Аԥсны атәылахьчара аминистрра: НАТОи ЕААи рыԥшыхәратә хаԥыррақәа рхыԥхьаӡара еизҳаит

3
(ирҿыцуп 15:22 21.04.2021)
Аԥырҩы дызҭам аԥрыгатә аппаратқәа Қырҭтәылеи Украинеи рҵакыра иахыԥраауеит, аамҭа-аамҭалагьы Аԥсны амшынтә ԥшаҳәа иаваршәны иԥырлоит ҳәа аанацҳауеит Аԥсны атәылахьчара аминистрра.

АҞӘА, мшаԥы 21– Sputnik. Ԥшьымз рыҩныҵҟа иазгәаҭоуп Аԥсны амшынтә ԥшаҳәа иаваршәны ЕААи НАТОи рыԥшыхәратә ԥыррақәа 62 ҳәа Sputnik иазеиҭеиҳәеит Аԥсны арратә мчрақәа Рыштаб хада аиҳабы ихаҭыԥуаҩ аполковник Вадим Кәартаа.

"Уаанӡа ҩымш хымш рахь знык ҳҵакыра иахаԥраауазар, уажәы акыр активла рхы мҩаԥыргоит. Аиҳарак Амшын еиқәа иаваршәны ауп ишыԥыруа. Аԥырҩы дызҭам аппаратқәа, иара убасгьы Донбасси Украинеи реинырратә цәаҳәа ааигәара иубоит. Иубоит Қырҭтәыла аҳауатә ҵакыраҿы", - иҳәоит иара.

Ашықәс иалагазар аԥшыхәратә ҳаирпланқәа Қырҭтәыла аҵакыраҿ жәынтә аԥыррақәа мҩаԥыргахьеит, убри аан Аԥснытәи акваториа ааигәара иахыԥраауеит, иҳәеит Кәартаа.

"Арҭ аҳаирпланқәа ԥшыхәра мҩаԥгароуп ирхықәку. Аҵыхәтәантәи аҩымчыбжь рыҩныҵҟа арҭ аԥыррақәа иаагәоуҭартә ирацәахеит", - иҳәеит Аԥсны арратә мчрақәа Рыштаб хада аиҳабы ихаҭыԥуаҩ аполковник Вадим Кәартаа.

Иахьа Украина акәша-мыкәша имҩаԥысуа аҭагылазаашьақәа 2008 шықәсазы Аахыҵ Уаԥстәыла иҟаз аҭагылазаашьа акыр еиԥшуп ҳәа иҳәеит иара.

"Иубартә иҟоуп Украина Аштатқәа рҟынтәи адҵа аиур ахымҩаԥгашьа еиҭанакыр шауа", - иҳәеит Кәартаа.

Мшаԥы 17 азы Урыстәыла Керчтәи аӡыбжьахалала Каспитәи афлотилиа 15 ӷба Амшын еиқәахьы иианагеит. Иара убри амш азы Босфортәи аӡыбжьахалала Амшын еиқәахь инеиит Аҩадатәи афлот адесанттә ӷбақәа ҩба, аамҭақәак рышьҭахь Балтикатәи афлот аӷбақәа ҩба. Абас ала урыстәылатәи адесанттә ӷбақәа Амшын еиқәаҿы рхыԥхьаӡара 11 ак инаӡеит.

Аекспертцәа ирӡом ари зыҟаҵоу Киев Донбас аинырратә цәаҳәахьы ари атехникеи ахьнанаго шакәу. Уи адагьы Аҩадатлантикатә алианс Амшын еиқәаҿы аҟазаара еиҳа-еиҳа иацнаҵоит "Урыстәыла ари аҭыԥ аҿы активра ахьаанарԥшуазы".

3

COVID-19 злаз даҽа пациенткак лыԥсҭазаара далҵит Гәдоуҭатәи ахәышәтәырҭаҿы

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15006-ҩык ыҟоуп, ргәы бзиахеит 14025-ҩык, рыԥсҭазаара иалҵит 226-ҩык.

