Ансамбль "Самырзаҟан" афестиваль "Урыстәыла аԥеиԥш" аҟны аԥхьахә анашьахеит

12
(ирҿыцуп 18:39 04.05.2021)
Афестиваль-еицлабра "Урыстәыла аԥеиԥш" хнызқьҩык рҟынӡа артистцәа алахәын, имҩаԥысуан аконцерттә зал "Измаилово" аҟны, мшаԥы 26 инаркны лаҵара 2-нӡа.

АҞӘА, лаҵара 4 - Sputnik. Бадраҟ Аҩӡба. Тҟәарчал араион Гал-хәыҷ ақыҭаҟынтәи ахәыҷтәы вокал-инструменталтә фольклортә ансамбль "Самырзаҟан" аԥхьахә хада анашьахеит аноминациа "Жәлар рвокал" аҟны, абри атәы Sputnik изеиҭеиҳәеит аколлектив асахьаркыратә напхгаҩы Михаил Џьумутиа.

"Алхратә конкурс аҟны ҳколлектив ашәақәа ҩба наныгӡеит- аԥсуа жәлар рашәақәа рпопурри, аурыс фольклортә ашәа "Бзиа избо"", - иҳәеит иара.

Афестиваль-еицлабра афиналтә хәҭа аԥҟарақәа рыла, аколлективқәа ашәак-ашәак анагӡаразы азин рыман, ансамбль "Самырзаҟан" аурыс фольклортә ашәа "Бзиа избо" наныгӡеит, уи иалнаршеит акультуреи аҟазареи рзы амилаҭтә премиа аиура.

Афестиваль-еицлабра "Урыстәыла аԥеиԥш" мҩаԥысуан аконцерттә зал "Измаилово" аҟны, мшаԥы 26 инаркны лаҵара 2-нӡа. Хнызқьҩык рҟынӡа артистцәа алахәын, зынӡа асценаҟны иқәгылан 150 коллектив, Урыстәылатәи ақалақьқәа 120 рҟынтәи. 

Михаил Џьумутиа "Самырзаҟан" 1997 шықәсазы иаԥиҵеит. Аколлектив Аԥсни анҭыҵи имҩаԥысуа аицлабрақәеи афестивальқәеи рҟны аԥхьахәқәа ириааихьеит. Иахьазы иара 35-ҩык ахәыҷқәа рыла ишьақәгылоуп.

12

Аԥсны агәабзиарахьчара аминистрра алабораториақәа Очамчыреи Гагреи аусура ианалаго рҳәеит

1
(ирҿыцуп 10:58 05.08.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 22642-ҩык ыҟоуп, ргәы бзиахеит 18189-ҩык, рыԥсҭазаара иалҵит 320-ҩык.

АҞӘА, нанҳәа 5 – Sputnik, Бадраҟ Аҩӡба. COVID-19 амазаара аҭҵааразы ПЦР-лабораториа Гагра аусура иазырхиоуп ҳәа иҳәеит Аԥсны Агәабзиарахьчара аминистр Едуард Быҭәба.

"Гагратәи алабораториа аусура ишаалагалак Аҟәатәи абактериологиатә лабораториа еиҳа ахы иақәиҭхоит. Алабораториаз ауада аремонт азуын Гагра араион ахадара амчала. Ахархәагақәа аахәан ареспубликатә биуџьет аԥарақәа рыла", - иҳәеит иара.

Аминистр иазгәеиҭеит алабораториа 200 рҟынӡа биоматериал уахыки-ҽнаки рыла адкылара шалшо. Ԥхынгәы 22 аахыс алабораториа атест режим ала аусура мҩаԥнагон.

Уи адагьы Едуард Быҭәба иҳәеит ареспубликатә биуџьет COVID-19 аламырҵәара иазнархаз аԥарақәа рыхәҭак ала Очамчыра алабараториа шаартхо.

"Иахьазы Очамчыратәи алабараториа аперсонал Ареспубликатә санитар-бактериологиатә лабораториаҿы аԥышәа иахысуеит" - иҳәеит иара.

Алабораториа аусура иалагоит атехникатәии адокументациатәии ҟазшьа змоу азҵаарақәа рҭыԥ ишықәҵахалак, аперсонал шазыҟаҵахалак.

1

Шьынқәырԥҳа Аԥсны ацитрус ԥырхага азҭо ахәаҷа азы: даара иамҽхакны иҟоуп

1
Ацитрус иаԥырхаго аԥарԥалыкь ықәызго абжы криптоламус ахархәара атәы арадио Sputnik аефир аҿы еиҭалҳәеит Аҵиаақәа рзы акарантинтә хылаԥшра асанитартә лабораториа аиҳабы Маиа Шьынқәырԥҳа.
Шьынқәырԥҳа Аԥсны ацитрус ԥырхага азҭо ахәаҷа азы: даара иамҽхакны иҟоуп

"Шерстистаиа белокрылка ҳәа изышьҭоу ԥшьышықәса раахыс иазгәаҭан иҳамоyп Аԥсны. Еиҳарак иахьаабо ацитрус аҟноуп, даара аҽамхакны иҟоуп. Ари хәаҷа ҿыцуп. Аҭагылазаашьа ас ианыҟала, ааигәа аинспекциаҿы иҟаз аиԥылараҟны иазыӡбан ахәаҷа зшьуа ахимметод ада, абиометод ахархәара. Абжы криптоламус, уи аԥырԥалыкь иаԥырхагоуп, ус азгәарҭеит аиԥылараҿы аекспертцәа. Макьана иҳазҳәом уи иахәоит ҳәа, аха иалагалазар, ахы шымҩаԥнаго аабарын. 500 цыра аԥсабарахь аушьҭра азгәаҭоуп. Ҳара урҭ аԥсабара ԥырхага анаҭом ҳәа азыҳаԥхьаӡоит", - еиҭалҳәеит Шьынқәырԥҳа.

Инеиҵыху аиҿцәажәара шәазыӡырҩыр шәылшоит аудиофаил аҿы.

1