Бедиа адгьылҳәазара аԥхасҭа знаҭаз рзы Аминистрцәа реилазаара акомпенсациа рзыршәоит

10
(ирҿыцуп 18:58 27.04.2021)
Ажьырныҳәа 15 рзы Тҟәарчал араион аҿы иҳәазаз амҩа еиднакылоит Тҟәарчал ақалақьи ақыҭақәа Бедиа ду, Агәы-Бедиа. Аҭаацәарақәа хԥа хыҵакырҭада иаанхеит.

АҞӘА, мшаԥы 27 – Sputnik, Асмаҭ Ҵәыџьԥҳа. Аҭагылазаашьа ҷыдақәа раԥырҟәҟәареи раԥыхреи аԥсабаратә рыцҳарақәа рыхҟьаԥҟьақәа раԥыхреи рзы Аминистрцәа реилазаараҿ иҟоу акомиссиа аӡбра аднакылеит аԥхасҭа зауыз аҭаацәарақәа хԥа 550 нызқьмааҭ рзоужьызарц. Абри атәы Sputnik иазеиҭарҳәеит Аиҳабыра рыпресс-маҵзураҿы.

Аминистрцәа реилазаара апресс-маҵзураҿы ирҳәеит адгьылҳәазараан аԥхасҭа зауыз Самсониаа рҭаацәара 350 000 мааҭ шырзоурыжьуа, Анатоли Харчлааи Оҭар Харчлааи рҭаацәарақәа шәкы-шәкы нызқьмааҭ рыҭахоит.

Акомпенсациа ахышәаҵышәа ҳәаақәҵоуп Аԥсны ахада иусдҵа "Аҭагылазаашьа ҷыдақәеи (ма) аԥсабаратә рыцҳарақәеи ирхырҟьаны аԥхасҭа зауыз ахатәхаҿқәа Аԥсны ахада ирезервтә фонд аҟынтәи аԥара рызшәара аԥҟарақәа рзы" инақәыршәаны. Ишышьақәыргыло ала аӡәы изы 50 нызқьмааҭ роуп иршәо.

Арадио Sputnik аинтервиу азҭаз Бедиа ду инхо Марина Самсониаԥҳа еиҭалҳәеит Ԥшьаԥ ақыҭаҿы аҩн ҿыц шырзаархәаз.

"Анхара ҿыц ааҳхәеит Ԥшьаԥ ақыҭа, иманшәаланы аҭыԥ ҳгеит. Схәыҷқәа, смоҭацәа ҳаиасит, анхара ҳаҿуп, аха ахә шәаӡам макьана. Аҳәынҭқар имчала ахә шәахап ҳәа ҳгәыӷуеит. Иҳалшоз аҩнымаҭәа ааҳгеит, арахәгьы ҳхы зланыҟәаҳгаша ҳамоуп. Агәылацәа бзиақәагьы ҳауит, даара ҳаигәырӷьоит. Аиашазы, ари аҩыза сақәгәыӷуамызт. Егьа ҳгәаҟзаргьы – ҳманшәалахеит", - лҳәеит Самсониаԥҳа.

Бедиа ду ахада Џьумбер Харчлаа иажәақәа рыла, аԥхасҭа зауыз Анатоли Харчлаа иҭаацәара макьаназы рыуацәа рҟны инхоит.

"Аҩны аԥшаара иаҿуп. Ирнаалаша рымбацт. Убри азы рыуацәа рҿы инхоит. Ара, ақыҭаҿы иаанхар рҭахуп", - иҳәоит иара.

Ажьырныҳәа 15 рзы Тҟәарчал араион аҿы иҳәазаз амҩа еиднакылоит Тҟәарчал ақалақьи ақыҭақәа Бедиа ду, Агәы-Бедиа, Бедиа.

100 метрак автомабилтә мҩа-хәҭа ҭабгеит. Аминистрцәа реилазаара апресс-маҵзура адыррақәа рыла иалшоит афымцацәаҳәа Аҽгәара-220 ашьаҟақәагьы аҭыԥ иахысыр, уи адагьы аҿҟьарала ҵаҟа илеиуа адгьыл аӡиас ихықәгылахьеит.

Адгьылҳәазара еимҽханакит 14-15 гектар аҵакыра. Ԥхьаҟа уи иҵегьы аҽарҭбаар алшоит.

Аминистрцәа реилазаара адыррақәа рыла иахыкәшо амҩа аҟаҵареи ацҳақәа ҩба рыхҵареи Акапиталтә ргылара иазнархиаз асметала 17 620 489 нызқьмааҭ итәоит.

