Аҟәа араион ҿыц аҿы иҟаз ахысра иалахәыз рхарахгара шьақәдыргылоит ԥхынгәы 21 рзы

18
Аиҿахысра ҟалеит асабша ԥхынгәы 17 рзы ахәылԥаз Аҳабла ҿыц аҿы, уи иахҟьаны ҩыџьа рыԥсҭазаара иалҵит, аӡәы ахәрақәа иманы ахәшәтәырҭаҿы дышьҭоуп.

АҞӘА, ԥхынгәы 21 – Sputnik, Бадри Есиава. Аҟәа ақалақь апрокуратура аӡбарҭахь азыҳәа нанашьҭит ахысра иалахәын ҳәа агәызҩара ззыҟоу рхарахгара ашьақәыргыларазы. Абри атәы Sputnik иазеиҭеиҳәеит ақалақь апрокурор ихаҭыԥуаҩ Алиас Ҭраԥшь.

Аматериалқәа аӡбарҭахь инашьҭуп, аӡбра ԥхынгәы 21 азы иаднакылароуп.

"Аҟәа ақалақь апрокуратура ашьаусҭҵаараан азыҳәа нанашьҭит ауаҩшьра иалахәын ҳәа агәызҩара ззыҟоу Игор Гәдалиеи Аслан Зыхәбеи рганахь ала рхарахгара шьақәдырӷәӷәарц", - иҳәеит иара.

Ашьаус аматериалқәа рыла, ԥхынгәы 17 асааҭ 20:00 рзеиԥш Руслан Гәдалиа, Игорь Гәдалиа, Гарри Аҩӡба, Аслан Зыхәба заанаҵ еибыҳәаны амцабџьари аџьаԥҳани рыманы, изакәанымкәа Аслан Зыхәба зыԥсҟы икыз автомашьына "Nissan Skyline" ала имҩанганы инеит Аҟәа ақалақь В.Лакоба имҩеи Цәыббра 30 амҩеи реихысырҭаҿы игылоу ауарашыжәырҭахь Беслан Ӡыба иқәшәарц. Ари агәыԥ еиҭа хҩык рыцын даҽа машьынак иақәтәаны.

Аиԥылараан Ӡыбеи Руслан Гәдалиеи, Аҩӡбеи, Зыхәбеи аимак рыбжьалеит, аисра иалагеит. Убри аамҭаз Беслан Ӡыба ишьақәыргылам амцабџьар ааҭиган, ишидыруаз Руслан Гәдалиа диеихсны дишьит, Аслан Зыхәба дихәит. Ари зегьы амашьынаҟынтәи избоз ишьақәыргылам автоматтә бџьар змаз Игор Гәдалиа азеиԥшшәарҭаразы аҭагылазаашьа аԥҵаны жәантә еиҵамкәа ауарашыжәырҭа ахыбра иарбаны дхысон, убас ала Беслан Ӡыба дишьит.

Игор Гәдалиа иганахьала Аԥсны Ашьаустә закәанеидкыла ахәҭаҷ 99 ахәҭа 2 апункт "е" ала иазԥхьагәаҭоу ацәгьоуразы (азеиԥшшәарҭаратә умҭала ауаҩшьра) ашьаус хацыркуп. Руслан Гәдалиа, Гарри Аҩӡба, Аслан Зыхәба, Игор Гәдалиа рганахьала Аԥсны Ашьаустә закәанеидкыла ахәҭаҷ 217 ахәҭа 2 ала иазԥхьагәаҭоу ацәгьоуразы (абџьар, уи ахәҭа хадақәа, аџьаԥҳаны, иԥжәо амаҭәашьарқәа, иԥжәо амаҭәарқәа изакәанымкәа раахәара, ҽаӡәы иҭара, рыҭира, рыҵәахра, рымҩангара ма рныҟәгара, гәыԥҩык ауаа заанаҵ еибыҳәаны имҩаԥыргаз) ашьаус хацыркуп.

Руслан Гәдалиа ԥхынгәы 18 рзы амилициа аусзуҩцәа дааныркылеит.

Аслан Зыхәба Ареспубликатә хәшәтәырҭаҿы дрыхьчоит. Гарри Аҩӡба иаанкыларазы аоператив-усԥшааратә усмҩаԥгатәқәа ирыцырҵоит.

Заанаҵтәи ашьаусԥшаара мҩаԥнагоит Аҟәа ақалақь апрокуратура ашьаусԥшааратә гәыԥ.

