Гинцбург: "Спутник V" ашәарҭадареи ахаҭабзиареи шьақәнарӷәӷәеит

8
COVID-19 аҟынтәи Аԥсны алаҵаҟаҵара иалагеит 2021 шықәса лаҵарамзазы "Спутник V" ала, нанҳәа 10 инаркны иацҵоуп "Спутник Лайт" ала.

АҞӘА, нанҳәа 11 – Sputnik. Гамалеи ихьӡ зху амикробиологиеи аепидемиологиеи ринститут аиҳабы, COVID-19 аҟынтә алаҵа "Спутник V" аԥызҵаз Александр Гинцбург алаҵа ашәҟәы ианҭаргала ашьҭахь, шықәсык анҵы ахәшьара аиҭеит. Абри атәы аанацҳауеит РИА Новости.

"Шықәсык аҩнуҵҟала "Спутник V" ахаҭабзиареи ашәарҭадареи шьақәнарӷәӷәеит", - иҳәеит Гинцбург.

Иара иазгәеиҭеит ари аамҭа иалагӡаны акьыбачымазара змоу алаҵа рзыҟаҵараз ԥкрақәак аԥырхит, зцәа зтәым алаҵаҟаҵара азин рырҭеит, иара убас абыргцәагьы.

2020 шықәса нанҳәа 11 азы Урыстәыла агәабзиарахьчара аминистрра ашәҟәы иҭанагалеит алаҵа "Спутник V" Гамалеи ихьӡ зху Ацентри РФПИ-и еицыҟарҵаз. Алаҵа аԥҵоуп иҭҵаау ауаҩытәыҩса иаденовирустә вектор аплатформала. Иара хра аман аус ауеит, шәарҭара аҵам. Акоронавирустә инфекциа аҟынтә алаҵа "Спутник V" 100% ачымазара уацәнахьчоит аштамм ҿыцқәа шыҟоугьы.

Урыстәыла агәабзиарахьчара аминистрра ашәҟәы иҭанагалахьеит алаҵақәа ԥшьба: "Спутник V" Гамалеи ихьӡ зху Ацентри РФПИ-и еицыҟарҵеит. Ари алаҵа адунеи аҟны раԥхьаӡа акәны COVID-19 хызҽуа ҳәа иҭаҩуп. Жьҭаарамзазы ашәҟәы иҭаргалеит даҽа лаҵакгьы - "ЭпиВакКорона", уи новосибирсктәи ацентр "Вектор" иаԥнаҵеит. Иара убасгьы Урыстәыла агәабзиарахьчара аминистрра иҭанаҩит COVID-19 хызҽуа ахԥатәи алаҵа "КовиВак". "КовиВак" аԥҵоуп Урыстәылатәи аҭҵаарадыррақәа ракадемиа иатәу М.П. Чумаков ихьӡ зху Аиммунологиатә препаратқәа рыҭҵаареи аус рыдулареи рфедералтә ҭҵаарадырратә центр аҟны, иара убас иҭыжьуп алаҵа "Спутник V" актәи ахәҭа "Спутник Лайт". COVID-19 аҟынтәи Аԥсны алаҵаҟаҵара иалагеит 2021 шықәса лаҵарамзазы "Спутник V" ала, нанҳәа 10 азы иацҵоуп "Спутник Лайт" ала.

8

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

6
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

6

Гагратәи аконсултә ҟәша аҳәаанырцәтәи атәылауаҩшәҟәқәа рыҭара иалагоит

5
Ацҳаражәҳәарҭа аконсултә ҟәша Гагра аус ауеит аԥхынтәи аамҭазы аҳәаанырцәтәи атәылауаҩшәҟәқәа рыдкылареи рыҭареи иара убасгьы атуристцәа ацхыраара рыҭареи рзы.

АҞӘА, цәыббра 23 - Sputnik. Аԥсны иҟоу Урыстәыла Ацҳаражәҳәарҭа Гагра иҟоу аконсултә ҟәша аҿы аҳәаанырцәтәи атәылауаҩшәҟәқәа рырҭоит цәыббра 24 асааҭ  10:00 - 17:00 рзы. Абри атәы аҳәоит Ацҳаражәҳәарҭа Facebook ахатәы даҟьаҿы.

Аконсултә ҟәша Гагра амилициа араионтә ҟәшаҿы иҟоуп. Иазгәарҭуеит, ишхымԥадатәиу уаанӡатәи атәылауаҩ ишәҟәы уцзар шакәу.

Гагратәи аконсултә ҟәша аԥҵан 2009 шықәсазы Сергеи Лавров  Аҟәа дааны даныҟаз Аԥсны адәныҟатәи аусқәа рминистри иареи реицәажәарала. Анаҩс аҟәша аадыртит 2010 шықәсазы.

5

Ачемпионат ConIFA Африка Занзибар имҩаԥгахоит

6
(ирҿыцуп 14:25 23.09.2021)
Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда.

АҞӘА, цәыббра 23 - Sputnik. ConIFA Africa аҳәаақәа ирҭагӡаны ашьапылампыл ачемпионат абҵара 13- 25 рзы Занзибар имҩаԥысраны иҟоуп, ҳәа аанацҳауеит аиҿкаара Twitter аҿтәи адаҟьаҿы.

Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда. Аамҭақәак раԥхьа аҽа хырхарҭакгьы аусура иалагеит – Африкатәи аконтинент аҿы ачемпионат амҩаԥгара.

Уаанӡа аԥхынразы ачемпионат азыԥхьагәаҭан аха акоронавирус иахырҟьаны аамҭа еиҭакын.

Рашәарамзазы ашьапылампыл азы Европа ачемпионат ConIFA-2021, Франциатәи ақалақь Ницца имҩаԥысраны иҟаз ахыган атурнир, аепидемиологиатә ҭагылазаашьа Франциа иахьыуадаҩуи анапхгара ауснагӡатә ашәарҭадара иахьзадымгылои азы. Ашьапылампыл азы Аԥсны еизгоу акоманда ConIFA-2021 Европа ачемпионат иалахәхараны иҟан.

2016 шықәсазы ашьапылампыл азы Европа ачемпионат ConIFA Аԥсны имҩаԥысуан. Аԥснытәи акоманда аиааира агеит.

6