Атуроператорцәа нанҳәамзазы Шәача аԥсшьаҩцәа еиҵахоит ҳәа азгәарҭоит

7
(ирҿыцуп 14:58 04.08.2021)
Нанҳәа 1 инаркны Краснодартәи атәылаҿацә аҿы асасааирҭақәа рыҩналаразы аусура иалагеит акоронавирус аламырҵәаразы иалагалаз аԥкра ҿыцқәа.

АҞӘА, нанҳәа 4 - Sputnik. Атуроператорцәа нанҳәамзазы Шәача аԥсшьаҩцәа еиҵахоит ҳәа азгәарҭоит нанҳәа 1 инаркны Краснодартәи атәылаҿацә аҿы аусура иалагаз аԥкра ҿыцқәа инарыдҳәаланы. Абри атәы аҩуеит RATA news.

Нанҳәа 1 аҟынӡа иазхоны иҟан ПЦР-тест амазаара. Уажәшьҭарнахыс алаҵа шыҟаҵоу, ма уи аҟаҵара шзалымшо азы аршаҳаҭга аҭахуп.

Атурист арҭ адокументқәа имамзар хымш рыҩныҵҟа алаҵа ҟаиҵароуп, мамзар ахараԥса иршәахоит.

Абри ашьҭахь атуристцәа Аԥсни Ҟрыми рахь еиҳа рхы дырхеит, лҳәоит аилахәыра "Интурист" ауаажәларра рнырраз адиректор Дариа Домостроева.

"Шәачаҟа атурқәа еиҳа еиҵаны иаҳҭиуеит. Нанҳәатәи атурқәа рыҭира 2019 шықәса аасҭа еиҵахеит 44 процент рыла", - лҳәоит Домостроева.

Аилахәыра "Дельфин" адиректор хада Сергеи Ромашкин иажәақәа рыла, нанҳәа 10 инаркны 30 процент рҟынӡа аԥсшьаҩцәа маҷхоит, цәыббрамзазы – 50 процент рҟынӡа 2019 ашықәс абри аамҭа иаҿырԥшны.

Иара иҳәеит нанҳәа-цәыббра аамҭазы арегион 1,6 миллион-ҩык атуристцәа ацәыӡыр шауа. Иара иажәақәа рыла ауаа аԥсшьараз алаҵаҟаҵара рҭахым.

Аилахәыра "Алеан" аҿы ирҳәеит асасааирҭақәа адгала ҷыдақәа шаздырхио, ахәԥсақәа 10-20 процент реиҵатәра ишалагаз.

7

Раионк аԥсҭазаараҟынтә: Царгәыш аӡиа Риҵа амашьынаргыларҭа аҟны русушьа атәы

3
(ирҿыцуп 20:36 24.09.2021)
Аӡиа Риҵа аҵакыраҿы амашьынаргыларҭа аҟны аус зуа Сасрыҟәа Царгәыш арадио Sputnik аефир аҟны еиҭаиҳәеит аҭыԥан аусура шеиҿкаауи, ирызцәырҵуа ауадаҩрақәеи ртәы.

Раионк аԥсҭазаараҟынтә: Царгәыш аӡиа Риҵа амашьынаргыларҭаҟны русушьа атәы
"…амашьынақәа ҳархылаԥшуеит, амбжьахрақәа ыҟам, уи аганхьала ҳҭынчуп. Азинхьчаратә маҵзура аусзуҩцәа ҳадгылоуп, ҳаицхыраауеит. Амашьына аргыларҭақәа х-ҭыԥкны иҟоуп, 150-200 машьына рҟынӡа хыхьтәи аҿы иакуеит.

Аус ишахәҭоу иууозароуп, иамуазар аҩны утәароуп. Иҟоуп еиҵахарақәак аныҟало амашьынақәа анырацәоу, аха аԥҟара еиҳарк иназмыгӡо аҭыԥан инхо ҳауп. Сааҭк амашьына аргылара 20 мааҭ иаԥсоуп, иҟоуп амш зегьы иргыланы ицо, урҭ 100 мааҭк ршәоит, - иҳәеит Царгәыш.

Аицәажәара шәазыӡырҩыр шәылшоит аудиофаил аҟны.

3

Аԥсны асанитартә ҳақьым хада: Қырҭтәылантә аковид Аԥсныҟа иҭаргалоит ҳәа аҳәара ҵаҵӷәыдоуп

15
(ирҿыцуп 19:37 24.09.2021)
Аҵыхәтәантәи адыррақәа рыла Аԥсны акоронавирус зцәа иаланы иаадырԥшыз ауаа рхыԥхьаӡара 27 нызқь иахысуеит. Ргәы бзиахахьеит 22107-ҩык ауааԥсыра, амедицинатә усбарҭақәа рыҟны рыԥсҭазаара иалҵхьеит 410-ҩык.

АҞӘА, цәыббра 24 – Sputnik. Қырҭтәылантә аҿкчымазара Аԥсныҟа иҭаргалоит ҳәа аҳәара ҵаҵӷәыдоуп, лҳәеит арадио Sputnik аинтервиу азҭаз Аԥсны асанитартә ҳақьым хада Лиудмила Скорик.

"Аԥсны мрагыларатәи аҳәааҟны асанитар-карантинтә ҟәша еиҿкааны иҳамоуп. Иара иахәҭоу амедицинатә гәаҭаратә мыругақәа зегь рыла еиқәыршәоуп. Аус ауеит аԥхынра зегьы, аусуҩцәа еиқәыршәоуп антиген азы аекспресс-тестқәа рыла. Хымш инреиҳаны Апсны анҭыҵ иҟаз, аковид шрымам ала ашәҟәы зцым зегьы атестқәа ҟарҵоит", - лҳәеит Скорик.

Иара убасгьы иазгәалҭеит, Қырҭтәылеи Аԥсни рҳәааҟны ауаа рацәа шахысуа, аха уи ишаанамго аҭагылазаашьа цәгьоуп ҳәа.

Аҵыхәтәантәи амзақәа рзы Гал араион аҿкчымазара зыхьуа рхыԥхьаӡара шыҟац иаанхоит иацымлаӡацт, ҳәа азгәалҭоит аҳақьым хада.

"Гал араион иаланхо егьырҭ араионқәа руааԥсыра реиԥш, ауаа рацәа злахәу аԥсрақәа, аиныхрақәа, аҭацаагара зҳәаз реиԥш аусмҩаԥгатәқәа мҩаԥыргоит. Ари иаҳа Аԥсны аепидемиологиатә ҭагылазаашьа ашәарҭара иҭанаргылоит, Гал араион ауааԥсыра Жәыргьыҭ араион раҭаара аасҭа",- лҳәеит Скорик.

Убри аан иазгәалҭеит, Аԥсны ауааԥсыра иҷыдоу амедицинатә цхыраараз Қырҭтәылаҟа ицо рхыԥхьаӡара ишазҳаз.

"COVID-19 аҟынтә зҽацәыхьчатәу Қырҭтәыла аҽыхәшәтәра аҟынтәи ихынхәыз роуп, урҭ ачымазара ахьыҟоу иҟан аҟынтәи иаҳа ашәарҭара рыцзар ауеит", -  лҳәеит лара.

Уаанӡа, Гал араион асанитартә ҳақьым хада инапынҵақәа назыгӡо Георги Қобалиа Sputnik иеиҭаз аинтервиу аҟны иҳәахьан Аԥсни Қырҭтәылеи рҳәааҿ аԥкрақәа рырӷәӷәара шхымԥадатәиу.

15