"Аԥсуа ҟармаҵыс" Лиудмила Логәуаԥҳа диижьҭеи 80 шықәса ҵит

100
(ирҿыцуп 14:11 10.02.2019)
Раԥхьатәи аԥсуа профессионалтә оператә шәаҳәаҩы Лиудмила Лагәуаԥҳа диижьҭеи 80 шықәса аҵра инамаданы лҩызцәеи лҵаҩцәеи ргәалашәарақәа анылҵеит Сырма Ашәԥҳа.

Сырма Ашәԥҳа, Sputnik

Абаҩхатәра ду злаз раԥхьатәи аԥсуа профессионалтә оператә шәаҳәаҩы, Аԥсны Жәлар рартистка, "Ахьӡ-Аԥша" аорден ахԥатәи аҩаӡара занашьоу Лиудмила Андреи-иԥҳа Логәуа лырҿиаратә ҟазареи, лԥышәа ҳараки, лыуаҩреи ҳаԥсуа жәлар рҭоурыхтә культура наунагӡа иазынхоит.

© Foto / архив семьи Логуа
Людмила Логуа на творческом вечере украинских композиторов

Лиудмила Лагәуаԥҳа Аҟәатәи амузыкатә ҵараиурҭа инаркны Қарҭтәи, Киевтәи аҳәынҭқарратә консерваториақәа рҟынӡа днанагеит, аҵара лҵон, 70-тәи ашықәсқәа рзы Аԥснытәи аҳәынҭқарратә филармониаҿы солист-вокалистс дыҟан. Амузыкатә ҟазара ахырхарҭақәа зегьы ҩаӡара ҳаракырала илыцааиуан. Амилаҭтә культура аԥҵамҭақәа шьаҭас иҟаҵаны лара лоуп раԥхьаӡа акәны аоператә музыкатә традициа хацзыркыз. Аҿар реиҵааӡараҿы, арҿиаратә интеллигенциа амузыкатә хәышҭаараҿы реидкылара аус аҿы лымч-лылша дамеигӡеит, уимоу лара дахьынхоз лхатә уадаҿы лассы-лассы еиҿылкаауан арҿиаратә хәылԥазқәа.

"Апрофессионалтә нагӡаратә школ аҭоурых аҟны, Лиудмила Андреи-иԥҳа лхаҿсахьа иналукааша акакәны иаанхоит. Акыршықәсатәи лырҿиаратә ԥсҭазаара мҽхакы рацәала иҭбаан, еиуеиԥшым ахырхарҭақәа рҟны аус луан, аихьӡарақәагьы лыман. Зегь раԥхьаӡа иргыланы аҟазара ҷыда злаз аоператә шәаҳәаҩын, уи аганахь ала аҵарадырра ҳаракы лыман", - ҳәа лгәалашәарақәа ҳацеиҩылшеит амузыкаҭҵааҩы Асида Царгәышԥҳа.

Асида Царгәышԥҳа излалҳәо ала, хаҭала лара лырҿиаратә ԥсҭазаараҿы Лиудмила Лагәуаԥҳа анырра ӷәӷәа ҟалҵеит, ирацәан илзеиҭалҳәоз ажәабжьқәа, урҭ рахь иҟоуп ҳара ҳҟынӡагьы иаалгаз.

"Украина Жәлар рартист Мариа Едуард-иԥҳа Донец-Тессеир Лиудмила Андреи-иԥҳа лырҵаҩ лакәын, иарбан усзаалак аҟны адгылара лылҭон, аҵара лзырҵоз зегьы дрылылкаауан, аиашазы уи иҟалҵаз анырра иабзоуроуп Лиудмила Лагәуаԥҳа шәаҳәаҩ дук лаҳасабала лхаҭара ашьақәгылара", - лҳәеит Царгәышԥҳа.

© Foto / архив семьи Логуа
Людмила Логуа, студенческие годы

Аоператә шәаҳәаҩык лаҳасабала Лиудмила Лагәуаԥҳа лықәгыларақәа зегьы рҿы шьахәла лхы аалырԥшуан, ахәаԥшцәа рхыхра дақәшәон. Асида Царгәышԥҳа илгәалашәоит, Қарҭтәи аконсерваториаҿы аҵара анылҵоз лыстуденттә аамҭақәа рзы, Лиудмила Андреи-иԥҳа иара убри аконсерваториаҿы лықәгылара.

