Цхинвал

Аахыҵ Уаԥстәыла аиҳабыра ԥхьатәара ицеит

25
(ирҿыцуп 09:38 31.08.2020)
Ахәаша ауха Аахыҵ Уаԥстәыла аԥыза-министр Ерик Пухаев ԥхьатәара дцеит Цхьинвал имҩаԥысыз амитингқәа раамышьҭахь.

АҞӘА, нанҳәа 29 - Sputnik. Аахыҵ Уаԥстәыла ахада Анатоли Бибилов инапы аҵаиҩит аԥыза-министр Ерик Пухаев имаҵураҟынтә ихы иақәиҭтәреи аиҳабыра рыԥхьатәареи рзы адҵа, аамҭала аԥыза-министр инапынҵақәа назыгӡо ҳәа деиҭеит Геннади Бекоев. Абри азы адырра ҟанаҵоит Sputnik Аахыҵ Уаԥстәыла.

Бибилов Аминистрцәа Реилазаара адҵа риҭеит рнапынҵақәа нарыгӡаларц Аахыҵ Уаԥстәыла аиҳабыра ҿыц шьақәыргылахаанӡа.

Ахәаша, нанҳәа 28 рзы еилкаахеит атәыла Аҩнуҵҟатәи аусқәа рминистрра иатәу аамҭалаҭақырҭаҿы иԥсҭазаара дшалҵыз иҭакыз Инал Џьабиев, иара дҭакын аҩнуҵҟатәи аусқәа рминистр Игор Наниев ишьра аҽазышәара мҩаԥигеит ҳәа гәҩарас дрыман. Апрокуратура ашьаус хацнаркит "Амаҵуратә зинмчра ахыԥара" ахәҭаҷ аҟазшьақәа рыла.

Анатоли Бабилов иӡбеит ААР аминистр Игор Наниев имаҵура иамхра. 

Иара уи аҽны, нанҳәа 28 рзы Аахыҵ Уаԥстәыла аҳҭнықалақь Цхьинвал амитингқәа мҩаԥысит. Еизаз ауаа аиҳабыреи апрокурор хадеи ԥхьатәара ицарц адҵа ҟарҵон. Апротестқәа мзызс ирыман Инал Џьабиев иԥсра. Атәыла аԥыза-министр Ерик Пухаев амитингқәа ирхырҟьаны имаҵура аанижьит. Анаҩс еизаз ауаа рҿаԥхьа дцәырҵит атәыла ахада, ауаа ажәа риҭеит аҭагылазаашьа хаҭала ахылаԥшра шаиҭало азы.

25

Аахыҵ Уаԥстәыла COVID-19 зыхьыз рхыԥхьаӡара 76-ҩык рҟынӡа инаӡеит

20
(ирҿыцуп 14:50 13.06.2020)
Аахыҵ Уаԥстәыла акоронавирус аҟынтәи ҩынҩажәаҩык рҽырхәышәтәхьеит. Ареспубликатә медцентр аҿкы чымазарақәа рыҟәшаҿы асабша, рашәара 13 рзы COVID-19 рыхьны ишьҭоуп 36-ҩык апациентцәа.

АҞӘА, рашәара 13 - Sputnik. Апандемиа рыларҳәеижьҭеи Аахыҵ Уаԥстәыла COVID-19 зыхьыз рхыԥхьаӡара 76-ҩык ыҟоуп, даҽа ԥшьҩык акоронавирус шрыхьыз шьақәырӷәӷәан иҳаҩсыз уахыки-ҽнаки рзы, абри атәы аанацҳауеит Sputnik Аахыҵ Уаԥстәыла.

Аинфекциа зыҟны ҿыц иаарԥшыз Аахыҵ Уаԥстәылаҟа Урыстәылантәи ихынҳәыз арратә ҵараиурҭақәа ркурсантцәа роуп.

"Иҳаҩсыз уахыки-ҽнаки рыла даҽа ԥшь-коронавирус хҭыск аарԥшын. Ахәышәтәырҭаҟынтәи илырҩаазгьы ԥшьҩык ыҟоуп. Иахьатәи аамҭазы Ареспубликатә медцентр аҿы ишьҭоуп 36-ҩык ачымазцәа", - лҳәоит Аахыҵ Уаԥстәыла ахархәаратә хылаԥшра ахаҭарнак Анна Гаглоева.

Зынӡа лаҵара 6 рзы раԥхьатәи ачымазцәа анцәырҵ инаркны атәыла ахәышәтәырҭақәа рҟынтәи илырҩаахьеит акоронавирус ззышьақәырӷәӷәаз 40-ҩык ауааԥсыра.

