Гәдоуҭа ауааԥсыра амшцәгьақәа рышьҭахь акомпенсациа аиуразы 300 рзаҳал нарышьҭит

16
(ирҿыцуп 18:12 01.09.2021)
Ԥхынгәымза алагамҭеи анҵәамҭеи рзы Аԥсны ақәаршҩы, аԥшатлакә аҭыԥ рыман, анхарҭаҩнқәа, аинфраструктура аԥхасҭа ӷәӷәа рыҭан.

АҞӘА, цәыббра 1 – Sputnik, Бадри Есиава. Аԥхасҭа зауыз Гәдоуҭа араион ауааԥсыра амшцәгьақәа рышьҭахь акомпенсациазы 300 рзаҳал нарышьҭит ҳәа  Sputnik иазеиҭеиҳәеит  араион ахада ихаҭыԥуаҩ Вианор Ҭаниа.

Ҭаниа ишиҳәаз ала, аӡхыҵрақәа ирыхҟьаны ааха роуит 248-ҩык, аԥша 50 ҩны рхыб рыхнахит, ҩ-ҩнык афы рысны иблит.

"Аӡхыҵра аԥхасҭа ӷәӷәа ҟанаҵеит.  Акомпенсациазы 248-ҩык арзаҳал ҳзаарышьҭит. Актәи аихагылақәа рҿы иҟаз зегь аӡы иԥхасҭанатәит.  Адокументқәа, актқәа азырхианы Аминистрцәа реилазаарахь иҳашьҭит. Арҭ арзаҳалқәа аҭагылазаашьа ҷыдазы акомиссиа ахәаԥшраны иҟоуп", - ҳәа иҳәеит иара.

Ԥхынгәы 4 рзы аԥшатлакә Аԥсны араионқәа акыр ирԥырхагахеит – 50 ҩны рхыб рыхнахит, ақыҭақәа Агараки Блабырхәеи рҿы ҩ-ҩнык афы рысны иблит.

Аԥсабаратә рыцҳара иахҟьаз аԥхасҭа  азеиԥш хәыԥса  араион ахадараҿы ирымԥхьаӡеит уи иҷыдоу аусбарҭақәа рнапы иануп.

Ҭаниа иажәақәа рыла, иблыз аҩнқәа рҿы ауаа машәыр рмыхьит. Урҭ 150 нызқь мааҭ рыҭан араион ахадара аҟынтәи аԥхьанатәтә цхыраара ҳәа, 50 нызқь мааҭ Риҵатәи апарк иашәеит.

"Арҭ аҭаацәарақәа рыуацәа рҿы инхоит. Рыҩнқәа реиҭашьақәыргылара иалагеит. Ииасыз амчыбжь азы афинанстә цхыраара рыҭан. Аԥша ихнашәеит Приморск ақыҭан инхо аибашьра аинвалид иҩны ахыб. Уигьы Риҵатәи апарк  200 нызқьмааҭ изашәеит", - иҳәеит Ҭаниа.

Ԥхынгәы 27 ашьҭахь ақалақь иалсуа аӡиасқәа ҟьашьит, урҭ рӡышьҭрақәа рыцқьатәуп иҳәеит Ҭаниа.  Араион ахадара атәыла аиҳабыра рахь ацхыраара иаҳәеит.

Қыҭақәак рҿы ацҳақәа аӡы иагеит. Ақыҭауаа макьаназы иахыкәшаны иныҟәоит. Ацҳақәа реиҭашьақәыргылара азыԥхьагәаҭоуп араионтә биуџьет аԥарақәа рыла. Асметақәа макьаназ аус рыдыруылоит.

16

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

6
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

6

Гагратәи аконсултә ҟәша аҳәаанырцәтәи атәылауаҩшәҟәқәа рыҭара иалагоит

5
Ацҳаражәҳәарҭа аконсултә ҟәша Гагра аус ауеит аԥхынтәи аамҭазы аҳәаанырцәтәи атәылауаҩшәҟәқәа рыдкылареи рыҭареи иара убасгьы атуристцәа ацхыраара рыҭареи рзы.

АҞӘА, цәыббра 23 - Sputnik. Аԥсны иҟоу Урыстәыла Ацҳаражәҳәарҭа Гагра иҟоу аконсултә ҟәша аҿы аҳәаанырцәтәи атәылауаҩшәҟәқәа рырҭоит цәыббра 24 асааҭ  10:00 - 17:00 рзы. Абри атәы аҳәоит Ацҳаражәҳәарҭа Facebook ахатәы даҟьаҿы.

Аконсултә ҟәша Гагра амилициа араионтә ҟәшаҿы иҟоуп. Иазгәарҭуеит, ишхымԥадатәиу уаанӡатәи атәылауаҩ ишәҟәы уцзар шакәу.

Гагратәи аконсултә ҟәша аԥҵан 2009 шықәсазы Сергеи Лавров  Аҟәа дааны даныҟаз Аԥсны адәныҟатәи аусқәа рминистри иареи реицәажәарала. Анаҩс аҟәша аадыртит 2010 шықәсазы.

5

Ачемпионат ConIFA Африка Занзибар имҩаԥгахоит

6
(ирҿыцуп 14:25 23.09.2021)
Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда.

АҞӘА, цәыббра 23 - Sputnik. ConIFA Africa аҳәаақәа ирҭагӡаны ашьапылампыл ачемпионат абҵара 13- 25 рзы Занзибар имҩаԥысраны иҟоуп, ҳәа аанацҳауеит аиҿкаара Twitter аҿтәи адаҟьаҿы.

Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда. Аамҭақәак раԥхьа аҽа хырхарҭакгьы аусура иалагеит – Африкатәи аконтинент аҿы ачемпионат амҩаԥгара.

Уаанӡа аԥхынразы ачемпионат азыԥхьагәаҭан аха акоронавирус иахырҟьаны аамҭа еиҭакын.

Рашәарамзазы ашьапылампыл азы Европа ачемпионат ConIFA-2021, Франциатәи ақалақь Ницца имҩаԥысраны иҟаз ахыган атурнир, аепидемиологиатә ҭагылазаашьа Франциа иахьыуадаҩуи анапхгара ауснагӡатә ашәарҭадара иахьзадымгылои азы. Ашьапылампыл азы Аԥсны еизгоу акоманда ConIFA-2021 Европа ачемпионат иалахәхараны иҟан.

2016 шықәсазы ашьапылампыл азы Европа ачемпионат ConIFA Аԥсны имҩаԥысуан. Аԥснытәи акоманда аиааира агеит.

6