Аԥснытәи аделегациа Нижни Новгород 800 шықәса ахыҵра азгәаҭара иалахәхоит

6
(ирҿыцуп 12:12 29.04.2021)
Аԥсны акультура аминистр Гәдиса Агрба усутә визитла Нижни Новгород дыҟоуп, мышқәак ирылагӡаны аиԥыларақәа акымкәа-ҩбамкәа имҩаԥигахьеит.

АҞӘА, мшаԥы 29 – Sputnik. Аԥсны акультура аминистр Гәдиса Агрбеи Нижни Новгород аофициалтә хаҿқәеи еиқәшәеит мшаԥы 27 рзы Нижегородтәи Кремль аҿы. Абри атәы аҳәоит аминистрра асаит.

Аиԥылара иалахәын Нижни Новгород иҟоу Аԥсны аҳаҭыртә консул Владимир Литвинчук, Нижегородтәи аобласт аиҳабыра адәныҟатә еимадарақәа рдепартамент адиректор Ольга Гусева, Нижни Новгород иҟоу Урыстәыла адәныҟатәи аусқәа рминистрра ахаҭарнак Сергеи Малов, арегион акультура аминистр актәи ихаҭыԥуаҩ Наталиа Суханова, Нижни Новгород ахада Иури Шалабаев, ақалақьтә Дума ахантәаҩы Олег Лавричев.

Аиԥылараан ирылацәажәан аиҿкааратә зҵаарақәа Аԥсны Аҳәынҭқарра аделегациа Нижни Новгород 800 шықәса ахыҵраз ауснагӡатәқәа ралахәразы.

Нижегородтәи аобласт агубернатор Глеб Никитин иааԥхьарала Аԥсны ахада Аслан Бжьаниа аԥхын арегион даҭаауеит, аныҳәатә уснагӡатәқәагьы иҽрылаирхәуиет.

Ақалақь Амш ахьӡала аԥснытәи акәашаратә коллективқәа ақәгыларақәа мҩаԥыргоит.

"Нижни Новгород — милаҭ рацәала еилоу қалақьуп, инхо ауааԥсыреи асасцәеи рзы ишьахәхоит егьырҭ акультурақәа рдырра, рбара. Ҳақалақьи Аҟәеи реиҩызаратә еимадара жәашықәса ирықәуп, аусеицура мҩаԥысуеит аҵара, аспорт, аҭҵаарадырра русхк аҟны. Аиҩызара еизҳалароуп иагьҿиалароуп", - ҳәа иҳәоит ақалақь ахада Иури Шалабаев.

Гәдиса Агрба иазгәеиҭеит атеатртәи арҿиаратәи коллективқәа реимадара, агастрольқәа рымҩаԥгара шаҭаху.

Ольга Гусева лажәақәа рыла, аганқәа имҩаԥыргеит Аԥсни Нижегородтәи аобласти ркультуратә еинырра ԥхьаҟагьы арҵаулараз алҵшәа зауша аиҿцәажәарақәа.

Аусутә визит аҳәаақәа ирҭагӡаны аминистр аиԥыларақәа еиҭагьы имҩаԥигараны дыҟоуп.

6

COVID-19 злаз даҽа пациенткак лыԥсҭазаара далҵит Гәдоуҭатәи ахәышәтәырҭаҿы

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15006-ҩык ыҟоуп, ргәы бзиахеит 14025-ҩык, рыԥсҭазаара иалҵит 226-ҩык.

АҞӘА, лаҵара 15 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 176-ҩык атестқәа рзыҟаҵан, урҭ рахьтә 22-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы лаҵара 14 рзы лыԥсҭазаара далҵит 1939 шықәса рзы ииз акоронавирус злаз апациентка.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 51-ҩык, урҭ рахьтә 41-ҩык акоронавирус адиагноз рзышьақәыргылоуп, рҭагылазаашьа бааԥсуп 28-ҩык, ибжьаратәуп - 12-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 31-ҩык апациентцәа, рҭагылазаашьа бааԥсуп хәҩык. Очамчыра ирхәышәтәуеит 16-ҩык, Гагратәи ахәышәтәырҭаҿы - 17-ҩык, Тҟәарчалтәи ахәышәтәырҭаҿы - ԥшьҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Аҿкычымазара – акоронавирус Аԥсни адунеи аҿи: иалкаау

Едуард Быҭәба Гәдоуҭатәи ахәышәтәырҭа даҭааны аусушьа гәеиҭеит

8
(ирҿыцуп 19:59 15.05.2021)
Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы Аԥсны Аҳәынҭқарра ахада иусԥҟа инақәыршәаны.

