Кәыдрытәи аиҩхааҟны еибырҭо-еимырхуа ацҳа аархәоит уаанӡа иҭабгаз ахаҭыԥан

12
(ирҿыцуп 10:28 06.07.2021)
Кәыдры ихыз уаанӡатәи ацҳа ҭабгеит ахәаша ԥхынгәы 2 рзы Кәыдрытәи аиҩхаа Гьанҵәыш ақыҭа иахьаҵанакуа. Аамҭалатәи аныҟәаразы асхема еиҿкаауп.

АҞӘА, ԥхынгәы 6 – Sputnik, Асмаҭ Ҵәыџьԥҳа. Гьанҵәыш ақыҭан еилаҳаз ацҳа ахҵаразы иаахәатәуп иҷыдоу еибырҭо-еимырхуа автомҩатә цҳа, уи 9 200 000 мааҭ иаԥсоуп, абри атәы Аԥсны аԥыза-министр Александр Анқәаб атәыла ахада Аслан Бжьаниа изеиҭеиҳәеит ԥхынгәы 5 рзы имҩаԥысыз реилацәажәараан.

Иара иажәақәа рыла, уаанӡа Кәыдры ихыз ацҳа аиҭашьақәыргылара алшаӡом, избанзар уи азы аихеихаԥсатә техника ду аҭахуп, аха уи уахь изнеиӡом. Убри азы иаахәатәуп абжьаратә шәагаа змоу еибырҭо-еимырхуа автомҩатә цҳа. Ари аҩыза ацҳа еиҳарак ишьақәдыргылоит арратә ҵакы змоу автомобилтә мҩақәа аамҭа кьаҿк иалагӡаны реиҭашьақәыргыларазы, уи аура 32 метра иҟоуп.

Абри аҩыза ацҳа 9 200 000 мааҭ иаԥсоуп. Аҭыԥ аҟынӡа анагара 300 000 мааҭ иаԥсахоит. Иааухәар ҟалоит Таганрог иҳәеит Анқәаб.

"Ари зегь иреиӷьу авариант ауп. Уа иарбанзаалак атехника ықәсыр алшоит. Уи аахәаразы абиуџьет аҟны аԥара ыҟаӡам, аха даҽа мҩак ала иҳаԥшаароуп. Абри аҩыза ацҳа акыр шықәса игылазаауеит, алшарақәа дууп", - иҳәеит иара. 

Аԥсны ахада Аслан Бжьаниа иазгәеиҭеит ари апроблема ирласны ишыӡбатәу, ажәалагалагьы ҟаиҵеит Урыстәыла АШәМ аҳәаахьчаратә маҵзурахьы ма Урыстәыла Атәылахьчара аминистррахь иадҵааларц, рышьҭаҵарҭақәа рҟны абри аҩыза ацҳа ыҟоу иҟаму еилыркаарц. 

Гьанҵәыш ақыҭан Кәыдры ихыз ацҳа ҭабгеит ахәаша ԥхынгәы 2 рзы.

Аҟазауаа ражәақәа рыла, аӡхыҵраан адгьыл ҿнаӡәӡәааит. Уи иахҟьеит ацҳа аҭабгарагьы. Уи инамаданы аамҭак азы қыҭақәаки Кәыдрытәи аҩхааҿы иҟоу Урыстәыла АШәМ Аҳәаахьчаратә усбарҭа архәҭақәа ҩбеи рымҩа аркхеит.

Аамҭала ажәытә цҳала аиҭанеиааира азыӡбоуп. Ацҳа ашьаҟақәа шәарҭам, ақә ҟаҵатәны иҟоуп.

12

Ҳагба: Лада Кавказ имҩаԥысуа ахҭысқәа зегьы Урыстәыла ақәыӷәӷәароуп хықәкыс ирымоу

9
(ирҿыцуп 17:05 03.08.2021)
Ермантәылеи Азербаиџьани аҵыхәтәантәи реиҿагыларақәа, ақырҭуа парламент ампыҵахалара ахыхраз арезолиуциа апроект, арҭқәа зегьы хықәкы хадас ирымоу Урыстәыла Лада Кавказ ақәыӷәӷәароуп хәа азгәеиҭеит арадио Sputnik аефир аҟны аполитолог Беслан Ҳагба.
Ҳагба: Лада Кавказ имҩаԥысуа ахҭысқәа зегьы Урыстәыла ақәыӷәӷәароуп хықәкыс ирымоу

