Ахәыҷра иазышәаҳәо амузыкант

456
(ирҿыцуп 16:13 10.02.2019)
Тҟәарчал ақалақь аҟны инхо амузыкант Манана Рабо-иԥҳа Галобери ахәыҷтәы ашәақәа аԥылҵоит, ахәыҷбаҳчақәеи амузыкатә школи рҟны имҩаԥылгоит ашәаҳәаратә урокқәа. Уи моу, ахәыҷқәа идлырҵо ашәақәа реиԥш илыҩуагьы, шамахамзар иаԥсышәа мацароуп. Сара исыӡбеит заамҭа зегьы ахәыҷқәа рааӡареи аԥсуа ашәақәа раԥҵареи иазызкуа арҿиаҩы лусуратә мшы шымҩаԥысуа сазааҭгыларц.

Аинар Ҷыҭанаа, Sputnik
Тҟәарчалтәи ахәыҷбаҳча "Џьамхәыхә" санаҭааз аԥсшьара иаамҭан аҟнытә Манана Рабо-иԥҳа лусуратә уада ҭынч иҭысҵаартә алшара бзиа соуит. Саныҩналаҵәҟьа сылаԥш ақәшәеит акәакьахьшәа игылаз апианино. Излазбо ала, ари амузыкатә мыруга арҿиаҩы-ааӡаҩ лзы араҟа ихадоу "абџьаруп". Иара ахархәараҟны изеиԥшроу слырбаразы кыраамҭа лыҳәарагьы аҭахымхеит. Манана Рабо-иԥҳа апианино "анацәкьарақәа" еиԥхьышьшьаауа лхатәы "альбом" аҟнытә ашәак анаацәырылга, агәра згеит ари "абџьар" ҵабыргыҵәҟьаны аус шауа. Избанзар исаҳаз ахәыҷтәы ашәақәа иззырхаз азыӡырҩцәа рықәра иашьашәало еихышәшәа-еиҵышәшәоит, уи аан аҵакгьы џьара ирцәыӡны иубаӡом. Дук мырҵыкәа ҷыдалатәи аконцерт маҷ хыркәшаны, амузыкант исзаалыртит иахьатәи лзанааҭи лареи рҭоурых адаҟьақәа.

© Foto / из личного архива
Манана Галобери

1981 шықәса инаркны, аамҭа кьаҿк иалагӡаны Галобериԥҳа амилаҭ инструменталтә ансамбль "Гәында" далахәын. Уи ашьҭахь, аамҭаказы аус луит ансамбль "Шьараҭын" аоркестр аҿгьы. 1985 шықәсазы Тҟәарчалтәи акультуратә хан ахәыҷтәы ҟәша данапхгаҩхоит. Иара уи ашықәсан Тҟәарчалтәи 4-тәи абжьаратә школ ашәаҳәара арҵаҩыс дҟалоит. Ҩышықәса рышьҭахь Манана Рабо-иԥҳа акультуратә хан аҟны лусура ныжьны ахәыҷбаҳҷахь диасуеит, иара убас аусура далагоит амузыкатә школ аҟны. Аџьынџьтәылатә еибашьра ашьҭахь акультуратә хан ахь лусура дазыхынҳәуеит. 1994 шықәсазы Ҭорник Амҷбеи, Геронт Кордааи лареи иаадыртуеит ахәыҷтәы музыкатә студиа "Ахәыҷра". Иахьатәи аамҭазы аус луеит ԥшьыџьара: Тҟәарчалтәи 4-тәи абжьаратә школ аҟны ашәаҳәара арҵаҩыс; ахәыҷбаҳчақәа "Џьамхәыхәи" "Амреи" рҟны амузыкатә усзуҩыс; насгьы амузыкатә школ аҟны амилаҭ инструментқәа рыла ахәыҷқәа ахәмаршьа длырҵоит.

Арҭқәа зегьы реилагӡара злалылшо санлызҵаа, Манана Рабо-иԥҳа минуҭкгьы дымхәыцкәа аҭак ҟалҵеит лара лзанааҭ ԥсшьарак ишылзаҩызо. Уи зыбзоуроу аилибакааратә еизыҟазаашьа ауп ҳәа илыԥхьаӡоит лара.

