"Аԥсныбылтәы" Аԥсны агаз ахә иацлоит ҳәа азгәанаҭоит

36
(ирҿыцуп 09:30 20.08.2021)
Аԥсны агаз Урыстәыла иамнахәҳауеит. Уа абылтәы аҭагылазаашьа инадҳәаланы ахәқәа халеит.

АҞӘА, нанҳәа 20 - Sputnik. "Аԥсныбылтәы" азԥхьагәаҭарала баллонк агаз 680 мааҭ аҟынтә 1100 мааҭ рахь ахә неиуеит. Абри атәы Аԥсуа телехәаԥшраҿы еиҭеиҳәеит АУН "Аԥсныбылтәы" аекономист хада Валери Антонов.

1100 мааҭ ахь иалоуп аҩнынӡа анагарагьы. Уи азы уажәы 70 мааҭ ршәоит.

Аԥсны агаз Урыстәыла иамнахәҳауеит. Уа абылтәы аҭагылазаашьа инадҳәаланы ахәқәа халеит. Абри ауп ареспубликаҿгьы ахәқәа рышьҭыҵра зыхҟьо.

"Излааҳхәо ахәԥса еиҳахеит. Уаанӡа тоннак азы 38 000 мааҭ ҳшәозар, уажәы иаҳзааз 58 662 мааҭ иаԥсан. Абри ауп изыдҳәалоу ара агаз ахә ацлара. Аха уи азы макьана акы ӡбаны иҟам", - ҳәа иҳәеит Валери Антонов.

"Аԥсныбылтәы" аҿы ирҳәеит агаз адефицит шыҟамло. Агаз аагаразы аиқәшаҳаҭра анапы аҵаҩуп ҳәа азгәарҭеит уа.

Аԥснытәи аилахәыра агаз аанахәоит "Нефтегаз Сочи" аҿы. Уажәазы ари аилахәыреи дареи 67 000 тонна агаз аахәаразы аилаӡара рыбжьоуп. Тоннак азы 58 000 мааҭ инареиҳаны ишәатәуп. Убри аан алагалатә ахәԥсацҵазы (НДС - аред. ашәахтә шьақәыргылам.

"Ҩ-вагонк Аԥсныҟа иаахьеит, даҽакы Адлер игылоуп. Зынӡа 105 тонна ыҟоуп. Уи ианеиҵаха ҩымз иҳазхоит. Ауааԥсыра рзы агаз адефицит ҟалом", - иҳәеит Валери Антонов.

Аԥсны агаз заҟа иаԥсахо макьаназы ишьақәыргылам. Ари азҵаара Аминистрцәа реилазаара аилатәараҿы иӡбахоит.

36

Хра злоу ахҭысқәа: Хәытаба Ҭырқәтәылеи Аԥсни инхо аԥсуаа реимадара иазкны

4
(ирҿыцуп 14:33 23.09.2021)
Арепатриациазы аҳәынҭқарратә хеилак ҳџьынџьуаа рымадаразы аҟәша аиҳабы Инал Хәытаба арадио Sputnik аефир аҿы дазааҭгылеит Ҭырқәтәылеи Аԥсни иҟоу аҿар реимадаразы имҩаԥырго апроект атәы, еиҭеиҳәеит, ҳџьынџьуаа рҭоурыхтә ԥсадгьыл ахь рырхынҳәразы ицо аусура атәы.
Хра злоу ахҭысқәа: Хәытаба Ҭырқәтәылеи Аԥсныи инхо аԥсуаа реимадара иазкны

"Аԥсныҟа ахынҳәразы ҳкомитет еиуеиԥшым апроектқәа ҟарҵоит, урҭ ируакуп ҳҿар Ҭырқәтәылантәи Аԥсныҟа иааны ААУ аҟны аҵара дырҵара. Уи азын ауниверситет аректор Алеко Гәарамиа иаҳҳәеит, иара даара игәы иаахәеит абри аҩыза апроект атәы аниаҳа. Адгылара шаиҭо атәы ҳаиҳәеит.

Арахь иаауа абызшәа рыздырӡом, убри азы раԥхьатәи ашықәс аԥсуеи аурыс бызшәақәеи дырҵаразы акурсқәа аадыртуеит. Абызшәазы аԥышәарақәа анарҭалак, иалырхаз азаанаҭ ала иахыԥхьаӡалахоит.

Ҭырқәтәылатәи ҳдиаспора ари даара ргәы иаахәеит. Иаарц зҭаххазгьы даара ирацәаҩхеит, аха зегьы зымааӡеит, избанзар, атәылауаҩшәҟәы аиура цәгьоуп. Уажәазы 9-ҩык рсиа ҳамоуп. Руаӡәы ахԥатәи акурс аҿы аҵара иҵон, аха абри аҩыза алшара ыҟоуп ҳәа аниаҳа, Ҭырқәтәыла аҵара ахьиҵоз ауниверситет ааныжьны Аԥсныҟа даауеит", - ҳәа еиҭеиҳәеит Хәытаба.

Инеиҵыху аиҿцәажәара шәазыӡырҩыр шәылшоит аудиофаил аҿы.

4

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

6
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

6