Едуард Быҭәба Аԥсны агәабзиарахьчара аминистрс дҟалеит

65
(ирҿыцуп 21:32 14.05.2021)
Едуард Быҭәба - аҳақьым-аортопед, Сеченов ихьӡ зху Москватәи амедицинатә академиа аушьҭымҭа, иахьанӡа дынхон, аусгьы иуан Москва.

АҞӘА, лаҵара 11 - Sputnik. Аԥсны ахада Аслан Бжьаниа иусԥҟала Аԥсны агәабзиарахьчара аминистрс дҟалеит Едуард Быҭәба. Ари аҭыԥ аҟны иара диԥсахит хатәгәаԥхарала змаҵура аанзыжьыз Ҭамаз Ҵахнакьиа.

Едуард Быҭәба диит 1974 шықәсазы Аԥснытәи АССР Очамчыра ақалақь аҿы.

1998 шықәсазы далгеит Сеченов ихьӡ зху Москватәи амедицинатә академиа "ахәышәтәратә ус" ала аҳақьым иквалификациа иманы.

Далгеит аклиникатә интернатура, анаҩс "атравматологиа-аортопедиа" азанааҭ ала Сеченов ихьӡ зху Москватәи амедицинатә академиа атравматологиа, аортопедиа, акатастрофақәа рхирургиа акафедраҿы аординатура далгеит.

2012 шықәсазы дахысит Пирогов ихьӡ зху аинститут аҟны апрофессионалтә еиҭазыҟаҵара "Агәабзиарахьчара аиҿкаареи ауаажәларратә гәабзиареи" азанааҭ ала. 2014 шықәсазы дахысит Урыстәыла ФНБА иатәу Аквалификациа аизырҳара аинститут аҿы апрофессионалтә еиҭазыҟаҵара апрограмма "агериатриа" ала.

Аус иуан москватәи аклиникақәа руак аҿы травматолог-ортопедс.

65

Аҟәа иҟалаз абылра ахәҭак ырцәоуп

4
(ирҿыцуп 13:29 13.06.2021)
Аҟәа ақалақь Ешба имҩаҿы игылоу уаанӡатәи акондитертә фабрика ахыбраҿы абылра ҟалеит амҽыша рашәара 13 рзы аҽнышьыбжьон.

АҞӘА, рашәара 13 – Sputnik, Бадри Есиава. Аҟәа ақалақь Ешба имҩаҿы игылоу амца зкыз уаанӡатәи акондитертә фабрика ахыбра ахәҭак ырцәоуп ҳәа аҭыԥ аҟынтәи иааицҳауеит Sputnik акорреспондент Аԥсны Аҭагылазаашьа ҷыдақәа рзы аминистр Лев Кәыҵниа иажәақәа ааго.

Аусбарҭа аиҳабы иажәақәа рыла, ахыбра еилаҳауеит ҳәа ашәарҭара ыҟам.

Амцарцәара иаҿын Аҟәеи, Аҟәа араиони, Гәылрыԥшь араиони рымцарцәаратә гәыԥқәа, иара убас аруаа.

Амца дырцәоит ахыбра мрагыларатәи мраҭашәаратәи аганқәа рыла еицҿакны. Амцарцәаҩцәа амардуанқәа рыла ахыб ахьгьы ихалеит.

Кәыҵниа ишиҳәаз ала, амца акит зықь ԥшьыркца метра инареиҳаны аҵакыра. Абылра акатегориақәа быжьба рҟынтәи ахәбатәи акатегориа иаҵадыркит.

4

Аҟәа амцакра ду ҟалеит

22
Аҟәа ақалақь Ешба имҩаҿы амцакра ду ҟалеит амҽыша рашәара 13 рзы аҽнышьыбжьон. Аҭыԥ аҟны аус руеит Аԥсны АҶА аусзуҩцәа.

АҞӘА, рашәара 13 – Sputnik, Бадри Есиава. Аҟәа ақалақь Ешба имҩаҿы игылоу уаанӡатәи акондитертә фабрика ахыбраҿы абылра ҟалеит. Раԥхьа амца ркит хыхьтәи аихагылақәа, ахыбгьы амҽханакит.

Аҭыԥ аҟны амцарцәара иаҿуп Аԥсны АҶА амцарцәаратә гәыԥқәа.

Алҩақ жәпа ажәҩанахь акыр ихалеит, ахыбра зегьы амҽханакит. Хара имгакәа амца ҵаҟатәи аихагылақәа рахьгьы ииасит, адәахьы икылсуа иалагеит.

Аԥша ахьасуаз иахҟьаны ааигәа игыла аԥсаҵлагьы амца акит, аха амцарцәаҩцәа уи ирласны арцәара рылшеит.

Ахыбра амцакра зыхҟьаз макьана еилкаам, ауааԥсыра рахьтә ааха зауз ҳәа аӡәгьы иӡбахә ҳәам.

22