Апандемиатә ҭагылазаашьа иалацәажәеит Гәдоуҭа араион аҿы

15
(ирҿыцуп 11:32 10.09.2021)
Аепидемиа ҵасижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 25920-ҩык рҟынӡа инаӡеит, ргәы бзиахеит 21780-ҩык ауааԥсыра, рыԥсҭазаара иалҵит 391-ҩык.

АҞӘА, цәыббра 10 - Sputnik. Аԥсны агәабзиарахьчара аминистр Едуард Быҭәба Гәдоуҭа араион ахадараҿы аоперативтә штаб аилацәажәара мҩаԥигеит. Абри атәы аанацҳауеит аусбарҭа апресс-маҵзура.

Аԥсны агәабзиарахьчара аминистр иажәақәа рыла иахьазы коронавирустә инфекциа ареспубликаҿ алаҵәара ахылаԥшра ауҭартә иҟоуп.

Асанитартә ҳақьым хада Лиудмила Скорик иазгәалҭеит COVID-19 маҷк ишьақәтәо ишалагаз.

Акоронавируси ахәыҷқәеи

Лиудмила Скорик инаҵшьны иазгәалҭеит аҵарашықәс иалагазар ичмазаҩхахьоу ахәыҷқәа рхыԥхьаӡара шмаҷу.

"Аҵара аҟәшақәеи ҳареи ҳаимадоуп. Аҵараиурҭақәа ҳарҭааны игәаҳҭоит рсанитартә ҭагылазаашьа", - лҳәеит Лиудмила Скорик.

Лара лгәаанагарала иӡбтәуп ахәыҷқәа ирзыԥшны еилагылоу аҭаацәа рызҵаара. Урҭ шамахамзар асабрадақәа рҿам, асоциалтә дистанциа иқәныҟәом.

Ахәыҷтәы хәшәтәырҭа аҳақьым хада Игор Џьапуа иҳәеит ахәыҷқәа рыбжьара COVID-19 шмаҷхаз.

Аԥхынразы уахыки-ҽнаки рыла 130 амбулатортә чымазцәа амедусҳәарҭахь ишыдҵаалоз, аиҳараҩык ротавирустә инфекциа рыманы. Ирацәаҩын атуристцәагьы.

ПЦР-лабораториақәа

Аоперштаб аилатәараҿы аминистр изеиҭарҳәеит Очамчыратәи СЕС аҿы ПЦР-лабораториа еиԥҟьарада аус шауа. Аҟазауаа ирымоуп алшара мышкы ахы аҵыхәала 100 ҭҵаарак рымҩаԥгара. Абри арежим ала аус ауеит ПЦР-лабораториа Гагратәи ахәышәтәырҭаҿы.

Гагреи Очамчыреи алабараториақәа 250 рҟынӡа ҭҵаара мҩаԥыргоит ҳәа иҳәеит асанитартә ҳақьым хада лхаҭыԥуаҩ Астан Аҩӡба.

Цәыббра 9 азы Афон ҿыцтәи ахәышәтәырҭаҿы иаадыртит ПЦР-тестқәа рыҭарҭа аҭыԥ.

Зынӡа а республикаҿы ПЦР-ҭҵаара мҩаԥыргоит жәа-ҭыԥк рҿы.

Амедусҳәарҭақәа реиқәшәара

Иааиуа амчыбжь азы Аԥсныҟа иааргараны иҟоуп 50 ҭоԥ "Артлегиеи" 30 ҭоԥ "Актемреи" ҳәа иҳәеит аминистрра афармациатә ҟәша аиҳабы Ахра Аџьба. Иара иҳәеит ахәышәтәырҭақәа хәшәыла еишеибыҭо.

Аминистр аиҳабыра рахь аҳәара ҟаиҵеит агоспиталь азы аҽа генераторк аархәарц.

