АҞӘА, ԥхынгәы 23 - Sputnik. Аҟәа ақалақь ахада Беслан Ешба аковидҿагыларатә уснагӡатәқәа рхылаԥшра рӷәӷәазарц анапынҵа ҟаиҵеит ҳәа аҳәоит ақалақь ахадара асаит.
Ауааԥсыра акоронавирустә инфекциа рацәыхьчараз аусмҩаԥгатә цҵақәа амчра роуит ԥхынгәы 12 инаркны. Урҭ инарықәыршәаны ареспубликаҿы рзин ыҟам иарку ахыбрақәа рҿы амассатә уснагӡатәқәа рымҩаԥгара, акультура аусҳәарҭақәа русура.
Аҳҭнықалақь ахада иазгәеиҭеит ԥхынгәы нҵәаанӡа аџьармыкьақәа, ахәаахәҭратә обиектқәа, ауаажәларратә транспорт рҟны аҭагылазаашьа ҭышәныртәалатәуп ҳәа.
"Ахәаахәҭцәа ираҳәатәуп иаҳҳәо ҟамлар, аграфик шьақәыргылатәхоит ҳәа. Ари зегьы рзы иуадаҩуп, аиҳаракгьы акурорттә сезон аан. Ари аинформациа изыхәҭоу ирашәҳә", - иҳәеит иара.
Беслан Ешба инаҵшьны иазгәеиҭеит аиҳарак ахцәажәара аҭахны ишыҟоу ауаажәларратә транспорт – арныҟәцаҩцәа реиҳараҩык аԥкрақәа ирықәныҟәом. Аҟәатәи автотранспорттә наплакы аиҳабы Леонид Шәлымба иҳәеит аныҟәцаҩцәа 18-ҩык рҟынӡа шчымазцәоу. Асеиԥш ицар ауаажәларратә транспорт аҿы аус зуа шыҟамло.
Ешба АТН адиректор идиҵеит Аҳәынҭавтоинспекциа алархәны ареидтә усурақәа ирылагарц.
"Амашьынарныҟәцаҩцәа ҭакԥхықәрада рхы мҩаԥыргоит. Убри азы анаплакқәа рнапхгаҩцәеи, атранспорттә департаменти, Аҳәынҭавтоинспекциеи алархәны ареидтә усурақәа ирылагароуп", - иҳәеит иара.
Ахада Аԥсны ААИ анапхгара рахь аҳәара ҟаиҵеит ауаажәларратә транспорт аҿы асабрадақәа рныҟәгара еиҿыркаарц. Ешба иҳәеит сабрадала реиқәыршәара шеиҿкаахо.
"Ас мызкы-ҩымз ахымҩаԥгара аҭахуп, ачымазара лаҟәаанӡа. Аусура рӷәӷәатәуп. Асабрада мап ацәызкуа ахараԥса ршәароуп", - иҳәеит Ешба.
Аҟәа асанитартә ҳақьым хада Алла Белиаева аҭагылазаашьа даара ишәарҭоуп ҳәа ахылҳәааит, лара иазылыԥхьаӡоит алокдауан ада аиааира шыцәгьоу.
"Аҵыхәтәантәи фымз рыҩнуҵҟа ичмазаҩхаз 2620–ҩык ыҟазар, ԥхынгәы иаалагеижьҭеи амза 17 рҟынӡа 1006-ҩык чмазаҩхеит. Урҭ рҟынтәи шәҩык хәыҷқәоуп. Ауаа рыԥсра еиҳахеит. Шықәсыбжак аҩныҵҟа 24-ҩык ԥсызар, ԥхынгәы 1-17 рыҩнуҵҟа – 8-ҩык ԥсит. Сгәанала, локдаун ада ԥсыхәа ыҟам", - лҳәоит лара.
Аҟәатәи аҿкчымазаратә хәшәтәырҭа амедусзуҩцәа ирҳәеит ахәшәтәырҭа шҭәу. Уа уажәы 44 пациент шьҭоуп, 15-ҩык рҭагылазаашьа бааԥсуп. Аҳақьым хада Асҭамыр Гәниа иҳәеит ахәшәқәа рзы проблема шыҟам, аха амедперсонал шазымхо.
Аҟәатәи аполиклиника № 1 аҳақьым хада Лиана Амԥарԥҳа иазгәалҭеит ҳақьымк мышкы аҩнуҵҟа 200-ҩык рҟынӡа ачымазцәа шидикыло.
"Амш аахәлаанӡа аус руеит. Аполиклиникаҿы алаҵаҟаҵарагьы мҩаԥысуан. Х-нызқь рҟынӡа лаҵа ҟаҵан. Ауадаҩра ду ыҟоуп ", - азгәалҭеит Амԥарԥҳа.
Апедиатра Есма Гәниаԥҳа лажәақәа рыла, ачымазара аҽарцәгьеит ахәыҷқәа рыбжьарагьы. Ԥхынгәы 1 инаркны ахәыҷтәы поликлиникаҿ 405-ҩык ахәыҷқәа рыдыркылахьеит.
"Игоу 149 ПЦР рҟынтәи 123 алҵшәа ҵоура рыман", - лҳәеит апедиатр.
Аоперштаб адыррақәа рыла, Гәдоуҭатәи агоспиталь иҭоуп 188-ҩык. Апандемиа ҟалеижьҭеи 20780 хҭыс аарԥшуп.