"Ҳаамҭазтәи ашаеҵәақәа Хьыбла Герзмааԥҳаи, Алиса Гыцԥҳаи раԥхьа, ас еиԥш аҩаӡара змаз ашәаҳәаҩ хатәра дҳамамызт, Лиудмила Лагәуаԥҳа леиԥш. Иахьеиԥш исгәалашәоит лара дызлахәыз усҟантәи аспектакль, лыбжьы ссир анаҩсангьы асценаҿы иаалырԥшыз артисттә ҟазара. Иара убас, акамертә концертқәа рҟны ҟазарыла лхы шаалырԥшуаз", - ҳәа азгәалҭоит Асида Царгәышԥҳа.

Асовет аамҭақәа рзы, ашәаҳәаҩ аконцертқәа рылҭон еиуеиԥшым ақалақьқәа рҟны, атәым ҳәынҭқаррақәа дырҭаауан. Лыбжьы ссир ханарҭәаауан лара лҭеиҭыԥш ԥшӡагьы.

"Аконцертқәа лыманы дықәгылон Москва, Ленинград, Львов, Кишиниов, Рига уҳәа ақалақьқәа рҟны. Иара убас, Пицундатәи ауахәамаҿы даара қәҿиарала дшәаҳәон, еицырдыруаз ауарӷанарҳәаҩцәеи лареи еицықәгылон, иҿыцыз арепертуар аҿы лхаҭара аартра иацхраауан. Еиуеиԥшым аепохақәа ирыҵаркуаз "Аве-Мариа" аконцертқәа рциклқәа дрылахәын. Урҭ иахьа уажәраанӡагьы ҳауаажәлар гәахәала иргәаладыршәоит", - лҳәеит амузыкаҭҵааҩы.

Рҵаҩык лаҳасаба алагьы, Лиудмила Лагәуаԥҳа илыллыршеит лбаҩхатәра аарԥшра. Иаҳҳәарц ҳалшоит лҟазара аҳәаақәа акыр иҭбаан, ганрацәала еиларсын ҳәа. Акыраамҭа акәымзаргьы аибашьра ашьҭахь шықәсқәак амузыкатә ҵараиурҭаҿы аус луан, лхатә принципқәа лыман. Аҵараиурҭаҟны аусура данаҟәыҵ, лырҿиаратә ԥсҭазаара иацылҵеит лыҩны. Илааӡоз лҵаҩцәа рбаҩхатәра аӡыргаразы ахәылԥазқәа рзеиҿылкаауан. Аклассикатә музыка абзиабаҩцәа адыԥхьаланы аиԥыларақәа мҩаԥылгон.

"Аинтеллигенциа рхаҭарнакцәа ааԥхьара рылҭон, лысасцәа ачеиџьыка рзеиҿылкаауан. Иара убраҟа ицәырылгон лҵаҩцәа рҟазарагьы, ахәылԥазқәа рзы ҷыдала еиқәлыршәон арепертуар ҿыцқәа. Ахәыҷыԥшқақәа сыман, аха лара илыбзоураны смузыкаҭҵааратә ус иацысҵартә иҟалҵеит. Аамҭаказы, лара лырҿиаратә хәылԥазқәа рымҩаԥгара снапы ианылҵеит. Даара аҵарадырра ҳаракы змаз рҵаҩын", - ҳәа азгәалҭоит Царгәышԥҳа.

© Foto / архив семьи Логуа
Людмила Логуа

Лиудмила Лагәуаԥҳа лҟазара аҳәаақәа араҟа инҵәомызт, лара лхала илыҩуан амузыка, алирикатә романсқәа. Лара илыман бзиа илбоз авторцәа, ҳаԥсуа поетцәа раԥҵамҭақәа ирылхны илыҩуан амузыка, анаҩс аконцертқәа рҟны урҭ лара лҵаҩцәа инарыгӡон.

