Урыстәыла ацҳаражәҳәаҩ иҳәамҭа Аԥсны Апарламент ахҳәаа анаҭеит

9
(ирҿыцуп 16:37 17.06.2021)
Аԥсны иҟоу Урыстәыла ацҳаражәҳәаҩ Алексеи Двинианин авидеоцҳа "Москва – Аҟәа – Цхинвал" аҟны аҳәамҭа ҟаиҵеит урыстәылатәи аинвесторцәа рзы аԥснытәи азакәанԥҵара аԥкырақәа ҟанаҵоит аинфраструктуратә обиектқәа рахь аинвестицианашьҭразы ҳәа.

АҞӘА, рашәара 17 - Sputnik. Аԥсны Апарламент рашәара 10 азы Sputnik апресс-центр аҿы Аԥсны иҟоу Урыстәыла ацҳаражәҳәаҩ Алексеи Двинианин авидеоцҳа "Москва – Аҟәа – Цхинвал" аҟны иҳәамҭа ахҳәаа анаҭеит.

Алексеи Двинианин авидеоцҳа аҳәаақәа ирҭагӡаны ареспубликахь аинвестициақәа ирызкыз азҵаара аҭакс иҳәеит аинвестициақәа – атәылақәа рыҩба рзакәанԥҵарақәа ргармонизациеи азеиԥш социал-економикатә ҵакыра аԥҵареи рыпрограммаҿ акрызҵазкуа усны ишыҟоу.

Ацҳаражәҳәаҩ игәаанагарала, урыстәылатәи аинвесторцәа рзы аԥснытәи азакәанԥҵара аԥкрақәа ҟанаҵоит аинфраструктуратә обиектқәа рахь аинвестицианашьҭарзы.

"Атәыла ахада, аԥыза-министр, аԥыза-министр ихаҭыԥуаҩ, аекономика аминистр Кристина Константин-иԥҳа Озган арҭ азҵаарақәа рыӡбаразы урыстәылатәи рколлегацәеи дареи аилацәажәарақәа мҩаԥыргоит. Исҭахуп Жәлар Реизара - Апарламент адепутатцәа рахь ааԥхьара ҟасҵарц Аԥсны аполитикатә напхгара ари азҵаара аӡбараҿ адгылара рырҭарц, аҭакԥхықәра рхахьы иргарц", - ҳәа иҳәеит Двинианин.

Аԥснытәи апарламентарицәа рҳәамҭаҿ иазгәарҭеит ари аҩыза аҳәамҭа иҟаҵәҟьоу аҭагылазаашьа ииашамкәа ишаанарԥшуа – Жәлар Реизара - Апарламент адепутатцәа русура ишахымҟьо урыстәылатәи аинвестициақәа рыҟамзаара.

"Ари аҩыза аҳәамҭа адепутаттә корпус оумашәа ирбеит. Ҳақәгәыӷуеит иара хықәкыс иамаз аҳәынҭқарра азакәанԥҵаратә усбарҭа гәаӷшақә иазхәыцны адискриминациа азура акәмызт ҳәа", - азгәарҭоит адепутатцәа.

Дара иазгәарҭеит ацҳаражәҳәаҩ дыззааҭгылаз 2017 шықәсазы ирыдыркылаз "Афымцаенергетиказ" азакәан ареспублика аенергосистема алагалақәа рзура шыԥнамкуа.

"Еиуеиԥшым аинвестициатә проектқәа рынагӡара гәахәарыла иҳадаҳкылоит иарбанзаалак аекономикатә усхкқәа рҟны. Аџьшьара цәырнагоит ацҳаражәҳәаҩ ицитата – урыстәылатәи аинвестициақәа радԥхьалара азҵаараҿы политикатә проблема ыҟаӡам, Аԥсны анапхгара аполитикатә ҭаххара рымоуп аԥкрақәа раԥыхразы ҳәа. Аиаша уҳәозар, аинвестициақәа ирԥырхагоу аполитикатә ҟазшьа змоу апроблемақәа ыҟоуп ҳәа ҳаздырам", - ҳәа аҳәоит аҳәамҭаҿы.

Уи адагьы адепутатцәа агәра ганы иҟоуп аинвестициатә усура аусхк аҟны аԥснытәи азакәанԥҵара ҳаамҭа ишақәшәо азы.

"Аҳәаанырцәтә инвестициақәа" рзы Аԥсны азакәани егьырҭ анорматив-зинтә актқәеи иаԥырҵоит аҭагылазаашьа бзиақәа аҳәаанырцә инвесторцәа рзы. Аха убри аан арҭ апроектқәа ҳажәлар ринтересқәа ирҿамгылозароуп", - ҳәа рҳәеит Апарламент аҿы.

Апарламентари ирҳәеит Жәлар Реизара ажәлар рзы актуалра змоу азҵаарақәа рыҽшрыцәхьарымкуа.

