Аԥсны Иреиҳаӡоу аӡбарҭа аӡбаҩ ҿыц далхуп

8
(ирҿыцуп 17:44 31.03.2021)
Аԥсны Иреиҳаӡоу атәылауаҩратә, административтә усқәа, административтә зинеилагарақәа, уҳәа ирзырхоу иреиҳаӡоу ӡбарҭатә усбарҭоуп.

АҞӘА, хәажәкыра 31 - Sputnik. Апарламент адепутатцәа Сафарбеи Мқанба икандидатура иахәаԥшит Аԥсны Иреиҳаӡоу аӡбарҭа аӡбаҩык иаҳасаб ала. Акандидатура Аԥсны Аконституциа ахәҭаҷ 69 инақәыршәаны атәыла ахада Апарламент ахь инаишьҭит.

Мқанба Сафарбеи Тарас-иԥа икандидатура рыдгалан 2021 шықәса жәабран 22 рзы Аԥсны аӡбаҩцәа рыквалификациатә коллегиа иҟарҵаз абжьагарала.

Абжьыҭараан 29-ҩык адепутатцәа рыбжьы ирҭеит, ҩыџьа акандидатура мап ахырҳәааит. Абас ала, Сафарбеи Мқанба Иреиҳаӡоу аӡбарҭа аӡбаҩыс далхуп.

Мқанба Сафарбеи Тарас-иԥа диит 1961 шықәса мшаԥы 9 рзы, Аԥснытәи АССР Гәдоуҭа араион Афон ҿыц ақалақь аҿы.

1986 шықәсазы Аԥснытәи ААУ аҭоурых-зиндырратә факультет қәҿиарала далгеит.

1987 шықәса мшаԥымза инаркны Аҟәа ақалақь апрокуратураҿы аус иуан, нас – Тҟәарчал ақалақь апрокуратураҿы.

1990 шықәса абҵара 21 инаркны 1993 шықәса жьҭаара 29 рзынӡа Тҟәарчал ақалақь апрокурорс дыҟан.

1993 шықәса жьҭаара 29 инаркны 2001 шықәса абҵара 12 рҟынӡа Аҟәа араион апрокурорс дыҟан.

2001 шықәса абҵара 12 – 2007 шықәса жәабран 7 – Аԥсны апрокурор хада актәи ихаҭыԥуаҩ.

2007 шықәса жәабран 7 – 2014 шықәса рашәара 5 – Аԥсны Аҳәынҭқарра апрокурор хада.

Дҭаацәароуп. Ҩыџьа аԥҳацәа драбуп.

8

Аԥсуа боксиор Саир Качараа Европа Аԥхьахә агаразы алшара иоуит

3
(ирҿыцуп 09:29 18.04.2021)
15-16 шықәса зхыҵуа рыбжьара абокс ала Урыстәыла Аԥхьахә азы аиндаҭлара мҩаԥысуан мшыԥы 11 -17 рзы, Анапа.

АҞӘА, мшаԥы 18 - Sputnik. Бадри Есиава. Аԥсуа боксиор Саир Качараа 15-16 шықәса зхыҵуа рыбжьара абокс ала Урыстәыла Аԥхьахә азы аиндаҭлараҟны аиааира игеит, иигаз аиааира иалнаршоит Европа Аԥхьахә аҿы иқәгылара, абри атәы Sputnik акорреспондент изеиҭеиҳәеит аспортсмен иазыҟаҵаҩцәа руаӡәк Арнольд Гәыбаз.

"Атурнир аан Саир ԥшьы-еиԥыларак мҩаԥигеит, урҭ зегьы рҿы аиааира игеит. Афинал аҟны еиԥылеит Белгородтәи аспортсмени иареи (Родион Мытник-аред.). Саир иеиндаҭлоз даара иӷәӷәан. Иаԥхьаҟа иизыԥшуп Европа Аԥхьахә аҿы ақәгылара. Саир ҩынтәуп Урыстәыла Аԥхьахә азы аиндаҭлараҟны аиааира игоижьҭеи, аха усҟан урыстәылатәи акоманда Европа Аԥхьахә агаразы имцаӡеит", - иҳәеит Гәыбаз.

