Ашьапылампыл азы Аԥсны ачемпионат мшаԥы 20 рзы иалагоит

8
(ирҿыцуп 15:43 08.04.2021)
Ашьапылампыл азы Аԥсны XXVIII ачемпионат иалахәхоит ареспублика акомандақәа ааба.

АҞӘА, мшаԥы 8 - Sputnik, Бадраҟ Аҩӡба. Ашьапылампыл азы Аԥсны XXVIII ачемпионат мшаԥы 20 рзы иалагоит ҳәа иҳәеит Аԥсны Аԥсны ашьапылампыл азы Афедерациа аиҳабы Ҭарашь Ҳагба Sputnik аҿы имҩаԥысыз апресс-конференциаҿ.

"Ачемпионат мшаԥы 20 инаркны абҵарамзанӡа имҩаԥыслоит. Рашәарамза актәи ахәҭаҟынӡа актәи аикәшара хҳаркәшоит, цәыббрамза инаркны аԥсшьара ашьҭахь аҩбатәи аикәшара ҳалагоит, нас – ахԥатәи", - иҳәеит иара.

Изаамҭанытәиу ачемпионат иалахәоит акомандақәа ааба: "Садӡ" – Цандрыԥшь, "Гагр – Гагра, "Афон" – Афон ҿыц, "Риҵа" – Гәдоуҭа, "Динамо"–Аҟәа, "Нарҭ" –Аҟәа, "Самырзаҟан" –Гал, "Шахтер" – Тҟәарчал.

"Акоманда "Шахтер" акраамҭа ачемпионат иалахәымызт. Сынтәа акоманда анапхгара, аспортеилакы аиҳабыра, ақалақь ахадара напеилаԥсала ирылшоз зегь ҟарҵеит акоманда ачемпионат иалахәхарц. Аҭыԥантәи ашьапылампыласыҩцәа маҷуп азы аҳәара ҟарҵеит егьырҭ арегионқәа рҟынтәи акомандаз ихәмарырц", - иҳәеит иара.

Ҭарашь Ҳагба иара убасгьы далацәажәеит ареспубликатә чемпионат аҟны аӡбразы аусқәа шеиҿкаау.

"Аӡбаразы апроблемақәа ахьҳамоу азы Урыстәыла ашьапылампылтә еидгылахь ацхыраара ҳаҳәеит. Аӡбаҩцәа рыбригадақәа ааҳгалоит", - иҳәеит Афедерациа ахада.

Иара убасгьы иазгәеиҭеит урыстәылатәи аӡбаҩцәа аиҳабыратә лигаҿ адагьы ахәыҷы-қәыԥштә лигаҿгьы аӡбра шымҩаԥыргало.

8

Ажьиԥҳа аҭыԥантәи адепутатцәа рзы: рҵарагьы ыҟазароуп, аԥсшәагьы рдыруазароуп

5
Тҟәарчал араион алхратә комиссиа алахәыла Рита Ажьиԥҳа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны аҭыԥантәи ахаланапхгараҭаратә усбарҭақәа рахь алхрақәа реихшьаала ҟалҵеит.
Раионк аԥсҭазаараҟынтә: Ажьиԥҳа ахаланапхгараҭарақәа рахь алхрақәа ирызкны

Аԥсны аҭыԥантәи ахаланапхгараҭарахь алхрақәа мҩаԥысит мшаԥы 11 рзы.

"Адепутатрахь иқәгылаз акандидатцәа ҩажәаҩык рахьынтә 15-ҩык алхын. Иманшәаланы еилагарада имҩаԥысит алхрақәа. 5196- ҩык ашәҟәы иҭагалаз алхыҩцәа рҟынтәи 2052 -ҩык алхрақәа рхы рыладырхәит. Уи аԥхьа иҟаз ас еиԥш алхрақәеи дареи еиҿурԥшуазар, усҟан 2800-ҩык ыҟан алхыҩцәа. Актәи аилатәара мҩаԥысраны иҟоуп иааиуа ашәахьаҽны мшаԥы 19 рзы. 15-ҩык адепутатцәа рахьынтә ҩыџьа аҳәса ыҟоуп. Уи аԥхьа иҟаз адепутатцәа рахьынтә ҩыџьа ықәгылан, руаӡәк ҩаԥхьа далырхит, уи Тҟәарчалтәи араионтә хәышәтәырҭа аиҳабы Лали Гаргәылиа лоуп", - лҳәеит Ажьиԥҳа.