9

Аԥснытәи ақалақь "акадифаамҭаз" аԥсшьара ахьалырхуа аҭыԥқәа ирхыԥхьаӡалоуп

3
Аԥсшьаразы анхарҭа ахьҿарҵо амаҵзура TVIL.RU иалнакааит "акадифаамҭаз" ҩыџьаны аԥсшьараз еиҳа иалырхуа аҭыԥқәа.

АҞӘА, нанҳәа 3 - Sputnik. Афон ҿыц "акадифаамҭаз" ҩыџьа рыԥсшьараз еиҳа иахьалыркаауа аҭыԥқәа иреиуоуп ҳәа аанацҳауеит TVIL.RU.

Амаҵзура астатистикала атуристцәа ари аамҭазы аиҳарак 1 - 10 уахы рзы аҭыԥқәа ҿарҵоит, ари аамҭала уахыки-ҽнаки рыҩнуҵҟа 1,5 - 6 нызқь мааҭ рныхра иазыхиоуп.

Аԥсшьараз зегь раасҭа ахәқәа мариоуп Афон ҿыц, иҳаракуп — Лахденпохьиа. Аромантикатә ԥсшьараз иалырхуеит Иалтеи Шәачеи.

Ахырхарҭақәа жәаба рсиа:

  • Иалта - 3 559 мааҭ 8 уахык
  • Шәача - 2 195 мааҭ 9 уахык
  • Санкт-Петербург - 2 944 мааҭ 5 уахык
  • Афон ҿыц - 1 456 мааҭ 10 уахык
  • Лахденпохьиа - 6 019 мааҭ 7 уахык
  • Ростов-на-Дону - 2 165 мааҭ 1 уахык
  • Калининград - 1 955 мааҭ 6,5 уахы
  • Казань - 2 062 мааҭ 4 уахык
  • Кисловодск - 1 691 мааҭ 10 уахык
  • Воронеж - 1 912 мааҭ 6 уахык.

Асиа шьақәыргылоуп 2021 шықәса нанҳәа-цәыббра рзтәи аҿаҵарақәа рыла.

Иара убас шәаԥхьар ҟалоит:

 

3
Сурам Сакания

Сақаниа Маркәыла иԥшааз ажәытә ҳаԥшьақәа рзы: еиҳагьы сеигәырӷьон урҭ сахьақәак рнызҭгьы

6
(ирҿыцуп 14:32 03.08.2021)
Аԥсни Урыстәылеи рархеологцәа Маркәылатәи анхарҭаҟны еицымҩаԥыргоз сынтәатәи ажрақәа раан анышәаԥшь иалху хә-ҳаԥшьак рыԥшааит. Археологиатә експедициа аԥсуа ган напхгара азызуа, аҵарауаҩ Сурам Сақаниа арадиоефир аҿы еиҭеиҳәеит аԥшаахқәа ртәы.
Сақаниа Маркәыла иԥшааз ажәытә ҳаԥшьақәа рзы: еиҳагьы сеигәырӷьон урҭ сахьақәак рнызҭгьы

"Археологцәа ҳанеицу есымша акы ҳазыԥшуп. Абаҳа аҿы аныҵаҳҵо абри акыр аанарԥшуама ҳәа ҳаԥшуеит. Аҳаԥшьақәа анаҳба, ҳаигәырӷьеит, аха еиҳагьы сеигәырӷьон урҭ сахьақәак рнызар, аԥсышәала жәақәак рнызар, ианамуӡах, ма латын бызшәала, ма бырзен бызшәала, аха уи аҩыза анасыԥ макьана иаҳмоуцт. Ҳазыԥшуп, ҳахьӡар ҟалоит", – ҳәа еиҭеиҳәеит Сақаниа.

Очамчыра араион Маркәыла ақыҭан 2013 шықәсазы иԥшаан антикатә аамҭа иаҵанакуа, абжьарашәышықәсагьы здызкыло ижәытәӡатәиу анхарҭа. Урыстәылеи Аԥсни рархеологцәа ари аҭыԥ аҭҵаара рнапы алакуп. Аҭҵаарақәа аурыс ган напхгара алҭоит Урыстәыла аҭҵаарадыррақәа Ракадемиа Археологиа аинститут аклассикатә археологиа аҟәша аиҳабы, аҭоурыхтә ҭҵаарадыррақәа ркандидат Галина Требелева, аԥсуа ган - Сурам Сақаниа.

Маркәылатәи аиланхарҭа жәытә – Аԥсуа ҭӡеибаркыра ду аҩнуҵҟа иҟоу, ажәытәтәи ауааԥсыра рыбзазареи рҭоурыхи зныԥшуа ҭыԥуп.

Инеиҵыху аиҿцәажәара шәазыӡырҩыр шәылшоит аудиофаил аҿы.

6