© Видео Арнольд Губаз
Аԥсуа боксиор Саир Качараа 15-16 шықәса зхыҵуа рыбжьара абокс ала Урыстәыла Аԥхьахә азы аиндаҭлараҟны аиааира игеит

Гәыбаз иазгәеиҭеит, ари атурнир ахь иколлегацәеи иареи Нальчикнтәи ишааз, уаҟа абокс азы Урыстәылазегьтәи атурнир мҩаԥыргон, уи иалахәын ԥшьҩык гәдоуҭатәи аспортсменцәа- ахԥатәи аҭыԥ ааникылеит Дамеи Чамагәуа, аҩбатәи-Соломон Папба, Аинар Малиеи Даут Хагәышьи актәи аҭыԥ.

Саир Качараа 15 шықәса ихыҵуеит. Анапа имҩаԥысуаз аицлабрақәа рҟны 60 кьыла рҟынӡа зыкапан наӡо дрыцықәгылон. Аспортсмен дазыҟарҵоит Арнольд Гәыбази Алиас Агрбеи.

3

COVID-19 зцәа иалаз апациент иԥсҭазаара далҵит Аҟәатәи аинфекциатә хәышәтәырҭаҿы

5
Иҳаҩсыз уахыки-ҽнаки рыла COVID-19 рылоу ирыламу аилкааразы 187-ҩык атестқәа рзыҟаҵан, урҭ рахьтә 42-ҩык акоронавирус рцәа ишалаз аадырԥшит.

АҞӘА, мшаԥы 17 – Sputnik.  Аҟәатәи аинфекциатә хәышәтәырҭаҿы иԥсҭазаара далҵит акоронавирустә инфекциа ҿыц ззышьақәыргылаз 67 шықәса зхыҵуаз апациент, ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 46-ҩык, урҭ рахьтә 36-ҩык акоронавирус адиагноз рзышьақәыргылоуп, рҭагылазаашьа бааԥсуп 12-ҩык, ибжьаратәуп - 25-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 36-ҩык апациентцәа, Очамчыра ирхәышәтәуеит ааҩык, Гагратәи ахәышәтәырҭаҿы - 12-ҩык, Тҟәарчалтәи ахәышәтәырҭаҿы - ҩыџьа апациентцәа.

Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 13924-ҩык ыҟоуп, ргәы бзиахеит 13338-ҩык, рыԥсҭазаара иалҵит 219-ҩык.

Акоронавирус иазку ажәабжьқәа зегьы шәрыԥхьар ҟалоит абра>>

5
Атемақәа:
Аҿкычымазара – акоронавирус Аԥсни адунеи аҿи: иалкаау

Адунеи аҿы иаарԥшу COVID-19 ахҭысқәа 140 миллион иреиҳахеит

2
(ирҿыцуп 09:32 18.04.2021)
Адунеи аҟны COVID-19 здырбалаз ауаа рхыԥхьаӡара 140 082 593 ирзааигәахоит, урҭ рахьтә 3 002 154 миллионҩык иреиҵамкәа рыԥсҭазаара иалҵит, ргәы бзиахеит 79 840 908 миллионҩык.

АҞӘА, мшаԥы 18 - Sputnik. Адунеи аҿы акоронавирустә инфекциа ҿыц здырбалаз рзеиԥш хыԥхьаӡара 140 миллион иреиҳахеит ҳәа адырра ҟанаҵоит Џьонс Хопкинс ихьӡ зху ауниверситет. Абри атәы аанацҳауеит РИА Новости.

Авирус реиҳаӡа алаҵәара ахьамоу тәылоуп Еиду Америкатәи аштатқәа-31,5 миллионҩык чмазцәахеит), аҩбатәи аҭыԥ аҟны игылоуп Индиа-14,5 миллионҩык), ахԥатәи аҿы Бразилиа 13,8 миллионҩык.

Мшаԥы 17 адыррақәа рыла аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 13924-ҩык ыҟоуп, ргәы бзиахеит 13338-ҩык, рыԥсҭазаара иалҵит 219-ҩык.

Хәажәкыра 11, 2020 шықәсазы Адунеизегьтәи агәабзиарахьчаратә еиҿкаара апандемиа рыланаҳәеит акоронавирустә инфекциа ҿыц COVID-19 алаҵәара инадҳәаланы.

Акоронавирус иазку ажәабжьқәа зегьы шәрыԥхьар ҟалоит абра>>

 

2
Атемақәа:
Аҿкычымазара – акоронавирус Аԥсни адунеи аҿи: иалкаау