Сабрадада апассаџьырцәа мҩанызго ауаажәларратә транспорт ааныркыло иалагеит

22
Аԥсны ауаажәларратә транспорт апассаџьырцәеи арныҟәцаҩцәеи асабрадақәа ныҟәаргалароуп аԥкратә уснагӡатәқәа инарықәыршәаны. Уи еилазгаз 600 мааҭ ахараԥса иқәырҵоит.

АҞӘА, ԥхынгәы 29 – Sputnik. Аҟәа ақалақь ахадара Аԥсны ААИ адҵа рырҭеит асабрада зҿам апассаџьырцәа мҩаԥызго ауаажәларратә транспорт ааныркыларц ҳәа Аԥсуа телехәаԥшраҿы иҳәеит ақалақь ахада Беслан Ешба.

"Ааигәа инарҭбаау аилацәажәара ҳаман, аоперативтә штаб аилатәара мҩаԥаагеит аџьармыкьа ду, атранспорттә наплакқәа, амаҭәатә џьармыкьа рнапхгаҩцәа алархәны. Иазгәаҳҭеит ауаажәларратә транспорт иҭало ауаа асабрадақәа рҿазарц", - иҳәеит иара.

Ешба иажәақәа рыла ԥхынгәы 28 актәи азбжазы иаанкылан хә-автомашьынак.

"Рыцҳара дууп ҳуааԥсыра реиҳараҩык ҭакԥхықәрада рхы ахьымҩаԥырго, абарҭқәа азгәаҭаны ауп асеиԥш ауснагӡатәқәа рахь ҳазкылсыз. Ахараԥса 600 мааҭ роуп иҟоу" - иҳәеит Ешба.

Асанитартә ԥҟарақәа иқәымныҟәо ауаажәларратә крыфарҭақәа ҩнызқьмааҭ ахараԥса рықәырҵоит.

"Абри аганахь ала азакәанԥҵара аус адулатәуп. Ҳдепутатцәа уажәы ԥсшьара ицеит, аха ианыхынҳәлак арҭ азҵаарақәа ирызхәыцыроуп" - иҳәеит иара

Уажәазы ауаа еиҳа ирзымариоуп ахараԥса ашәара аԥҟарақәа рықәныҟәара аасҭа, ҳәа азгәеиҭеит Беслан Ешба.

22

Аԥсны даҽа 88-ҩык акоронавирус рыдырбалеит, ҩыџьа рыԥсҭазаара иалҵит

4
Аепидемиа ҟалеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 27353-ҩык рҟынӡа инаӡеит, ргәы бзиахеит 22404-ҩык ауааԥсыра, рыԥсҭазаара иалҵит 413-ҩык.

АҞӘА, цәыббра 25 – Sputnik. Иҳаҩсыз уахыки-ҽнаки рыла COVID-19 азы атестқәа арҭеит 370-ҩык Аԥсны ауааԥсыра, урҭ рахьтә 88-ҩык рцәа акоронавирус шалаз аадырԥшит.

Урыстәылатәи арратә госпиталь аҟны акоронавирус злаз ҩыџьа апациентцәа рыԥсҭазаара иалҵит: 1958 шықәсазы ииз ахаҵеи 1936 шықәсазы ииз аԥҳәыси. 

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 42-а, рҭагылазаашьа бааԥсуп ааҩык, ибжьаратәуп - 28-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 28-ҩык, урҭ рахьтә ааҩык апациентцәа рҭагылазаашьа уадаҩуп. Очамчыра ирхәышәтәуеит 9-ҩык, Гагратәи ахәышәтәырҭаҿы - 15-ҩык, урҭ рахьтә хҩык рҭагылазаашьа уадаҩуп. Тҟәарчалтәи ахәышәтәырҭаҿы - 8-ҩык апациентцәа. Аҟәа иҟоу амобилтә госпиталь аҿы - 64-ҩык апациентцәа, жәаҩык рҭагылазаашьа хьанҭоуп.

Аоперативтә штаб аҳәара ҟанаҵоит ауааԥсыра аҿкы рхы ацәырхьчаларц.

Акоронавирус иадҳәалоу ажәабжьқәа шәрыԥхьар ҟалоит абра>>

4
Атемақәа:
Аҿкычымазара – акоронавирус Аԥсни адунеи аҿи: иалкаау
(1:19 / 10.22Mb / просмотров видео: 6)

Ажьира, амца, аиха: Мгәыӡырхәа амаден рҭәаны абџьар шыҟарҵо

10
(ирҿыцуп 19:22 25.09.2021)
Гәдоуҭа араион Мгәыӡырхәа ақыҭан аетнопарк "Аԥсны" аҿы цәыббра 24 рзы иаадыртит ажьицәа-абџьарҟаҵаҩцәа раԥхьатәи рфестиваль "Аихамца". Уи иалахәуп Аԥсни Урыстәылеи рҟазацәа. Афестиваль мҩаԥыслоит хымш.

Ажьицәа-абџьарҟаҵаҩцәа рфестиваль Аԥсны раԥхьаӡа акәны еиҿыркааит. Уи цәыббра 24-26 рзы имҩаԥыслоит аетнопарк "Аԥсны" аҿы. Уи рхы аладырхәырц иааит аҭыԥантәиқәа рыдагьы, Иакутиа, Брест, Белгород, Маиҟәаԥ ақалақьқәа рҟынтәи аҟазацәагьы.

Хымш ирылагӡаны ажьицәа аиха дырҭәалоит, дамасктәии амоизака иаҩызоуи аџыр ҟарҵалоит, аԥсуа ҳәызбақәа, аҿыбџьар, ахҿақәа. Урҭ зегьы реиҳарак излырхуа Бырзышьха иҵхны илбааргаз 300 килограмм иҟоу аихамаден ауп.

Амаден аихамаҭәа алырхырц азы идыргылеит аихаӡырҭақәа ҩба, 1200 градус рҟынӡа ашоура ҭарҵоит.
Аҟазацәа рус арманшәаларазы ишьақәдыргылеит афрынақәа жәаба рҟынӡа, урҭ рахьтә ҩба уаанӡа ҳабацәа ишыҟарҵалоз еиԥш ахәы зқәу ацәала аҳауа ҭадыршәшәоит. Егьырҭ рҿы амца агаз ала ма афымцала аҳауа ҭадыршәшәоит.

Афестиваль аҟны зегь реиҳа азҿлымҳара зырҭаз аԥсуа ҳәызба акәхеит. Аҟазауаа шьоукы ргәы иҭоуп арҭ хымш рыҩнуҵҟа ҩба-ҩба, иара инеиҳангьы абџьарҿқәеи, иара убас итрадициатәу аԥсуа хҿақәеи рыҟаҵара.

Афестиваль аҟынтәи афотосахьақәа шәрыхәаԥшыр ҟалоит абра>>

10