"Ахәыҷқәа бзиа ианубо аус рыдулара зынӡагьы уарааԥсаӡом. Насгьы дара уҳәатәы харҵарц уҭахызар, уаргьы рҟазшьа уҽақәуршәар ухәҭоуп. Ауаҩы еснагь игәалашәозар ауп адуи ахәыҷи рыԥсихологиа шхаз-хазу. Ҩынҩажәа шықәса зхыҵуа ушиацәажәо еиԥш, ҳәарада, ԥшьышықәса зхыҵуа ахәыҷы узиацәажәаӡом. Убри аҟнытә ахәыҷы акы аниеилуркаауа ма акы аниурҟаҵо, еснагь иара еиҳа ишизааигәоу аганахьала уазнеилароуп. Ус акәымкәа мчыла мацара акы дсырҟаҵоит ҳәа уалагар, ҳәарада, дара рҟынтәигьы аҭак бзиа уазымԥшын", - лԥышәа насымалдеит лара.

Ахәыҷбаҳча ақәра иҭысхьоу ахәыҷқәа ртәы ҳҳәозар, Манана Рабо-иԥҳа иазгәалҭеит урҭ аус рыдулара даҽа ҟазшьак шамоу, еиҳагьы ганрацәала азнеира шаҭаху. Избан акәзар ахәыҷы деизҳацыԥхьаӡа илаԥшҳәаагьы аҽарҭбаауеит, убри аҟнытә еиҳа-еиҳа иазҳауеит игәцареикуагьы.

© Foto / из личного архива
Манана Галобери

"Бзиа избаӡом, акы ада даҽакы рзымдыруа, мыцхәы ирџьбараны ахәыҷқәа рааӡарц ианалаго. Ахәыҷы зны-зынлагьы ахақәиҭра иҭалатәуп, хымԥада, хы змам ахақәиҭра акәымкәа - ииашоу ахақәиҭра. Убасҟан ауп еиҳа ианубарҭахо ахәыҷы еиҳа изыинтересу, ихы зызцо, еиӷьны ицааиуа. Хымԥада, ахәыҷы иалихыша, иара еиҳа изеиӷьхаша ахырхарҭақәа идугалалар ухәҭоуп, аха иара иҭыԥан алхра азин умаӡам. Ашәаҳәара бзиа ибозар – уицхраа, ирҵа. Аха мчыла, иара иҭахымкәа асцена дықәуцалар – иаргьы дрыцҳауп, уаргьы уиашахаӡом", - исеиллыркааит амузыкант.

Аибашьра иацынҵәаз Арасаӡыхьтәи ашәаҳәаратә гәыԥ аҭоурых
© Фото : предоставлено Музеем Боевой Славы им. В. Ардзинба

Манана Рабо-иԥҳа аҵаҩы рацәа рыдагьы, ҭаацәашәалагьы уаалыҵашьыцыртә дыҟоуп. Лара дандууп, илымоуп хҩык амоҭацәа. Руаӡәы, Салима – ашәа лҳәоит, далахәуп ланду напхгара зылҭо ачамгәырарҳәаҩцәа ргәыԥ. Амузыкант лмоҭа длырҽхәар лҭахымхеит, аха иазгәалҭеит Салима лҟыбаҩ бзиа, насгьы илҳәеит ашәаҳәаразы ихымԥадатәиу арбагақәагьы шлыгым. Салима ланду лыдагьы, лангьы ашәаҳәаратә баҩхатәра лылоуп, лхәыҷрашықәсқәа рзы лассы-лассы асценахь дцәырҵуан. Ажәакала, аҭыԥҳа дымҩақәызҵаша арҵаҩцәа лыгны дыҟаӡам. Аха ашәаҳәара аҽазыҟаҵарахь аус аннеило андуи амоҭеи реизыҟазаашьақәа аҩны инрыжьуеит. Ара дыҟоуп арҵаҩы, насгьы дыҟоуп аҵаҩы. Манана Рабо-иԥҳа лажәақәа рыла, инамыцхәны "ахшьышьра" аметод аҽазҵәылхра иаԥсам. Избан акәзар заанаҵы аҳаракырахь зхы назго ауаҩы, акаҳара мыцхәы игәы инархьыр ҟалоит.

"Еснагь акәымзаргьы, лассы-лассы ашәа зҳарҳәо ахәыҷқәа еиуеиԥшым арҿиаратә еицлабрақәа ирылаҳархәуеит. Ҳара ирацәаны ҳаниақәахьеит убри аиԥш аҭагылазаашьақәа, абаҩхатәра аҵыхәтәантәи аҭыԥ аҿы иныжьны "утәы-стәы" асистема ала ахәыҷқәа аԥхьахәқәа анранаршьо. Убри аҟнытә сара ианакәзаалак заанаҵы ргәы рҽанысҵоит, аҵыхәтәан мыцхәы ргәы рнамырхьырц. Иреилсыркаауеит абӷьыц акгьы шаанамго, ахы аус адулареи амаашьареи зегьы ишрыцку",  - лгәаанагара лҳәеит Галобери.

