Аспорти аполитикеи ирызкны: адепутат Светлана Журова аԥсуа ҿар драцәажәеит

18
(ирҿыцуп 10:13 08.07.2021)
Светлана Журова – урыстәылатәи аҵаақәшьқьырҩы, аолимпиатә чемпионка, Аҳәынҭқарратә Дума адепутат. Аԥсуа ҿари лареи реиԥылара еиҿкаан Аԥсны агәыҳалалра ацҳаражәҳәаҩцәеи аплатформа "Аԥсны аԥеиԥши" рыбзоурала.

АҞӘА, ԥхынгәы 8 - Sputnik, Асмаҭ Ҵәыџьԥҳа. Урыстәыла Аҳәынҭқарратә Дума адепутат Светлана Журова Аҟәа аԥсуа ҿар дырԥылеит ахаша ԥхынгәы 7 рзы.

Аиԥылара мҩаԥысит азҵаареи аҭаки рформат ала. Аԥснытәи ашколхәыҷқәеи астудентцәеи алшара рыман адепутат ргәы иҵхоз азҵаарақәа лырҭартә.

© Sputnik / Асмат Цвижба
Урыстәылатәи Афедерациа Аҳәынҭқарратә Дума адепутат Светлана Журова аԥсуа ҿар драцәажәеит

Раԥхьаӡа иргылан астудентцәа еилыркаар рҭахын аолимпиатә чемпионка аполитикахь анеира лгәазырԥхаз. Журова иазгәалҭеит, лара есымшагьы активла ауаажәларратәи аполитикатәи проектқәа дышрылахәыз, урыстәылатәии жәларбжьаратәии аиԥыларақәа дышрылахәыз, убас лара дшеицгәарҭаз.

"Сара абаҩхатәра сыман ҳәа азгәарҭеит, насгьы џьара бзиарак аҟаҵара сылшартә алшара соуит. Ленинградтәи аобласт аҿы ирыԥхьаӡеит Аҳәынҭдумахь сцароуп ҳәа. Сахьнеиз аусура даара исгәаԥхеит", - лҳәеит лара.

ААУ жәларбжьаратәи аизыҟазаашьақәа рзанааҭ ахәбатәи акурс астудентка Адель Хәырхәмал азҵаара лылҭеит Журова рыпрофессионалтә усуразы хықәкы хадас илымоу арбану ҳәа.

Адепутат ҭакс илылҭеит дарбанзаалак аполитик изы - алхрақәа рҟны аиааира агара шакәу, уи абзоурала лара ҩаԥхьа алшара лоуеит ауааԥсыра ирзеиӷьу ауснагӡатәқәа рымҩаԥгара, рыԥсҭазаара аиӷьтәра, баша аус шылымуа аилкаара.

11-тәи акласс аҿы аҵара зҵо Аслан Хышба адепутат иабжьылгарц длыҳәеит аспорт ахь раԥхьаӡа акәны зшьаҿа еихызго ауаҩы иҿаԥхьа дҵақәас иқәиргылар акәу лҳәарц.

"Раԥхьа иргыланы - аҽазыҟаҵарақәа уҭахызар ауп, уҩызцәа бзиа иубалароуп, избанзар аҽазыҟаҵарақәа рҿы уҩызцәа ҟамлар, даара иуадаҩхоит уус, акгьы алҵӡом. Иара убас, хымԥада, уус бзиа иубоазроуп", - лҳәеит лара.

Журова лгәаанагарала, Аԥсны аиқәԥарақәа анарха роур алшоит, аха ахырхарҭа ҿыцқәагьы ирызхәыцтәуп - афигуратә ҵаақәшьқьырра аӡәы иҭаххар ҟалоит, ма ахоккеи, убри азы аинфраструктура рҿиатәуп лҳәеит лара. 

Астудентка Милана Џьапуаԥҳа длазҵааит аспортсменка девизс илымоу, насгьы ԥхьаҟа ацаразы илыхә арбану.

