Бадра Гәынба Урыстәылатәи Аҳәынҭқарратә Думахь алхрақәа реиҿкааразы аилацәажәара мҩаԥигеит

12
(ирҿыцуп 16:27 13.09.2021)
Цәыббра 19 азы Урыстәыла Аҳәынҭқарратә Думахь алхрақәа раан Аԥсны иахьаҵанакуа абжьыҭаратә ҭыԥқәа жәба аадыртуеит. Абжьыҭара алшоит Аҟәа, Гагра, Пицунда, Гәдоуҭа, Бамбора, Очамчыра, Тҟәарчал, Гал.

АҞӘА, цәыббра 13– Sputnik, Асмаҭ Ҵәыџьԥҳа. Аԥсны ахада ихаҭыԥуаҩ Бадра Гәынба Урыстәылатәи Аҳәынҭқарратә Думахь алхрақәа реиҿкааразы аилацәажәара мҩаԥигеит араионқәеи аусбарҭақәеи рхадацәа алархәны.

Абжьыҭаразы аҭыԥқәа аартхоит: Аҟәа ашколқәа №10, №5 рҿы, Гагра – Акультура ахан аҿы, Пицунда – Акультура ахан аҿы.

Гәдоуҭа араион аҿы абжьыҭара мҩаԥысуеит абжьаратә школ №2, Бамборатәи ашкол аҿи.

Очамчыра – ашкол №2 ахыбраҿ, Тҟәарчал – Дырмит Гәлиа ихьӡ зху Акультура ахан аҿы, Гал – Акультура ахан аҿы.

Абжьыҭаратә ҭыԥқәа аартызаауеит асааҭ 8:00 - 20:00 рҟынӡа.

"Азхьаԥшра асҭар сҭахуп Гәылрыԥшь араион, Аҟәа араион, Афон Ҿыц рҿы алхырҭатә ҭыԥқәа шыҟам. Аратәи ауааԥсыра рыбжьыҭара мҩаԥыргарц азы араионқәа реиҳабацәа анапынҵа рыҭахоит атранспорт еиҿыркаарц", - иҳәеит иара.

Гәынба иазгәеиҭеит аԥснытәи аган абжьыҭара апроцесс аганахь ала атехникатә еиԥҟьарада еиҿнакаар шакәу.

Аԥсны иҟоу Урыстәыла Ацҳаражәҳәарҭа абжьгаҩ Максим Литвинов еиҭеиҳәеит Аҟәатәи абжьыҭаратә ҭыԥқәа Забаикалтәи мандатктәи аокруги Павловтәи мандатктәи аокруги ишрыдҳәалоу, Гагратәи абжьыҭаратә ҭыԥқәа –Самаратәи мандатктәи аокруг, егьырҭ аҭыԥқәа Всеволожтәи аокруг иадҳәалоуп.

Иара иҳәеит ҭыԥ-цыԥхьаӡа 7 – 15-ҩык Ацҳаражәҳәарҭа ахаҭарнакцәа шыҟало, жәаҩык иреиҵамкәа амилициа аусзуҩцәеи ААИ аекипажи шыҟало.

"Аԥсны инхо алхыҩцәа ирыҭахоит ҩ-биуллитенк: актәи афедералтә сиақәа рылеи апартиақәа рылеи; аҩбатәи мандатктәи акандидатцәа рыла. Аинформациа аиура ҟалоит аинтернет аҿы" - иҳәеит иара.

Араионқәа рхадацәа имҩаԥыргахьоу аусуразы аҳасабырба ҟарҵеит.

"Абжьыҭара иалахәхар зҭаху ауаа рынеиааира еиҿкаахоит. Аҟәа ҳҽазҳархиахьеит ҳәа сҳәар сылшоит" - иҳәеит ақалақь ахада Беслан Ешба.

Аԥсны ААКХ ахада Ҭамаз Гогьиа иҳәеит Аҳәынҭдумахь алхрақәа Урыстәыла аҩнуҵҟатә ус шакәу, аӡәгьы ихы шалеимгало.

"Ҳара изҳаҳәо аҿы ацхыраара ҟалоит. Араионқәа рхадацәа атәылауаа ацхыраара рырҭоит", - иҳәеит иара.

Абжьыҭара мҩаԥысуеит цәыббра 19 рзы, рхы аладырхәыр рылшоит Аԥсны инхо, 18 шықәса зхыҵхьоу Урыстәыла атәылауаа, иара убасгьы абжьыҭара амш азы ара аамҭала иҟоу. Абжьыҭаразы иумазароуп аҩнуҵҟатәи ма аҳәаанырцәтәи урыстәылатәи атәылауаҩшәҟәы.

Аԥсны инхо, 18 шықәса зхыҵхьоу Урыстәыла атәылауаа рзы абжьыҭаратә ҭыԥқәа еиҿкаан 2011, 2016 шықәсқәа раантәи алхрақәа раан. 2016 шықәсазы абжьыҭара рхы аладырхәит 20 000-ҩык ауааԥсыра, урҭ рҟынтәи 75% апартиа "Иаку Урыстәыла" азы рыбжьы рҭиит.

2018 шықәсазы ареспубликаҿ имҩаԥысит Урыстәыла ахада иалхразы абжьыҭарақәа. Владимир Путин изы рыбжьы рҭиит 94,1% ма 39 427-ҩык.

Урыстәыла Аҳәынҭқарратә Думахь адепутатцәа хәышықәса аҿҳәара рыманы иалырхуеит еилаԥсоу асистемала: 225-ҩык адепутатцәа апартиатә сиақәа рыла, даҽа 225-ҩык – мандатктәи аокругқәа рҟынтәи.