Манана Рабо-иԥҳа иара убас аԥстәқәа бзиа илбозаап. Уажәазы аҩны илымоуп арупап Гриша, насгьы "хомиак" ҳәа изышьҭоу аҳәынаԥ хәыҷы Даша. Урҭ рыбзоурала амузыкант лмоҭацәа аныҟамгьы лхала лхы дазынхаӡом. Даша аӡбахәала акгьы сыздыруам, аха Гриша ашәаҳәара аҵара иаҿуп. Араҟа аԥстәқәаҵәҟьа аҭаацәаратә ҵасқәа еиларгаӡом.

456
Книги и учебники

Аклассика онлаинла: Акультура аминистрреи Аҿар рбиблиотекеи авидеоакциа хацдыркит

14
(ирҿыцуп 20:59 25.05.2020)
Аԥсны Акультура аминистрре Аҿар ирызку ареспубликатә библиотекеи еицымҩаԥырго авидеоформат змоу акциа мҩаԥыслоит рашәара 1 аҟынӡа.

АҞӘА, лаҵара 25 - Sputnik, Асмаҭ Ҵәыџьԥҳа. Аԥсны Акультура аминистрреи Аҿар ирызку ареспубликатә библиотекеи лаҵара 26 инаркны ихацдыркуеит акциа "Ҳаԥхьоит аклассика", абри атәы Sputnik иазеиҭарҳәеит аусбарҭаҟны.

"Акциа видеоформатла имҩаԥаагоит. Ҳара ианаҳҵеит Акультура аминистрреи абиблиотекеи русзуҩцәа зну ароликқәа, урҭ аԥсуеи аурыси классикцәа раԥҵамҭақәа ирыԥхьоит. Уаҵәы инаркны есҽны ҩба-ҩба ролик ҭаҳгалалоит ҳофициалтә даҟьаҟны, ателехәаԥшралагьы иддырбар ҟалоит", - ҳәа азгәарҭеит Акультура аминистрра апресс-маҵзураҟны.

Акциа "Ҳаԥхьоит аклассика" рашәара 1 аҟынӡа имҩаԥыслоит. Акциа хықәкы хадас иамоуп абиблиотекатәи ашәҟәтәи ус арҿиара, ашәҟәыԥхьара ауаа азҿлымҳахартә еиԥш аҟаҵара, аҿар радԥхьаларазы аформат ҿыцқәа реиҿкаара.

Акоронавирус алаҵәаразы иҟоу ашәарҭара инамаданы рашәара 1 аҟынӡа Аԥсны еиуеиԥшым аԥкрақәа алагалоуп. Убарҭ рхыԥхьаӡараҿы иҟоуп акультуратә хыбрақәа - атеатрқәа, амузеиқәа, акультуратә центрқәа, акультура аханқәа, аконцерттә залқәа, аҭоурых-культуратә ҳәырԥсаррақәа - русура аанкыларагьы.

Иара убас шәаԥхьар ҟалоит:

14

Милена Тачулиаԥҳа жәларбжьаратәи аԥхьаҩцәа реиндаҭлараҿы дықәгылеит

14
Есышықәсатәи жәларбжьаратәи аԥхьаҩцәа реиндаҭлара "Живая классика" иалахәуп адунеи атәылақәа 80 рҟынтәи ашколхәыҷқәа. Аԥснынтәи уи рҽаладырхәит хҩык аԥхьаҩцәа.

АҞӘА, лаҵара 20 - Sputnik, Асмаҭ Ҵәыџьԥҳа. Ателепроект "Ты супер. Танцы" алахәыла Милена Тачулиаԥҳа далахәын есышықәсатәи жәларбжьаратәи аԥхьаҩцәа реиндаҭлара "Живая классика".

Лара иалылхит Чингиз Аитматов иҩымҭа "Ан лыдәҳәыԥш" ("Материнское поле"). Алахәылацәа рықәгылара жәабаллктәи асистемала ахәшьара арҭон. Ажиури алахәылацәа хәҩык рҟынтәи ԥшьҩык Милена 8 лзықәдыргылеит, аӡәы – 9.

Борис Шьукин ихьӡ зху Атеатртә институт актиортә ҟазара акафедра арҵаҩы Александр Фадеев Милена 9 баллк лзықәиргылеит, иазгәеиҭеит лактиортә ҟазара.