АҞӘА, лаҵара 15 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 176-ҩык атестқәа рзыҟаҵан, урҭ рахьтә 22-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы лаҵара 14 рзы лыԥсҭазаара далҵит 1939 шықәса рзы ииз акоронавирус злаз апациентка.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 51-ҩык, урҭ рахьтә 41-ҩык акоронавирус адиагноз рзышьақәыргылоуп, рҭагылазаашьа бааԥсуп 28-ҩык, ибжьаратәуп - 12-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 31-ҩык апациентцәа, рҭагылазаашьа бааԥсуп хәҩык. Очамчыра ирхәышәтәуеит 16-ҩык, Гагратәи ахәышәтәырҭаҿы - 17-ҩык, Тҟәарчалтәи ахәышәтәырҭаҿы - ԥшьҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Аҿкычымазара – акоронавирус Аԥсни адунеи аҿи: иалкаау

Едуард Быҭәба Гәдоуҭатәи ахәышәтәырҭа даҭааны аусушьа гәеиҭеит

8
(ирҿыцуп 19:59 15.05.2021)
Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы Аԥсны Аҳәынҭқарра ахада иусԥҟа инақәыршәаны.

АҞӘА, лаҵара 15 – Sputnik. Аԥсны агәабзиарахьчара аминистр Едуард Быҭәба Гәдоуҭатәи араионтә хәышәтәырҭа хада даҭааит ахәаша лаҵара 14 рзы ҳәа аҳәоит Аԥсуа телехәаԥшра адырраҭара.

Иара игәеиҭеит ахәышәтәырҭа ашҭаҿы игылоу акоронавирус азы анализқәа ахьрыдыркыло аҭыԥ, адкыларҭа, апалатақәа. Ахәышәтәырҭа аусзуҩцәа аминистр изеиҭарҳәеит акоронавирустә инфекциа злоу апациентцәа, убарҭ рхыԥхьаӡараҿы COVID-19 адиагноз ззықәыргылоу зцәазтәым аҳәсагьы, рыхәышәтәра шеиҿкаау.

Быҭәба иара убас игәеиҭеит аҵәыҵәри анашьҭразы еиқәыршәоу астанциа, уантәи ауп аковид-госпиталь апалатақәа рахь аҵәыҵәри зланеиуа. Игәеиҭеит аҳауеиҭарсра асистема шыҟам, уи азҵаара шыӡбатәугьы азгәеиҭеит.

Иҷыдоу ахыхьчага маҭәа ишәҵаны аминистр "азона ҟаԥшь" ахь днеит, хаҭала апациентцәа рҭагылазаашьа ибарц, драцәажәарц азы. Иара дразҵаауан иаҭаху зегьы рымоу ирымаму, иаарласны ргәабзиара шьақәгыларц рзеиӷьеишьеит.

"Анцәа иҳәааит иаарласны шәгәы бзиахо, уи ауп зегь реиҳа ихадоу. Шәҭаацәа рахь ԥшӡала шәхынҳәааит. Ҳара, ҳколлегацәа, аҳақьымцәа, ҳашәзыӡырҩлоит, ишәҭаху аҿы ҳшәывагылоит", - иҳәеит аминистр.

Аԥсуа телехәаԥшра анҵамҭаҿы иара убас иарбоуп Едуард Быҭәба амедицинатә усзуҩцәа рџьабаазы иҭабуп ҳәа шреиҳәаз, агоспитальгьы лассы-лассы даҭаалоит ҳәа ажәа шриҭаз, аҳақьымцәеи ахәышәтәырҭа анапхгареи иареи аусутә еиԥыларақәа мҩаԥаагалоит ҳәа шиҳәаз.

Гәдоуҭатәи араионтә хәышәтәырҭа аҳақьым хада Ҳаџьараҭ Шамба лаҵара 14 рзы иҟаиҵаз адыррала, аковид-госпиталь аҿы ишьҭоуп акоронавирустә инфекциа злоу апациентцәа 38-ҩык, урҭ рахьтә 16-ҩык рҭагылазаашьа бааԥсуп. Иара убас ара ареабилитациа иахысуеит COVID-19 иаиааихьоу 11-ҩык апациентцәа.

Аԥсуа телехәаԥшра аматериал аҿы иара убас иазгәаҭоуп агәабзиарахьчара аминистр атәыла амедусҳәарҭақәа зегьы дырҭааны рҭагылазаашьа гәеиҭарц игәы ишҭоу.

Аԥсны Аҳәынҭқарра ахада иусԥҟа инақәыршәаны Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы. Иара диԥсахит зхатәгәаԥахарала змаҵура аанзыжьыз Ҭамаз Ҵахнакьиа.

8
Атемақәа:
Аҿкычымазара – акоронавирус Аԥсни адунеи аҿи: иалкаау