"Амцахареи" "Аиҭаиреи" аполитикатә еидгыла аԥырҵоит

12
Амчра иадгылоу аполитикатә партиақәа "Амцахареи" "Аиҭаиреи" аидгыла аԥҵара рыгәҭакуп.

АҞӘА, рашәара 24 – Sputnik. Аполитикатә партиақәа "Амцахареи" "Аиҭаиреи" еизааигәоуп, иахьатәи амчра иадгылаҩцәоуп, Аслан Бжьаниа ахада иҿы аус зуло Ауаажәларратә хеилак аԥҵара иақәшаҳаҭуп. Убри азы иӡбоуп арҭ аҩпартиак реидгыла аԥҵара ҳәа арадио Sputnik иазеиҭеиҳәеит аполитикатә партиа "Амцахара" анапхгаҩы Лиосик Цыгәба.

Иара иажәақәа рыла, ауаажәларра ахықәкы хадас ирымоу ареспублика аҿиара алыршаразы, уи акәша-мыкәша аҽеидкыларазы ахада иҟаиҵаз аԥшьгамҭа – Ауаажәларратә хеилак аԥҵара актуалуп.

"Аӡәгьы изы имаӡаӡам ҳаиҿкаарақәа ахада иалхрақәа раан Аслан Бжьаниа ишидгылоз. Алхрақәа рышьҭахьгьы ҳҿаԥхьа иқәгылоу азҵаарақәа аӡбара рҭахуп", - ҳәа иҳәеит иара.

Атәыла аҿаԥхьа иқәгылоу апроблемақәа рыӡбара хықәкыс иманы ахада Ауаажәларратә хеилак аԥҵара аҭахуп ҳәа ишьаны ажәалагала ҟаиҵеит, актуалтә проблемақәа адәахьы акәымкәа ҭаацәашәала, диалогла иӡбахаларцаз иҳәеит Цыгәба.

Аполитикатә партиа "Аиҭаира" акәзаргьы, позициала ирзааигәоу еиҿкаароуп. Апартиа "Амцахара" апрезидиум ахантәаҩы Заур Адлеиба иазгәеиҭеит атәыла аҩнуҵҟа аибарххара атәыла аҿиара ишаныԥшуа.

"Атәыла аҩнуҵҟа иаӡәыкымкәа ианыҟоу аҳәынҭқарра акыр иаԥырхагоуп, еиҳарак ҳара ҳаиԥш зхыԥхьаӡара маҷу аҳәынҭқарраҿы", - ҳәа иҳәеит иара.

Адлеиба иажәақәа рыла, ареспубликаҿы агәаанагара рацәа ахьыҟоу ахьыбзиоугьы ыҟоуп, аха убри аан ихарҟьацәажәазар, аҭагылазаашьа шьақәнаҟьар алшоит. Иара ишиҳәо ала, аполитикатә гәаанагара иахьмырԥшкәа аӡәгьы атәыла аҵшәаара азин имам.

"Ҳара зегьы еилаҳкаауазароуп иҟоу амчра ҳадгылоу ҳадымгылоу иахьмырԥшкәа, атәыла аҿиара ҳаҿамгылар шакәу", - ҳәа иҳәеит иара.

Аполитикатә партиа "Аиҭаира" аполитсовет рашәара 18 азы инарҭбаау аилатәара мҩаԥнагеит. Аиԥылараҿы ирылацәажәан ауаажәларра-политикатә ҭагылазаашьа азҵаарақәа. Алахәылацәа зегьы еицҿакрыла иақәшаҳаҭхеит апартиа "Амцахареи" дареи реидылара. Иара убасгьы ирылацәажәеит 2022 шықәсазы иҟалараны иҟоуп Апарламент ахь алхрақәа рҟны акандидатцәа рсиақәа реиҿкаара.

Рашәара 22 азы апартиа "Амцахара" апрезидиум еилацәажәеит "Аиҭаиреи" дареи реидҵара азҵааразы.

Аиԥылара алахәылацәа ахада иаԥшьгамҭа ишадгылоз рҳәеит аконструктивтә диалог амҩаԥгаразы, агәаанагарақәа реимдаразы, аҳәынҭқарратәии ауаажәларратәии институтқәа рырҿиаразы.

"Ауаажәларраҿ амчреи аоппозициеи рдиалог иазыԥшуп, ирҭахуп атәыла аҩнуҵҟа аҭышәынтәалара", - ҳәа азгәарҭеит дара.

Аидгыла аԥҵара иахықәкы хаданы иҟоуп аконструктивтә мчрақәа рконсолидациа, Аконституциа аҳәаақәа ирҭагӡаны ауаажәларра-политикатә ҭышәынтәалара, ицәырҵуа азҵаарақәа ҭынчмҩала рыӡбра. Абри азы апартиа "Амцахара" апрезидиум аӡбара аднакылеит аусеицура мҩаԥгалазарц.

"Амцахареи" "Аиҭаиреи" хара имгакәа аиқәшаҳаҭра анагӡаразы ршьаҿақәа ирылацәажәараны иҟоуп.

12

Аԥсны ААР "ампыҵахалара ахыхраз" Қырҭтәыла арезолиуциа апроект ахҳәаа анаҭеит

2
Ампыҵахалара ахыхрази аурыс-ақырҭуа еимак ҭынчмҩала аҭышәныртәаларази арезолиуциа уаанӡа, нанҳәа 2 рзы иалацәажәеит Қырҭтәыла Апарламент азинтә зҵаарақәа реилак аҿы.

