"Абысҭа" Сҭамԥылтәи асценаҿы

3075
Хышықәса зхыҵуа, Сҭамԥыл ақалақь аԥсуа Дернеқь аҟны еиҿкаау аҿар ртеатр "Абысҭа" ашьақәгылашьеи, иарбан спектакльқәоу иқәдыргылахьоуи, актиорцәа ԥхьаҟатәи рыгәҭакқәеи ртәы еиҭалҳәеит атеатр асценарист-арежиссиор Шьибзаҳ Назлы.

Саида Жьиԥҳа, Sputnik

Хышықәса раԥхьа адыга ҭыԥҳа, асценарист-арежиссиор Шьибзаҳ Назлы Сҭамԥыл ақалақь аԥсуа Дернеқь аҟны атеатр аԥҵаразы ааԥхьара лоуит. Актиортә ҟазара ззанааҭқәа адҳәалаз аҿар еидкыланы ишьақәлыргылеит атруппа. Аамҭа кьаҿ иалагӡаны, Шьибзаҳ Назлы илыллыршеит аспектакльқәа ҩба рзы асценари ҩны, рықәыргылара.

Шьибзах Назлы
© Фото : Шьибзах Назлы лархив аҟынтә
Шьибзах Назлы

Иџьашьахәу атеатр ахьӡ "Абысҭа" акәзар, уи арежиссиор лажәақәа рыла, зегьы еицҿакны ирыӡбеит бзиа ирбо, рыԥсадгьыл афҩы зхылҵуа ачыс ахьӡ ахызарц.

"Абысҭа" раԥхьатәи аспектакль "Аҩны" ианыԥшуеит амҳаџьырра аамҭа еиқәаҵәақәа.

"Ҳара иахьа Ҭырқәтәыла инхо аԥсуааи, адыгааи, иара егьырҭ Кавказ ахаҭарнакцәеи иаҳхаҳаршҭӡом ҳажәларқәа зыниаз ахҭысқәа. Аха убри азы аус ду мҩаԥгалатәуп. Ҳара ҳтеатр ақәгыларақәа рылагьы ҳҭоурых еиҭаҳҳәарц ҳаҿуп", - ҳәа ҳаиллыркааит асценарист-арежиссиор.

"Абысҭа" аспектакльқәа ирылахәуп ахәыҷқәагьы. Актиорцәа ирҭахуп ҳауаажәлар знысыз амҩа хьанҭа атәы даргьы рхаҟны инхарц, рыблаҿы асахьақәа ааирц.

Ароль хадақәа руакы назыгӡо актриса қәыԥш Хьыбла Тәанԥҳа илҳәеит, аспектакль "Аҩны" аҟны ахәмарра лара лзы аҵак ду шамоу.

© Foto / Атеатр архив аҟынтә
Сҭамԥылтәи атеатр "Абысҭа" ақәыргыламҭа аҟынтәи

"Ароль анагӡараан исоуз ацәаныррақәа ртәы аиҭаҳәара уадаҩуп. Уи иацуп ҵҩа змам абзиабара, агәырҩа. Сара сфырԥҳәызба бзиа илбоз арԥыс аурыс-кавказтәи аибашьраҟны дҭахоит, лара атәым дгьыл ахь дахнагоит. Аԥҳәызба лгәы еиҩшоит, аԥсҭазаара иаҵоу ахаареи, аԥшӡареи ркәицқәа наӡаӡа иҿыцәаауеит ла лзы", - еиҭалҳәоит актриса.

Аспектакль хырқәшахоит аҿыц аамҭа ала. Ашәышықәса аԥхьа зџьынџьдгьыл иаҟәыҭхаз рыԥсадгьыл ахь агәашәқәа рзаатуеит.

© Foto / Атеатр архив аҟынтә
Сҭамԥылтәи атеатр "Абысҭа" ақәыргыламҭа аҟынтәи

"Абысҭа" аҩбатәи ақәгылара "Атәымуаа" азкуп 1992-1993 шықәсқәа рзтәи Аԥсны Аџьынџьтәылатә еибашьра.

Назлы Шьибзаҳ араҟа, аԥсуаа агәилшәҭқәа ирыдылкылеит, ақәылаҩцәа урҭ ԥызҟо ракәны иаалырԥшит. Ари ақәгылара апремиера хәажәкырамзазы арбара азгәаҭоуп.

Шықәсыки бжаки аҽазыҟаҵарақәа мҩаԥганы, актиорцәа асцена ду ахь ицәырҵит. Дара ҩынтә Сҭамԥыл иқәгылахьеит, знык Измиҭ. Ааигәа иргәиҭоуп Измир ақалақь ақәыгалара.