18

Џьапуа еиҭеиҳәеит шаҟа мегаватт инамцхәны Гал араион аҟны афымца рхы иадырхәо

7
Гал араион ахада ихаҭыԥуаҩ Нарсоу Џьапуа арадио Sputnik арубрика "Раионк аԥсҭазаараҟынтә" аҳәаақәа ирҭагӡаны еиҭеиҳәеит ауаа инырхуа афымцалашара аиҵатәразы иарбан усқәоу ицо, амаининг маругақәа раарԥшра аганахьала аҭагылазаашьа зеиԥшроу атәы.
Раионк аԥсҭазаараҟынтә: Џьапуа Гал инырхуа афымцалашара аиҵатәра иазкны

"Амаининг азҵаара есымчыбжьа аус адаҳулоит, иҳаҩсыз аԥшьашазы аилацәажәара мҩаԥган афымцалашара ахә еизызго алархәны. Адҵа рыҭан досу рқыҭақәа рҟны агәаҭарақәа мҩаԥыргарц. Гал араион аҟны егьырҭ ашықәсқәа ирҿырԥшны инамцхәны рхы иадырхәо мегаваттки бжаки ауп", - иҳәеит Џьапуа.

Шәазыӡырҩы аудио.

Иара убас шәаԥхьар ҟалоит:

7
Атемақәа:
Аԥсны амаинингтә фермақәа раҿыхра
Мусорная свалка в городе Гал

Аԥсны иргылахо агәамсамкаԥсарҭа ахарџьнҵа Урыстәыла иҭырҵааит

6
(ирҿыцуп 18:52 26.07.2021)
Жәабранмзазы арадио Sputnik аинтервиу азҭаз Аԥсны акапиталтә ргылара аусбарҭа аиҳабы Ҭимур Агрба иҳәеит Гәылрыԥшь араион аҿы абзазаратә црыҵқәа ркаԥсарҭа 2021 шықәса лаҵарамзазы иалагоит ҳәа.

АҞӘА, ԥхынгәы 26 – Sputnik, Бадри Есиава. Абзазаратә црыҵқәа ркаԥсарҭа аргыларазы апроект-ахарџьнҵа шәҟәқәа Урыстәыла иҭырҵааит, абри атәы Sputnik иазеиҭеиҳәеит Аԥсны акапиталтә ргылара аусбарҭа аиҳабы ихаҭыԥуаҩ Демир Гамисониа.

"Краснодаркрайгосэкспертиза" аҟынтәи иҵоуроу аҭак ҳауит. Уажәы ари ахарџьнҵа аԥсуа ган агәаҭарақәа ихрыжьуеит. Сгәанала амчыбжь нҵәаанӡа иахәаԥшны аҭак ҟарҵоит", - иҳәеит иара.

Аусурақәа рзы иарбоуп 112 миллион мааҭ. Адгьылҵакыра 12 гектар ыҟоуп. Гамисониа ишиҳәаз ала аԥснытәи аган ашәҟәқәа ишақәшаҳаҭхалак Аԥсны акапиталтә ргылара аусбарҭеи анардадаҩи аиқәшаҳаҭра рыбжьарҵоит, анаҩс азаахә ршәоит.

Нардадаҩыс аԥсыуа еилахәырак алкаахоит, аха уи арбан макьана ишьақәыргылам.

"Аицлабра мҩаԥаагартә аилахәырақәа рацәаны иҳамам. Аха иҳамоуп аҭахрақәа дара рганахь ала – техникала еиқәшәоу, зыҩаӡара ҳараку зус иазҟазоуи зԥышәа ҳаракыуи ауаа змоу, иара убас афинанс аганахь ала иҭышәантәалоуи. Аиҿкаара арҭ аҭахрақәа ирықәшәозар ҳаилацәажәар алшоит", - иҳәеит Гамисониа.

Хәажәкырамзазы атәыла аиҳабыра агәамсамкаԥсарҭа аргыларазы Гәылрыԥшь араион Кациқыҭ аҿы 36 гектар адгьыл алыркааит. Ара иазԥхьагәаҭоуп ацрыҵқәа ҽыҭҽыҭла реиҵакәаҳара, иара убас апластикеи ацеллофани Аԥснынтәи иалганы ргара, избанзар урҭ адгьыл аҟны рыжра ҳекологиа иаԥырхагоуп.

2019 шықәса, мшаԥымзазы Алашарбага араион ауааԥсыра ҿҳәарадатәи акциа хацдыркит араион аҿы иҟоу агәамсамкаԥсарҭа аркразы. Еизаз агәамсамкаԥсарҭахь инеиуаз амҩа ркит. Уи иалҵшәаны мшаԥы 12, 2019 шықәса аиқәшаҳаҭра анапы аҵаҩын. Уи инақәыршәаны, аҳҭнықалақь абзазаратә црыҵқәа, Гәылрыԥшь араион аҿы агәамкаԥсарҭа дыргылаанӡа Гал араион ахь ирго иалагеит.

Шьашьикәара ақыҭан иҟоу агәамсамкаԥсарҭа Аҟәантәи инарго агәам заднакылаӡом 2021 шықәса анҵәамҭа инаркны ҳәа, ԥхынгәы 7 азы Sputnik иазеиҭеиҳәеит Гал араион ахада ихаҭыԥуаҩ Нарсоу Џьапуа.

6