Аҳақьымцәа рхылаԥшра аҵаҟа иҟоуп 252-ҩык - урҭ зегьы ахәышәтәырҭақәеи асасааирҭа "Алани" рҟны акарантин иахысуеит.

Апандемиа рыларҳәеижьҭеи Аԥсны COVID-19 рыхьхьеит 37-ҩык. Иацы Аԥсны ахада Аслан Бжьаниа аԥсуа-аурыс ҳәаа аҳәаанырцә тәылауаа рахысразы аԥкрақәа рыҿҳәара ԥхынгәы 1 аҟынӡа ацҵаразы аусԥҟа инапы аҵаиҩит, атәыла аҩнуҵҟа акәзар, ԥкрақәак аԥыхуп рашәара 15 инаркны.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

 

20
Атемақәа:
Ачымазара ҿкы – акоронавирус Аԥсни адунеи аҿи: иалкаау

Аахыҵ Уаԥстәыла АШәЕ Қырҭтәыла абиолабораториа Лугара ахықәкқәа еилыркааит

18
(ирҿыцуп 00:27 10.06.2020)
Аахыҵ Уаԥстәыла Аҳәынҭқарратә шәарҭадаратә еилакы атәылауаа рахь ааԥхьара ҟанаҵоит ареспублика аҳәаақәа еилазгои Аахыҵ Уаԥстәыла асанитар-епидемиологиатә ҭагылазаашьа зеиԥшроу иазҵаауа Қырҭтәыла инхо рыуацәеи рыҽрымарымдаларц.

АҞӘА, рашәара 10 - Sputnik. Аахыҵ Уаԥстәыла Аҳәынҭқарратә шәарҭадаратә еилакы "Апатриотизм злоу Қырҭтәыла аграждантә уаажәларреи Қырҭтәыла НПО-еиҿкаарақәа рактивистцәеи" рҟынтәи ироуа адыррақәа шьаҭас иҟаҵаны адырра ҟанаҵоит Қырҭтәыла иҟоу абиолабораториа Лугара аҿы аус шадыруло абиологиатә бџьар ҳәа аанацҳауеит Sputnik Аахыҵ Уаԥстәыла.

Аилак апресс-маҵзура ишаанацҳауа ала, абри аиԥш аус Қырҭтәыла анапхгара рҿаԥхьа иқәдыргылеит Қырҭтәыла иҟоу ар рмедицина-ҭҵаарадырратә ҟәшаҟынтәи америкатәи акураторцәа.

Уи адагьы, Аахыҵ Уаԥстәыла Аҳәынҭқарратә шәарҭадаратә еилакы адыррақәа рыла, алабораториа Лугара аҿаԥхьа дҵаны иқәыргылоуп "ареспубликаҿы асанитар-епидемиологиатә ҭагылазаашьа аҭҵаара, Аахыҵ Уаԥстәыла аҿкы чымазарақәа рыҟазааразы аинформациа, ареспублика иахьаҵанакуа авирусқәеи абактериақәеи рзы адыррақәа реизгара". Аахыҵ Уаԥстәыла Аҳәынҭқарратә шәарҭадаратә еилакы адыррақәа рыла, иара убасгьы иҟоуп анапынҵа "аԥстәқәа рықәӡаара иазырхоу адиверсиатә операциақәа рымҩаԥгара, иԥсабаратәымкәа аепизоотиа аԥҵара, арегион аҿы ақыҭанхамҩа "алабораториа Лугара" иҭрыжьуа авакцинақәа ирхьыԥшхартә аҟаҵара".

Аахыҵ Уаԥстәыла Аҳәынҭқарратә шәарҭадаратә еилакы ааԥхьара ҟанаҵоит ианаамҭоу Қырҭтәыла ауааԥсыра рганахьынтә ареспублика абиологиатә шәарҭадаразы аинформациа аинтерес зкуа рзы адыррақәа ҟарҵаларц, рбиоматериал агара иадҳәалоу амедицинатә проектқәа Аахыҵ Уаԥстәыла ауааԥсыра ралагалара атәы азы акыр рдыруазар, иахьахәҭоу еиҭарҳәаларц.

Уаанӡа Урыстәыла Адәныҟатәи аусқәа рминистрра аҳәамҭа ҟанаҵахьан "Лугара ихьӡ зху ауаажәларратә гәабзиарахьчара Аҭҵаарадырратә центр аҿы аҳәаанырцә ҳәынҭқаррақәа рырра-биологиатә усура азҵаара рацәа цәырнагоит" ҳәа.

Урыстәыла Адәныҟатәи аусқәа рминистрра иазгәанаҭон ЕАА Ртәылахьчара аминистрреи аффилиациа зызуу аструктурақәеи алабораториа аҭҵаарақәа аԥаразоужьра рнаҭоит ҳәа.

