Аԥсны апартиақәеи ауаажәларратә еиҿкаарақәеи ахашәалақәа рдекларациа иадгылоит

30
(ирҿыцуп 09:54 02.04.2021)
Апарламент адепутатцәа хәажәкыра 31 рзы "Амаҵзурауааи адепутатцәеи рхашәалақәеи, рныхрақәеи, рмазареи, амазаратә ҟазшьа змоу рхыдҵақәеи ашәҟәы рҭагаларазы" азакәан ариашарақәа рыдыркылеит актәи аԥхьарала.

АҞӘА, мшаԥы 2 – Sputnik, Бадраҟ Аҩӡба. Аԥсны политикатә партиақәаки уаажәларратә еиҿкаарақәаки ахашәалақәа рдекларациа ишадгыло рҳәеит мшаԥы 1 азы имҩаԥысыз аиԥылараҿы.

Аиԥылара алахәылацәа "Амаҵзурауааи адепутатцәеи рхашәалақәеи, рныхрақәеи, рмазареи, амазаратә ҟазшьа змоу рхыдҵақәеи ашәҟәы рҭагаларазы" азакәан ариашарақәеи азакәан амчра аиуреи ирылацәажәеит.

Акоррупциа иаҿагылоe азакәанԥҵара адкылараз иқәгыло активист Асҭамsр Какалиа ииашам ҳәа ахиҳәааит асиаҟынтә адекларантцәа зықәра наӡахьоу рыхшара ахьалырхыз.

"Азакәан шықәсык иҭызҵаауаз адепутатцәа адекларантцәа зықәра наӡахьоу рыхшара алырхит, убри аан адокумент еиҭа аус адулатәуп ҳәа рҳәеит. Шықәсык ашьҭахь иҟалаша здыруада – иҟалап иара адекларант ихаҭа асиа далырхыргьы. Аус нагӡаны ианадулахо аамҭазы егьырҭ аус зымуа азакәанқәа иреиԥшхозар акәхап", - ҳәа иҳәеит иара.

Какалиа иҳәеит азакәан хықәкыла идырххоит ҳәа.

© Sputnik
Аԥсны апартиақәеи ауаажәларратә еиҿкаарақәеи ахашәалақәа рдекларациа иадгылоит

"Аус зыдулатәны иҟоузеи? Адекларациа хасырҭәааит, амц анысҵазар, сусура самырхит, ус акәымкәа смазара ахьынтәаазгаз иашан иасырбазар – проблема ыҟам. Азакәан уаҵәыҵәҟьагьы аус аур алшоит. Уаанӡатәи аԥхьарала иара мшаԥы 3 инаркны аусура иалагар акәын. Адепутатцәа ирҳәоит азакәан амч аиура иахьымӡар ҟалоит ҳәа. Шәара уи азы шәыбжьы шәҭии, ахада уи инапы ақәиҵарц жәамш иҭахны дыҟам", - ҳәа иҳәеит иара.

Аиԥылараҿы дықәгылеит ауаажәларратә еиҿкаара "Аԥсуа жәлар рхеидкыла" анапхгаҩы, аԥыхьатәи аекономика аминистр Адгәыр Арӡынба.

"Чынуаҩык дӷьычит ма дымӷьычит ҳәа акәӡам азҵаара шықәгыло. Акоррупциа еиҳа иахьеиҵоу адунеи атәылақәа рреитинг ҳанахәаԥшуа иаабоит урҭ атәылақәа аҿиара ду змоу атәылақәа шракәу. Акоррупциа ҳаҿагылара иаанаго аҳәынҭқарра хра аманы иҿиаларц азықәԥароуп иаанаго", - ҳәа иҳәеит иара.

Арӡынба иара убасгьы иазгәеиҭеит аекономика аминистрс даныҟаз инаркны ари азакәан адгылара шеиҭоз.

"Ари сара еснагь иаартны салацәажәон. Напхгара зысҭоз аминистрраҿы акоррупциа иаҿагыло аусқәа рацәан –акадртә резерв, акадрқәа еиндаҭлара ралхра уҳәа ирацәаны", - ҳәа иҳәеит Арӡынба.

Иара игәаанагарала азакәан аус адулареи адкылареи раамҭа арххара аҭахны иҟаӡам.

"Аҳәынҭқарратә маҵзура иахагылоу ауаҩы, имазара ахьааигаз ахыҵхырҭа ззамыртуа – дыцәгьоуҩуп. Араҟа 28 ԥхьара аҭахны иҟаӡам", - ҳәа иҳәеит иара.

Ауаажәларратә еиҿкаара "Аруаа" ахантәаҩы Ҭемыр Гәлиа иҳәеит "Амаҵзурауааи адепутатцәеи рхашәалақәеи, рныхрақәеи, рмазареи, амазаратә ҟазшьа змоу рхыдҵақәеи ашәҟәы рҭагаларазы" азакәан, актәи аԥхьарала адепутатцәа ирыдыркылаз, Аԥсны ажәлар ринтересқәа ирықәшәаӡом ҳәа.

