Страйкбол

Аԥснытәи акоманда "НЕРС" Москва астраикболтә хәмаррақәа рзы ахраҿа анашьахеит

14
(ирҿыцуп 12:39 18.05.2021)
Страикбол азы ахәмаррақәа "Сутки на броне" мҩаԥысуан Москва амҵантәи Ступино аҿы лаҵара 14 - 16 рзы. Ахәмаррақәа ирылахәын ԥшь-нызқьҩык рҟынӡа Урыстәыла, Аԥсны, Донецктәи ареспублика рҟынтә.

АҞӘА, лаҵара 18 – Sputnik, Бадри Есиава. Атактикатә ҟәша ҷыда "НЕРС" страикбол азы ахәмаррақәа "Сутки на броне" аҿы ианашьахеит ахраҿа "Аусдҵақәа фырхаҵарыла рынагӡаразы". Абри атәы Sputnik иазеиҭеиҳәеит Аԥсны Арра-тактикатә хәмаррақәа рфедерациа ахантәаҩы Денис Шашура.

"Аицлабрақәа мҩаԥысуан ҳара ҳзы иҿыцыз аполигон аҿы. Аҽаршьцылара уадаҩын, аиҳаракгьы маҷк ҳагхан ҳахьнеиз азы. Ҳаамҭа маҷын. Аполигон аӡиастә ԥынгыларақәа змаз бнаран. Раԥхьатәи усдҵаны иҳаҭан аԥшыхәра, аминомиоттә хырӷәӷәарҭақәа рықәгара, атыл аҿы адиверсиатә усқәа рымҩаԥгара", - ҳәа иҳәоит Шашура.

Аусдҵа анагӡара имариамыз акәын. Аамҭа азымхара иахҟьаны ахсаала ишахәҭаз иҭҵаамызт, "НЕРС" "аӷа" итыл ахь инеит, уа еибашьыр акәхеит. Аԥснытәи акоманда хьаҵт, аҭагылазаашьа аҽанрааланы, аха аминомиоттә хырӷәӷәарҭа аҭархара рылшеит.

Шашура иажәақәа рыла, зегь реиҳа иуадаҩыз амацәаз иахьҭакыз аҭыҵра акәхеит. "НЕРС" ҩ-гәыԥкны аҽеихшаны еибашьрыла амацәаз иҭыҵит.

"Агәыԥ алахәылаки сареи "аӷа" итыл аҿы ҳаанхеит. Амацәаз иҭашәаз ҳаибашьцәеи ҳареи ҳҽанеимаҳда ашьҭахь иҳаӡбеит мцаԥшьла урҭ ацхыраара раҳҭарц. Ҳаибашьцәа руаӡәк х-сааҭк инарзынаԥшуа "аӷа" цхыраарада диҿагылан ихала. Иааулак амацәаз ҳҭыҵны ҳҿаԥхьа иқәгылаз ауснагӡатәқәа рымҩаԥгара ҳҽазаҳшәеит", - ҳәа иҳәоит иара.

Шашура еиҭеиҳәеит уи амш азы аԥшаӷьы шасуаз, ихжәаз аҵла амахә дшаҵахаз. Ахәмаррақәа реиҿкааҩцәа аԥснытәи акоманда аиндаҭлара аанрыжьырц рабжьыргеит, аха дара мап ркит. "НЕРС" акапитан ааха ахьиоуз азы акоманда адиверсиатә гәыԥ иалганы аҽыхьчаратә гәыԥ ахь ииаргеит.

"Ахәмаррақәа лаҵара 14, Аԥсны Раԥхьатәи ахада имшира аҽны иахьрылагаз амч ҷыда ҳнаҭон. Азин ҳамамызт акы ацәхьаҵра. Зегьы идҳарбар ҳҭахын ахәмаррақәа рылахәхара аиҳа ҳтәыла ахаҿы аарԥшра шаҳҭахыз", - ҳәа иҳәоит Шашура.

  • За проявленное мужество: «НЕРС» из Абхазии получил награду в играх «Сутки на броне»
    © Foto / предоставил Денис Шашура
  • За проявленное мужество: «НЕРС» из Абхазии получил награду в играх «Сутки на броне»
    © Foto / предоставил Денис Шашура
  • За проявленное мужество: «НЕРС» из Абхазии получил награду в играх «Сутки на броне»
    © Foto / предоставил Денис Шашура
  • За проявленное мужество: «НЕРС» из Абхазии получил награду в играх «Сутки на броне»
    © Foto / предоставил Денис Шашура
1 / 4
© Foto / предоставил Денис Шашура
За проявленное мужество: «НЕРС» из Абхазии получил награду в играх «Сутки на броне»

Страикбол азы ахәмаррақәа "Сутки на броне" мҩаԥысуан Москва амҵантәи Ступино аҿы лаҵара 14 - 16 рзы. Ахәмаррақәа ирылахәын ԥшь-нызқьҩык рҟынӡа Урыстәыла, Аԥсны, Донецктәи ареспублика рҟынтә. Арҭ ахәмаррақәа атәылақәа жәпакы рыҽрыладырхәуеит, аха сынтәа пандемиа иахырҟьаны аҳәаақәа аркын, инеизгьы маҷхеит ҳәа иҳәеит Шашура.

Рҿаԥхьа иқәгылаз адҵақәа хаҵарыла рынагӡаразы "НЕРС" уаанӡа аӡәгьы ианарымшьацыз ахраҿа анашьахеит.