© Foto / Атеатр архив аҟынтә
Сҭамԥылтәи атеатр "Абысҭа" ақәыргыламҭа аҟынтәи

Цәаныррала еибаркыу аҿар рыхәмарра лаӷырӡыда ахәаԥшра уадаҩуп. Актиорцәа рҟазара ихнаххьеит зықьҩыла атеатр абзиабаҩцәа.

Назлы Шьибзаҳ иҳаиллыркааит актиорцәа агәаҳәара дуӡӡа шрымоу Аԥсныи, Нхыҵ-Кавкази, Урыстәыла ақалақьқәеи рҟны иқәгыларц.

"Иҳамоу аспектакльқәа рыҩбагьы аԥсышәалеи, урысшәалеи иҳарцәажәарц ҳҭахуп. Анаҩс ҳгәы иҭоуп Аԥсни, Нхыҵ-Кавкази, Москвеи инхо ҳауаажәлар идҳарбарц", - ҳәа наҵылшьит асценарист-арежиссиор.

"Абысҭа" имҩаԥнаго аҽазыҟаҵарақәа рҿы ацхыраара дуӡӡа аалырԥшуеит Ҭырқәтәыла еицырдыруа актриса, аҟазара амҩаԥгаҩ Аила Алган.

Нызла Шьибзаҳ илҳәеит, аспектакльқәа рҟнытә илҵуа аԥара, Ҭырқәтәыла, аԥсуа қыҭақәа рҿы иҟоу ашколқәа ацхыраара аҳасабала ирырҭарц ргәы ишҭоу.

"Абысҭа" атруппа шьақәгылоуп актиорцәа Ердеми, Аныли, Бенани Цәеиаа, Пелини, Ергьиуль-Мираии Ашәԥҳацәа, Хьыбла Тәанԥҳа, Бурақ Хәымсацә, Ендер Арӡынба, Екәашь Атакан, Ҭаӷан Серџьаи рыла.

3075

Афестиваль "Хьыбла Гьерзмааԥҳа шәаалыԥхьоит..." аконцертқәа ҟалаӡом

7
(ирҿыцуп 13:15 23.07.2021)
Афестиваль "Хьыбла Гьерзмааԥҳа шәаалыԥхьоит..." Аԥсны есышықәса иззыԥшу, иналукааша культуратә хҭысуп.

АҞӘА, ԥхынгәы 23 - Sputnik. Нанҳәамзазы иазԥхьагәаҭаз афестиваль "Хьыбла Гьерзмааԥҳа шәаалыԥхьоит..." аконцертқәа ҟалаӡом ҳәа лыҩуеит ашәаҳәаҩ Facebook аҿы.

"Афестиваль "Хьыбла Гьерзмаа шәаалыԥхьоит..." аҳәаақәа ирҭагӡаны имҩаԥысран иҟаз аконцертқәа ҟалом. Дара азԥхьагәаҭан нанҳәа 13 азы Пицундатәи ауахәамаҿи нанҳәа 15 азы Искандер ихьӡ зху Аурыс драматә театр аҿи", - ҳәа лыҩуеит Гьерзмааԥҳа.

Аоператә шәаҳәаҩы иазгәалҭоит урҭ рыхәҭак 2021 шықәса ҭагалан азы имҩаԥысыр шалшо.

Аԥсны акультура аминистр иусԥҟала ҳтәылаҿы аминистрра иаҵанакуа акультуратә усбарҭақәа – атеатрқәа, аконцерттә залқәа, ацәыргақәҵатә залқәа уҳәа русура аанкылахеит ԥхынгәы 12 инаркны, акоронавирус аламырҵәаразы.

Азеижәтәи афестиваль "Хьыбла Гьерзмааԥҳа шәаалыԥхьоит..." мҩаԥысраны иҟан Аԥсни Урыстәылеи жәлар рартистка Хьыбла Гьерзмааԥҳа, Аҳәынҭқарратә камертә оркестр "Виртуозы Москвы" (анапхгаҩы - СССР жәлар рартист Владимир Спиваков), Санкт-Петербургтәи Аурыс балет Академиа ааӡамҭа, абалерина Кристина Ҷкотуа.

2020 шықәсазы афестиваль акоронавирустә пандемиа иахҟьаны имҩаԥырымгеит.

7

Хьыбла Гьерзмааԥҳа раԥхьаӡа акәны Арена ди Верона аҿы Верди и-"Реквием" далахәын

16
Арена-ди-Верона —антикатәи римтәи амфитеатруп, иара Верона иргылан ҳера алагамҭа 30-тәи ашықәс азы.

АҞӘА, ԥхынгәы 20 - Sputnik, Асмаҭ Ҵәыџьԥҳа. Аоператә шәаҳәаҩы Хьыбла Гьерзмааԥҳа раԥхьаӡа акәны Арена ди Верона аҿы дықәгылеит Верди и-"Реквием" далахәны. Абри атәы ашәаҳәаҩ илыҩуеит Instagram аҿтәи лаккаунт аҟны.

