Аԥсны ахада Гәдоуҭатәи ахәшәтәырҭа атомограф аремонт азырурц адҵа ҟаиҵеит

29
(ирҿыцуп 21:17 20.08.2021)
Гәдоуҭатәи аковидхәышәтәырҭаҿы акомпиутертә томограф уаҳа налымшо иԥхасҭахеит ԥхынгәымза анҵәамҭазы. Уи инамаданы аԥыза-министр Александр Анқәаб атомограф ҿыц аахәара аҭахуп ҳәа аҳәамҭа ҟаиҵеит.

АҞӘА, нанҳәа 20 - Sputnik. Аԥсны ахада Аслан Бжьаниа Гәдоуҭатәи аковидхәшәтәырҭаҿы акомпиутертә томограф аремонт азутәуп ҳәа аҳәамҭа ҟаиҵеит, агәабзиарахьчара аминистрра адҵагьы риҭеит иаарласны аремонт азуразы иаҭаху ахәҭақәа раахәарази амаругақәа аусура раларгарази аиқәшаҳаҭра рыбжьарҵарц. Абри атәы аанацҳауеит атәыла ахада ипресс-маҵзура.

Гәдоуҭатәи аковидхәышәтәырҭаҿы акомпиутертә томограф уаҳа налымшо иԥхасҭахеит ԥхынгәымза анҵәамҭазы. Нанҳәа 12 рзы Акоронавирус аламырҵәаразы акоординациатә штаб аилатәараан аԥыза-министр Александр Анқәаб аҳәамҭа ҟаиҵеит атомограф аиҭашьақәыргылара шалымшо, аҿыц шаахәатәу, уи 60 миллион мааҭ шақәырӡтәхо. Иара иазгәеиҭеит уи азы аиҳабыра абиуџьет аҟынтәи аԥара рыԥшаарц ажәалагала шыҟарҵо.

Анқәаб иажәақәа рыла, ҵыԥх ԥхынгәымзазы иаагаз атомограф иара усҟангьы аусура алымшо иҟан ҳәа. 

Аԥыза-министр иҳәамҭа ауаажәларра рыбжьара ацәажәарақәа ахылҿиааит. "Абаза-ТВ" арепортаж аҿы уи ииҳәаз азы агәынамӡара шрымоу рҳәеит атомограф арахь иаазгаз аилахәыреи уи аахәаразы аԥара еизызгаз ҳџьынџьуаа реиҿкаара "Ҳара ҳаидгылоуп" алахәылацәеи.

Нанҳәа 20 рзы имҩаԥысыз аусутә еилатәараан Александр Анқәаб иазгәеиҭеит атомограф ҿыц аахәара аҭахуп ҳәа ииҳәахьаз уажәгьы дшадгылоу. Иара ишиҳәаз ала, ԥыхьатәи аилатәараан атомограф аазхәаз аԥсуа наплакыҩцәа рганахь гәынамӡара ҳәа акгьы ааимырԥшит. 

"Сара сгәаанагарала, атомограф зҭиуаз иаазхәоз ржьеит ауп", - ҳәа азгәеиҭеит аԥыза-министр.

Атәыла ахада иусбарҭа аиҳабы Алхас Кәыҵниа иазгәеиҭеит аԥыза-министр ииҳәаз ажәа хьанҭан, анаплакыҩцәа ргәы иахьалсыз еилукаартә иҟоуп ҳәа. 

Атәыла ахада амеценатцәа иҭабуп ҳәа реиҳәеит иаҳа ианыуадаҩыз аамҭазы рыԥсадгьыл иарҭаз ацхырааразы. Бжьаниа иазгәеиҭеит аҳәынҭқарра акомпиутертә томограф ҿыц аахәаразы аԥара аԥшаар шакәу, избанзар уи зҭаху егьырҭ амедусбарҭақәагьы ыҟоуп. 

