Алада Новгородтәи аобласт аиҳабыреи Аԥснытәи аделегациеи реиԥылара мҩаԥысит

30
(ирҿыцуп 19:14 22.08.2021)
Хы-мштәи рныҟәара аҳәаақәа ирҭагӡаны Аԥснытәи аделегациа Алада Новгород ақалақь 800-шықәса ахыҵра иазкны имҩаԥгаз аныҳәатә усмҩаԥгатәқәа ирылахәын, иара убас ирҭааит ақалақь аҭыԥԥшӡарҭақәа.

АҞӘА, нанҳәа 22 - Sputnik. Алада Новгородтәи аобласт агубернатор ихаҭыԥуаҩ Андреи Саносиан Аԥснытәи аделегациа идикылеит, абри атәы аанацҳауеит Аԥсны ахада ипресс-маҵзура.

Аделегациа напхгара азызуа Алхас Кәыҵниа Аԥсны ахада Аслан Бжьаниа иҟынтәи, Алада Новгород ақалақь 800-шықәса ахыҵра аҳаҭыр азын иҟаиҵаз адныҳәаларатә ажәанҵа риҭеит. Анаҩс аҩ-ганк алацәажәеит аусеицуразы азҵаарақәа.

Сынтәа 10 шықәса ҵоит Аԥсни Алада Новгородтәи аобласти рыбжьара аиҩызаратә еиқшаҳаҭра рнапы аҵарыҩижьҭеи. 2011 шықәса раахыс Аҟәеи Алада Новгороди - ақалақьқәа аиашьара рыбжьоуп.

Андреи Саносиан иҭабуп ҳәа реиҳәеит аиубилеитә усмҩаԥгатәқәа рхы ахьаладырхәыз.

"Ҳара иҭабуп ҳәа шәаҳҳәоит ҳрегион шәахьазҿлымҳау, иара убас ҳқалақь  800-шықәса ахыҵра иазкны ҳгәырӷьара ахьҳацеиҩышәшаз", - иҳәеит Саносиан.

Алхас Кәыҵниа Алада Новгородтәи аобласт анапхгара иҭабуп ҳәа реиҳәеит иҟарҵаз адкыларазы. Инаҵшьны иазгәеиҭеит еиуеиԥшым ахырхарҭала ҳусеицура аҵак ду шамоу.

Аиԥылара мҩаԥысит Алада Новгород иҟоу ҳаҭыр зқәу Аԥсны аконсул Владимир Литвинчуки аҭыԥантәи анапхгареи алархәны.

Аԥсны ахада иусбарҭа анапхгаҩы Алхас Кәыҵниа зхадараҿы дыҟоу аԥсуа делегациа аилазаараҿы иҟоуп Аҳәынҭқарра ахада иусбарҭа анапхгаҩы ихаҭыҧуаҩ Зураб Қаџьаиа, адәныҟатәи аусқәа рминистр Даур Ақаҩба, Гагра араион ахада ихаҭыҧуаҩ Алхас Барцыц, Пицунда ақалақь ахада Руслан Хәынҵариа.

 

30

Аԥсны даҽа 88-ҩык акоронавирус рыдырбалеит, ҩыџьа рыԥсҭазаара иалҵит

4
Аепидемиа ҟалеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 27353-ҩык рҟынӡа инаӡеит, ргәы бзиахеит 22404-ҩык ауааԥсыра, рыԥсҭазаара иалҵит 413-ҩык.

АҞӘА, цәыббра 25 – Sputnik. Иҳаҩсыз уахыки-ҽнаки рыла COVID-19 азы атестқәа арҭеит 370-ҩык Аԥсны ауааԥсыра, урҭ рахьтә 88-ҩык рцәа акоронавирус шалаз аадырԥшит.

Урыстәылатәи арратә госпиталь аҟны акоронавирус злаз ҩыџьа апациентцәа рыԥсҭазаара иалҵит: 1958 шықәсазы ииз ахаҵеи 1936 шықәсазы ииз аԥҳәыси. 

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 42-а, рҭагылазаашьа бааԥсуп ааҩык, ибжьаратәуп - 28-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 28-ҩык, урҭ рахьтә ааҩык апациентцәа рҭагылазаашьа уадаҩуп. Очамчыра ирхәышәтәуеит 9-ҩык, Гагратәи ахәышәтәырҭаҿы - 15-ҩык, урҭ рахьтә хҩык рҭагылазаашьа уадаҩуп. Тҟәарчалтәи ахәышәтәырҭаҿы - 8-ҩык апациентцәа. Аҟәа иҟоу амобилтә госпиталь аҿы - 64-ҩык апациентцәа, жәаҩык рҭагылазаашьа хьанҭоуп.

Аоперативтә штаб аҳәара ҟанаҵоит ауааԥсыра аҿкы рхы ацәырхьчаларц.

Акоронавирус иадҳәалоу ажәабжьқәа шәрыԥхьар ҟалоит абра>>

4
Атемақәа:
Аҿкычымазара – акоронавирус Аԥсни адунеи аҿи: иалкаау
(1:19 / 10.22Mb / просмотров видео: 6)

Ажьира, амца, аиха: Мгәыӡырхәа амаден рҭәаны абџьар шыҟарҵо

10
(ирҿыцуп 19:22 25.09.2021)
Гәдоуҭа араион Мгәыӡырхәа ақыҭан аетнопарк "Аԥсны" аҿы цәыббра 24 рзы иаадыртит ажьицәа-абџьарҟаҵаҩцәа раԥхьатәи рфестиваль "Аихамца". Уи иалахәуп Аԥсни Урыстәылеи рҟазацәа. Афестиваль мҩаԥыслоит хымш.

Ажьицәа-абџьарҟаҵаҩцәа рфестиваль Аԥсны раԥхьаӡа акәны еиҿыркааит. Уи цәыббра 24-26 рзы имҩаԥыслоит аетнопарк "Аԥсны" аҿы. Уи рхы аладырхәырц иааит аҭыԥантәиқәа рыдагьы, Иакутиа, Брест, Белгород, Маиҟәаԥ ақалақьқәа рҟынтәи аҟазацәагьы.

Хымш ирылагӡаны ажьицәа аиха дырҭәалоит, дамасктәии амоизака иаҩызоуи аџыр ҟарҵалоит, аԥсуа ҳәызбақәа, аҿыбџьар, ахҿақәа. Урҭ зегьы реиҳарак излырхуа Бырзышьха иҵхны илбааргаз 300 килограмм иҟоу аихамаден ауп.

Амаден аихамаҭәа алырхырц азы идыргылеит аихаӡырҭақәа ҩба, 1200 градус рҟынӡа ашоура ҭарҵоит.
Аҟазацәа рус арманшәаларазы ишьақәдыргылеит афрынақәа жәаба рҟынӡа, урҭ рахьтә ҩба уаанӡа ҳабацәа ишыҟарҵалоз еиԥш ахәы зқәу ацәала аҳауа ҭадыршәшәоит. Егьырҭ рҿы амца агаз ала ма афымцала аҳауа ҭадыршәшәоит.

Афестиваль аҟны зегь реиҳа азҿлымҳара зырҭаз аԥсуа ҳәызба акәхеит. Аҟазауаа шьоукы ргәы иҭоуп арҭ хымш рыҩнуҵҟа ҩба-ҩба, иара инеиҳангьы абџьарҿқәеи, иара убас итрадициатәу аԥсуа хҿақәеи рыҟаҵара.

Афестиваль аҟынтәи афотосахьақәа шәрыхәаԥшыр ҟалоит абра>>

10