"Аԥсуа культураҿы иухамшҭуа хҭысны иаанхоит акомпозитор Шведов иопера "Аламыс" аҟны лықәгылара. Ари раԥхьатәи аԥсуа спектакльын, иқәыргылан Аԥсуа драматә театр асценаҿы. Уаҟа лара иналыгӡон ароль хадақәа руак, аԥсуа ҭыԥҳа Назира лпартиа, еицырдыруа ҳашәаҳәаҩ Борис Амҷбеи лареи", - лҳәеит амузыкаҭҵааҩ Асида Царгәышԥҳа.

Амҷба Лиудмила Логәуаԥҳа илызкны: ашәаҳәара лгәы-лыԥсы, лшьа-лда иалан

Аԥсны Аџьынџьтәылатә еибашьра ашьҭахь, амузыкатә ҿиара ахырхарҭа ҳазҭагылоу аамҭазеиԥш иҟамызт аҭагылазаашьа. Убри аҟынтә лара иаԥылҵаз атрадициа ҿыц инамаданы, ашәаҳәаҩцәеи амузыка абзиабаҩцәеи еималдон, цҳас дрыбжьан.

Лара лҵаҩцәа ируаӡәку, иахьа зыхьӡ-зыԥша еидкыланы ирҳәо ашәаҳәаҩ ҟаза Асҭамыр Кәыҵниа излаиҳәо ала, асахьаҭыхра инаҷыданы ашәаҳәара адунеи дагәылазгалаз Лиудмила Лагәуаԥҳа лоуп.

"Сара ашкол саналга, 2000 шықәса рзы Аԥснытәи аҳәынҭқарратә университет аҿы асахьаҭыхра аҟәша сҭалеит. Убри ашықәсан ауп ҳанеибадыр Лиудмила Андреи-иԥҳаи сареи. Саҳәшьеиҵбы афортепиано лҽазыҟалҵон Лиудмила Лагәуаԥҳа илзааигәаз лҩыза, акомпониатор Еҭери Ҭадекиан лҟны. Зны ус дсазҵааит: "Ашәаҳәара уҭахӡами, сара шәеибасырдыруеит Лагәуаԥҳаи уареи ҳәа", - абас игәалашәарақәа хациркит Асҭамыр ҳаниҿцәажәоз.

Асҭамыр Кәыҵниа дхәыҷаахыс аҟазара бзиа ибон, акәашара далан, еиҳаракгьы асахьаҭыхра дазҿлымҳан, ашәаҳәара аганахьала акагьы даҿымызт.

"Усҟан 16 шықәса ракәын исхыҵуаз. Саби сареи ҽнак Лагәуаԥҳа ҳалҭааит. Лара лыҩнакәын аҿар ахьазыҟалҵоз, дахьрыцхраауаз, лгәы-лыԥсы зегьы ахҭнылҵон абри аус. Аклассика аганахь ала иаҳҳәозар, еиҳа ирацәаҩхар лҭахын ашәаҳәаҩцәа. Дысзыӡырҩит, нас ус салҳәеит: "Абри аганахь ала амҩа уанылар уҭахызар аҵара рацәаны иуҵароуп ҳәа". Аиаша шәасҳәап, усҟан сара исыздыруамызт саԥхьаҟа амҩа хара шышьҭаз, даҽа дунеик шысзаатуаз", - дҳацәажәон Асҭамыр Кәыҵниа.

Лиудмила Лагәуаԥҳа усҟан Асҭамыр Кәыҵниа иаацәырган илҭеит шәҟәык, ахы инаркны аҵыхәанӡагьы даԥхьар шакәыз наиалҳәеит.

Азыӡырҩра инеиз арԥыс қәыԥш иаразнак аҵарадырра адунеи даанахәартә иҟалҵеит аҟаза. Уи, хымԥада, Асҭамыр изы иџьашьатәхеит.

