"Аԥсны жәлар Рконгресс" аделегатцәа ралхразы ашәага-загақәа шьақәдыргылеит

12
(ирҿыцуп 15:58 21.05.2021)
Аҟәа имҩаԥысит атәыла анапхгареи атәылауааи рыбжьара аинырра абжьаҵара хықәкны измоу "Аԥсны жәлар Рконгресс" аҩбатәи аилатәара.

АҞӘА, лаҵара 21 - Sputnik. "Аԥсны жәлар Рконгресс" аҩбатәи аилатәараҿ иахәаԥшын аиҿкаара аилазаара апроект, аструктура, аделегатцәа ралхра ашәага-загақәа.

Аконгресс ахыркәшаратә модель аверсиа амза нҵәаанӡа Аԥсны араионқәа рҿы иӡырыргоит.

"Аԥсны жәлар Рконгресс" аилазаареи аструктуреи ӡырылгеит асоциал-економикатә ҭҵаарақәа Рцентр амилаҭтә економика аҟәша аиҳабы Хатуна Шаҭ-иԥа.

Апроект инақәыршәаны Аконгресс 380-ҩык алахәхоит, аиҳараҩык ақыҭақәа рҟынтәи. Аиҿкаара иалахәхоит еиуеиԥшым аусхкқәа рҟны аҟазауаа, ауаажәларратә еиҿкаарақәа рхаҭарнакцәа, араионтәи ақалақьтәи еизарақәа рхаҭарнакцәа.

Шаҭ-иԥа ишылҳәаз ала 51% Аконгресс аилахәыра ақыҭауаа ракәхоит.

"Ақыҭауаа рҿаԥхьа ауал ҳақәуп. Ринтересқәа ахьцәырыргаша аҭыԥ раҳҭароуп. Аконгресс ала адепутатрахь ркандидатцәа ирыдгыло иҟаҵатәуп. Иҟаҵатәуп дара адепутатцәагьы нас дара рҿаԥхьа аҳасабырба аҟаҵара рыдны", - лҳәеит аекономист иагьазгәалҭеит Апарламент адепутатцәа реиҳараҩык ақыҭақәа шракәу иалызхуа.

Аконгресс иалахәылахар рылшоит ауаажәларраҿ унеишь-уааишь ҳәа зарҳәо ауаа, зус рмыӡбац, анаркотик, арыжәтә иадцалам, апрофессионалцәа.

Ақыҭақәа рҟынтәи аделегатцәа уа аҭыԥқәа рҿы инхозароуп. Рҵара абжьаратә ҵара еиҵамзароуп. Аибашьра аамҭаан арра анаԥхьара ашықәс иаҵанакуазар, аибашьратә хҭысқәа ирылахәызароуп.

Аконгресс аделегатцәа рҭаацәарақәа ракәзар – атәыла Аконституциатәии азинтәии нормақәа ирықәныҟәозароуп, ашьаус иаҵанамкхьазароуп, аԥсыҭбара зцу амҩатә машәыр рхылымҿиаацзароуп.

Иара убасгьы акандидатгьы иҭаацәара алахәылацәагьа аекономика ашәшьыратә сектор аҿы рыӡбахә рымҳәацзароуп. Дара анкета ахарҭәаараан иазгәарҭароуп рхашәалеи уи шьаҭас иамоуи. Аконгресс аделегатцәа ралхраан аспект хаданы иҟоу иреиуоуп Қырҭтәыла акала рыхьӡ адымҳәалара. Ари Гал араион ауааԥсыреи уахь ҽыхәышәтәра ицоуи аҵанакуам.

Аконгресс иалахәхоит Аԥсны амилаҭқәа зегьы.

Аконгресс аԥҵаразы аиҿкааратә гәыԥ анапхгаҩы, ауаажәларратә усзуҩ, Апарламент актәи ааԥхьара адепутат Давид Ԥлиа иазгәеиҭеит абжьыҭараан алхыҩцәа раахәара аҵыхәа ԥҵәатәуп ҳәа.

Иара убасгьы иазиԥхьаӡоит Апарламент аҿы аҳәса рхыԥхьаӡара иазырҳатәуп агендертә еиҟарара алыршаразы ҳәа.

Аԥсны асоциал-економикатә ҭҵаарақәа Рцентр аԥшьгарала 2021 шықәса мшаԥымзазы атәыла анапхгареи атәылауааи рыбжьара аинырра абжьаҵара хықәкны измоу ауаажәларратә еиҿкаара "Аԥсны жәлар Рконгресс" аԥҵоуп.

12
В Сухуме загорелось здание бывшей кондитерской фабрики

Аҟәа иҟалаз абылра ахәҭак ырцәоуп

4
(ирҿыцуп 13:29 13.06.2021)
Аҟәа ақалақь Ешба имҩаҿы игылоу уаанӡатәи акондитертә фабрика ахыбраҿы абылра ҟалеит амҽыша рашәара 13 рзы аҽнышьыбжьон.

АҞӘА, рашәара 13 – Sputnik, Бадри Есиава. Аҟәа ақалақь Ешба имҩаҿы игылоу амца зкыз уаанӡатәи акондитертә фабрика ахыбра ахәҭак ырцәоуп ҳәа аҭыԥ аҟынтәи иааицҳауеит Sputnik акорреспондент Аԥсны Аҭагылазаашьа ҷыдақәа рзы аминистр Лев Кәыҵниа иажәақәа ааго.

Аусбарҭа аиҳабы иажәақәа рыла, ахыбра еилаҳауеит ҳәа ашәарҭара ыҟам.

Амцарцәара иаҿын Аҟәеи, Аҟәа араиони, Гәылрыԥшь араиони рымцарцәаратә гәыԥқәа, иара убас аруаа.

Амца дырцәоит ахыбра мрагыларатәи мраҭашәаратәи аганқәа рыла еицҿакны. Амцарцәаҩцәа амардуанқәа рыла ахыб ахьгьы ихалеит.

Кәыҵниа ишиҳәаз ала, амца акит зықь ԥшьыркца метра инареиҳаны аҵакыра. Абылра акатегориақәа быжьба рҟынтәи ахәбатәи акатегориа иаҵадыркит.

4
В Сухуме загорелось здание бывшей кондитерской фабрики

Аҟәа амцакра ду ҟалеит

22
Аҟәа ақалақь Ешба имҩаҿы амцакра ду ҟалеит амҽыша рашәара 13 рзы аҽнышьыбжьон. Аҭыԥ аҟны аус руеит Аԥсны АҶА аусзуҩцәа.

АҞӘА, рашәара 13 – Sputnik, Бадри Есиава. Аҟәа ақалақь Ешба имҩаҿы игылоу уаанӡатәи акондитертә фабрика ахыбраҿы абылра ҟалеит. Раԥхьа амца ркит хыхьтәи аихагылақәа, ахыбгьы амҽханакит.

Аҭыԥ аҟны амцарцәара иаҿуп Аԥсны АҶА амцарцәаратә гәыԥқәа.

Алҩақ жәпа ажәҩанахь акыр ихалеит, ахыбра зегьы амҽханакит. Хара имгакәа амца ҵаҟатәи аихагылақәа рахьгьы ииасит, адәахьы икылсуа иалагеит.

Аԥша ахьасуаз иахҟьаны ааигәа игыла аԥсаҵлагьы амца акит, аха амцарцәаҩцәа уи ирласны арцәара рылшеит.

Ахыбра амцакра зыхҟьаз макьана еилкаам, ауааԥсыра рахьтә ааха зауз ҳәа аӡәгьы иӡбахә ҳәам.

22