Аҟәа ақалақь ахадараҿы иалацәажәеит амшцәгьа ахҟьаԥҟьақәа раԥыхра атәы

15
(ирҿыцуп 10:24 07.07.2021)
Амҽыша ԥхынгәы 4 рзы Аԥсны иасыз аԥшатлакәи илеиз ақәаршыҩи ирхҟьаны Аҟәа ақалакь аԥхасҭа аиуит, аҩнқәа рхыбқәа рыхнахит, аҵлақәа каҳаит, афымцацәаҳәақәа ԥыҵәҵәеит.

АҞӘА, ԥхынгәы 6 – Sputnik. Аҟәа ақалақь ахада Беслан Ешба амшцәгьа ахҟьаԥҟьақәа раԥыхразы иаԥҵоу аоперативтә штаб реилатәара мҩаԥигеит, абри атәы аанацҳауеит ақалақь ахадара асаит.

Беслан Ешба иазгәеиҭеит, ақалақь аусбарҭақәа икаҳаз аҵлақәа зегьы амҩақәа ишырныргаз, ақалақь аҩныҵаҟа шыдрыцқьаз. Инаҵшьны иазгәеиҭеит аамҭа кьаҿк ала, ишхыбтәу аԥша зхыбқәа рықәнахыз аҩнеихагылақәа.

"Иҟоу аԥхасҭа макьана ахәшьара ҳзаҭаӡом, уи хазтәи усуроуп, уажә имҩаԥааго арыцқьаратә усурақәа инарываргыланы", - азгәеиҭеит Ешба.

Аҟәа аҩнусбарҭақәа рхадацәа еиҭарҳәеит амшцәгьа ирынаҭаз аахақәа ртәы. Ирҳәеит 45 ҩнеихагыла, хәҭа-ҳәҭалеи инеизакныи рхыбқәа рыхнахит. Ақалақь ахадара иатәу ԥшь-гәыԥк аҩнқәа рхыбра иаҿуп. Ҩнқәак рыҟны аусурақәа хыркәшахоит ԥхынгәы 6 рзы. 

Аҩнусбарҭақәа рхадацәеи анхарҭа акоммуналтә усбарҭа анџьнырцәеи, ааха зауз аҩнқәа зегьы иаарласны иҟоу аԥхасҭазы ашәҟәынҵа аздырхиарц рыдиҵеит Беслан Ешба.

Аҟәа ақалақь ахада ихаҭыԥуаҩ Асҭамыр Ашәба дазааҭгылеит, амедицинатә усбарҭақәа рҭагылазаашьа. Иҳәеит ахәшәтәырҭақәа зегьы абжьааԥаны еиԥш аус шыруа.

Ақалақь ашколқәеи ахәыҷбаҳчақәеи ракәзар, ааха роуит жәа-школки ахәыҷбаҳчақәа жәбеи.

"Ахәыҷбаҳча "Алашара" ахыб абжак ахнашәеит, ашҭа иҭагылаз аҵлақәа жәаба рҟынӡа хжәеит. Ахыбраз аусурақәа цоит, икаҳаз аҵлақәа рықәгаразы ҳацхыраара иазыԥшуп. Иара убас, аҳабла ажәытәаҿ иҟоу ахәыҷбаҳчагь аус ауӡом ахыб ахьахнахыз иахҟьаны", - азгәеиҭеит Ашәба.

Ақалақь афымцалашара аҭагылазаашьа атәы дазааҭгылеит Аҟәатәи афымцеихшарҭақәа русбарҭа аиҳабы. Уи иажәақәа рыла ақалақь ауааԥсыра 90% лашарала еиқәыршәахоит амш анҵәамҭазы. Афымцалашара ааха ӷәӷәа зегь раасҭа иахьаиуз Алашарбага аҳаблан ауп. 

"Алашара иахьа зегьы ироуеит ҳәа сызҳәом, избанзар ирацәоуп ацәаҳәақәа ахьыԥцәоу, урҭ реиҭашьақәыргылараз иаҭахуп аамҭеи амчи", - азгәеиҭеит Џьынџьал.