Ажьиԥҳа лгәаанагара лҳәеит аҭыԥантәи ахаланапхгараҭарақәа рахь инеиуа адепутатцәа зеиԥшразар акәу.

5

Аԥсны Атәанчахәытә фонд аҿы ашәарақәа зеиԥҟьо атәы рҳәеит

5
(ирҿыцуп 20:14 14.04.2021)
Аԥсны Атәанчахәытә фонд Аԥсны атәылауаа рҿаԥхьа руал 55 миллион мааҭ ыҟоуп. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы.

АҞӘА, мшаԥы 14 - Sputnik. Аԥсуа тәанчахәқәа ршәара апандемиа аамҭа иахҟьеит, избанзар 2020 шықәсазы Атәанчахәытә фонд 130 миллион мааҭ амоуӡеит. Абри атәы радио Sputnik иазеиҭеиҳәеит Аԥсны Атәанчахәытә фонд ахантәаҩы Денис Гәылариа.

2020 шықәсазы акоммерциатә еиҿкаарақәа ашәахтәқәа рықәырхит апандемиа инадҳәаланы. Ари афонд ахь аԥаранашьҭра анырра анаҭеит.

Ахантәаҩы иажәақәа рыла Атәанчахәытә фонд ахь аԥара назмышьҭуаз акоммерциатә еиҿкаарақәа рымацара ракәым, аҳәынҭқарратә еиҿкаарақәагьы рыдҵақәа нарыгӡомызт.

Убас ауал ду ақәны иҟоуп АУН "Амшынеиқәафымцамч", иҳәеит Гәылариа.

"Аха дара ишьақәырӷәӷәоу аграфик ҳзаарышьҭит, ирҳәеит ЕгрыГЕС аусура ишалагалак Атәанчахәытә фонд ахь ахыԥхьаӡаларақәа ишрылаго", - иҳәеит Гәылариа.

Иахьазы реиҳа ауал ду зықәны иҟоу еиҿкаароуп АУН "Амшынеиқәафымцамч".

Ашәарақәа еиҵахоит иара убасгьы ареспубликаҿы аԥсуа тәанчахәы зауа рхыԥхьаӡара иацло иахьалагаз ҳәа иҳәоит Гәылариа.

2020 шықәса алагамҭаз ари ахыԥхьаӡара 6656-ҩык инаӡозар, шықәса анҵәамҭазы 8592-ҩык ҟалеит.

Иахьа Атәанчахәытә фонд аамҭа-аамҭала ашәарақәа мҩаԥнагоит. Аԥхьа иззыршәо категорианы иҟоу Аԥсны жәлар реибашьра аинвалидцәа роуп.

"56 миллион мааҭ ауал ҳақәуп. Ари хәажәкырамза иатәуп. Аха иара есыҽны еиҵахоит. Раион-раионла аԥарақәа ҳшәоит. Аибашьра иадҳәало акатегориақәа рҿаԥхьа Аҟәа, Аҟәа араион, Очамчыратәии Тҟәарчалтәии араионқәа рҟны ҳуал ҳшәеит, иаанханы иҟоуп Гагреи Гәылрыԥшьи араионқәа", - иҳәеит афонд ахантәаҩы.

Гәылариа иажәақәа рыла Афонд ахь аԥаралагалара адинамика аныԥшуа иалагеит. Аҭагылазаашьа аҭышәынтәалара алшоны иҟоуп 2021 шықәса ахԥатәи аԥшьбаразы ҳәа иҳәоит иара.

5