АҞӘА, нанҳәа 3 - Sputnik. Аԥсны Адәныҟатәи аусқәа рминистрра "ампыҵахалара ахыхрази" аурыс-ақырҭуа еимак ҭынчмҩала аҭышәныртәаларази арезолиуциа "аԥсҭазаара иаҟәыгоу, аԥсуа-ақырҭуа еиҿагылара амзыз еиҭазкуа" акоуп ҳәа азгәанаҭеит. Абри атәы кьыԥхьуп аусбарҭа асаит аҿы.

Аԥсны ААР адырра ала, Қырҭтәыла иаднакылаз адокумент аҿы Урыстәылатәи Афедерациахь ааԥхьара ҟанаҵоит Аԥсни Аахыҵ Уаԥстәылеи "ампыҵахалара рхыхраз", иазхаҵоу рхьыԥшымра мап ацәнакырц, иара убасгьы аетникатә ҟазшьала ауаа еилырымхларц, Женеватәи аиҿцәажәарақәа рҟны аконструктивтә ҟазшьала ахы мҩаԥнагаларц азы ҳәа.

Аусбарҭаҿ иазгәарҭеит 1992 шықәсазы Аԥсны аибашьра алагаразы аҭакԥхықәра зду Қырҭтәыла шакәу, иара убас, Аахыҵ Уаԥстәыла 2008 шықәсазы аҭыԥ змаз ахҭысқәа рызгьы ахара дара ишрыду.

"Иазгәаҭатәуп Қырҭтәыла амчрақәа ишырҭаху аԥсуа-ақырҭуа еимак аурыс-ақырҭуа еимак акәушәа ауаа дырбара, аха уи изаҟаразаалак ҵаҵӷәык амам. Иззыҟарҵогьы аҭакԥхықәра рҽацәхьакны ахара ирыду мап ацәыркырц ауп", - ҳәа аҳәоит ареспублика адәныҟаполитикатә усбарҭа ахҳәааҿы.

Аԥсны адәныҟатәи аусқәа рминистрра Женеватәи аиҿцәажәарақәа ирлахәылоу жәларбжьаратәи абжьаҟазацәа рахь ааԥхьара ҟанаҵоит 1992–1993 шықәсқәеи 2008 шықәсеи рзы Қырҭтәыла ахымҩаԥгашьа цәгьоуроуп ҳәа иршьарц, Аԥсни Қырҭтәылеи рыбжьара амч ахамырхәаразы аиқәшаҳаҭра анапаҵаҩра иацхраарц.

Аусбарҭа иара убасгьы ааԥхьара ҟанаҵоит Аҟәеи Қарҭи рыбжьара еиҟароу аҳәынҭқаррабжьаратә еиҿцәажәарақәа рышьақәыргылара иацхраарц Аахыҵ Кавказ акраамҭатәи аҭынчреи аҭышәынтәалареи реиҿкаара хықәкыс иҟаҵаны.

Аԥсуа дипломатцәа иазгәарҭоит ақырҭуа ган Женеватәи аиҿцәажәарақәа рҳәаақәа ирҭагӡаны аполитикатә ҭахра аарԥшны рконструктивтә позициа иқәныҟәар шрыхәҭоу. Избанзар аиҿцәажәарақәа рлахәылацәа зегьы ззыԥшу Қырҭтәыла аконструктивтә хымҩаԥгашьа ауп.

2

Аԥснытәи ақалақь "акадифаамҭаз" аԥсшьара ахьалырхуа аҭыԥқәа ирхыԥхьаӡалоуп

5
Аԥсшьаразы анхарҭа ахьҿарҵо амаҵзура TVIL.RU иалнакааит "акадифаамҭаз" ҩыџьаны аԥсшьараз еиҳа иалырхуа аҭыԥқәа.

АҞӘА, нанҳәа 3 - Sputnik. Афон ҿыц "акадифаамҭаз" ҩыџьа рыԥсшьараз еиҳа иахьалыркаауа аҭыԥқәа иреиуоуп ҳәа аанацҳауеит TVIL.RU.

Амаҵзура астатистикала атуристцәа ари аамҭазы аиҳарак 1 - 10 уахы рзы аҭыԥқәа ҿарҵоит, ари аамҭала уахыки-ҽнаки рыҩнуҵҟа 1,5 - 6 нызқь мааҭ рныхра иазыхиоуп.

Аԥсшьараз зегь раасҭа ахәқәа мариоуп Афон ҿыц, иҳаракуп — Лахденпохьиа. Аромантикатә ԥсшьараз иалырхуеит Иалтеи Шәачеи.

Ахырхарҭақәа жәаба рсиа:

  • Иалта - 3 559 мааҭ 8 уахык
  • Шәача - 2 195 мааҭ 9 уахык
  • Санкт-Петербург - 2 944 мааҭ 5 уахык
  • Афон ҿыц - 1 456 мааҭ 10 уахык
  • Лахденпохьиа - 6 019 мааҭ 7 уахык
  • Ростов-на-Дону - 2 165 мааҭ 1 уахык
  • Калининград - 1 955 мааҭ 6,5 уахы
  • Казань - 2 062 мааҭ 4 уахык
  • Кисловодск - 1 691 мааҭ 10 уахык
  • Воронеж - 1 912 мааҭ 6 уахык.

Асиа шьақәыргылоуп 2021 шықәса нанҳәа-цәыббра рзтәи аҿаҵарақәа рыла.

Иара убас шәаԥхьар ҟалоит:

 

5