"Абжьы умоуп, ишахәҭоу еиԥш аус адулатәуп, иқәыргылатәуп лҳәеит. Ажәакала, хәыҷы-хәыҷла саанахәо салагеит ҿыц нап зласкыз аус. Фымз рнаҩс, еиҳа имариаз ашәақәа слырҵан схы аласырхәит ахәылԥаз. Даара сгәы хыҭ-хыҭуан уи амш азы, избанзар сара сзы уи раԥхьатәи қәгыларан. Ахәылԥаз еиднакылоз аиҳабацәа, аҿарацәа рацәаҩын", - ҳәа азгәеиҭоит Кәыҵниа.

Асҭамыр Лиудмила Андреи-иԥҳа лахь аҽазыҟаҵара даанеи, шықәсқәак иара иаԥхьа уахь дныҟәон Ҭамара Воронова. Асҭамыри лареи адуетқәа рзеиҿылкааит аԥышәа роурц азы. Арҵаҩы нага хеигӡарак ҟамҵакәа лҵаҩцәа лхы-лыпсы зегьы рыхҭнылҵон, лдыррақәа рымалдон.

"Фышықәса рыҩныҵҟа исгәалашәом урокк бжьасыжьхьан ҳәа. Аҿар рахь азнеишьа бзиа лыман. Асахьаҭыхреи амузыкеи еиласыгӡон. Аҵараиурҭа аҭаларазы сазыҟалҵо далагеит, нас уантә аконсерваториахь сиасырц. Ус, Краснодартәи акультуратә институт аконсерваториа акафедра саанахәеит. Аҵара анысҵозгьы лара лахь саалон, дацклаԥшуан сыбжьы, исыгыз-исыбзаз салҳәон", - игәалаиршәоит Кәыҵниа.

Краснодартәи аконсерваториа аҩбатәи акурс аҿы дыштәаз, Асҭамыр Кәыҵниа солистк иаҳасабала, Гатов ихьӡ зху амузыкатә театр ахь солистс иԥхьеит, уаҟа ԥшьышықәса аус иуит.

"Аҵара анысҵоз аҵыхәтәантәи ашықәсқәа рзы машәырла лшьапқәа ԥҵәеит. Лара ак ҟамҵакәа ҭыԥк аҿы дызтәаӡомызт. Ақыҭахь дцалон, лан акыршықәса дычмазаҩны дышьҭан, уахь дцаны дбаны, ақыҭа аусқәа ҟаҵаны ҳаргьы дҳахьӡон, дҳацхраауан, аҵара ҳлырҵон, илымаз лхьаагьы лынлырԥшуамызт. Асинтезатор хәыҷык сыман, лыҩныҟа исыманы сцалон, дтәаны иаҳлырҵон", - дҳацәажәон Асҭамыр Кәыҵниа.

Акыршықәса раахыс Лиудмила Лагәуаԥҳа асценаҿы ашәаҳәара даҟәыҵхьан, уи иара ахатә мзызқәа аман, иҟан ауадаҩрақәа, аклассика арҿиара иҵегьы ахаҵгылара амазар лҭахын, уи лара акыр хьаас илыман.

"Ашәаҳәара анаҩсангьы, асценаҿы ахымҩаԥгашьа шаҭахыз слырҵон. Аконсерваториа санҭала, хымԥада иацысҵаз рацәоуп. Лара лҿы снанамгазтгьы, сара иахьа шәаҳәаҩык иаҳасабала сшьақәгыланы сҟалаӡомызт. Ҳаҟазшьақәа еиқәшәеит, саргьы сызлаго аус сзаҟәыҵӡом. Асценаҿы иаасырԥшуа абаҩхатәра еиҳарак лара исылалҵаз ауп, лара лыбзоуралоуп сҵарадырра ишацысҵазгьы, иҟоуп инасыгӡо лара лхатәы ашәақәагьы", - иҳәеит ашәаҳәаҩ.

Ауаҩытәыҩса илоу аҟазара аарԥшра, арҿыхара иацхраауа ауаҩы иааигәа даныҟоу, амҩа иаша данықәиҵо, хымԥада алҵшәа маиурц залшом. Уи дахаҿырбагоуп Лиудмила Лагәуаԥҳа лааӡамҭацәа ируаӡәку, Аԥсуа ҳәынҭқарратә камертә оркестри, Аԥсны Атәылахьчара аминистрра арратә оркестри рсолист, асахьаҭыхҩы, амультипликатор Асҭамыр Кәыҵниа.

