Аҟәатәи амбулатортә центр COVID-19 азы ауаа рацәаны иадҵаалоит

9
(ирҿыцуп 18:28 24.06.2021)
COVID-19 азы Аҟәатәи амбулатортә центр аусура иалагеит 2020 шықәса абҵарамзазы. Абри аамҭа иалагӡаны Ацентр аусзуҩцәеи амобилтә бригадеи зқьи хәышәҩык рҟынӡа апациентцәа рымаҵ рухьеит.

АҞӘА, рашәара 24 – Sputnik. Аҟәатәи амбулатортә центр ахь COVID-19 азы ауаа рацәа ыдҵаало иалагеит ҳәа иҳәеит арадио Sputnik аинтервиу азҭаз ацентр акоординатор Валери Џьынџьал.

"Уаанӡа мышкы ахы-аҵыхәала жәаҩык рҟынӡа ҳҭаауазар, аҵыхәтәантәи хымш рыҩнуҵҟа ҩынҩажәа-ҩынҩажәи хәҩык мышкала иҳадҵаалоит. Абас аизҳарахь атенденциа мҩаԥысуеижьҭеи мчыбжьык ирықәуп", - ҳәа иҳәеит иара.

Амбулатортә центр ахь инеиуа COVID-19 ԥсыҽны ма ибжьаратәны измоу роуп. Ацентр аус ауеит асааҭ жәба инаркны фбанӡа.

"Ҳара апациентцәа ӡрила еиқәҳаршәом, аҳақьымцәа рус мҩаԥаагом. Ара амедиаҳәшьцәа иаҳҭаауа хәыда-ԥсада агәыр ршьа-рда иаларҵоит, ржьышәа иаларҵоит, иара убасгьы аҳақьым аконсультациа ииҭоит, ПЦР-анализи КТеи рымҩаԥгаразы адәықәҵабӷьыцқәа риҭоит", - иҳәоит Џьынџьал.

Иара убасгьы Ацентр аҟазауаа аҩныҟа инеины ацхыраара ҟарҵоит.

"Аобиективтә мзызқәа ирхырҟьаны ҳара ҳахь анеира злымшо рахь ауп ҳахьнеиуа", - ҳәа иҳәоит иара.

Акоронавирустә ҭагылазаашьа еиҭашәаанӡа ара аус руан медиаҳәшьаки ҳақьымки, аха рашәара 23 раахыс даҽа медиаҳәшьакгьы аусура далагеит ҳәа азгәеиҭоит иара.

"Аҳҭнықалақь агәабзиарахьчара аусбарҭа ацхыраарала аштат иацаҳҵеит, аха агәаанагара сымоуп уигьы шазымхо азы. Аӡынразтәи аамҭақәа рзы аҳақьым, ҩыџьа амедиаҳәшьцәа, администратор аус руан, аха хҩахаха рымамызт, избанзар мышкала 50–ҩык иреиҵамкәа рымаҵ руыр акәын", - ҳәа иҳәоит Ацентр акоординатор.

Ацентр аҿы 11 иара ыҟоуп апациентцәа рзы, аха урҭ азхом. Ауаа рацәоуп шьыжьнаҵы, асааҭ 9:00 - 10:30 рзы, 20-25-ҩык аамҭак ала ианнеиуа ыҟоуп.

Акоординатор иазгәеиҭоит досу ихы дашьклаԥшлар шакәу акоронавирус шьҭимкаарц.

Амбулатортә центр Аҟәатәи аҭыӡҭыԥ: Ақырҭаа имҩ., 2 (Ацҳа Ҟаԥшь). Аимадара аномер +79409156202, +79407602602; Whatsapp: +7940915620

9
Атемақәа:
Аҿкычымазара – акоронавирус Аԥсни адунеи аҿи: иалкаау (1372)

Раионк аԥсҭазаараҟынтә: Габлиа Акаԥа ақыҭа иамоу ауадаҩрақәа ртәы

6
(ирҿыцуп 19:23 25.07.2021)
Акаԥа ақыҭа ахада Зураб Габлиа арадио Sputnik аефир аҿы еиҭеиҳәеит афымцалашареи амҩақәеи рзы ирымоу ауадаҩра атәы, иҳәеит анхацәа ирыбзазашьоу.
Раионк аԥсҭазаараҟынтә: Габлиа ақыҭа Акаԥа иамоу ауадаҩрақәа ртәы

Аиҿцәажәараҿы ақыҭа ахада иҳәеит уаанӡа аӡазы ирымаз ауадаҩра шаԥыху, уажәы изыргәамҵуаны иҟоу афымцалашара амчхара амаҷра шакәу.

"2014 шықәса рзы иргылан ашьаҟақәа. Уи аахас ацәаҳәақәа рыҟаҵара алмыршахеит. Ааигәа ҳақәдыргәыӷит ари апроблема шыӡбахо. Ҳара иаҳҭахуп 3 километра афымцатә цәаҳәақәа. Иахьа иҳамоу алашара амчхара даара имаҷуп, иҳазхаӡом", - ҳәа еиҭеиҳәеит Габлиа.

Акаԥа ақыҭа ахада иҳәеит амҩақәа рҭагылазаашьа уамак ишҽеим, убри аан ақыҭатәи ауахәама иаҭаауа рхыԥхьаӡара рацәоуп, аԥсшьаҩцәагьы уахь иналаҵаны.

"Ааигәа иҟаз амшцәгьаан амҩа еиҳагьы иԥхасҭахеит. Акомиссиа ыҟан, ирбеит, иаарласны аҭагылазаашьа аҽеиҭанакып ҳәа ҳақәгәыӷуеит", - ҳәа азгәеиҭеит Габлиа.

