АҞӘА, хәажәкыра 31 – Sputnik, Бадри Есиава. Ахәыҷтәы шьапылампылтә клубқәа "Динамо" (Аҟәа) "Ерцахә" (Очамчыра) актәии ахԥатәии аҭыԥқәа ааныркылеит атурнир "Уаҵәтәи алегендақәа рира" аҿы ҳәа Sputnik иазеиҭарҳәеит аклубқәа рнапхгаҩцәа.
"Динамо-Аҟәа" ф-хәмаррак мҩаԥнагеит. Афинал аҿы москватәи акоманда "Барселона" афилиал ахәмарыҩцәа ирындаҭлон, аиааирагьы агеит 5:1 ҳәа.
"Апандемиа инадҳәаланы шықәсык ҵуан џьаргьы ҳамцеижьҭеи. Сынтәа раԥхьаӡа акәны аҳәаанырцә ҳааит. Аԥхыни ҭагалани Урыстәыла атурнирқәа ҳрылахәхараны ҳаҟоуп. Ахада ирезервтә фонд аҟынтәи 200 000 мааҭ ҳзоурыжьит. Иаҳҭахыз зегьы рзы ирзымхазаргьы, даара ицхыраагӡахеит. Иазымхоз аԥара аҭаацәа еизыргеит", - иҳәеит азыҟаҵаҩ Мераб Кәакәасқьыр.
Иара иажәақәа рыла, ахәмарра шьахәын.
Очамчыратәи "Ерцахә" ф-хәмаррак мҩаԥнагеит, ахԥатәи аҭыԥ ааннакылеит. Афиналбжаҿы москватәи "Академиа Барселоны" иацыхәмаруан, пенальти аҿы 4:3 ҳәа иаҵахеит. Ахԥатәи аҭыԥ аиуразы "Ерцахә" москватәи аклуб "Финиш спорта" иацыхәмаруан, иагьаиааит 3:0 ҳәа.
"Асеиԥш иҟоу аицлабрақәа рылахәхара ҳцәыцәгьоуп. Уажәы атәыла ахада аԥара ҳзоуижьит. Ишыздыруа ала, Урыстәыла ихәмаруа акомандақәа быжьба ԥарала еиқәиршәеит", - иҳәеит "Ерцахә" азыҟаҵаҩ Рамин Киут.
Киут иҳәеит ахәмарыҩцәа аԥышәа роурц лассы-лассы атәыла анҭыҵ ихәмарлароуп ҳәа, аха аԥаразымхара еиҵанарҟьоит.
"Уаҵәтәи алегендақәа рира" шықәсык аԥхьатәи атурнир имҩаԥысуаз иалахәын "Ерцахә". Усҟан аԥшьбатәи аҭыԥ ааннакылеит.