Урыстәыла Адәныҟатәи аусқәа рминистрраҿ иара убасгьы иазгәарҭеит алабораториа аусура азҵаара рацәа цәырнагоит абиологиатә бџьар ахархәаразы азин аҟамҵаразы Аконвенциа аҳәаақәа ирҭагӡаны ЕАА ауалԥшьақәа ирықәныҟәо ирықәымныҟәо ҳәа.

"Абри абиообиект аҟны аҿкы чымазарақәа цәырызго ахычԥаԥыр, амаҵақәа рхархәарала аҭҵаарқәа мҩаԥысуеит", - рҳәеит Урыстәыла ААР аҟны.

Иара убас шәаԥхьар ҟалоит:

18

"Аԥшӡа" насыԥда дшаанхаз: арԥыс изку ажәабжьк

2
(ирҿыцуп 14:20 26.09.2020)
Анасыԥдара иазку аҭоурых иадыруа ахҭысқәа аиҳарак аҭыԥҳацәа роуп изыхҳәаау, аха уи иаанагаӡом арԥарцәа рразҟы арыцҳара акьысуам ҳәа. Иахьа ишәзеиҭаҳҳәо ажәабжь зызку, қыҭак аҟны "Аԥшӡа" ҳәа жәаҩыла аҭыԥҳацәа илаԥшықәҵаны ирымаз, аԥсҭазаара "злахәмарыз" аҷкәын иоуп.

Саида Жьиԥҳа, Sputnik

"Аԥшӡа" - ари ахьыӡ ҷыда ауп акәымзар, ихьӡ хаҭа аӡәгьы иҳәомызт, уи аҟазшьарбада ари аҷкәын иоура, иҭбаара, ибла иаҵәа, иччаԥшь ихнаххьаз рхаҿы дырзаагомызт азы.

"Аԥшӡа" ажәеизатәи акласс аҿы дтәан, Асовет Еидгыла аррахь иаанаԥхьараны иҟаз арԥарцәа дрыцны амедицинатә гәаҭарақәа данырхысуаз. Убасҟан аҳақьым иабжьеигеит аурологиа аганахьала ихы гәеиҭарц, аха иԥхашьаз, 18 шықәса ирықәыз аҷкәын иҭаацәа рҿы иӡеит ари апроблема атәы.

"Аԥшӡа" Украина арра анихигоз ӡынрак азы ӷәӷәала дычмазаҩхеит. Ишоура акраамҭа имтәо ианалага, арратә ҳақьымцәа агәаҭарақәа жәпакы дырхыжьны, ипроблема аҽшарцәгьаз, наҟ-наҟ ахшара дшимоуа атәы рҳәеит. Хымԥада, ақәыԥшра иҭагылаз арԥыс, арҭ ажәақәа ирыҵаз аразҟыдара ихахьы иаразнак иааимгеит. Аамҭа анца ауп данрызхәыц.

"Аԥшӡа" аишьцәа дреиҵбан азы, аб игәараҭа иазынхоз иара иакәын. Хәҩык ахшара рахьтә иара ида аҭаацәарақәа аԥырҵахьан. "Уқәра цоит, уԥшӡарагьы наӡаӡа иаанхаӡом, аԥҳәыс даага", - ҳәа аӡәаӡәала дыхҭаркуа иалагеит рашьа 35 шықәса рҟынӡа даннеи.

"Бареи сареи ҳаибагар ҟалаӡом, аха бзиа бсамхабеит, ишԥаҟасҵари?" - ҳәа лаиҳәалон "Аԥшӡа" иаҳәшьа ланхәыԥҳа, дара рахь аангылара данцалоз. Аҿар рымаӡақәа анрыҵырх, ирылабжьеит "ари маҳагьароуп" ҳәа раҳәауа. Уи аахыс 20 шықәса ҵит, анхәыԥҳа хаҵа дцеит, ҩыџьа аԥҳацәа лоуит, аха лыԥшәма инапы шьҭихуан азы лычҳара анхыжжыла, лҭаацәагьы "ҳаԥҳа даҳшьума" рҳәан ддәылганы аҩныҟа дааргеит.

"Аԥшӡа" лара лахь хымԥада уажәшьҭа акагьы дақәгәыӷуамызт, аха даҽаӡәгьы длыхәаԥшӡомызт аиҳарак ипроблема иахырҟьаны.

Ныҳәак аҽны, "Аԥшӡа" иаҳәшьаԥа дицны днанагеит ихәыҷреи, иқәыԥшреи ахьихыигоз агәараҭахь.