АҞӘА, лаҵара 15 – Sputnik. Аԥсны агәабзиарахьчара аминистр Едуард Быҭәба Гәдоуҭатәи араионтә хәышәтәырҭа хада даҭааит ахәаша лаҵара 14 рзы ҳәа аҳәоит Аԥсуа телехәаԥшра адырраҭара.

Иара игәеиҭеит ахәышәтәырҭа ашҭаҿы игылоу акоронавирус азы анализқәа ахьрыдыркыло аҭыԥ, адкыларҭа, апалатақәа. Ахәышәтәырҭа аусзуҩцәа аминистр изеиҭарҳәеит акоронавирустә инфекциа злоу апациентцәа, убарҭ рхыԥхьаӡараҿы COVID-19 адиагноз ззықәыргылоу зцәазтәым аҳәсагьы, рыхәышәтәра шеиҿкаау.

Быҭәба иара убас игәеиҭеит аҵәыҵәри анашьҭразы еиқәыршәоу астанциа, уантәи ауп аковид-госпиталь апалатақәа рахь аҵәыҵәри зланеиуа. Игәеиҭеит аҳауеиҭарсра асистема шыҟам, уи азҵаара шыӡбатәугьы азгәеиҭеит.

Иҷыдоу ахыхьчага маҭәа ишәҵаны аминистр "азона ҟаԥшь" ахь днеит, хаҭала апациентцәа рҭагылазаашьа ибарц, драцәажәарц азы. Иара дразҵаауан иаҭаху зегьы рымоу ирымаму, иаарласны ргәабзиара шьақәгыларц рзеиӷьеишьеит.

"Анцәа иҳәааит иаарласны шәгәы бзиахо, уи ауп зегь реиҳа ихадоу. Шәҭаацәа рахь ԥшӡала шәхынҳәааит. Ҳара, ҳколлегацәа, аҳақьымцәа, ҳашәзыӡырҩлоит, ишәҭаху аҿы ҳшәывагылоит", - иҳәеит аминистр.

Аԥсуа телехәаԥшра анҵамҭаҿы иара убас иарбоуп Едуард Быҭәба амедицинатә усзуҩцәа рџьабаазы иҭабуп ҳәа шреиҳәаз, агоспитальгьы лассы-лассы даҭаалоит ҳәа ажәа шриҭаз, аҳақьымцәеи ахәышәтәырҭа анапхгареи иареи аусутә еиԥыларақәа мҩаԥаагалоит ҳәа шиҳәаз.

Гәдоуҭатәи араионтә хәышәтәырҭа аҳақьым хада Ҳаџьараҭ Шамба лаҵара 14 рзы иҟаиҵаз адыррала, аковид-госпиталь аҿы ишьҭоуп акоронавирустә инфекциа злоу апациентцәа 38-ҩык, урҭ рахьтә 16-ҩык рҭагылазаашьа бааԥсуп. Иара убас ара ареабилитациа иахысуеит COVID-19 иаиааихьоу 11-ҩык апациентцәа.

Аԥсуа телехәаԥшра аматериал аҿы иара убас иазгәаҭоуп агәабзиарахьчара аминистр атәыла амедусҳәарҭақәа зегьы дырҭааны рҭагылазаашьа гәеиҭарц игәы ишҭоу.

Аԥсны Аҳәынҭқарра ахада иусԥҟа инақәыршәаны Едуард Быҭәба Аԥсны агәабзиарахьчара аминистрс дҟаҵан аҩаша лаҵара 11 рзы. Иара диԥсахит зхатәгәаԥахарала змаҵура аанзыжьыз Ҭамаз Ҵахнакьиа.

8
Атемақәа:
Аҿкычымазара – акоронавирус Аԥсни адунеи аҿи: иалкаау