Аилатәара иалахәыз Едуард Быҭәба аепидемиологиатә ҭагылазаашьа зеиԥшроу атәы ахада изеиҭеиҳәеит.

Иара иажәақәа рыла, аҵыхәтәантәи амшқәа рзы иҟоу астатистикала иубоит COVID-19 алаҵәара маҷк ишылаҟәыз. Уажәазы атәылаҿы иҟоуп 500 ҭыԥ ачымазцәа рыхәшәтәразы. 

Быҭәба иазгәеиҭеит аҵәыҵәри ахә ишацлазгьы, уи еиԥҟьарада аахәара мҩаԥысуеит ҳәа, иара убас Аҟәатәи Афизика-техникатә институт аҿы аҵәыҵәри аҭыԥ аҿы аиуразы аусурақәа ирҿуп.

29
Атемақәа:
Аҿкычымазара – акоронавирус Аԥсни адунеи аҿи: иалкаау (1453)

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

5
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

5

Гагратәи аконсултә ҟәша аҳәаанырцәтәи атәылауаҩшәҟәқәа рыҭара иалагоит

5
Ацҳаражәҳәарҭа аконсултә ҟәша Гагра аус ауеит аԥхынтәи аамҭазы аҳәаанырцәтәи атәылауаҩшәҟәқәа рыдкылареи рыҭареи иара убасгьы атуристцәа ацхыраара рыҭареи рзы.

АҞӘА, цәыббра 23 - Sputnik. Аԥсны иҟоу Урыстәыла Ацҳаражәҳәарҭа Гагра иҟоу аконсултә ҟәша аҿы аҳәаанырцәтәи атәылауаҩшәҟәқәа рырҭоит цәыббра 24 асааҭ  10:00 - 17:00 рзы. Абри атәы аҳәоит Ацҳаражәҳәарҭа Facebook ахатәы даҟьаҿы.

Аконсултә ҟәша Гагра амилициа араионтә ҟәшаҿы иҟоуп. Иазгәарҭуеит, ишхымԥадатәиу уаанӡатәи атәылауаҩ ишәҟәы уцзар шакәу.

Гагратәи аконсултә ҟәша аԥҵан 2009 шықәсазы Сергеи Лавров  Аҟәа дааны даныҟаз Аԥсны адәныҟатәи аусқәа рминистри иареи реицәажәарала. Анаҩс аҟәша аадыртит 2010 шықәсазы.

5

Ачемпионат ConIFA Африка Занзибар имҩаԥгахоит

0
(ирҿыцуп 14:14 23.09.2021)
Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам акомандақәа, зынӡа – 25 команда.

АҞӘА, цәыббра 23 - Sputnik. ConIFA Africa аҳәаақәа ирҭагӡаны ашьапылампыл ачемпионат абҵара 13- 25 рзы Занзибар имҩаԥысраны иҟоуп, ҳәа аанацҳауеит аиҿкаара Twitter аҿтәи адаҟьаҿы.

Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда. Аамҭақәак раԥхьа аҽа хырхарҭакгьы аусура иалагеит – Африкатәи аконтинент аҿы ачемпионат амҩаԥгара.

Уаанӡа аԥхынразы ачемпионат азыԥхьагәаҭан аха акоронавирус иахырҟьаны аамҭа еиҭакын.

Рашәарамзазы ашьапылампыл азы Европа ачемпионат ConIFA-2021, Франциатәи ақалақь Ницца имҩаԥысраны иҟаз ахыган атурнир, аепидемиологиатә ҭагылазаашьа Франциа иахьыуадаҩуи анапхгара ауснагӡатә ашәарҭадара иахьзадымгылои азы. Ашьапылампыл азы Аԥсны еизгоу акоманда ConIFA-2021 Европа ачемпионат иалахәхараны иҟан.

2016 шықәсазы ашьапылампыл азы Европа ачемпионат ConIFA Аԥсны имҩаԥысуан. Аԥснытәи акоманда аиааира агеит.

0