Аишәа рхианы, "иуҭахыу акыр ыҟоума" ҳәа ивагьежьуаз "анкьатәи ибзиабара" зегь акоуп игәаӷьны ила дҭаԥшуамызт, иаргьы ихы ларҟәны, акәын аҭак шлиҭоз, аха убасҟан илашәыз иоуп изымбаз рҩыџьагьы рцәаныррақәа шҿыхаз.

Аҿыҵгақәа ҟаҵо, зны имашьына акы агушәа, ҽазны акы ихашҭызшәа иблахкыга дибарц азы "Аԥшӡа" лассы-лассы амҩа дықәлон уахь.

Шықәсыбжак ааҵуаны, ацәаныррақәа ирзымиааиз "Аԥшӡеи" анхәыԥҳаи маӡала еиқәшәо иалагеит. "Аԥҳәыс дааугар, агәра усыргоит ҳаизыҟазаашьақәа рҵыхәа шыԥҵәо" ҳәа иалҳәалон лара, иахькылнаго еилылкаауан азы. Арҭ ажәақәа "Аԥшӡа" рҭак ҟаиҵомызт, игәалаҟазаара бжьырхуан ауп…

Ҽнак "Аԥшӡа" ибзиабаҩ рымаӡаҭыԥ ахь дымнеиӡеит. Уи акырӡа игәнигеит, машәырк лыхьзар ҳәа дшәан, еиҭа ҿыҵгак ԥшааны дрызцеит. Асас абжьааԥнеиԥш аишәа издырхиеит, аха "иуҭаху акыр ыҟоума" ҳәа уажәтәила ивагьежьуаз иаҳәшьаԥҳа ҳәыҷы лакәын. Аӡәгьы ианимаҳауаз "баҳәшьаду дабаҟоу" ҳәа данлазҵаа, "лгәы бзиам, диоуп" ҳәа иаҭалкит. Арҭ ажәақәа ишоура харгалеит, игәы идырхьит, аха дахьышьҭаз ауадахь дызлаҩналози…

Анхәыԥҳа ақалақьтә џьармыкьа аԥхьа лыԥсы лылшәшәаны данкаҳа, дызбаз ауаа атакси ала ахәшәтәырҭахь дрышьҭит. "Ишакәым бкыдҟьеит, сыӡӷаб, ахәыҷы деиқәымхеит" ҳәа аҳәса рҳақьым зыԥсы ааиз лахь лҿанаалха, анхәыԥҳа еиҭа ахчы лхы нылаҳаит. Ахәылбыҽхан, аԥҳәыс лхьаақәа анеиқәтәа аҩныҟа дааит.

"Сара аҭаацәара сзаламлоз ахшара дсоуӡом, џьоукы рыӡӷаб лыгәнаҳа сықәсымҵап ҳәа акәын, бызлацәажәо схаҿы исзаагом, иҵабыргыцәҟьоума?" - ҳәа ибзиабаҩ лахь изҵаарақәа ҵыхәаԥҵәара рмоуит ианеибаба. Иажәақәа идыргәааз аԥҳәыс, ихаимҵозар дзызҵаашаз аҳақьым дазусҭоу аалырԥшит.

"Нан, угәынамӡара еилыскаауеит, аха аԥҳәыс ус анлыхьуа ыҟоуп, амала алаҳәара сахьымӡеит лцәа ҩыџьа асабицәа шалаз, дыццакцәаны дцеит", - ҳәа ахаҵа ихы иаднамкылоз ажәақәа иалҳәеит.

Хара имгакәа, "Аԥшӡа" иқәыԥшраан изықәгылаз адиагноз аҭҵаара далагеит. Москваҟа дахьцаз: "Ауаҩы ахьҭа илаланы даныҟоу егьа проблема изцәырҵуеит, аха уи иаанагаӡом ачымазарақәа зегьы хәышәтәышьа рымам ҳәа. Уара угәы бзиоуп", - ҳәа иарҳәеит уаатәи аҳақьымцәа.

Ибзиабаҩ лҿаԥхьа ишьамхы арсны аҭамзаара шьҭеиҵеит "Аԥшӡа", аҳақьымцәа ирҭахьаз ақьаадқәагьы лнапы инаиркит. Аха изхәарҭоузеи…

"Аԥшӡа" ибзиабаҩ машәырла лыԥсҭазаара ҿахҵәеит. Иара иахьагьы иԥсы ҭоуп, лара дшиџьабоз уаҳа аҭаацәара даламлеит. Ишьапы дахьынӡананагоз аҿыҵгақәа ԥшааны иаҳәшьаԥацәа рахь дцалон, абаҳча дҭысуашәа ҟаҵаны раҳәшьаду лҳаҭгәын аԥхьа днатәалон…

Илашәыз иакәын урҭ ацәаныррақәа зымбоз…

2