Сынтәа Афедералтә сиақәа ирнуп 14 партиа: КПРФ, "Зеленые", ЛДПР, "Новые люди", "Единая Россия", "Справедливая Россия - За Правду", "Яблоко", "Партия Роста, Российская партия свободы и справедливости", "Коммунисты России", "Гражданская платформа", "Зеленая альтернатива", "Родина", "Партия пенсионеров".

12

Хра злоу ахҭысқәа: Хәытаба Ҭырқәтәылеи Аԥсни инхо аԥсуаа реимадара иазкны

3
(ирҿыцуп 14:33 23.09.2021)
Арепатриациазы аҳәынҭқарратә хеилак ҳџьынџьуаа рымадаразы аҟәша аиҳабы Инал Хәытаба арадио Sputnik аефир аҿы дазааҭгылеит Ҭырқәтәылеи Аԥсни иҟоу аҿар реимадаразы имҩаԥырго апроект атәы, еиҭеиҳәеит, ҳџьынџьуаа рҭоурыхтә ԥсадгьыл ахь рырхынҳәразы ицо аусура атәы.
Хра злоу ахҭысқәа: Хәытаба Ҭырқәтәылеи Аԥсныи инхо аԥсуаа реимадара иазкны

"Аԥсныҟа ахынҳәразы ҳкомитет еиуеиԥшым апроектқәа ҟарҵоит, урҭ ируакуп ҳҿар Ҭырқәтәылантәи Аԥсныҟа иааны ААУ аҟны аҵара дырҵара. Уи азын ауниверситет аректор Алеко Гәарамиа иаҳҳәеит, иара даара игәы иаахәеит абри аҩыза апроект атәы аниаҳа. Адгылара шаиҭо атәы ҳаиҳәеит.

Арахь иаауа абызшәа рыздырӡом, убри азы раԥхьатәи ашықәс аԥсуеи аурыс бызшәақәеи дырҵаразы акурсқәа аадыртуеит. Абызшәазы аԥышәарақәа анарҭалак, иалырхаз азаанаҭ ала иахыԥхьаӡалахоит.

Ҭырқәтәылатәи ҳдиаспора ари даара ргәы иаахәеит. Иаарц зҭаххазгьы даара ирацәаҩхеит, аха зегьы зымааӡеит, избанзар, атәылауаҩшәҟәы аиура цәгьоуп. Уажәазы 9-ҩык рсиа ҳамоуп. Руаӡәы ахԥатәи акурс аҿы аҵара иҵон, аха абри аҩыза алшара ыҟоуп ҳәа аниаҳа, Ҭырқәтәыла аҵара ахьиҵоз ауниверситет ааныжьны Аԥсныҟа даауеит", - ҳәа еиҭеиҳәеит Хәытаба.

Инеиҵыху аиҿцәажәара шәазыӡырҩыр шәылшоит аудиофаил аҿы.

3

Аԥсны аиҳабыра анхарҭаз аҳәынҭқарратә программа еиҭахәаԥшраны иҟоуп

6
2020 шықәсазы аекономикатә ҭагылазаашьа иахҟьаны ареспубликаҿы аамҭала иаанкылан аҳәынҭпрограммақәа ҩба: "Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәара ", "Анхарҭа-2021".

АҞӘА, цәыббра 23 - Sputnik. Аԥсны Аҳәынҭқарра хаз игоу атәылауаа ркатегориақәак нхарҭала реиқәыршәараҿ ацхыраара аҟаҵаразы аҳәынҭқарратә программа аформа ҿыц апроект изаамҭанытәиу Аминистрцәа реилазаара аилатәараҿы иахәаԥшраны иҟоуп. Абри атәы аанацҳауеит Аминистрцәа реилазаара асаит.

Цәыббра 22 азы аԥыза-министр Александр Анқәаб аусутә еилацәажәара мҩаԥигеит социалла ихьчам атәылауаа аҳәынҭқарратә цхыраара рыҭара азҵаарақәа рзы.

2019 шықәсазы Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" ирыбзоураны 50 ҭаацәара ацхыраара рыҭан.

Аҳәынҭпрограмма иалахәу акандидатцәа рҟынтә азыҳәақәеи адокументқәеи рыдыркылон 2020, 2021 шықәсқәа рызгьы, аха абиуџьет аԥарақәа аҿкчымазара аԥырҟәҟәара иазырхахеит.

Аусутә еилацәажәараҿы апрограммақәа рыструктуратә модификациагьы иалацәажәан. Аԥыза-министр инапынҵала азиндырыҩцәа, асоциалтә усхк аекспертцәа апрограмма иалахәхар зылшо акатегориақәа ҭырҵааит.

Иахьазы иазыԥхьагәаҭоуп апрограммақәа еидҵаны акны иҟарҵарц. Еидҵоу аресурсқәа 40 миллион мааҭ рҟынӡа ҟалоит, уи есышықәса 50 ҭаацәара ацхыраара рыҭара алнаршоит. Апрограмма ҩышықәса ҿҳәарас иаҭахоит.

Александр Анқәаб иҳәеит апрограммақәа рҳәаақәа ирҭагӡаны анхарҭаҭыԥ роур шалшо, I агәыԥ аинвалидцәа, 1992-1993 шықәсазтәи аибашьраан иҭахаз рҭаацәарақәа, зҭаацәа ҭахаз ахәыҷқәа, ԥшьҩык инареиҳани ахшара змоу аҭаацәарақәа.

Аҳәынҭқарратә программақәа "Аԥсны атәылауаа ркатегориақәак нхарҭаҭыԥла реиқәыршәаразы", "Анхарҭаҭыԥ-2021" рзы акомиссиа аусура аанкылан 2020 шықәса хәажәкырамзазы акоронавирус алаҵәара инадҳәаланы.

6