Сослан Салаҟаиа: Диубуа европаа Кавказ ажәларқәа дирдырит

© Фото : Екатерина Чеснокова / Амедиаҵәахырҭахь аиасраКавказ. Архивное фото.
Кавказ. Архивное фото. - Sputnik Аҧсны
Анапаҵаҩра
Лаҵарамза 28, 1798 шықәсазы диит Швеицариатәи археолог, анатуралист Фредерик Диубуа де Монпере. Аԥсуа ҭҵаарадырраҿы уи дырдыруеит ф-томк иҟоу иусумҭа "Кавказ аныҟәарақәа" захьӡу ала.

АҞӘА, лаҵ 28 – Sputnik, Асҭанда Арӡынԥҳа. Диубуа Аԥсныҟа дааит 1833 шықәсазы, уи ашьҭахь иаарласны Крымҟа дцеит, уаантәи Нхыҵ-Кавказ, иҳәеит аҭоурыхҭҵааҩ Сослан Салаҟаиа.

Аҵарауаҩ ишазгәеиҭаз ала, Диубуа Крыми Кавкази иныҟәарақәа раан аматериал рацәаны еизигеит, 1838 шықәсазы уи ф-томкны иҭыҵит  "Кавказ аныҟәарақәа" ҳәа хьӡыс иаҭаны.

"Уи ишәҟәаҿы дазааҭгыланы аԥсуаа рҭоурых далацәажәеит. Диубуа игәаанагарақәак иашамхеит, иаҳҳәап Аԥсуа ҭӡы анкьа абырзенцәа идыргылеит ҳәа ииҳәо. Егьа ус акәзаргьы, европаа идеилиркааит "ачерқьес милаҭ" закәу, уи уахь иахиԥхьаӡалон ачерқьесқәа, аҟабардақәа, аԥсуаа, абазақәа, адыгақәа", — иҳәеит Салаҟаиа.

Уи иажәақәа рыла,  Диубуа иусумҭақәа рҿы аинтерес зҵоу агеографиатә дыррақәа ааигоит, иара убас, Кавказ ажәларқәа рынхашьа, ркультура, рҵасқәа ирызкны адыррақәа.

"Диубуа иусумҭақәа рҿы иҟоуп ашьхарыуаа-қәылаҩцәа рхаҿсахьақәа, убри аан уи иазгәеиҭоит ари аетап ажәларқәа зегьы ишырхысыз, европаагьы убрахь иналаҵаны", — азгәеиҭеит Салаҟаиа.
Сослан Салаҟаиа игәаанагарала, Фредерик Диубуа ишәҟәы "Кавказ аныҟәарақәа" аиҭаҭыжьра аҭахуп.

Фредерик Диубуа Швеицариатәи ақалақь Невшатель диит. Апрофессор иҭиҵаауан Крым, Нхыҵи Аахыҵи Кавказ ажәларқәа рҭоурых.

Ажәабжьқәа зегьы
0