"Иахьа азакәан шыҟоу ала ихәарҭаӡам. Азакәан ала амаҵзурауаҩ, иҭаацәара алахәылацәа, ачынуаҩи уи иҭаацәеи рмазара, рлагала ахьынтәааргаз рҳәо иҟазароуп. Убас иҟоу азакәан ауп сара сзыдгыло", - ҳәа иҳәеит иара.

Акоррупциа иаҿагыло азакәан ишадгыло рҳәеит апартиақәа: "Аԥсны", "Акзаара", "Аԥсны жәлар рпартиа", ауаажәларратә еиҿкаарақәа "Аԥсуа жәлар рхеидкыла", "Аруаа", "Ахьаца".

30
Милиция

Аԥсны арепатриациазы уаанӡатәи аминистр Беслан Дбар иԥшаара рылаҳәоуп

1
(ирҿыцуп 16:26 23.04.2021)
Аԥсны Апрокуратура хада ашьаусԥшааратә усбарҭа ашьаус хацнаркит Арепатриациа уаанӡатәи аминистр Беслан Дбар иганахьала Аԥсны азакәанԥҵара анагӡашьа ахылаԥшразы аусбарҭа Апрокуратура хадахь инанашьҭыз аматериалқәа рҵаҵӷәала.

АҞӘА, мшаԥы 23 - Sputnik. Аԥсны арепатриациазы уаанӡатәи аминистр Беслан Дбар иԥшаара рылаҳәоуп ҳәа аанацҳауеит Апрокуратура хада апресс-маҵзура.

Апрокуратура хада аусҭҵааратә усбарҭа иара убасгьы ирыланаҳәоит ИАЕ ИАЕ "РемСтрой2012" адиректор Амиран Лакербаиагьы иԥшаара рылаҳәоуп ҳәа.

Ашьаусԥшаара адыррақәа рыла, Дбар амаҵзуратә ԥаршеитә усмҩаԥгатәқәа ҟаиҵеит, гәыԥҩык ауаа - ЗҲәА "РемСтрой 2012" адиректор Амиран Лакербаиеи Арепатриациазы афонд атехникатә хылаԥшра анџьныр Денис Ақаҩбеи иареи - заанаҵ еицәажәаны мҽхакы ҭбаала абиуџьеттә ԥарақәа рӷьычра хықәкыс иҟаҵаны мцҳәарала, ишԥаршеиз заанаҵ идырны ишьақәиргылеит амаҵзуратә документқәа.

Аԥсны Апрокуратура хада ашьаусԥшааратә усбарҭа ашьаус хацнаркит хәажәкыра 23 рзы. Аҟәатәи ақалақьтә ӡбарҭа Арепатриациаз уаанӡатәи аусзуҩ Денис Ақаҩба иганахьала аҩнтәы рбаандаҩра иқәнаҵеит лаҵара 23 рҟынӡа.

Иара убас шәаԥхьар ҟалоит:

1

Урыстәылатәи агранатаршәыҩцәа ацәҟьарақәа ирықәкны ихысуан

4
(ирҿыцуп 14:32 23.04.2021)
Аԥсны иҟоу Аладатәи арратә округ арратә ҟәшақәа аӡынразтәи рҵара-гәаҭаратә уснагӡатәқәа мҩаԥыргоит. Амчыбжь анҵәамҭазы арратә база адырра ахәшьара ықәдыргылоит. Ауснагӡатәқәа ирыдыԥхьалоуп 1,5 нызқьҩык аруаа, 500 ак арратә техника.

АҞӘА, мшаԥы 23 - Sputnik. Аԥсны иҟоу Урыстәылатәи Аладатәи арратә округ агранатаршәыҩцәа еиҭаҵуази еиҭамҵуази ацәҟьарақәа ирықәкны ихысуан агәаҭара аҳәаақәа ирҭагӡаны. Абри атәы аанацҳауеит аокруг апресс-маҵзура.

Аполигонқәа Нагвалоуи Ҵабали рҟны аррамаҵзурауаа "аӷа" иеибашьыга машьынақәа рсахьа змаз ацәҟьарақәа иреихсуан 350 метра набжьаны. Ацәҟьарақәа секундк 10 метрак рҟынӡа ирццакын.

Абри аан ахархәара рыҭан: анапылатә гранатаршәгақәа РПГ-7, акәылӡы кылызжәо агранатақәа ПГ-7ВЛ, агранатаршәга АГС-17.

Амшын аԥшаҳәаҿы ауснагӡатәқәа рымҩаԥгараан аԥша аӷьеы иасуан, секундк ала 20 метра инаӡон. Аруаа рхысраан ари азгәаҭара рыман.

Урыстәыла ар ргәаҭара мҩаԥысуеит Аладатәи арратә округ ар ркомандаҟаҵаҩ Александр Дворников инапхгарала. Аҽазыҟаҵарақәа мҩаԥысуеит 2021 шықәсазтәи аплан инақәыршәаны. Аҽазыҟаҵарақәа ирылархәуп Амшынеиқәатә флоти Каспитәи афлоти. Аҽазыҟаҵарақәа рыхәшьара мҩаԥыргоит арратә усбарҭа анапхгаҩцәа рыла ишьақәгылоу акомиссиа. Игәарҭоит ар реиҿкаашьа, анормативқәа рынагӡашьа, роперативтә зыҟаҵара аҩаӡара.

4