"Верди и-"Реквием" аҿы ашәа сҳәеит. Ари џьашьахәуп. Сыԥрындаз ҳәа сыҟоуп. Насыԥ сыманы схы збоит абрахь сааины ашәа сҳәартә аҭагылазаашьа ахьсымоу ", - лҳәоит Герзмааԥҳа.

Арена-ди-Верона —антикатәи римтәи амфитеатруп, Верона иргылан ҳера алагамҭа 30-тәи ашықәс азы. Ақалақь ашҭа хада агәҭа игылоуп. Иахьазы адунеи аҿы еицырдыруа концерттә ҭыԥуп. 2000 шықәсазы амфитеатр Адунеитә ҭынха абаҟақәа ирыҵадыркит.

  • Хьыбла Гьерзмааԥҳа раԥхьаӡа акәны Арена ди Верона аҿы Верди и-"Реквием" далахәын
    © Foto / Министерство культуры Абхазии
  • Хьыбла Гьерзмааԥҳа раԥхьаӡа акәны Арена ди Верона аҿы Верди и-"Реквием" далахәын
    © Foto / Министерство культуры Абхазии
  • Хьыбла Гьерзмааԥҳа раԥхьаӡа акәны Арена ди Верона аҿы Верди и-"Реквием" далахәын
    © Foto / Министерство культуры Абхазии
1 / 3
© Foto / Министерство культуры Абхазии
Хьыбла Гьерзмааԥҳа раԥхьаӡа акәны Арена ди Верона аҿы Верди и-"Реквием" далахәын

Аоператә шәаҳәаҩы Хьыбла Герзмааԥҳа – адунеитә оператә сценаҟны инарылукааша шәаҳәаҩуп. Лара дықәгылахьеит адунеи иреиӷьӡоу аоператәи аконцерттәи сценақәа рҟны - Ла Скала, Ковент-Гарден, Метрополитен-опера, Бавартәии Римтәии атеатрқәа, Венатәи аопера асцена уҳәа рҟны. Аконцерттә программақәа лыманы адунеи атәылақәа жәпакы дырҭаахьеит.

Хьыбла Герзмааԥҳа – Урыстәылеи Аԥсни Жәлар рартистка, иланашьоуп аԥхьахәқәа "Триумф", "Casta Diva" аноминациа "Иреиӷьӡоу аоператә шәаҳәаҩы" аҟны, амилаҭтә театртә ԥхьахә "Ахьтәы сабрада" аноминациа "Иреиӷьӡоу аԥҳәыс лроль" аҟны, атеатртә ԥхьахә "Ахьы Орфеи" аноминациа "Иреиӷьӡоу ашәаҳәаҩ" аҟны.

Рашәара 12 азы Урыстәыла ахада Владимир Путин Урыстәылатәи Афедерациа Аҳәынҭқарратә премиа лнапы иаиркит аоператә шәаҳәаҩы, Урыстәылеи Аԥсни Жәлар рартистка, Станиславскии Немировичи-Данченкои рыхьӡ зху Москватәи академиатә музыкатә театр асолистка Хьыбла Гьерзмааԥҳа аурыси адунеитәи оператә ҟазара арҿиараҿы иҟалҵаз алагалазы.

16

Аԥсны акоронавирус 145-ҩык ишрылаз аадырԥшит иҳаҩсыз уахыки-ҽнаки рыла

9
(ирҿыцуп 23:42 23.07.2021)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 20925-ҩык ыҟоуп, ргәы бзиахеит 16750-ҩык, рыԥсҭазаара иалҵит 285-ҩык.

АҞӘА, ԥхынгәы 23 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 550-ҩык атестқәа рзыҟаҵан, урҭ рахьтә 145-ҩык рцәа акоронавирус шалаз аадырԥшит, абри атәы аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәшәтәырҭа хадаҿы ишьҭоуп 192-ҩык, рҭагылазаашьа бааԥсуп 63-ҩык, ибжьаратәуп - 54-ҩык.

Аҟәатәи аинфекциатә хәшәтәырҭаҿы ирхәшәтәуеит акоронавирус зцәа иалоу 41-ы пациент, урҭ рахьтә 17-ҩык рҭагылазаашьа уадаҩуп. Очамчыра ирхәшәтәуеит 23-ҩык, рҭагылазаашьа уадаҩуп- ааҩык. Гагратәи ахәшәтәырҭаҿы - 45-ҩык, урҭ рахьтә жәаҩык рҭагылазаашьа уадаҩуп. Тҟәарчалтәи ахәшәтәырҭаҿы - 15-ҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

9
Атемақәа:
Аҿкычымазара – акоронавирус Аԥсни адунеи аҿи: иалкаау