Проблемы с орехом

Ақыҭанхамҩа аминистрра Гал арасаҭрақәа 5000 гектар рҟынӡа рыхәшәтәра агәы иҭоуп

19
(ирҿыцуп 19:31 22.05.2021)
Аԥсны амармалташьтә пты иаҿагыланы иқәԥоит апестицидқәа рыла ихәышәтәны, иара убас напылагьы иҟәшәаны.

АҞӘА, лаҵара 22 – Sputnik. Хә-нызқь гектар рҟынӡа арасаҭрақәа рхәышәтәуеит амармалташьтә пти акәыкәбаақәеи рҟынтәи ҳәа арадио Sputnik иазеиҭеиҳәеит Аԥсны ақыҭанхамҩа аминистрра аҵиаақәа рыхьчара амаҵзура аиҳабы Владимир Гьериа.

Иара иажәақәа рыла, аусура еиҳарак иахьырҿу Гал араион аҿоуп, избанзар уброуп еиҳарак арасаҭрақәа ахьырацәоу. Ахимиатә маҭәашьарқәа рықәырҭәоит иара убас авиациа ахархәарала.

"Ари зымҽхак ҭбаау, зхарџь дуу акциоуп, уи Урыстәылеи ҳареи ҳусеицура иабзоураны имҩаԥысуеит. Аусурақәа егьырҭ араионқәа рҿгьы имҩаԥаагараны иҟоуп, атәыла аиҳабыра уи азы иаҭахыз зегь ҟарҵеит", - иҳәеит Гьериа.

Аҵиаақәа рыхьчара амаҵзура аиҳабы иазгәеиҭеит Аԥсны амармалташьтә пты ахыԥхьаӡара аиҵахара ишалагаз, уи зыбзоуроу анхацәа активла ари аус иахьадгылоу ауп, дара ианаамҭоу ахәышәтәрақәа мҩаԥыргоит, напыла апты еизыргоит.

Амармалташьтә пты Аԥсны Амшын еиқәа аҿықә аҿы хыԥхьаӡара рацәала ицәырҵит хәышықәсаҟа раԥхьа. Иара ирласны иҿиеит. Ари ахәаҷа иафоит аҵиаақәа рбыӷь ҿақәа, ашәыр. Еиҳарак аԥырхага рынаҭоит ашәыри аргәыцқәеи, иара убас ауҭраҭыхи арыцтәқәеи.

2020 шықәсазы Урыстәыла Аԥсны ацхыраара анаҭеит ахәаҷа-маҷақәа рҿагыларазы, уи азы 130 миллион мааҭ аԥара аанашьҭит. Ари аԥарала иаахәан апестицидқәа, аҵиаақәа ахәшә рықәҭәагақәа, иҷыдоу атехника, авиациа ацхыраарала ақыҭанхамҩа дгьылқәа аус адуларазы аныхтәқәа. Иара убас жәларбжьаратә аиҿкаарақәагьы атәыла иацхраауан. Ақыҭанхамҩа аминистрра абиуџьет аҟынтәи иныхын 15 миллион мааҭ аԥара ашҳамхимикатқәа раахәаразы.

2020 шықәсазы иааидкыланы амармалташьтә пты ақәхразы иныхын 400 тонн апестицидқәа.

19

Аԥсны акоронавирус зыхьуа даҽа 45-ҩык рыцлеит иҳаҩсыз уахыки-ҽнаки рыла

3
(ирҿыцуп 22:57 12.06.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15756-ҩык ыҟоуп, ргәы бзиахеит 15069-ҩык, рыԥсҭазаара иалҵит 238-ҩык.

АҞӘА, рашәара 12 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 177-ҩык атестқәа рзыҟаҵан, урҭ рахьтә 45-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 38-ҩык, урҭ рахьтә 37-ҩык акоронавирус адиагноз рзышьақәыргылоуп, рҭагылазаашьа бааԥсуп 12-ҩык, ибжьаратәуп - 26-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 40-ҩык апациентцәа, урҭ рахьтә ааҩык рҭагылазаашьа уадаҩуп. Очамчыра ирхәышәтәуеит 10-ҩык, Гагратәи ахәышәтәырҭаҿы - 15-ҩык, Тҟәарчалтәи ахәышәтәырҭаҿы - ааҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

3
Атемақәа:
Аҿкычымазара – акоронавирус Аԥсни адунеи аҿи: иалкаау

Хра злоу ахҭысқәа: Ҳашыги Ҷолокәуеи атәыла ахада инашьҭымҭа иазкны

4
(ирҿыцуп 16:15 12.06.2021)
Аԥсны ахада иҿы иҟоу аинформациатә хархәагақәа рымадаразы аусбарҭа аиҳабы Алхас Ҷолокәуеи, ажурналист, агазеҭ "Чегемскаиа правда" аредактор хада Инал Ҳашыги иалацәажәеит атәыла ахада инашьҭымҭа аҵакы, уи абжьажьра азакәан ахьынӡеиланаго.
Хра злоу ахҭысқәа: Ҳашыги Ҷолокәуеи атәыла ахада инашьҭымҭа иазкны

Атәыла ахада апарламент ахь инашьҭымҭа - хықәкыс иамоузеи ари апроцедура? Иара абжьажьра азакәан абанӡеиланаго? Аԥсны ахада апарламент ахь инашьҭымҭа ари ашықәс азы иарбоума, уи аҟны иалкаахо ахырхарҭа хадақәа, анашьҭымҭа аҵакы, адунеитә ԥышәа уҳәа азҵаарақәа ирылацәажәеит арадио Sputnik аефир аҟны Аԥсны ахада иҿы иҟоу аинформациатә хархәагақәа рымадаразы аусбарҭа аиҳабы Алхас Ҷолокәуа, ажурналист, агазеҭ "Чегемскаиа правда" аредактор хада Инал Ҳашыг.

"…Аԥсны аҳәынҭқарра ахада анапхгарахь даннеи, ԥшьымзгьы ахылахьан ашықәс, ачымазара ҿыц анцәырҵыз акәын. Ҳазхиаӡамызт аҭагылазаашьа, иҟалараны иҟазгьы аҳәара уадаҩын, амч-алша, ахшыҩ зегьы уи аус иазкын. Насгьы ԥҟаралагьы Аԥсны ауаа рацәа алархәны аиԥыларақәа, аизарақәа рымҩаԥгара аанкылан… уи ауп изызку анашьҭымҭа аҟамзаара, аха уи инаваргыланы исҳәар сҭахуп аҳәынҭқарра ахада изныкымкәа апарламент аҟны аиԥыларақәа шимаз, уаҟа Аԥсны аҩнуҵҟатәи адәныҟатәи аполитика далацәажәеит. Аԥсны аҭагылазаашьазы аҳәынҭқарра ахада ипланқәа ауаа рахь ицәыргамызт ҳәа аҳәарагьы иашам… Акызаҵәык, исҳәар исҭаху, анашьҭымҭа ҟалоит, амала ианыҟало абри амш ауп ҳәа макьана аҳәара сазхиам", - ҳәа азгәеиҭеит Ҷолокәуа.

Арҭ ашықәсқәа рзы аҳәынҭқарра ахада апарламент ахь инашьҭымҭа ритуалтә традициак аҳасабала ҳахәаԥшуан, инарҵауланы адокумент ҭҵааны, иҟаҳҵо шыҟаҳҵо атәы уиаҟара ҳазхәыцуамызт ҳәа агәаанагара ааирԥшит ажурналист Инал Ҳашыг.

Инеиҵыху аицәажәара шәазыӡырҩы аудиофаил аҟны.

4