"Аспорт иазкыз сымшынҵа алагон Софиа Ковалевскаиа лажәақәа рыла: "Угәы иаанаго ҳәа, иҟауҵаша ҟаҵа, нас иҟалалакгьы ҟалааит" ҳәа. Абри ауп сыԥсҭазаараҿы сзықәныҟәо", - лҳәеит адепутат.

Журова лԥылара далахәын Ашәарҭадаратә хеилак амаӡаныҟәгаҩ Сергеи Шамба. Иара иазгәеиҭеит Светлана Журова "Урыстәыла иреиӷьу аҳәса дышреиуоу", лара аспорт аҿы адагьы, аполитикаҿгьы аихьӡара дуқәа лымоуп ҳәа азгәеиҭеит.

Светлана Журова – урыстәылатәи аҵаақәшьқьырҩы, Урыстәыла зҽаԥсазтәыз аспорт азҟаза, урыстәылатәии жәларбжьаратәи аицлабрақәа рҟны изныкымкәа аиааира лгахьеит, дчемпионхахьеит.

2007 шықәсазы лара "Иаку Урыстәыла" апартиаҟынтәи Ленинградтәи аобласт аҿы ддепутатхеит, 2013 шықәса инаркны Урыстәыла Аҳәынҭқарратә Дума дадепутатхеит.

18

Аԥсны акоронавирус зланы зыԥсҭазаара иалҵыз 300-ҩык рҟынӡа инаӡеит

10
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 21579-ҩык ыҟоуп, ргәы бзиахеит 17307-ҩык, рыԥсҭазаара иалҵит 300-ҩык.

АҞӘА, ԥхынгәы 28 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 517-ҩык атестқәа рзыҟаҵан, урҭ рахьтә 162-ҩык рцәа акоронавирус шалаз аадырԥшит, абри атәы аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәшәтәырҭаҿы иԥсҭазаара далҵит 69 шықәса зхыҵуаз апациент.

Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 171-ҩык, рҭагылазаашьа бааԥсуп 46-ҩык, ибжьаратәуп - 56-ҩык.

Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 43-ҩык апациентцәа, урҭ рахьтә 15-ҩык рҭагылазаашьа уадаҩуп. Очамчыра ирхәшәтәуеит 25-ҩык. Гагратәи ахәшәтәырҭаҿы - 47-ҩык, урҭ рахьтә 15-ҩык рҭагылазаашьа уадаҩуп. Тҟәарчалтәи ахәшәтәырҭаҿы - 15-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

 

10
Атемақәа:
Аҿкычымазара – акоронавирус Аԥсни адунеи аҿи: иалкаау

Аԥсуа инхашьа-инҵышьа: иблахкыгоу аетнографиатә парк

9
(ирҿыцуп 21:43 28.07.2021)
Ԥхынгәы 27 рзы Гәдоуҭа араион Мгәыӡырхәа ақыҭан иаатит аԥсуа инхашьа -инҵышьа, иԥсҭазаашьа атәы аазырԥшуа амилаҭтә парк "Аԥсны".

Гәдоуҭа араион Мгәыӡырхәа ақыҭан иаарту аетнографиатә парк аҵакырадгьыл аа-гектарк рҟынӡа инаӡоит. Аҭааҩцәа ирбарц рылшоит ажәытәан аԥсуаа рынхашьа-рынҵышьа зеиԥшраз, иахьынхоз рыҩнқәа шеиҿкааз, рхы иадырхәоз амаҭәарқәеи аҩнымаҭәеи, афатә ахьыҟарҵоз.

Апарк аҵакырадгьыл аҟны иҭагылоуп аԥацха, амҳара, акәасқьа, ара аекскурсиақәа мҩаԥыргоит.

