Иблахкыгоу "Аԥсуа иашҭа": Бзыԥтәи аҩхааҿ иҟоу, ҳқьабзқәа ӡырызго амузеи

87
(ирҿыцуп 21:15 12.09.2021)
"Аԥсуа иашҭа" - аԥсуаа ҳҵас, ҳқьабз аӡыргара хықәкыс иамоуп Бзыԥҭатәи ақьафурҭа аҩнуҵаҟа еиҿкаау амузеи. Арахь иааиуа асасцәа ҳафатә анаҩсгьы иддырбоит аԥсуа инхашәа-чашәара.

Бзыԥҭатәи аҩхааҿ еиҿкаау ақьафурҭа "Аԥсуа иашҭа" даара иблахкыгоуп, даҽа крыфарҭак иузадкылом, избанзар араҟа еиҿкаауп аԥсуа иҵас-иқьабз ӡырызго иаарту амузеи.

Наала Гәымԥҳа, Sputnik  

"Аԥсуа иашҭа" уанынҭалалак, иаразнак улаԥш нарықәшәоит жәытәнатә аахыс хҵас-ҳқьабз шьаҭас иамоу, иахьа ажәытәра иагарц згәы иҭоу, аха уи еиқәырханы, еиҷаҳаны иӡыргоу аԥсуаа ажәытә рынхаратә мыругақәа. Иарбан мчу иргәазырԥхаз ас еиԥш "Аԥсуа иашҭа" аиҿкаара, абри атәы ҳзеиҭеиҳәеит аԥшәмацәа ируаӡәку Мурман Ԥкьын.

© Sputnik / Томас Тхайцук
Бзыԥтәи аҩхааҿ иҟоу ақьафурҭа "Аԥсуа иашҭа" аԥшәма Мурман Ԥкьын
Иара иажәақәа рыла, хықәкы хадас рҿаԥхьа идыргылаз, даҽа милаҭк ҳрылазмырҩашьо ҳкультура абеиара атәым милаҭқәа деилыркаара ауп. "Раԥхьаӡа ас еиԥш аҟаҵара зхаҿы иааиз саҳәшьаԥацәа Димеи Баҭали Кәакәасқьыраа роуп. Иҳаӡбеит акрыфарҭа "Аԥсуа иашҭа" ахьӡаҳҵарц. Ас еиԥш аԥсуа хьӡы анаиу, иаҳҭаххеит уи иашьашәалоу, ианаало ала ашҭа арԥшӡара, ҳмилаҭ цәа зыҟәну, ҳҵас-ҳқьабз атәы зҳәо асасцәа дырбара, деилыркаара" - ҳәа иҳәеит Мурман.

© Sputnik / Томас Тхайцук
Бзыԥтәи аҩхааҿ иҟоу ҳқьабзқәа ӡырзго амузеи

"Аԥсуа иашҭа" уанынҭалалак, иаразнак улаԥш нарықәшәоит жәытәнатә аахыс аԥсуаа рхы иадырхәоз амаҭәарқәа. Араҟа иҟоуп анхашәа-чашәа, абзазаратә мыругақәа, ачысмаҭәа уҳәа амаҭәарқәа рацәаны. Иара убас, акәаскьа инаркны акәытҵара аҟынӡа аԥсуаа ирызгылаз ахыбрақәа зегьы.

© Sputnik / Томас Тхайцук
Бзыԥтәи аҩхааҿ иҟоу ҳқьабзқәа ӡырзго амузеи

Анаҩс иубоит ауардын, ауардын - аԥсуа ибзазараҿ даара ицхыраагӡа дуун. Иара змамыз ԥсыуа ҭаацәарак ыҟаӡамызт. Аџьықәреи, амҿы, ажь зҳәаз еиԥш иахьа машьынада ауаҩы дышхәарҭам еиԥш, аԥсуа нхаҩы уардында акагьы изыҟаҵомызт. Иара убас уаҟа ихшьуп акалаҭ хәыҷқәа, амҵәышә хәыҷқәа, ачана настхашэа игылоуп. Ажәытә мыругақәа аԥшәмацәа абиԥарала еиқәырханы иааргаз роуп, иҟоуп иаархәазгьы.

"Аҽхырԥарҭаҿ ихшьу акьахь саб инапкымҭоуп, уи шьҭа 40-45 шықәса ахыҵуеит. Ижәбо ауардынгьы саб инапала иҟаиҵаз ауп. Еиуеиԥшым амаҭәарқәа, ауаткаршыга, ақәаб, хатәгәаԥхарала иҳазҭаз ыҟоуп, убас иааҳхәақәазгьы маҷым,"- ҳәа иҳәоит аԥшәма.

© Sputnik / Томас Тхайцук
Бзыԥтәи аҩхааҿ иҟоу ҳқьабзқәа ӡырзго амузеи

Мурман изыҳәаны ари зегьы гәалашәароуп, иарбан маҭәарзаалакгьы ихәыҷра, иқәыԥшра ашықәсқәа игәаланаршәоит.

"Сара сзыҳәан арҭ зегьы хҭыс-хҭыск ирыдҳәалоуп. Ауардын санахәаԥшуа исгәалашәоит шаҟантә сашьцәеи сареи уардынла ҳныҟәахьаз. Исгәалашәоит, ҽнак сашьеи сареи ҳаб ҳицны мҿаагара ҳцеит. Ҳаб иҳаиҳәеит ауардын ахьаанкылатәыз аҭыԥ, аха ҳара ҳамӡырҩра иахҟьаны ԥхьаҟа ҳандәықәла, ҳуардын ҳцәааҳәит, амҩақәа ҽеиӡамызт, иҿыбгаран. Ажәакала, ҭаацәара дук ҳҭоурых ауп сара сзын абри ижәбо ауардын", - ҳәа игәалашәарақәа ҳацеиҩишеит Мурман.