Анык лаҳасабала аҿар ирзыҟаз, абжьы ссир зхаз, абзиара аҟаҵара еснагь иашьҭаз, заԥсуа ламыс заԥхьа игылаз, ачеиџьыка зцыз Аԥсны Жәлар рартист Лиудмила Андреи-иԥха Логәуа лыԥсҭазаара далҵит 2013 шықәса рзы. Лара илыллыршеит еицакра зқәым лыхьӡ ҳаракы аԥсуа культура аҭоурых азныжьра, еизҳауа абиԥарақәа лԥышәеи лҟазареи рымадара.

100

Зусура ԥсыршьагас измоу: асахьаҭыхҩы Мадина Саманџьиаԥҳа лҭоурых

58
(ирҿыцуп 19:24 09.08.2020)
Ауаҩы иџьабаа иаԥхьаҟа иԥылоит гәыкала даназнеиуа, избанзар илауҵаз ауп иааурыхуа. Зусура ԥсыршьагас измоу, уадаҩрак ззаҵам асахьаҭыхҩы қәыԥш Мадина Саманџьиаԥҳа лҭоурых шәаԥхьа Sputnik аматериал аҟны.

Аамҭа анааилак ауаҩы иалихуеит иара игәы ззыбылуа ихатәы занааҭ. Иҟалоит изанааҭ ахь имоу агәыблыра иара изыҳәаны иԥсыршьаганы, иԥсҭазаара иаԥхьагыланы ианизыҟало.

Наала Гәымԥҳа, Sputnik

Мадина Саманџьиаԥҳа даныхәыҷыз аахыс асахьаҭыхра бзиа илбоит. Ашкол данҭаз ибзианы абаҩхатәра аалырԥшуан адизаини асахьаҭыхреи рҿы. Еиҿылкаауан, илырԥшӡон ашкол аҭыӡқәа. Иҭылхуа лсахьақәа, лара ишазгәалҭо ала, ԥсык-ԥсык рхоуп, ишлылшо ала илырцәажәоит. Инстаграм аҿтәи лдаҟьаҟны еиуеиԥшым лҭыхымҭақәа уԥылоит: апеизаж, ақалақь ахаҿра ӡырызго асахьақәа, ауаҩы иҭеиҭыԥш уҳәа ирацәаны. Мадина лырҿиара дазааҭгыло илҳәоит:

© Foto / предоставлено Мадиной Саманджия
Мадина Саманџьиаԥҳа лусумҭа

"Ҽнак снатәаны сахьак ҭысымхкәа ҟамлаӡацт. Сара сыԥсы алоуп асахьаҭыхра. Саныхәыҷыз сан исалҳәалон асахьаҭыхҩы ишилшо ишьҭа абри адгьыл аҟны ааныжьра. Убасҟан ауп ианалага зегьы, иахьа уажәраанӡагьы аангылашьа сымаӡам. Асахьаҭыхра сыԥсҭазаара иашьашәаланы ишыҟазгьы, сҭалеит апсихологиатә факультет, аха зегьы акоуп асахьаҭыхра касмыжьӡеит. Апсихологиатә факультет саналга ашьҭахь сҭалеит Аҟәатәи асахьаҭыхратә ҵараиурҭа. Сан лоуп аҟазара агәыблыра сзыркызгьы, лара занааҭла дсахьаҭыхҩуп".

Мадина зыпрофессионалтә ҟазара ҳараку специалиступ. Иахьа лара қәҿиарала аус луеит рҵаҩык иаҳасабала асахьаҭыхратә студиаҟны.