"Аԥсныҟәарахьчара" адиректор хада Гурам Ҳаразиа ишиҳәо ала иахәҭаны иҟоу зегь наганы аҭыԥ аҿы ишьҭоуп, амш ирнаҭар 15 мшы азхоит аусура ахыркәшаразы.

Тҟәарчал ақалақьи араион ақыҭақәеи еимаздо амҩа аремонт азуны еиҭашьақәыргылан Аԥсны асоциал-економикатә ҿиаразы Аинвестпрограмма аԥарақәа рыла. Иақәхарџьын 60 миллион мааҭ. Аусурақәа мҩаԥысуан 2017 - 2020 шықәсқәа рзы.

10

Урыстәылатәи адукат Ахра Аҩӡба изинқәа ихьчалоит

2
(ирҿыцуп 14:12 12.05.2021)
Гәылрыԥшьтәи араионтә ӡбарҭаҿы лаҵара 12 рзы иаатит Ахра Аҩӡбеи дзыхьчоз ԥшьҩыки рганахь ала аӡбаҩцәа реилатәара.

АҞӘА, лаҵара 12 - Sputnik, Асмаҭ Ҵәыџьԥҳа. Гәылрыԥшьтәи араионтә ӡбарҭа аӡбаҩ Игор Агәмаа Ахра Аҩӡба иҳәарала аус аҽа хьчаҩык иадгалара дақәшаҳаҭхеит.

Уаанӡа Ахра Аҩӡба иус ахәаԥшра урыстәылатәи адукат Сергеи Белиак иалахәхаразы азыҳәа ҟаиҵеит. Аӡбамҭа адкыларазы аӡбаҩцәа аилацәажәаратә уадахь инеиит.

Уаанӡа Ахра Аҩӡба иинтересқәа лыхьчон адукат Инга Габилаиаԥҳа.

Гәылрыԥшьтәи араионтә ӡбарҭаҿы Ахра Аҩӡбеи иара идгылаҩцәеи рус азы аилатәара хацдыркит. Дара ахара рыдҵоуп абџьари аџьаԥҳани закәаншьаҭа рымамкәа раахәара, рыҵәахра, рымҩангара, рныҟәгара ахьымҩаԥигоз азы.

Ари аҩыза аумҭазы ахәҭаҷ иазыԥхьагәанаҭоит ҩышықәса инаркны фышықәсанӡа ҭакрала ахыгара.

2
Атемақәа:
Аҿкычымазара – акоронавирус Аԥсни адунеи аҿи: иалкаау

Урыстәылатәи азенитчикцәа Амшын еиқәа акваториаҿы аԥырҩы дызҭам ихархәагақәа ҭадырхеит

3
Аҽазыҟаҵарақәа мҩаԥысуан аполигон Нагвалоу аҿы Аԥсны иҟоу Аладатәи арратә округ 200-ҩык аруаа алархәны.

АҞӘА, лаҵара 12 - Sputnik. Аԥсны иҟоу Урыстәыла Аладатәи арратә округ азенит ракетатә ҟәшақәа аҽазыҟаҵарақәа мҩаԥыргеит. Аҽазыҟаҵарақәа раан Урыстәылатәи азенитчикцәа Амшын еиқәа акваториаҿы "аӷа" аԥырҩы дызҭам ихархәагақәа карыжьит ҳәа аанацҳауеит аокруг апресс-маҵзура.

"Аӷа" иԥрыгатә хархәагақәа ракәны ахархәара рыҭан аԥрыга аппаратқәа "Орлан", "Застава", "Гранат". Ацәҟьарақәа ирықәдыршәон аракетақәа релектронтә ҭырҟьагақәа рыла.

Аусдҵақәа рынагӡаразы аруаа атехника аибашьратә ҭагылазаашьала иаздырхиеит, ахацыркратә позициақәа ааныркылеит, еиҿыркааит аимадареи анапхгараҭареи рсистема. Абри ашьҭахь аԥшыхәра мҩаԥганы Амшын еиқәа акваториаҿы аԥырҩы дызҭам ахархәагақәа карыжьит.

Аҽазыҟаҵарақәа мҩаԥысуан аполигон Нагвалоу аҿы Аԥсны иҟоу Аладатәи арратә округ 200-ҩык аруааи 40 ак арратә техникеи алархәны. Ахархәара рыҭан азенит-ракетатә комплексқәа "Оса-АКМ", "Стрела-10" , еиҭарго ЗРК "Игла".

3