Аҵыҵындра Урыстәылаҟа аекспорт ырмариахар ҟалоит

21
(ирҿыцуп 09:38 28.04.2021)
Сынтәа Аԥснынтәи Урыстәылаҟа аҭиразы инашьҭхар алшоит зықь тонна инареиҳаны аҵыҵындра.

АҞӘА, мшаԥы 28 – Sputnik, Бадраҟ Аҩӡба. Аҵыҵындра аалыҵ адекларациа азуны Урыстәылаҟа аекспорт ашьҭра азҵаара иалацәажәеит мшаԥы 27 рзы Аҳәынҭқарратә ҳазалхратә еилак аҿы.

"Сынтәа иазԥхьагәаҭоуп аҵыҵындра аекспорт рацәаны. Иахьатәи аиԥылара аҳәаақәа ирҭагӡаны ҳара ҳазыхиоуп аҳазалхратә еиҿкаареи ахылаԥшреи рырмариаразы досу шәажәалагалақәа рзыӡырыҩра", - иҳәеит аиԥылара аартуа Аԥсны Аҳазалхратә еилакы ахантәаҩы актәи ихаҭыԥуаҩ Алиас Лабахәуа.

Аҳазалхратә еиҿкаара аусбарҭа хада аиҳабы Џьамал Цәеиба ишьақәирӷәӷәеит сынтәа ареспубликаҟынтә аҵыҵындра аекспорт хыԥхьаӡара рацәала ишазыԥшу.

"Уаанӡатәи ашықәсқәа реиԥш сынтәагьы ҳусбарҭа аусура азырхахоит адәныҟаекономикатә усура амҩаԥгаразы аҭагылазаашьа маншәалақәа раԥҵара", - иҳәеит иара.

Атауар аекспорт аан аҳазалхратә кәамаҵамарақәа рырмариаразы аус адулан аамҭа-аамҭалатәи адекларациаҟаҵара апроцедура ҳәа азгәеиҭеит Џьамал Цәеиба.

"Ари аԥҟара инақәыршәаны адәныҟаекономикатә усура алахәылацәа ари аформа ахархәараан акыр раамҭа еиҷаҳауеит. Уи иалнаршоит аныхрақәа реиҵатәра, атауареикәыршара ахышәаҵышәа аизырҳара. Ари аформа ахархәарала аҳәаа иахыган 25 000 тонн ацитрусқәа рекспорт", - иҳәеит иара.

Иара иазгәеиҭеит 2020 шықәса анҵәамҭазы азинмч шаиуз Аилак аструктуратә еилазаарақәа русура арегион азы адҵа.

"Аихшара абасеиԥш ишьақәыргылоуп – аҳазалхратә ҭыԥ  "Ԥсоу", ари Гагреи Гәдоуҭеи араионқәа роуп, аҳазалхратә ҭыԥ "Аҟәа" – ари Аҟәеи Гәылрыԥшьи араионқәа роуп, аҳазалхратә ҭыԥ "Гал" – ари Очамчыратәи, Галтәи, Тҟәарчалтәи араионқәа роуп. Адәныҟа-економикатә усура алахәылацәа асеиԥш аихшара азин рнаҭоит  атауари атранспорти рбизнес ахьыҟоу аҭыԥ аҿы реиҿкаара", - иҳәеит Џьамал Цәеиба.

Аилак азинтә ҟәша аиҳабы Анана Гогохьиаԥҳа аҵыҵындра ааӡара знапы алаку анаплакҩы Баҭал Аҩӡба азҵаара илҭеит аалыҵ аҭиразы игәаанагараз.

"Акурорттә сезон аан аҳәаа ишалшо ала ахысра ҳармариароуп", - лҳәоит лара.

Анаплакҩы иҳәеит дшазыхиоу зықь тонна рҟынӡа аалыҵ аекспорт амҩаԥгара. Иара иажәақәа рыла, ирыдгалоу аформа аҳәаа ахысраан аҳазалхратә еиҿкаарақәа армариоит.

Аҳазалхратә еилкы аексперт-ҟаза хада Максим Титаренко иазгәеиҭеит ҵыԥх Аԥснынтәи Урыстәылаҟа аҳәаа ишахыгаз 294 тонна абаҳчаҵыҵындра.

"Ари аалыҵ ирласны иԥхасҭахо тауаруп. Иара амҩангарагьы аҭагылазаашьа ҷыдақәа амазароуп. Абҵарамзазы азин ҳаҭан ҿҳәаралатә адекларациаҟаҵара", - иҳәеит иара.

Ҵыԥх ацитрусқәа риагараан аҭагылазаашьа уадаҩын аҳазалхратә ҭыԥ "Адлер" аҿы. Уахыки-ҽнаки рыҩнуҵҟа 200 инарзынаԥшуа машьына гылон. Аҿҳәаралатә декларациаҟаҵара аналаргала агәаран акыр иаӷахеит иҳәеит Титаренко.

"2021 шықәсазы 2020 шықәса иаҿырԥшны аҵыҵындра аҽаҩра хынтә рыла еиҳахар шалшо  анеилаҳкаауп абри аиԥылара мҩаԥгазарц анаҳаӡба.  Иара лассы иԥхасҭахо аалыҵны иҟоуп, акраамҭа аҳәааҿ инукылар ҟалом, аиҳаракгьы аԥхынразы", - иҳәеит иара.

Убри азы аҿҳәаратә декларациаҟаҵара алшара ҟанаҵоит  уахынла ма ҽынла, аныҳәамшқәа ма аусурамшқәа уҳәа рыла аамҭа алхны аграфик ашьақәыргылара ҳәа иҳәеит иара.