© Foto / предоставлено Мадиной Саманджия
Мадина Саманџьиаԥҳа лусумҭа

"Аграфикатә дизаин аган ала аус зухьеит жәаҩа шықәса. Уи ашьҭахь софистә усура аҽаԥсахит асахьаҭыхратә студиаҿы сусурала. Уаҟа сара срықәшәеит хыԥхьаӡара рацәала аҟазара злаз, еиуеиԥшым аганқәа рыла зҽазыҟазҵоз ауаа. Сара аеҵәа сызкыдԥаауамызт са сахь раԥхьаӡа акәны ҽазыҟаҵара иааиуаз "ахаан сымҭыхӡацт" зҳәоз, аҵыхәтәаны иҭыхымҭқәа ссирқәа иманы данцоз. Ауаҩы иџьабаа иаԥхьаҟа иԥылоит гәыкала даназнеиуа. Илауҵаз ауп иааурыхуа. Убасҟан сара еилыскааит арҵара ари шус дуу, иагьысҭахуп сышьҭа ари адгьыл аҟны иаанхарц", - лҳәоит асахьаҭыхыҩ қәыԥш.

Мадина қәҿиарала Москва иҭылҵааит аграфика иадҳәалоу аҵара. Аус луан Москва еицырдыруа аӡыргаратә хеилакқәа рыҟны. Аԥсны имаҷымкәан аус лухьеит дизаинерк иаҳасабала, убас Аҟәафон адизаинерс дыҟан. Лара лҭыхымҭақәа дырԥшӡоит иахьа Амшын аԥшаҳәа, акаҳуажәырҭақәа.

Урыстәыла аус анылуаз илырҳаит ирацәаҩны лусура иазҿлымҳау ауаа, асахьаҭыхра лҿызҵаарц зҭаху аҵаҩцәа.

© Foto / предоставлено Мадиной Саманджия
Мадина Саманџьиаԥҳа лусумҭа

"Москвеи Шәачеи аус анызуаз срабадырит аҟазацәа. Аҭыхра зҵарц зҭахыз алшара иман сыстудиахь амҩахыҵра. Сҭыхымҭақәа рыҟны апропаганда ҟазшьа аҭаны стәыла еснагь иӡырызгон. Ҳаԥсадгьыл аԥшӡара ҭызхуаз аҵаҩцәа, ҳәарада, иџьаршьон, ара иҟазшәа атмосфера рзаԥысҵон. Иахьа уажәраанӡа дареи сареи аимадара ҳабжьоуп, асахьа мацара иабзоураны Аԥсны агәыблыра ркит", - лҳәоит Мадина.

Аҵыхәтәантәи ашықәсқәа рзы Мадина аус луан Шәача. Уаҟа илыдылкылон аҵаҩцәа, аха аҭаацәара даналала дхынҳәит Аԥсныҟа. Иахьа Аҟәа ақалақь аҟны иаартны илымоуп лхатәы сахьаҭыхратә студиа. Лара лахь имҩахыҵуеит асахьаҭыхра зҵарц зҭаху зегьы, ахәыҷы инаиркны аду иҟынӡа. "Сара ахаан мчыла ауаҩы идысцалаӡом. Иара иалихуеит игәы иаҭаху асахьа, нас убри ҳахәаԥшны ҳҭыхуеит. Сусураҟны сыԥсы сшьоит, уи еиҳау цәанырра ыҟаӡам. Сахьак ҭыхны саналгалак, сгәы-сыԥсы еизҳауеит, иҭазгалоит ссоциалтә даҟьақәа рахь. Ауаа ахәшьара бзиа арҭоит, уи даара амотивациа снаҭоит", - ҳәа азгәалҭоит Мадина.

Асахьаҭыхҩы лусураҟны иуԥылоит дызлаҭыхуа амыругақәа рыхкы рацәаны. Урҭ зегьы доусы рыхьыӡқәа рымоуп. Лхы иалырхәо аҭыхгақәа зегьы еиԥшӡам, акы поуп, акы еиҳа ижәпоуп. Лҭыхымҭақәа зегьы ирыҵоуп агәалашәарақәа, доусы ирымоуп рхатәы хьыӡқәа. Лҭыхымҭа "Ацәанырра" зыхьӡу аҟны даарԥшуп зхы иақәиҭу, зцәаныррақәа ирықәиҭу, заԥхьаҟа ԥынгылак змам аҭыԥҳа лхаҿсахьа.