"Аибашьра иаҵанакуа зегьы рыԥхьара уадаҩуп аибашьра ҳахьацәыхарахахьоу азы. Аха зны-зынла аԥхьаҩ иалихуа арҿиамҭа ихы-игәы иалсуеит. Милена дануп ҳәа аҳәара алшом, аха ан лцәаныррақәа раарԥшра лылшеит. Иҟоуп агха-ԥхақәагьы, аха Милена аҟыбаҩ ҷыда лылоуп", - иҳәеит иара.

Аиндаҭлара алкааратә турқәа мҩаԥысуеит лаҵара 28 рҟынӡа. Лаҵара 30 рзы имҩаԥысуа афиналбжахь инеиуа 30-ҩык роуп. Афинал мҩаԥгахоит рашәара 1 азы.

Алкааратә турқәа ирылахәуп аԥснаа даҽа ҩыџьа.

Ахәбатәи акласс аҵаҩы Кристина Ераносиан иалылхит Лев Толстои ирҿиамҭа "Кавказтәи атҟәа" (Кавказский пленник").

"Сгәы хыҭхыҭуеит. Ишахәҭоу еиԥш ацәаныррақәа сзаамырԥшыр ҳәа сшәоит", - лҳәоит лара.

Афбатәи акласс аҵаҩы Софиа Шенгелиа Анатоли Приставкин иавтобиографиатә повест "Ночевала тучка золотая" ацыԥҵәаха даԥхьоит.

"Софиа аибашьра атема лзааигәоуп. Ирацәаны акинофильмқәа дрыхәаԥшхьеит. Арегионалтә еиндаҭлара аламҭалаз "Мальчик в полосатой пижаме" дахәаԥшит. Акыр лгәаҟынӡа инеит. Убри азакәхап дзыԥхьоз аарԥшра лылзыршаз", - лҳәоит Софиа лан Ирма Барцыцԥҳа.

Аиндаҭлара мҩаԥысуеит Урыстәыла Аҵара аминистрреи Россотрудничествои рыдгыларала.

14

Чаблахԥҳа иаԥшәымадоу алақәа рызҵаара аӡбашьазы: ус дууп, зегь ҳзы ибзиоуп

0
Гагра араион Алаҳаӡы ақыҭан инхо Хамида Чаблахԥҳа арадио Sputnik аефир аҟны арубрика "Раионк аԥсҭазаараҟынтә" аҿы еиҭалҳәеит иаԥшәымадоу алақәа рызҵааразы араион аҟны аҭаагылазаашьа зеиԥшроу.
Раионк аԥсҭазаараҟынтә: Чаблахԥҳа иаԥшәымадоу алақәа ртәы

Гагра арион ахада инапынҵақәа назыгӡо Иури Хагәышь лаҵара 27 рзы аилацәажәара мҩаԥигеит иаԥшәымадоу алақәа рызҵаара иазкны. Уи аҟны аӡбамҭа рыдыркылеит араион аҟны иҟоу иҷыдоу алақәа рыԥхьарҭахь инаргаларц хылаԥшра змам аԥстәқәа.

"Аилацәажәараҟны ирыӡбаз аус бзиоуп. Шьҭа хәышықәса ҵуеит алақәа рааӡарҭа "Топа" аиҳабы Саида Оҭырԥҳа ари имариам аус лнапы алакуижьҭеи. Лара илыбзоураны 700 инареиҳаны алақәа Аԥсны анҭыҵҟа ишьҭуп, аԥшәмацәа рзыԥшаауп. Ааӡарҭаҟны 180 рҟынӡа алақәа ыҟоуп, аҭыԥ азхаӡом. Гагра ақалақь аӡәгьы итәымкәа иалоу алақәа маҷым, ари аҭагылазаашьа ҽеим ҳара ҳзеиԥш, дара алақәа рзгьы, ауадаҩрақәа рацәаны иацуп ари азҵаара. Амҩа иану алақәа амла иакуеит, амашьынақәа ирыҵалоит, ауаа ирзыҭрысыр ҟалоит, ишәарҭоуп, аха рышьра иашам, игәнаҳароуп ҳәа сыԥхьаӡоит. Ари азҵаара даҽа ӡбашьак амоуп - алақәа мшьӡакәа ааӡарҭахь рышьҭра. Уи иахьадгылаз Гагра ахадара иҭабуп ҳәа расҳәоит, ааӡарҭа ацҵара ацхыраара ахьарҭо азы. Ари ус дууп, зегьы ҳзы ибзиоуп", - лҳәеит Чаблахԥҳа.

Шәазыӡырҩы аудио. иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

0