Атәанчахәытә фонд аамҭа-аамҭала ашәарақәа мҩаԥнагоит. Аԥхьа иззыршәо категорианы иҟоу Аԥсны жәлар реибашьра аинвалидцәа роуп.

"56 миллион мааҭ ауал ҳақәуп. Ари хәажәкырамза иатәуп. Аха иара есыҽны еиҵахоит. Раион-раионла аԥарақәа ҳшәоит. Аибашьра иадҳәало акатегориақәа рҿаԥхьа Аҟәа, Аҟәа араион, Очамчыратәии Тҟәарчалтәии араионқәа рҟны ҳуал ҳшәеит, иаанханы иҟоуп Гагреи Гәылрыԥшьи араионқәа", - иҳәеит афонд ахантәаҩы.

Гәылариа иажәақәа рыла Афонд ахь аԥаралагалара адинамика аныԥшуа иалагеит. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы ҳәа иҳәоит иара.

3