Аилацәажәара алкаақәа рыла Едуард Быҭәба анапынҵа ҟаиҵеит:

  • Уаанӡа аковид амедусҳәарҭақәа рҿы аус зымуц аҳақьымцәеи амедеҳәшьцәеи азыҟарҵарц,
  • Урыстәылатәи рколлегацәеи дареи еиҳа лассы-лассы авидеоконференциақәа мҩаԥыргаларц,
  • Урыстәылатәи рколлегацәа аԥышәа рымдаразы иаарыԥхьаларц,
  • акоронавирустә чымазцәа рыхәшәтәра апротоколқәа дырҿыцырц,
  • амбулатортә чымазцәа ирырҭо ахәшәқәа ахылаԥшра рырҭаларц,
  • амедицинатә коллеџь астудентцәа апрактикахь инашьҭызарц.
15

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

5
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

5

Гагратәи аконсултә ҟәша аҳәаанырцәтәи атәылауаҩшәҟәқәа рыҭара иалагоит

5
Ацҳаражәҳәарҭа аконсултә ҟәша Гагра аус ауеит аԥхынтәи аамҭазы аҳәаанырцәтәи атәылауаҩшәҟәқәа рыдкылареи рыҭареи иара убасгьы атуристцәа ацхыраара рыҭареи рзы.

АҞӘА, цәыббра 23 - Sputnik. Аԥсны иҟоу Урыстәыла Ацҳаражәҳәарҭа Гагра иҟоу аконсултә ҟәша аҿы аҳәаанырцәтәи атәылауаҩшәҟәқәа рырҭоит цәыббра 24 асааҭ  10:00 - 17:00 рзы. Абри атәы аҳәоит Ацҳаражәҳәарҭа Facebook ахатәы даҟьаҿы.

Аконсултә ҟәша Гагра амилициа араионтә ҟәшаҿы иҟоуп. Иазгәарҭуеит, ишхымԥадатәиу уаанӡатәи атәылауаҩ ишәҟәы уцзар шакәу.

Гагратәи аконсултә ҟәша аԥҵан 2009 шықәсазы Сергеи Лавров  Аҟәа дааны даныҟаз Аԥсны адәныҟатәи аусқәа рминистри иареи реицәажәарала. Анаҩс аҟәша аадыртит 2010 шықәсазы.

5

Ачемпионат ConIFA Африка Занзибар имҩаԥгахоит

2
(ирҿыцуп 14:14 23.09.2021)
Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам акомандақәа, зынӡа – 25 команда.

АҞӘА, цәыббра 23 - Sputnik. ConIFA Africa аҳәаақәа ирҭагӡаны ашьапылампыл ачемпионат абҵара 13- 25 рзы Занзибар имҩаԥысраны иҟоуп, ҳәа аанацҳауеит аиҿкаара Twitter аҿтәи адаҟьаҿы.

Ихьыԥшым ашьапылампылтә командақәа р-Конфедерациа еиҿкаан 2013 шықәсазы. ConIFA еиднакылоит FIFA иалам 25 команда. Аамҭақәак раԥхьа аҽа хырхарҭакгьы аусура иалагеит – Африкатәи аконтинент аҿы ачемпионат амҩаԥгара.

Уаанӡа аԥхынразы ачемпионат азыԥхьагәаҭан аха акоронавирус иахырҟьаны аамҭа еиҭакын.

Рашәарамзазы ашьапылампыл азы Европа ачемпионат ConIFA-2021, Франциатәи ақалақь Ницца имҩаԥысраны иҟаз ахыган атурнир, аепидемиологиатә ҭагылазаашьа Франциа иахьыуадаҩуи анапхгара ауснагӡатә ашәарҭадара иахьзадымгылои азы. Ашьапылампыл азы Аԥсны еизгоу акоманда ConIFA-2021 Европа ачемпионат иалахәхараны иҟан.

2016 шықәсазы ашьапылампыл азы Европа ачемпионат ConIFA Аԥсны имҩаԥысуан. Аԥснытәи акоманда аиааира агеит.

2