Нодар (Масик) Бениа

Ҩ-абиԥарак рчара зырԥшӡахьоу: амузыкант Нодар Бениа иҭоурых

663
(ирҿыцуп 18:43 01.10.2020)
Дыҟамзар ҟалап Гагра араион аӡәы, Нодар (Масик) Бениа дыззымдыруа. Чароума, иубилеиума, хәылԥазума уҳәа рҟны Масик имузыка иамыцкәашахьада. Иахьа, жәларбжьаратәи амузыка амш аҽны Саида Жьиԥҳа иаҳзеиҭалҳәоит иара иҭоурых.

Саида Жьиԥҳа, Sputnik

Масик ԥшьышықәса ихыҵуан раԥхьаӡакәны Бармышь ақыҭан, игәылара Зурик Дбар ичараҿы аестрадатә гәыԥ рықәгылара лабҿаба ианиба. Усҟан абарҵаҿы ишәаҳәоз артистцәа, ахәыҷы ҵаҟантәи дрыҵаԥшуа инапы еиниҟьон. Ашҭаҿы икәашоз асасцәа дрыхәаԥшуа, ихаҿы иааигеит мышкызны ианизҳауа дшартистхо, ауаа иашәақәа ишрыцкәашало, рнапы шизеинырҟьало. Ус иагьыҟалеит, ихәыҷратә гәазыҳәара нагӡахеит.

"Дбараа рчара аамышьҭахь, сан лсаанқәа, луедрақәа лыцәганы, адаул сасуан. Аҩни, агәылареи умшала акәытқәа хылаӡом ҳәа исацәҳауан, жәлар разгәаҭарақәа рыла арҭ ашьҭыбжьқәа рԥырхагазаарын", - длафуеит Масик.

Бармышь ақыҭан, Масикраа Колиа ҳәа урыс маҵуҩык дрызнеилон. Иара аккордеон аирҳәозаарын. Иԥсшьара аамҭазы, ҭаҭынк данахоз иаацәырганы ашәакгьы ацирӷызлон. Уи збоз ахәыҷы, арҳәашьа сурҵароуп ҳәа дыхҭаикуазаарын.

"Колиа иусура аамҭа нҵәаны аҩныҟа дандәықәла, иаккордеон сахьҵәыуа салагеит. Усҟан сан илҭараны иҟаз аԥара иҵегь нацҵаны исзылыхәҳаит. Аха сшьамхы иқәкны иасырҳәарц саналага, схы ахыҳәҳәомызт. Нас саб сиҳәаны, ишьҭаҵаны ганк иара дахон, егьи аган сара. Арыд (клавиша) ахьамаз апианино еиԥш иасырҳәо салагеит. Маҷк иансызҳа, аԥсуа кәашара амелодиа арҳәашьа сҵеит схала. Ашәақәа ракәзар, издырқәоз маҷымызт, саби хҩык иашьцәеи жәлар рашәақәа ирызҟазан азы игәныскылон", - раԥхьатәи имузыкатә шьаҿақәа игәалашәоит Масик.

Ахәыҷы хәышықәса анихыҵуаз, иуа-иҭынха дџьаршьо иалагеит рҵаҩык димамкәа ихала амелодиақәа гәынкыланы аинструмент инапаҿы иахьааиуаз. Уи нахыс рҵакыраҿы чарак Масик ида имҩасуамызт. Аарла ихы ахыҳәҳәо акоррдеон арҳәауа, ауаа иркәашон.

"Ашкол санҭаз, акультуратә усмҩаԥгатәқәа реиҿкаараҿы аҭакԥхықәра сара сакәын издыз. Амузыкатә инструментқәа жәпакы рарҳәашьагьы сҵахьан азы, сышхәыҷызгьы Гәдоуҭатәи ансамбль "Риҵа" саларҵеит. Уаҟа сԥышәа иацхрааны, сдыррақәа еизырҳаны амузыкантцәа нагацәа срыддыртәалеит. Ҩынтәгьы Дагомыс агастрольқәа рахь сыргахьан", - ҳәа игәалашәоит Масик.

Аҷкәын аиҳабыратәи акласс ахь даниас, иҭаацәа Гаграҟа нхара иааит. Усҟан ақалақь аҟны аԥсуа акәашаратәи, ашәаҳәаратәи ансамбльқәеи, аестрадатә гәыԥқәеи реиҿкаара ианаҿыз аамҭан. Масик иԥсҭазаара амузыкада ихаҿы изаагозма, хымԥада акультура аҩнахьы днеит, аԥсуа артистцәа драбадырит. Аамҭак азы акоррдеон аирҳәон ансамбль "Афырҭын" аҟны, аетрадатә гәыԥ "Гагрыԥшь" аҿы адаул дасуан. Ишнеиуа "Гагрыԥшь" анапхгаҩы, ашәаҳәаҩ Ныгәзар Ҷкадуеи, абасгитарист Витали Абӷаџьааи ааԥхьара ахьроуаз ачарақәа рахь музыкантс дырго иалагоит.

Калдахәара ақыҭатә клуб аҿы еиҿкааз аестрадатә гәыԥ "Арашьи", Бзыԥҭа аҳаблатә клуб аҟны иаԥҵаз агәыԥ "N" дрылан. Масик "иуниверсалтәу амузыкант" ҳәа ишьҭан. Иара аабатәи акласс аҿы дыштәаз иаб Аҟәатәи аҵаралашаратә ҵараиурҭахь дигоит. Рҵаҩцәас иман Роза Чамагәуаԥҳаи, Оҭар Хәынҵариеи. Арԥыс иҟыбаҩ ҷыда иабзоураны аккордеон, апианино, асинтезатор, аритмтәи, абас гитарақәеи, жәлар рмузыкатә инструментқәа аҩымаа, ахымаа, аԥхьарца аирҳәон, дасуан адаул.