"Ари гәахәара дуун. Ԥхьаҟазгьы аиааира ҳгәы азҭанаҵеит", - ҳәа азгәеиҭеит Денис Шашура.

Аԥснытәи акоманда жәаҩык рыла ишьақәгылан. Аԥхьанатә агәыԥ зегьы – 15-ҩык цоит ҳәа иԥшын, аха афинанстә проблемазы изалмыршахеит.

"Ҳцартә аиԥш алшара шҳауаз аиндаҭларақәа рылагара мышк шагыз ауп ишеилаҳкааз. 18 сааҭ рыла Москва ҳнеит. Уи азоуп инагӡаҵәҟьаны аҽазыҟаҵара ҳзахьымӡаз. Ҳара уахь ҳцара алыршахеит Апарламент адепутатцәа Каха Пертаиеи Илиа Гәниеи рыцхыраарала", - иҳәеит Шашура.

"Сутки на обороне" – иналукааша страикболтә хәмарроуп. Сынтәа иара иалахәын ф-нызқьҩык рҟынӡа, имҩаԥысуан Москва, лаҵара 14-16 рзы.

"НЕРС" ҩынтәуп арҭ ахәмаррақәа ирылахәуижьҭеи.

14

Урыстәылатәи атанкныҟәцаҩцәа Краснодартәи атәылаҿацә аҿы аҽазыҟаҵарақәа мҩаԥыргеит

1
(ирҿыцуп 18:39 18.06.2021)
Аҽазыҟаҵаратә уснагӡатәқәа ирылахәын шәҩык аруаа, ахархәара рыҭан 30 ак арратә техника, акәылӡы зқәу автомашьынақәа КамАЗ "Мустанг" реиԥш иҟақәаз.

АҞӘА, рашәара 18 - Sputnik. Аԥсны иҟоу Урыстәыла Аладатәи арратә база атанкныҟәцаҩцәа Краснодартәи атәылаҿацә аполигон аҿы ахысрақәа мҩаԥыргеит ҳәа аанацҳауеит аокруг апресс-маҵзура.

Аекипажқәа 200 рҟынӡа ицәырҵуаз, еиҭаҵуаз ацәҟьарақәа ахы рықәдыршәеит ҳаамҭазтәи атанкқәа Т-72Б3 рҟынтәи. Ацәҟьараҟынӡа иреиҳаӡоу ахарара ҩ-нызқь метра иҟан.

Уахынлатәи ахысрақәа раан ахархәара рыҭан уахынларбагатә хархәагақәа ТВН-5.

Т-72Б3 амеханик-ныҟәцаҩцәа рдырреи рԥышәеи еиздырҳауан аԥынгылақәа рхысраан, амина-ԥжәага ԥкырақәа рхысраан.

Ахсрақәа раан иныхын 300 танктә рҭҟәацгақәа.

Инарҭбаау аҽазыҟаҵарақәа мҩаԥгахараны иҟоуп акоманда-штабтә зыҟаҵарақәа ирылахәны.

1
Нодар Чанба

Аԥсны еицырдыруа ахьыӡқәа: раԥхьатәи аԥсуа драматург Самсон Ҷанба иҭоурых иазкны

5
(ирҿыцуп 17:51 18.06.2021)
Аԥсны раԥхьаӡатәи апрофессианалтә театр аԥҵараҿы злагала рацәоу Самсон Ҷанба диижьҭеи 135 шықәса ҵит. Жәлар рартист Нодар Ҷанба арадио Sputnik аефир аҿы еиҭеиҳәеит раԥхьатәи аԥсуа адраматург иҭоурых.
Аԥсны еицырдыруа ахьыӡқәа: раԥхьатәи аԥсуа драматург Самсон Ҷанба иҭоурых иазкны

Самсон Ҷанба – ауаажәларратә усзуҩы, ашәҟәыҩҩы, аҧсуа драматургиа ашьаҭыркҩы. Дыҩуан иара ҧсышәалагьы урысшәалагьы. Иҩымҭақәа цәырҵуа иалагеит агазеҭ "Аҧсны" адаҟьақәа рҿы 1919 шықәса рзы. Еиуеиҧшым ашықәсқәа рзы С. Ҷанба аус иуан: Аҧсны ацентртә нагӡаратә комитет (ЦИК) ахантәаҩыс (1923 - 1930), аҵаралашара жәлар ркомиссарс (1921 - 1925), Аҧсны ашәҟәыҩҩцәа Реидгыла ахантәаҩыс (1934 - 1937), агазеҭ "Аҧсны ҟаҧшь" редакторс. Ҷанба инапы иҵижьыз иреиуоуп: аромантикатә поема “Ашьха ҭыҧҳа”(1919), раҧхьатәи аҧсуа драма “Амҳаџьырқәа”(1920), “Аҧсны Ҳаным”(1923), “Ажәытәра иагаз” (1929) уҳәа убас егьырҭгьы. Идраматә ҩымҭақәа аҧсуа милаҭтә драматургиаҿ иауасхырны иҟалеит. Иповест “Сеидыҟ”(1934) – аҧсуа прозаҿы акыр зҵазкуа раҧхьатәи рҿиамҭаны иҧхьаӡоуп. С. Ҷанба иара убас еиқәиршәеит “Аҧсны агеографиа” (Аҟәа, 1925). Далахәын 1929ш. рзы иаҧҵаз раҧхьатәи апрофессионалтә аҧсуа театр аиҿкаара.

Аиҿцәажәара шәазыӡырҩыр шәылшоит аудиофаил аҿы.

5