Урыстәылатәи аруаа ахысрақәа мҩаԥыргеит Аԥсны ашьхареи агаԥшаҳәеи рҿы

4
(ирҿыцуп 15:14 07.04.2021)
Аҽазыҟаҵарақәа ирылахәын зықьҩык инареиҳаны аррамаҵзурауаа, ахархәара рыҭан 300 ак арратә техника.

АҞӘА, мшаԥы 7 - Sputnik. Урыстәыла Аладатәи арратә округ Аԥсны иҟоу арратә база аррамаҵзурауаа ахысразы аметод ҿыцқәа аус рыдыруылеит ҳәа аанацҳауеит аокруг апресс-маҵзура.

Аррамаҵзурауаа еиуеиԥшым абџьар рхы иархәаны аҽазыҟаҵарақәа мҩаԥыргон апалигон Ҵабал аҿы ашьхара-бнаратә ҭыԥқәа рҿи Амшын еиқәа иаԥну аҭыԥқәа рҿи.

Аруаа ахысрақәа мҩаԥыргон ҽынлеиԥш уахынлагьы акәылӡы зқәу атранспартиорқәа БТР-82АМ, агранатаршәгақәа РПГ-6 рҟынтә иара убасгьы аҽыхьчарҭаҟынтә ахысрақәа мҩаԥыргон.

Агәыԥқәа "аӷа" ижәылара амодель иаҿырԥшны рхы мҩаԥыргон. Аротақәа ркомандаҟаҵаҩцәа истандартәымыз аҭагылазаашьақәа рҟны аӡбрақәа рыдыркылон, ахархәара рыҭан адунеи аҟны ицо бџьаршьҭыхлатә еибашьрақәа рԥышәа.

Зынӡа аҽазыҟаҵарақәа ирылахәын зықьҩык инареиҳаны аррамаҵзурауаа, ахархәара рыҭан 300 ак арратә техника.

Урыстәыла ар ргәаҭара мҩаԥысуан Аладатәи арратә округ ар ркомандаҟаҵаҩ Александр Дворников инапхгарала. Аҽазыҟаҵарақәа ирылархәын Амшынеиқәатә флоти Каспитәи афлоти. Аҽазыҟаҵарақәа рыхәшьара мҩаԥыргоит арратә усбарҭа анапхгаҩцәа рыла ишьақәгылоу акомиссиа. Аҽазыҟаҵарақәа мҩаԥысуеит 2021 шықәсазтәи аплан инақәыршәаны.

4

Ахра Аҩӡба лаҵара 5 рҟынӡа дшыбаандаҩыц даанхоит

3
(ирҿыцуп 13:20 14.04.2021)
Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

АҞӘА, мшаԥы 14– Sputnik, Асмаҭ Ҵәыџьԥҳа. Аԥсны Иреиҳаӡоу аӡбарҭа ахашшааратә коллегиа Аҟәатәи ақалақьтә еизара Ахра Аҩӡба лаҵара 5 рҟынӡа ибаандаҩра аҿҳәара иахьацнаҵаз азы ахьчаратә ган Иреиҳаӡоу аӡбарҭахь инанашьҭыз ашшыԥхьыӡ иақәшаҳаҭымхеит.

Ахра Аҩӡба даанкылан хәажәкыра 4 рзы. Азинхьчаратә усбарҭақәа русзуҩцәа хәажәкыра 4 рзы Ахра Аҩӡба дахьынхоз аҩнаҟны иаадырԥшит иҵәахыз абџьар, аџьаԥҳаны, ахархәага ҷыдақәа, арадиодырраҭара мҩаԥызго ашьақәгылақәа. Ашьаус хацыркын уаанӡа еиқәшаҳаҭханы абџьари аџьаԥҳани азакәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥыргоз азы.

Хәажәкыра 7 рзы Аҟәатәи ақалақьтә ӡбарҭа Ахра Аҩӡбеи ихьчаҩцәа: Талех Гасанов, Аслана Гуатижев, Андреи Локтионов, Станислав Культа мызкы – мшаԥы 5 рҟынӡа ҭакрала ирхыргарц аӡбамҭа аднакылеит.

Мшаԥы 1 азы Аҟәатәи ақалақьтә ӡбарҭа Станислав Культа, Андреи Локтионов, Аслан Гуатижев рырбаандаҩратә ҿҳәара аҽа мызкы ацнаҵеит, 2021 шықәса лаҵара 4 аҟынӡа. Убри аан аус аҽа лахәылак – Талех Гасанов иганахь ала Апрокуратура хада азыҳәа иақәшаҳаҭымхеит.

Мшаԥы 2 рзы Аҟәатәи ақалақьтә ӡбарҭа Ахра Аҩӡба лаҵара 5 рҟынӡа ибаандаҩра аҿҳәара иацнаҵеит.

3
Атемақәа:
Ахра Аҩӡба иаанкылара

Аԥсны афымцарцәара аграфик ԥсахуп

3
(ирҿыцуп 12:43 14.04.2021)
Аԥсны Урыстәылантәи алашара аиуеи 2020 шықәса ԥхынҷкәынаахыс, ЕгрыГЕС аремонт азы иааныркылаанӡа.

АҞӘА, мшаԥы 14 - Sputnik. Иахьазы Аԥсны аҵакыраҿы иалагалоу алашара арцәара аграфик ԥсахуп абзазаратә обиектқәа еиҳа иҭышәынтәаланы русуразы ҳәа аанацҳауеит "Амшынеиқәафымцамч".

Аԥкыратә схема шыҟаз иаанхоит: сааҭк ҽынла, ҩ-сааҭк – уахынла идырцәалоит.

  • Астанциа маҷқәа: Аҟәа-2, Афон, Мҵара, Дәрыԥшь, Гәдоуҭа-ахара Т-2, Гал-110, Гал-35, Барӷьаԥ, Отобаиа, Тҟәарчал ГРЕС, Аҟәа-220 - 01:00 - 03:00; 13:00 - 14:00;
  • Астанциа маҷқәа: Очамчыра-ахара, Очамчыра-2, Мықә, Кәачара, Уарча, Дранда, Агәыӡера, Синоп, Баслаҭ, Ҵабал, Гәдоуҭа-ахара Т-1, Гәдоуҭа-110, Лыхны, Мысра-ахара, Мысра - 03:00 - 05:00; 14:00 - 15:00;
  • Астанциа маҷқәа: Аҟәа-1, ИЕПит, Пицунда, Алаҳаӡы, Бзыԥ-220, Чегал, Переброска, Рухски Карьер - 05:00 - 07:00; 15:00 - 16:00;
  • Астанциа маҷқәа: Гагра-1, Гагра-2, Гагра-3, Цандрыԥшь-ахара, Гьиачрыԥшь - 03:00 - 05:00; 15:00 - 16:00.

Мшаԥы 8рзы урыстәылатәи аган Аԥсныҟа иаауа алашарамчра алимит ҳәаақәнаҵеит 7 миллион киловатт-сааҭ ҳәа. Убри аан ареспублика иаҭахны иҟоуп 9,6 миллион киловатт-сааҭ ҳәа азгәарҭоит "Амшынеиқәафымцамч" аҿы.

3
Атемақәа:
Аԥсны аенергетика апроблемақәа