Аҳҭнықалақь ахадара амҩатә ныҟәара ашәарҭадареи атранспорт аҟәшеи реиҳабы Ҭемыр Абӷаџь иажәақәа рыла, Алашарбагеи Кәыдрытәи амҩеи рҟны ауп атроллеибустә цәаҳәақәа еиҳарак ааха ахьроуз. Кәыдрытәи амҩа аҟны игылоу 28 фымцашьаҟа ааха роуит, ацәаҳәақәа ԥыҵәҵәоуп.

"Аусурақәа шцац ицоит. Икаҳаз ашьаҟақәа рышьҭыхразы иҷыдоу атехника аҭахуп", - иҳәеит Абӷаџь.

Аштаб аусура иалахәыз Аԥсны аекологиазы аҳәынҭқаратә еилакы аханатәаҩы Савели Ҷыҭанаа иҳәеит, аилак аусзуҩцәа аҭагылазаашьа ҭҵааны иалыркаауеит зеиқәырхара зылшо аҵлақәа.

Ҷыҭанаа иара убасгьы иҳәеит, ақалақь аҩныҵаҟа аҵлақәа машәыр ҟарымҵарц азын ианаамҭоу икарҿҿалатәуп ҳәа.

Беслан Ешба иазгәеиҭеит, аекологцәа рылкаа ҟамҵакәан ихынааз аҵлақәа ишрыламкьысуа.

15

Аԥсны акоронавирус зланы зыԥсҭазаара иалҵыз 300-ҩык рҟынӡа инаӡеит

10
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 21579-ҩык ыҟоуп, ргәы бзиахеит 17307-ҩык, рыԥсҭазаара иалҵит 300-ҩык.

АҞӘА, ԥхынгәы 28 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 517-ҩык атестқәа рзыҟаҵан, урҭ рахьтә 162-ҩык рцәа акоронавирус шалаз аадырԥшит, абри атәы аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәшәтәырҭаҿы иԥсҭазаара далҵит 69 шықәса зхыҵуаз апациент.

Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 171-ҩык, рҭагылазаашьа бааԥсуп 46-ҩык, ибжьаратәуп - 56-ҩык.

Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 43-ҩык апациентцәа, урҭ рахьтә 15-ҩык рҭагылазаашьа уадаҩуп. Очамчыра ирхәшәтәуеит 25-ҩык. Гагратәи ахәшәтәырҭаҿы - 47-ҩык, урҭ рахьтә 15-ҩык рҭагылазаашьа уадаҩуп. Тҟәарчалтәи ахәшәтәырҭаҿы - 15-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

 

10
Атемақәа:
Аҿкычымазара – акоронавирус Аԥсни адунеи аҿи: иалкаау

Аԥсуа инхашьа-инҵышьа: иблахкыгоу аетнографиатә парк

9
(ирҿыцуп 21:43 28.07.2021)
Ԥхынгәы 27 рзы Гәдоуҭа араион Мгәыӡырхәа ақыҭан иаатит аԥсуа инхашьа -инҵышьа, иԥсҭазаашьа атәы аазырԥшуа амилаҭтә парк "Аԥсны".

Гәдоуҭа араион Мгәыӡырхәа ақыҭан иаарту аетнографиатә парк аҵакырадгьыл аа-гектарк рҟынӡа инаӡоит. Аҭааҩцәа ирбарц рылшоит ажәытәан аԥсуаа рынхашьа-рынҵышьа зеиԥшраз, иахьынхоз рыҩнқәа шеиҿкааз, рхы иадырхәоз амаҭәарқәеи аҩнымаҭәеи, афатә ахьыҟарҵоз.

Апарк аҵакырадгьыл аҟны иҭагылоуп аԥацха, амҳара, акәасқьа, ара аекскурсиақәа мҩаԥыргоит.