Иаҳа инеиҵыху аиҿцәажәара шәазыӡырҩыр шәылшоит аудиофаил аҿы.

Иара убас шәаԥхьар ҟалоит:

6
Кукушка

"Ҳцәаӷәап - ҳрашәап, ҳрашәап - ҳцәаӷәап": анхаҩы дызҟаҭәар зылшо аԥсаатәқәа

38
(ирҿыцуп 15:23 25.07.2021)
Анхаҩы дманшәалахарц, иҽаҩра иԥыларц иҽызцәихьчоз аԥсаатәқәа ртәы шәаԥхьарц шәылшоит Аԥсуаҭҵааратә институт афольклортә лабораториа аусзуҩ Сусанна Ҭаниаԥҳа лматериал аҟны.

Аԥхаррақәа аныҟалалак, анхаҩы адгьыл аус адулара иҽаназикуа аамҭа ицәырнагоит ажәлар разхаҵарақәеи разгәаҭарақәеи жәпакы. Урҭ азхаҵарақәа хықәкыла ауаҩы ацәгьа иацәыхьчара, имоу аманшәалара, амарымажара реиқәырхара, реихаҳароуп изызку.

Сусанна Ҭаниаԥҳа, Sputnik

Ааԥын, аԥсабара зегьы анҿыхо, аԥсаатә амра шәахәақәа иреигәырӷьаны рашәа хаақәа анцәырырго, аԥсуаа шьыжьымҭан џьара усура ҳәа ианааҵыҵуаз, еиҳарак адгьыл иқәаарыхырц, амхы иҭаларц ргәы ианҭарк, "какалк мкыкәа", даҽакала иуҳәозар, "ҿаҵак ымфакәа" ицомызт.

Ауаҩы акрыфа, имч ҭаны, игәы алаҟаны аусура иҽаназикуа еиӷьу ыҟам. Ацәгьа ухьыԥшӡом, иара унапы злаукыз аусгьы иаҳа иуцааиуеит.

Шьыжьнаҵы акрыфара ргәы ианаҭахӡамыз, хыхьчага ҳасабала аусура рнапы аларкаанӡа аџьыкхыш маҷк нарыхәларыԥсон, зынӡа рыца ак ҭамкәа иҟамларц азы. Аԥсуаа иазгәарҭоит, анхаҩы ҿмырҵысы (акрымфакәа) ааԥын имхы данҭала, зыбжьы иаҳаз аԥсаатә даҟаҭәоит ҳәа (азгә: "аҟаҭәара" - одоление птицы).

Ҿмырҵысы ажәҵыс аҷырҷырбжьы уаҳар – ахьара, ахш ԥхасҭахалоит (иҵәыҵәлоит) рҳәоит. Амалаӷәыри аҟармаҵыси рышәаҳәабжь уаҳар – унасыԥ дыркьаҿуеит. Убри аҟнытә, ааԥын рҽырцәырыхьчон абарҭ аԥсаатәқәа: акәыкәу, ажәҵыс, ашамыхьажь, амалаӷәыр, аҟармаҵыс…

Акәыкәу

Акәыкәу ршьуам, еишәарыцом. Аԥсуаа рҟны иҟоуп азхаҵара "ҿмырҵысы акәыкәу абжьы заҳаз даҟаҭәоит, иҽаҩра беиахом" ҳәа. Акәыкәу аҿыҭра ианалаго (инықәырԥшшәа мшаԥымзазы) аӡәырҩы анхацәа ахлафаауеит: "Ҳцәаӷәап - ҳрашәап, ҳрашәап - ҳцәаӷәап!" - аҳәоит ҳәа. Акәыкәу аҿыҭра ианаҟәыҵлак – лаҵараамҭам. Илауҵогьы ҟалом.

Уамашәа иубаша, ари аԥсаатә хәыҷы ахьӡ аџьа, адгьыл ақәаарыхра аамҭа ишадҳәалоугьы, ахыргәаҟра ацәымӷуп. Егьырҭ аԥсаатәқәа реиԥш аҭра ҟанаҵом. Акәыкәу аҟара иаашьо, зыхшара змааӡо "имцәаӷәои имрашәои" ԥсаатә ыҟам.

Ашамыхьажь

Ашамыхьажь иамоуп даҽа хьӡык, уи "абжьоубжьыкь" ауп. Ԥсаатә ӷроуп, аԥыц ҵәызуп, иаҩцамкәа иқәырхәоуп. Аԥҷаҷар харгьежьаауп, еиларгыланы ахы иқәгылоуп. Ашамыхьажь зымшьҭа цәгьоу ԥсаатәны иахәаԥшуеит. Ашҭа инҭаԥырны аҩны азааигәара махәык инықәтәар, рыцҳашьарада иԥхадырсуан.

Амалаӷәыр

Амалаӷәыр аиаҵәареи аҩеижьреи еимазкуа ԥштәуп иамоу. Даараӡа ҵыс ԥшӡоуп, амала ишымышьҭацәгьоу ҳәатәуп. Ауаҩы иитәу ҟәыхк - амаҭәа ҽыҭк, мамзаргьы ахцәы аԥыц иаҿыҵакны иагар, аманшәаламрақәа ичычоит, илаиҵазгьы иԥылом.

Ажәытәан аҽаҩра бзиа ззаамрыхыз "амалаӷәыр уаҟаҭәеит" ҳәа ихыччауан.

38