"Аԥсуа иашҭа " аҩнуҵҟа имҩаԥыргоит аныҟәарақәа. Мурман асасцәа ирҭаауа ирзеиҭеиҳәоит, иарбан маҭәарзаалак иамоу аҵакы атәы, уи рхы ишадырхәоз ҳабацәа, ҳабдуцәа.

© Sputnik / Томас Тхайцук
Бзыԥтәи аҩхааҿ иҟоу ҳқьабзқәа ӡырзго амузеи

"Аныҟәарақәа мҩаԥызгоижьҭеи, сара дсықәымшәацт азҿлымҳара аазмырԥшыз аӡәы. Даара интересс икны иазыӡырҩуеит иазҵаауеит амаҭәарқәа закәу, излыху, шаҟа шықәса рхыҵуа", - ҳәа иҳәоит Мурман.

Акрыфарҭа акәша-мыкәша даара иԥшӡарҭоуп, аӡы ахьхьаҳәа имҩасуеит, ахра иаҿагылоу аҵла дуқәа иасуа аԥша еимнадоит. Атәарҭақәа аӡы ихгылоуп, уаантәи уаныԥшуа зынӡа алакә тәылаҿ саама уҳәо аҟынӡа унеиуеит. Ари ақьафурҭа ӡынгьы-ԥхынгьы асасцәа рыла иҭәуп. Еиҳараӡак аӡын асы анлеиуа иблахкыгоуп рҳәоит аԥшәмацәа.

87

Иҳаҩсыз уахыки-ҽнаки рыла 112-ҩык COVID-19 рыхьит, аӡәы лыԥсҭазаара далҵит Аԥсны

10
Аепидемиа ҟалеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 27265-ҩык рҟынӡа инаӡеит, ргәы бзиахеит 22318-ҩык ауааԥсыра, рыԥсҭазаара иалҵит 411-ҩык.

АҞӘА, цәыббра 24 – Sputnik. Иҳаҩсыз уахыки-ҽнаки рыла COVID-19 азы атестқәа арҭеит 536-ҩык Аԥсны ауааԥсыра, урҭ рахьтә 112-ҩык рцәа акоронавирус шалаз аадырԥшит.

Урыстәылатәи арратә госпиталь аҟны акоронавирус злаз 1960 шықәсазы ииз аԥҳәыс лыԥсҭазаара далҵит. 

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 45-ҩык, рҭагылазаашьа бааԥсуп фҩык, ибжьаратәуп - 28-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 28-ҩык, урҭ рахьтә ааҩык апациентцәа рҭагылазаашьа уадаҩуп. Очамчыра ирхәышәтәуеит 9-ҩык, Гагратәи ахәышәтәырҭаҿы - 15-ҩык, урҭ рахьтә хҩык рҭагылазаашьа уадаҩуп. Тҟәарчалтәи ахәышәтәырҭаҿы - 8-ҩык апациентцәа. Аҟәа иҟоу амобилтә госпиталь аҿы - 66-ҩык апациентцәа, жәаҩык рҭагылазаашьа хьанҭоуп.

Аоперативтә штаб аҳәара ҟанаҵоит ауааԥсыра аҿкы рхы ацәырхьчаларц.

Акоронавирус иадҳәалоу ажәабжьқәа шәрыԥхьар ҟалоит абра>>

10
Атемақәа:
Аҿкычымазара – акоронавирус Аԥсни адунеи аҿи: иалкаау

Раионк аԥсҭазаараҟынтә: Царгәыш аӡиа Риҵа амашьынаргыларҭа аҟны русушьа атәы

9
(ирҿыцуп 20:36 24.09.2021)
Аӡиа Риҵа аҵакыраҿы амашьынаргыларҭа аҟны аус зуа Сасрыҟәа Царгәыш арадио Sputnik аефир аҟны еиҭаиҳәеит аҭыԥан аусура шеиҿкаауи, ирызцәырҵуа ауадаҩрақәеи ртәы.

Раионк аԥсҭазаараҟынтә: Царгәыш аӡиа Риҵа амашьынаргыларҭаҟны русушьа атәы
"…амашьынақәа ҳархылаԥшуеит, амбжьахрақәа ыҟам, уи аганхьала ҳҭынчуп. Азинхьчаратә маҵзура аусзуҩцәа ҳадгылоуп, ҳаицхыраауеит. Амашьына аргыларҭақәа х-ҭыԥкны иҟоуп, 150-200 машьына рҟынӡа хыхьтәи аҿы иакуеит.

Аус ишахәҭоу иууозароуп, иамуазар аҩны утәароуп. Иҟоуп еиҵахарақәак аныҟало амашьынақәа анырацәоу, аха аԥҟара еиҳарк иназмыгӡо аҭыԥан инхо ҳауп. Сааҭк амашьына аргылара 20 мааҭ иаԥсоуп, иҟоуп амш зегьы иргыланы ицо, урҭ 100 мааҭк ршәоит, - иҳәеит Царгәыш.

Аицәажәара шәазыӡырҩыр шәылшоит аудиофаил аҟны.

9