Амилаҭтә парк "Аԥсны" аргыларазы мҽхакы ҭбаала аусурақәа хышықәса ицон. Апроект авторс дамоуп анаплакҩы Мзауҷ Ԥлиа, ацхыраара ирҭеит аҵарауаҩ Адгәыр Какоба, асахьаҭыхҩы Баҭал Џьапуа, Аԥсны абџьарҟаҵаҩцәа рхеилак аиҳабы Ҭемыр Ӡиӡариа.

Аԥсны ауааԥсыреи урыстәылтәи аррамаҵзурауааи рзы апарк аҭалара хәыдаԥсадоуп.

Иара убас шәаԥхьар ҟалоит:

 

9
  • © Sputnik / Акоп Кущян

    Ԥхынгәы 27 рзы Гәдоуҭа араион Мгәыӡырхәа ақыҭан иаатит аԥсуа инхашьа -инҵышьа, иԥсҭазаашьа атәы аазырԥшуа амилаҭтә парк "Аԥсны".

  • © Sputnik / Томас Тхайцук

    Аҭааҩцәа араҟа ирбарц рылшоит ажәытәан аԥсуаа рынхарҭақәа зеиԥшрази, рыҩныи-рашҭеи, рхы иадырхәоз амаҭәарқәеи

  • © Sputnik / Томас Тхайцук

    Апарк аҵакырадгьыл аҟны иҭагылоу ахыбрақәа амузеи ҳасабла иҟоуп

  • © Sputnik / Томас Тхайцук

    Аԥсуа милаҭтә маҭәа. Автор Елена Лабахәуа.

  • © Sputnik / Томас Тхайцук

    Ари агара Тҟәарчал амҩаду аҟны иангылан иԥшааит асахьаҭыхҩы Баҭал Џьапуа.

  • © Sputnik / Томас Тхайцук

    Амузеи иҩнагылоу амаҭәарқәа еидкылан шықәсқәак рыла.

  • © Sputnik / Томас Тхайцук

    еиҳарак анхацәа ҳамҭас ирырҭеит

  • © Sputnik / Томас Тхайцук

    Ахыбрақәа рҟны аекскурсиақәа мҩаԥыргоит. Амҩаԥгаҩцәа еиҭарҳәоит аԥсуаа рҵасқәеи, рқьабзқәеи зеиԥшроу

  • © Sputnik / Томас Тхайцук

    Амҳара – ҿыц еибагаз рыҩноуп

  • © Sputnik / Томас Тхайцук

    "Амҳара – ҩны хәыҷуп, иаабац аԥацхеиԥш ишышны аҭыӡқәа шьҭхуп. Уи аҩнду ашьҭахь идыргылон, жәабаҟа-ҩажәаҟа метра иаацәыхараны", – ҳәа иҩуан аҵарауаҩ Шьалуа Инал-иԥа.

  • © Sputnik / Томас Тхайцук

    Амҳара иҩнагылаз аҩнымаҭәа

  • © Sputnik / Томас Тхайцук

    Апарк аҵакырадгьыл аа-гектарк рҟынӡа инаӡоит

  • © Sputnik / Томас Тхайцук

    Аԥсуа иашҭа иаакәыршаны аанда абыц ала ишшуп.

  • © Sputnik / Томас Тхайцук

    Аԥш зҭарыԥсо- аца

  • © Sputnik / Томас Тхайцук

    Мҷышьҭа ахықәаҿы иаарту апарк аҵакырадгьыл иҭагылоу ахыбрақәеи, ирыҩнагылоу амаҭәарқәеи аԥсуареи, ақабзқәеи, аҵасқәеи бзиа избо зегьы азҿлымҳара рзаҵалар алшоит.

  • © Sputnik / Томас Тхайцук

    Аԥсуа иԥацха аиҿкаашьа

  • © Sputnik / Томас Тхайцук

    Апарк аҟны ахыци-ахәымпали рыла ахысшьеи, аҽы ақәтәашьеи ддырҵоит

  • © Sputnik / Томас Тхайцук

    Апарк аҟны аус руеит ажьирҭеи аҳаԥшьаӡратә аҟазарҭеи