Гагра акоммуналтә шәарақәа рзы иаку Ацентр аадыртит

17
(ирҿыцуп 18:05 01.06.2021)
Гагра акассатә ԥхьаӡаратә центр аадыртаанӡа акоммуналтә маҵзурақәа рзы ашәара мҩаԥыргон аконтролиорцәа рыцхыраарала.

АҞӘА, рашәара 1 – Sputnik, Бадри Есиава. Рашәара 1 азы Гагра акоммуналтә шәарақәа рзы иаку Ацентр аадыртит ҳәа Sputnik иазеиҭеиҳәеит акассатә ԥхьаӡаратә центр аиҳабы Давид Багаҭелиа.

"Аԥхьаӡаратә центр аԥҵоуп ахатәхаҿқәеи аиурист хаҿқәеи рҟынтәи ашәарақәа реилырккаразы. Ишьақәыргылоуп акомпиутортә программа ҷыда. Абонентцәа ҳҭаалар алшоит Демерџь-иԥа, 35 аҭыӡҭыԥ ала. Ара ашәарақәа рыдыркылоит", - иҳәеит Багаҭелиа.

Иара иҳәеит еизгоу аԥара абонентцәа амаҵзурақәа рызҭо аиҿкаарақәа рыбжьара. Гагра иахьаҵанакуа акоммуналтә маҵзура зхы иазырхәо быжь-нызқь хатәхаҿи 350 иурист хаҿи ыҟоуп.

Гагра акассатә ԥхьаӡаратә центр аадыртаанӡа акоммуналтә маҵзурақәа рзы ашәарақәа мҩаԥыргон аконтролиорцәа рыцхыраарала.

"Абонентцәа ацентр аҿы хаҭа-хаҭала амаҵзурақәа ршәаразы аквитанциақәа рырҭоит. Нас уи ала акассаҿ аԥара ршәалоит. 2022 шықәсазы иазыԥхьагәаҳҭоит акоммуналтә маҵзурақәа рзы атерминалқәа рыла аԥара рыхшәаара, иахьазы афымцалашареи аҭелтә еимадареи рзы ишыҟарҵо аиԥш",- иҳәоит иара.

Аиҿкаарақәа рабонентцәа рыбжьара иҟоуп згәамбзиара иахҟьаны ацентр ахь изымнеиуа. Абри аан урҭ аҩныҟа ирызнеиуеит аконтролиорцәа.

Аԥарашәара зыгәҭакым аиҿкаара аиуристцәа рыдгалахоит.

"Арҭ рҩызцәа ауаа аԥхьа адырра раҳҭоит. Ҳарзыԥшуеит. Нас аӡбарҭахь ҳашшуеит. Убас аӡбарҭахь инаҳашьҭхьо ашәҟәқәа маҷым. Иҟоуп аӡбарҭатә приставцәа аулафахәы ианахырхуа ауал", - еиҭеиҳәоит Багаҭелиа.

Аӡбарҭахь адокументқәа нарышьҭуеит абонент ҩышықәса рыҩныҵҟа аԥарашәара мҩаԥимгацзар.

17

Аԥсны акоронавирус зыхьуа даҽа 45-ҩык рыцлеит иҳаҩсыз уахыки-ҽнаки рыла

3
(ирҿыцуп 22:57 12.06.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15756-ҩык ыҟоуп, ргәы бзиахеит 15069-ҩык, рыԥсҭазаара иалҵит 238-ҩык.

АҞӘА, рашәара 12 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 177-ҩык атестқәа рзыҟаҵан, урҭ рахьтә 45-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 38-ҩык, урҭ рахьтә 37-ҩык акоронавирус адиагноз рзышьақәыргылоуп, рҭагылазаашьа бааԥсуп 12-ҩык, ибжьаратәуп - 26-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 40-ҩык апациентцәа, урҭ рахьтә ааҩык рҭагылазаашьа уадаҩуп. Очамчыра ирхәышәтәуеит 10-ҩык, Гагратәи ахәышәтәырҭаҿы - 15-ҩык, Тҟәарчалтәи ахәышәтәырҭаҿы - ааҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

3
Атемақәа:
Аҿкычымазара – акоронавирус Аԥсни адунеи аҿи: иалкаау

Хра злоу ахҭысқәа: Ҳашыги Ҷолокәуеи атәыла ахада инашьҭымҭа иазкны

4
(ирҿыцуп 16:15 12.06.2021)
Аԥсны ахада иҿы иҟоу аинформациатә хархәагақәа рымадаразы аусбарҭа аиҳабы Алхас Ҷолокәуеи, ажурналист, агазеҭ "Чегемскаиа правда" аредактор хада Инал Ҳашыги иалацәажәеит атәыла ахада инашьҭымҭа аҵакы, уи абжьажьра азакәан ахьынӡеиланаго.
Хра злоу ахҭысқәа: Ҳашыги Ҷолокәуеи атәыла ахада инашьҭымҭа иазкны

Атәыла ахада апарламент ахь инашьҭымҭа - хықәкыс иамоузеи ари апроцедура? Иара абжьажьра азакәан абанӡеиланаго? Аԥсны ахада апарламент ахь инашьҭымҭа ари ашықәс азы иарбоума, уи аҟны иалкаахо ахырхарҭа хадақәа, анашьҭымҭа аҵакы, адунеитә ԥышәа уҳәа азҵаарақәа ирылацәажәеит арадио Sputnik аефир аҟны Аԥсны ахада иҿы иҟоу аинформациатә хархәагақәа рымадаразы аусбарҭа аиҳабы Алхас Ҷолокәуа, ажурналист, агазеҭ "Чегемскаиа правда" аредактор хада Инал Ҳашыг.

"…Аԥсны аҳәынҭқарра ахада анапхгарахь даннеи, ԥшьымзгьы ахылахьан ашықәс, ачымазара ҿыц анцәырҵыз акәын. Ҳазхиаӡамызт аҭагылазаашьа, иҟалараны иҟазгьы аҳәара уадаҩын, амч-алша, ахшыҩ зегьы уи аус иазкын. Насгьы ԥҟаралагьы Аԥсны ауаа рацәа алархәны аиԥыларақәа, аизарақәа рымҩаԥгара аанкылан… уи ауп изызку анашьҭымҭа аҟамзаара, аха уи инаваргыланы исҳәар сҭахуп аҳәынҭқарра ахада изныкымкәа апарламент аҟны аиԥыларақәа шимаз, уаҟа Аԥсны аҩнуҵҟатәи адәныҟатәи аполитика далацәажәеит. Аԥсны аҭагылазаашьазы аҳәынҭқарра ахада ипланқәа ауаа рахь ицәыргамызт ҳәа аҳәарагьы иашам… Акызаҵәык, исҳәар исҭаху, анашьҭымҭа ҟалоит, амала ианыҟало абри амш ауп ҳәа макьана аҳәара сазхиам", - ҳәа азгәеиҭеит Ҷолокәуа.

Арҭ ашықәсқәа рзы аҳәынҭқарра ахада апарламент ахь инашьҭымҭа ритуалтә традициак аҳасабала ҳахәаԥшуан, инарҵауланы адокумент ҭҵааны, иҟаҳҵо шыҟаҳҵо атәы уиаҟара ҳазхәыцуамызт ҳәа агәаанагара ааирԥшит ажурналист Инал Ҳашыг.

Инеиҵыху аицәажәара шәазыӡырҩы аудиофаил аҟны.

4