Амилаҭтә парк "Аԥсны" аргыларазы мҽхакы ҭбаала аусурақәа хышықәса ицон. Апроект авторс дамоуп анаплакҩы Мзауҷ Ԥлиа, ацхыраара ирҭеит аҵарауаҩ Адгәыр Какоба, асахьаҭыхҩы Баҭал Џьапуа, Аԥсны абџьарҟаҵаҩцәа рхеилак аиҳабы Ҭемыр Ӡиӡариа.

Аԥсны ауааԥсыреи урыстәылтәи аррамаҵзурауааи рзы апарк аҭалара хәыдаԥсадоуп.

Иара убас шәаԥхьар ҟалоит:

 

9
  • © Sputnik / Акоп Кущян

    Ԥхынгәы 27 рзы Гәдоуҭа араион Мгәыӡырхәа ақыҭан иаатит аԥсуа инхашьа -инҵышьа, иԥсҭазаашьа атәы аазырԥшуа амилаҭтә парк "Аԥсны".

  • © Sputnik / Томас Тхайцук

    Аҭааҩцәа араҟа ирбарц рылшоит ажәытәан аԥсуаа рынхарҭақәа зеиԥшрази, рыҩныи-рашҭеи, рхы иадырхәоз амаҭәарқәеи

  • © Sputnik / Томас Тхайцук

    Апарк аҵакырадгьыл аҟны иҭагылоу ахыбрақәа амузеи ҳасабла иҟоуп

  • © Sputnik / Томас Тхайцук

    Аԥсуа милаҭтә маҭәа. Автор Елена Лабахәуа.

  • © Sputnik / Томас Тхайцук

    Ари агара Тҟәарчал амҩаду аҟны иангылан иԥшааит асахьаҭыхҩы Баҭал Џьапуа.

  • © Sputnik / Томас Тхайцук

    Амузеи иҩнагылоу амаҭәарқәа еидкылан шықәсқәак рыла.

  • © Sputnik / Томас Тхайцук

    еиҳарак анхацәа ҳамҭас ирырҭеит

  • © Sputnik / Томас Тхайцук

    Ахыбрақәа рҟны аекскурсиақәа мҩаԥыргоит. Амҩаԥгаҩцәа еиҭарҳәоит аԥсуаа рҵасқәеи, рқьабзқәеи зеиԥшроу

  • © Sputnik / Томас Тхайцук

    Амҳара – ҿыц еибагаз рыҩноуп

  • © Sputnik / Томас Тхайцук

    "Амҳара – ҩны хәыҷуп, иаабац аԥацхеиԥш ишышны аҭыӡқәа шьҭхуп. Уи аҩнду ашьҭахь идыргылон, жәабаҟа-ҩажәаҟа метра иаацәыхараны", – ҳәа иҩуан аҵарауаҩ Шьалуа Инал-иԥа.

  • © Sputnik / Томас Тхайцук

    Амҳара иҩнагылаз аҩнымаҭәа

  • © Sputnik / Томас Тхайцук

    Апарк аҵакырадгьыл аа-гектарк рҟынӡа инаӡоит

  • © Sputnik / Томас Тхайцук

    Аԥсуа иашҭа иаакәыршаны аанда абыц ала ишшуп.

  • © Sputnik / Томас Тхайцук

    Аԥш зҭарыԥсо- аца

  • © Sputnik / Томас Тхайцук

    Мҷышьҭа ахықәаҿы иаарту апарк аҵакырадгьыл иҭагылоу ахыбрақәеи, ирыҩнагылоу амаҭәарқәеи аԥсуареи, ақабзқәеи, аҵасқәеи бзиа избо зегьы азҿлымҳара рзаҵалар алшоит.

  • © Sputnik / Томас Тхайцук

    Аԥсуа иԥацха аиҿкаашьа

  • © Sputnik / Томас Тхайцук

    Апарк аҟны ахыци-ахәымпали рыла ахысшьеи, аҽы ақәтәашьеи ддырҵоит

  • © Sputnik / Томас Тхайцук

    Апарк аҟны аус руеит ажьирҭеи аҳаԥшьаӡратә аҟазарҭеи