Ладатәи Кавказ хҭысқәак аныҟалалак, ахҭысқәа зегьы имҩаԥысуа рҟны еимадарак уԥшаар ҟалоит. Қырҭтәылеи, Аԥсни, Ермантәылеи, Азербаиџьани хәыҷык еицәыхаразаргьы, ҵыԥх иҟалаз ахҭысқәа рышьҭахь, Азербаиџьан аибашьраҟны аиааира анырга ашьҭахь Ладатәи Кавказ аҭышәныртәалара аганахь зынӡа аҽаԥсахит. Аҭынчратә политика ҳәа Урыстәылатәи Афедерациа имҩаԥырго Ашьха Ҟарабах аганахьала аҭышәынтәалара згәамԥхо аҳәынҭқаррақәа рацәоуп. Адеоккупациа ҳәа ахьыӡҵаны Қырҭтәыла ишьҭырхыз ақәҵара иаҿурԥшыр ҟалоит Украина Донбасси Крыми рганахьала ишьҭнахыз ақәҵарақәа. Иара убас, ааигәа Зеленски(Украина ахада - азгәаҭа) Аԥсны аҳәааҟны дааны иҟаиҵоз аҳәамҭақәа, арҭқәа зегьы еидҳәалоуп, Урыстәыла ақәыӷәӷәароуп еиҳарак аԥхьа иргыланы хықәкыс ирымоу", - ҳәа азгәеиҭеит Ҳагба.

Шәазыӡырҩы аудио.

Иара убас шәаԥхьар ҟалоит:

9

Аԥсны ААР "ампыҵахалара ахыхраз" Қырҭтәыла арезолиуциа апроект ахҳәаа анаҭеит

6
Ампыҵахалара ахыхрази аурыс-ақырҭуа еимак ҭынчмҩала аҭышәныртәаларази арезолиуциа уаанӡа, нанҳәа 2 рзы иалацәажәеит Қырҭтәыла Апарламент азинтә зҵаарақәа реилак аҿы.

АҞӘА, нанҳәа 3 - Sputnik. Аԥсны Адәныҟатәи аусқәа рминистрра "ампыҵахалара ахыхрази" аурыс-ақырҭуа еимак ҭынчмҩала аҭышәныртәаларази арезолиуциа "аԥсҭазаара иаҟәыгоу, аԥсуа-ақырҭуа еиҿагылара амзыз еиҭазкуа" акоуп ҳәа азгәанаҭеит. Абри атәы кьыԥхьуп аусбарҭа асаит аҿы.

Аԥсны ААР адырра ала, Қырҭтәыла иаднакылаз адокумент аҿы Урыстәылатәи Афедерациахь ааԥхьара ҟанаҵоит Аԥсни Аахыҵ Уаԥстәылеи "ампыҵахалара рхыхраз", иазхаҵоу рхьыԥшымра мап ацәнакырц, иара убасгьы аетникатә ҟазшьала ауаа еилырымхларц, Женеватәи аиҿцәажәарақәа рҟны аконструктивтә ҟазшьала ахы мҩаԥнагаларц азы ҳәа.

Аусбарҭаҿ иазгәарҭеит 1992 шықәсазы Аԥсны аибашьра алагаразы аҭакԥхықәра зду Қырҭтәыла шакәу, иара убас, Аахыҵ Уаԥстәыла 2008 шықәсазы аҭыԥ змаз ахҭысқәа рызгьы ахара дара ишрыду.

"Иазгәаҭатәуп Қырҭтәыла амчрақәа ишырҭаху аԥсуа-ақырҭуа еимак аурыс-ақырҭуа еимак акәушәа ауаа дырбара, аха уи изаҟаразаалак ҵаҵӷәык амам. Иззыҟарҵогьы аҭакԥхықәра рҽацәхьакны ахара ирыду мап ацәыркырц ауп", - ҳәа аҳәоит ареспублика адәныҟаполитикатә усбарҭа ахҳәааҿы.

Аԥсны адәныҟатәи аусқәа рминистрра Женеватәи аиҿцәажәарақәа ирлахәылоу жәларбжьаратәи абжьаҟазацәа рахь ааԥхьара ҟанаҵоит 1992–1993 шықәсқәеи 2008 шықәсеи рзы Қырҭтәыла ахымҩаԥгашьа цәгьоуроуп ҳәа иршьарц, Аԥсни Қырҭтәылеи рыбжьара амч ахамырхәаразы аиқәшаҳаҭра анапаҵаҩра иацхраарц.

Аусбарҭа иара убасгьы ааԥхьара ҟанаҵоит Аҟәеи Қарҭи рыбжьара еиҟароу аҳәынҭқаррабжьаратә еиҿцәажәарақәа рышьақәыргылара иацхраарц Аахыҵ Кавказ акраамҭатәи аҭынчреи аҭышәынтәалареи реиҿкаара хықәкыс иҟаҵаны.

Аԥсуа дипломатцәа иазгәарҭоит ақырҭуа ган Женеватәи аиҿцәажәарақәа рҳәаақәа ирҭагӡаны аполитикатә ҭахра аарԥшны рконструктивтә позициа иқәныҟәар шрыхәҭоу. Избанзар аиҿцәажәарақәа рлахәылацәа зегьы ззыԥшу Қырҭтәыла аконструктивтә хымҩаԥгашьа ауп.

6