© Foto / предоставлено Мадиной Саманджия
Мадина Саманџьиаԥҳа лусумҭа

"Ари ахаҿсахьа арҿиара злоу ауаҩы изы зых иақәиҭу хаҿсахьоуп. Уи инапы злаку аус бзиа ибоит, ихы мшаҭа игәҭакахьы деихоит. Ари асахьа аҭыхра санаҿыз аамҭазы иаархәеит. Уажәы иҟоуп ақалақь Пермь ахатәы коллекциаҿы", - ҳәа дазааҭгылеит Мадина.

Мадина лҭыхымҭақәа аархәахьеит имаҷымкәан ауаа, убасгьы иҿарҵарц рылшоит ргәы иаҭаху асахьа. Лхаҭа лҭыхымҭакәа ҳамҭас лыуацәа, лҩызцәа, илзааигәоу ауаа ирылҭоит. Лара даара деигәырӷьоит лҭыхымҭақәа бзиа ибаны иахьрыдыркыло.

© Foto / предоставлено Мадиной Саманджия
Мадина Саманџьиаԥҳа лусумҭа

Еиҳа зҭыхра мариеи, аԥсабара акәу, мамзаргьы ауаҩы иҭеиҭԥш акәу ҳәа ҳанлазҵаа абас лҳәеит:

"Аԥсабара аҭыхра еиҳа имариоуп, избанзар уи иацу ахаареи, аԥшӡареи ауаҩы игәаҵанӡа иаразнак инеиуеит. Ауаҩы ихы-иҿы аҭыхра адагьы, иҭухроуп иара иҩныҵҟатәи иҟазшьа, игәаҭа, иҿаԥшылара. Убри зегьы анузаарԥш ауп, уанпрофессионалҵәҟьоу", - ҳәа азгәалҭоит Мадина.

Сынтәа Мадина Саманџьиаԥҳа Гагра ақалақь аҟны еиҿылкааит лҵаҩцәа хәыҷқәа рцәыргақәҵа. Уи азкын Аԥсны Жәлар рартистка Хьыбла Гьерзмаа лиубилеитә ныҳәа мшы.

Мадина лусумҭа: Аԥсны Жәлар рартистка Хьыбла Гьерзмаа

Мадина лаԥхьаҟа лгәы иҭоуп лхатәы цәыргақәҵа аиҿкаара.

Иара убас шәаԥхьар ҟалоит:

58
Органные вечера в Пицунде

Сынтәа изымҩаԥысуам жәларбжьаратәи афестиваль " Пицундатәи ауарӷан ахәылԥазқәа"

9
(ирҿыцуп 12:39 07.08.2020)
Жәларбжьаратәи афестиваль "Пицундатәи ауарӷан ахәылԥазқәа" 1977-1992 шықәсқәа раан Пицунда есышықәса имҩаԥысуаз ауарӷан музыка Жәларбжьаратәи ахәылԥазқәа ирышьҭрақәлаҩын.

АҞӘА, нанҳәа 7– Sputnik. Апандемиа иахҟьаны сынтәа изымҩаԥысуам жәларбжьаратәи афестиваль "Пицундатәи ауарӷан ахәылԥазқәа", абри азы аӡбамҭа рыдыркылеит аиҿкааратә гәыԥ ҳәа арадио Sputnik иазеиҭеиҳәоит Аԥсны зҽаԥсазтәыз артист, ауарӷанарҳәаҩ Лука Гаделиа.

Иара иазгәеиҭеит есышықәса афестиваль ахь адунеи атәылақәа рҟынтәи амузыкантцәа шаауаз. Аха аҳәаақәа раркра инадҳәаланы аныҳәа ареспубликаҿ ишымҩаԥгамхо.

"Ус, есԥшьашеи есмҽышеи Марина Ешԥҳаи сареи аконцертқәа мҩаԥаагалоит", - иҳәеит иара.

Ишиҳәо ала аконцертқәа раан ашәарҭадаратә усхкқәа ирықәныҟәахоит, атәарҭақәа шахматтә ҟазшьа рыманы иргылахоит.

"Аусзуҩцәа зегьы асабрадақәа рҿоуп. Сара мап, аха азыӡырыҩцәеи сареи ҳаицәыхароуп", - еиҭеиҳәоит Гаделиа.