Адокументқәа зегьы анаплакыҩцәа заанаҵы еиқәдыршәоит раалыҵ  аҳәаа ахыгараан аамҭа амгарц ҳәа азгәеиҭеит Максим Титаренко.

Аԥсны иҟоу Урыстәыла аҳазалхартә маҵзура ахаҭарнак Константин Козлов иҳәеит аҿҳәаратә декларациаҟаҵара аҳәааҿ агәаранқәа рыҟазаара шеиҵанатәуа, апроцедура адекларациа зныктәи аҟаҵарала мызкы ахы-аҵыхәа атауар аҳәаа ахыгара шалнаршо. Урыстәылатәи аҳазалхырҭа азыхиоуп аҵыҵындра атауартә партиақәа аԥҟара ҿыцқәа рыла реиҿкаара ҳәа аҳәеит Козлов.

21

Урыстәылатәи аспелеологцәа Веревкин иҳаԥаҿы ахаҵа иԥсыбаҩ рбеит

2
(ирҿыцуп 09:32 05.08.2021)
Урыстәылатәи аспелеологцәа ргәаанагарала Веревкин иҳаԥаҿыарыцҳара ҟалазар ҟалоит 2020 шықәса аԥхын ма ҭагалан.

АҞӘА, нанҳәа 5 – Sputnik, Бадри Есиава. Урыстәылатәи аспелеологцәа Аԥсны иҟоу Веревкин иҳаԥаҿы ахаҵа иԥсыбаҩ рбеит 1100 метра алаҟәыраҿы, абри атәы Sputnik иазеиҭеиҳәеит Урыстәыла аспелеологцәа Реидгыла анапхгара алахәыла Евгени Снедков.

"Нанҳәа 3, асааҭ 4:00 азы Москва, Перовсктәи аклуб аспелеологцәа ргәыԥ, 30 шықәса инарзынаԥшуа Веревкин иҳаԥаҿы аусурақәа мҩаԥызго, атурист иԥсыбаҩ рбеит. Аԥхьа аҭаларҭатә ҵеиџь ахықәаҿ ашаха рбеит, маҭәақәакгьы. Анаҩс 1100 метра алаҟәыраҿ ауаҩы иԥсыбаҩ кнаҳан", - иҳәеит иара.

Снедков иажәақәа рыла иҭахаз дыштуристыз еилкаахеит, избанзар аҳаԥы амаршрут ауадаҩра иақәшәомызт ихархәагақәа. Иҟалоит иара аԥышәеи амчи изымхазар. Уи адагьы асеиԥш иҟоу аҳаԥқәа аӡәы ихала аҭалара ашәарҭадара атехника еиланагоит. Иара ихаҭара шьықәзыргылаша ҳәа аспелеологцәа акгьы рзымԥшааит.

Урыстәылатәи аспелеологцәа ргәаанагарала Веревкин иҳаԥаҿы арыцҳара ҟалазар ҟалоит 2020 шықәса аԥхын ма ҭагалан.

Аспелеологцәа реидгыла Аԥсны АҶА ахь адырра ҟарҵеит.

"Идокументқәеи игәакьацәеи ԥшаатәуп. Иҟаҵатәу дара ирҳәароуп. Асеиԥш аан аԥсыбаҩ аҭгара рҽазыршәоит аха ариаҟара аҵаҟынтә уи уадаҩуп. 50 – 100-ҩык рҟынӡа аспелеологцәа аҭахуп. Аҳаԥаҿы ишәарҭоу аҭыԥқәа ыҟоуп",- иҳәоит Снедков.

Иара иҳәеит Аԥсныҟа амҩа ишықәло аспелеологцәа Реидгылаҟынтә уи азы аҳәара ҟаҵахар.

2020 шықәса нанҳәамзазы Арбаика аҳаԥаҿы дҭахеит аспелеолог Павел Демидов. Иԥсыбаҩ 300 метра рҟынтә ихагалан.
Веревкин иҳаԥы адунеи аҿы реиҳа иҵаулоу ҳәа иԥхьаӡоуп. 2018 шықәсазы урыстәылатәи аспелеологцәа 2212 метра илбааит.

2

Аԥсны акоронавирус зланы зыԥсҭазаара иалҵыз 320-ҩык рҟынӡа инаӡеит

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 22642-ҩык ыҟоуп, ргәы бзиахеит 18189-ҩык, рыԥсҭазаара иалҵит 320-ҩык.

АҞӘА, нанҳәа 4 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 392-ҩык атестқәа рзыҟаҵан, урҭ рахьтә 98-ҩык рцәа акоронавирус шалаз аадырԥшит, абри атәы аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәшәтәырҭаҿы рыԥсҭазаара иалҵит ԥшьҩык: 76 шықәсеи 80 шықәсеи зхыҵуаз ҩыџьа аҳәсеи,  42 шықәсеи 83 шықәсеи зхыҵуаз ҩыџьа ахацәеи.

Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 178-ҩык, рҭагылазаашьа бааԥсуп 41-ы, ибжьаратәуп - 51-ҩык.

Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 44-ҩык апациентцәа, урҭ рахьтә 17-ҩык рҭагылазаашьа уадаҩуп. Очамчыра ирхәшәтәуеит 24-ҩык. Гагратәи ахәшәтәырҭаҿы - 47-ҩык, урҭ рахьтә 12-ҩык рҭагылазаашьа уадаҩуп. Тҟәарчалтәи ахәшәтәырҭаҿы - 13-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Аҿкычымазара – акоронавирус Аԥсни адунеи аҿи: иалкаау