Sputnik аусзуҩцәа Аԥсны ажурналистцәа Реидгыла иалахәылацәахеит

17
(ирҿыцуп 13:18 09.09.2021)
Жәларбжьаратәи аинформациатә маҵзура Sputnik аусзуҩцәа жәаҩа-ҩык Аԥсны ажурналистцәа Реидгыла иаларҵеит.

АҞӘА, цәыббра 9 - Sputnik, Бадраҟ Аҩӡба. Аԥсны ажурналистцәа Реидгыла ахантәаҩы Руслан Ҳашыг аиҿкаара алахәылатә билеҭқәа рнапы иаиркит Жәларбжьаратәи аинформациатә маҵзура Sputnik аусзуҩцәа.

"Шәара қәҿиарала аԥсуа аалыҵ амаҵ азыжәуеит. Аханатә сара ари апроект садгылаҩын. Исҳәон уи ҳара ҳзы иҳамҭоуп, ихадароу ииашаны ахархәашьоуп", - ҳәа иҳәоит Руслан Ҳашыг.

Sputnik Аԥсны анапхгаҩы Руслан Бганба Аԥсны ажурналистцәа Реидгыла ахантәаҩы Руслан Ҳашыг ҭабуп ҳәа иеиҳәеит иҟаиҵаз адгыларазы.

"Ҭабуп ҳәа шәаҳҳәоит амаҵзура Sputnik ажурналистцәа иҳашәҭо адгыларазы. Хаҭала ҭабуп ҳәа шәасҳәоит журналистк иҳасабала акәымкәа менеџьерк иҳасабалагьы исзыҟашәҵо адгыларазы. Аиҳабыратә абиԥара иаҵанакуа ауаа рԥышәа аиҵыбцәа ианрымардо ахәшьара ду амоуп", - иҳәеит Бганба.

Аԥсны ажурналистцәа Реидгыла ахантәаҩы Sputnik аредактор-хада Дмитри Нездоровин алахәылатә билеҭ иҭо Руслан Ҳашыг иазгәеиҭеит Sputnik ажурналистикатә школ иааиԥмырҟьаӡакәа аус аулароуп аҿар иахәҭоу адыррақәа роуларц ҳәа.

© Sputnik / Томас Тхайцук
Sputnik аусзуҩцәа жәаҩа-ҩык Аԥсны ажурналистцәа Реидгыла иалахәылацәахеит.

"Шәара шәеиԥш аԥышәа змоу аредактор – аԥсуа журналистикатә школ азы дыԥшаах дууп. Сгәыӷуеит шәԥышәа егьырҭ аинформациатә маҵзурақәагьы аҵанакып ҳәа" - иҳәеит иара.

Дмитри Нездоровин ҭабуп ҳәа ахиҳәааит иусура Аԥсны апрофессионалтә еилазаара аҟынтәи ахәшьара ахьарҭаз.

"Ари ашәҟәы атрибутӡам, ари аусураҿ ҳаидызыԥхьало еизыҟазаашьоуп. Ҳара ҳазыхиоуп арҵаратә, арккаратә проектқәа рымҩаԥгара. Аԥсуа журналистика абиԥара ҿыц реиҵагыларазы ҳазыхиоуп ҳарҿиаратәии ҳтехникатәии база шәыдгалара", - ҳәа азгәеиеҭит Нездоровин.

© Sputnik / Томас Тхайцук
Sputnik аусзуҩцәа жәаҩа-ҩык Аԥсны ажурналистцәа Реидгыла иалахәылацәахеит.

Жәларбжьаратәи аинформациатә маҵзура Sputnik аусзуҩцәа жәаҩа-ҩык: амаҵзура анапхгаҩы Руслан Бганба, аредактор-хада Дмитри Нездоровин, апортал аҭыжьырҭатә редактор Рада Ажьиԥҳа, афотокорреспондент Томас Ҭҳаиҵук, арадио аҭыжьырҭатә редакторцәа Елена Бекреневеи Альбина Жьиԥҳаи, арадио амҩаԥгаҩцәа Алхас Манаргиеи Лана Абшьлааԥҳаи, акорреспондентцәа Асмаҭ Ҵәыџьԥҳа, Бадри Есиава, Сариа Кәарацхьелиаԥҳа, Бадраҟ Аҩӡба Аԥсны ажурналистцәа Реидгыла иалахәылацәахеит.

17

Хра злоу ахҭысқәа: Хәытаба Ҭырқәтәылеи Аԥсни инхо аԥсуаа реимадара иазкны

4
(ирҿыцуп 14:33 23.09.2021)
Арепатриациазы аҳәынҭқарратә хеилак ҳџьынџьуаа рымадаразы аҟәша аиҳабы Инал Хәытаба арадио Sputnik аефир аҿы дазааҭгылеит Ҭырқәтәылеи Аԥсни иҟоу аҿар реимадаразы имҩаԥырго апроект атәы, еиҭеиҳәеит, ҳџьынџьуаа рҭоурыхтә ԥсадгьыл ахь рырхынҳәразы ицо аусура атәы.
Хра злоу ахҭысқәа: Хәытаба Ҭырқәтәылеи Аԥсныи инхо аԥсуаа реимадара иазкны

"Аԥсныҟа ахынҳәразы ҳкомитет еиуеиԥшым апроектқәа ҟарҵоит, урҭ ируакуп ҳҿар Ҭырқәтәылантәи Аԥсныҟа иааны ААУ аҟны аҵара дырҵара. Уи азын ауниверситет аректор Алеко Гәарамиа иаҳҳәеит, иара даара игәы иаахәеит абри аҩыза апроект атәы аниаҳа. Адгылара шаиҭо атәы ҳаиҳәеит.

Арахь иаауа абызшәа рыздырӡом, убри азы раԥхьатәи ашықәс аԥсуеи аурыс бызшәақәеи дырҵаразы акурсқәа аадыртуеит. Абызшәазы аԥышәарақәа анарҭалак, иалырхаз азаанаҭ ала иахыԥхьаӡалахоит.

Ҭырқәтәылатәи ҳдиаспора ари даара ргәы иаахәеит. Иаарц зҭаххазгьы даара ирацәаҩхеит, аха зегьы зымааӡеит, избанзар, атәылауаҩшәҟәы аиура цәгьоуп. Уажәазы 9-ҩык рсиа ҳамоуп. Руаӡәы ахԥатәи акурс аҿы аҵара иҵон, аха абри аҩыза алшара ыҟоуп ҳәа аниаҳа, Ҭырқәтәыла аҵара ахьиҵоз ауниверситет ааныжьны Аԥсныҟа даауеит", - ҳәа еиҭеиҳәеит Хәытаба.

Инеиҵыху аиҿцәажәара шәазыӡырҩыр шәылшоит аудиофаил аҿы.

4

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

6
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

6