Аконцертқәа раан азыӡырыҩцәа ирзыԥшуп Барокко аепоха иаҵанакуа амузыка– Бах, Вивальди, аромантикцәа рмузыка.

"Сара иара убасгьы арок музыка атранскрипциа азызуит. Уи азы схы иасырхәеит агәыԥ Queen, Фредди Меркиури ррепертуар. Сгәы иаанагоит иргәаԥхап ҳәа" - иҳәоит ауарӷанарҳәаҩ.

Аконцертқәа дрылахәхоит Аԥснытәи аҳәынҭқарратә филармониа асолистка Кристина Ешԥҳа.

Жәларбжьаратәи афестиваль "Пицундатәи ауарӷан ахәылԥазқәа" Пицунда есышықәса имҩаԥысуаз ауарӷан музыка Жәларбжьаратәи ахәылԥазқәа ирышьҭрақәлаҩуп.

1977 шықәса инаркны 1992 шықәсанӡа Пицунда имҩаԥысуан Ауарӷантә музыка Жәларбжьаратәи афестиваль. Уи аԥшьызгаз Леонид Роизман иоуп - еицырдыруа аурыс уарӷанарҳәаҩ, Пиотр Чаиковски ихьӡ зху Москватәи аконсерваториа апрофессор. Уи ибзоурала Аԥсни Урыстәылеи иаарго иалагеит еицырдыруа анемец фирмақәа иҭрыжьыз ауарӷанқәа. Уи афестиваль ауп уажәтәи Жәларбжьаратәи афестиваль "Пицундатәи ауарӷантә хәылԥазқәа" зхылҿиааз ҳәа иԥхьаӡоу.

Ари афестиваль мҩаԥысуеижьҭеи 15 шықәса рыҩнуҵҟа Пицундаҟа иаахьеит Урыстәыла, Германиа, Прибалтика, Украина, Ермантәыла уҳәа атәылақәа рҟынтәи еицырдыруа ауарӷанарҳәаҩцәа аӡәырҩы.

9

COVID-19 рзықәыргылоуп даҽа 26-ҩык Аԥсны ауааԥсыра

7
(ирҿыцуп 19:06 14.08.2020)
Апандемиа ҟалеижьҭеи Аԥсны акоронавирус здырбалахьоу рхыԥхьаӡара 182-ҩык ыҟоуп. Урҭ рахьтә 66-ҩык ргәы бзиахеит, хҩык рыԥсҭазаара иалҵит.

АҞӘА, нанҳәа 14 - Sputnik. Ииасыз уахыки-ҽнаки рыла акоронавирустә чымазара амазааразы агәаҭара иахысит 235-ҩык ауааԥсыра. Урҭ рахьтә адиагноз COVID-19 рзықәыргылоуп 26-ҩык, ҳәа аанацҳауеит Ауааԥсыра акоронавирустә ҿкы рацәыхьчаразы аоперативтә штаб.

Апандемиа ҟалеижьҭеи Аԥсны акоронавирус здырбалахьоу рхыԥхьаӡара 182-ҩык ыҟоуп. Урҭ рахьтә 66-ҩык ргәы бзиахеит, хҩык рыԥсҭазаара иалҵит.

Абри аамҭазы Гәдоуҭатәи ахәышәтәырҭаҿы ишьҭоуп акоронавирус зцәа иалоу 24-ҩык апациентцәа. Уахыки-ҽнаки рыла ахәышәтәырҭаҟнытә илыҩҩауп згәабзиара ҭышәынтәалахаз ааҩык атәылауааи, урыстәылатәи ахаҿи, ԥсшьаҩык Шәачаҟа диагоуп идиагноз хада ала иҷыдоу амедицинатә цхыраара иҭаразы.

Ауааԥсыра акоронавирустә ҿкы рацәыхьчаразы аоперативтә штаб ажәлар рахь ааԥхьара ҟанаҵоит ачымазара рымкырц азы ахыхьчаратә ԥҟарақәа ирықәныҟәаларц, асоциалтә дистанциа ркызарц.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

 

7