"Иахьагьы сыла ихгылоуп Оҭар Гьаргь-иԥа Хәынҵариа икабинеҭ саби сареи ҳаныҩнала. "Иуҭахи ара" ҳәа ибжьы хәанчаӡа дансазҵаа, азнык азы сшәеит, аха сыгәҭакы атәы иасҳәеит. Иарбан инструментқәоу иаурҳәо аниҳәа, акабинеҭ иҩнагылаз апианинои, истол иқәгылаз аккордеони рахь дхьасырԥшит", - иҵаратә аамҭа далацәажәоит амузыкант.

Аԥсны Аџьынџьтәылатә еибашьра ашьҭахь, раԥхьатәи аԥсуа чарақәа рахь музыкантс ааԥхьара зауоз дреиуоуп Масик. Иахьа иара ихатә музыкатә инструментқәа рыла деиқәшәоуп, ирепертуар аҿы иҟоуп аԥсуеи, аурыси, англыз ашәақәеи аашәы. Иҩуеит авторцәеи, ихатәы жәеинраалақәеи рзы амузыка. Аҭыжьра иазыхиоуп аҩбатәи адиск.

Масик уажәшьҭа изеиқәыԥхьаӡом шаҟа чара рҿы дыхәмархьоу.

"Иахьа сахьцо, аамҭала рани раби рчарақәа рҿгьы ааԥхьара сыман. Ажәакала аҩбатәи абиԥара рынасыԥ шаҳаҭра азызуеит, уи хымԥада сара сзы игәырӷьара дууп", - инаҵишьит амузыкант.

Масик Бениа асцена ду аҿгьы артистк иаҳасабала ихы ааирԥшхьеит, аха иара ажәлар дырзааигәахеит, рыбзиарагьы даԥсахеит ачарақәа рҿы.

"Ауниверсалтә музыкант" убриаҟара ауаа ргьама иҵахьеит, еиҳаби, еиҵби ирҭаху рҳәаанӡа иара анагӡара далагоит. Даара игәы иахәоит ҳмилаҭтә ашәақәеи, акәашарақәеи еиҳа ҳчарақәа рҟны аԥыжәара ахьрымоу.

Жәларбжьаратәи амузыка амш азгәарҭо иалагеит жьҭаара 1, 1975 шықәса раахыс Жәларбжьаратәи амузыкатә Хеилак аԥшьгарала.

Иара убас шәаԥхьар ҟалоит:

663
Хибла Герзмава исполняет песню Абхазия моя

Хьыбла Герзмааԥҳа Москватәи аконсерваториаҿ асолотә концерт мҩаԥылгоит

12
(ирҿыцуп 11:20 26.10.2020)
Ауснагӡатә мҩаԥысуеит Кремльтәи ахан аҿы ихацыркыз аныҳәатә концерт ду ала ашәаҳәаҩ лиубилеитә шықәс аҳәаақәа ирҭагӡаны.

АҞӘА, жьҭаара 26- Sputnik. Аԥсни Урыстәылеи жәлар рартистка, аоператә шәаҳәаҩы Хьыбла Герзмааԥҳа Москватәи аконсерваториа Азал ду аҿы абҵара 10 рзы дықәгылараны дыҟоуп ҳәа аанацҳауеит РИА Новости ауснагӡатә аиҿкааҩцәа рыпресс-маҵзура хыҵхырҭас иганы.

"Аԥсни Урыстәылеи жәлар рартистка, аоператә шәаҳәаҩы Хьыбла Герзмааԥҳа Москватәи аконсерваториа Азал ду аҿы абҵара 10 рзы лсолотә концерт мҩаԥысраны иҟоуп. Аԥсни Урыстәылеи жәлар рартистка Хьыбла Герзмааԥҳа иахьа Урыстәылеиԥш адунеи зегьы аҿы еицырдыруа шәаҳәаҩуп", - аҳәоит адырраҭараҿы.

Аиҿкааҩцәа иазгәарҭоит аконцерт шымҩаԥысуа аҳәынҭқарратә камертә оркестр "Виртуозы Москвы" ацнагӡарала, адирижор – Владимир Ланде.

Аконцерт далахәуп Урыстәыла зҽаԥсазтәыз артист, Атеатр Дуи Аопера Ҿыци рсолист, абаритон Игорь Головатенко.

Ауснагӡатә мҩаԥысуеит Кремльтәи ахан аҿы ихацыркыз аныҳәатә концерт ду ала ашәаҳәаҩ лиубилеитә шықәс аҳәаақәа ирҭагӡаны.

12
Сцена из вечера Чехова. Симона Спафопуло

РУСДРАМ онлаин аус аулоит: Чехов ииубилеи асоциалтә ҳақәа рҟны иазгәаҭахоит

11
(ирҿыцуп 12:23 23.10.2020)
Аԥсны акультура-массатә уснагӡатәқәа аамҭала рыԥкра инадҳәаланы атеатртә проект "Вечер А.П. Чехова" онлаин-формат ала имҩаԥгахоит.

АҞӘА, жьҭаара 23 - Sputnik. Аурыс литература аклассик Антон Павел-иԥа Чехов 160 шықәса ихыҵра инадҳәаланы, Ф.А. Искандер ихьӡ зху аурыс драматә театр ахәаԥшцәа ирыднагалоит иҷыдоу атеатралтә проект "Вечер А.П. Чехова", ҳәа Sputnik иазаанацҳаит РУСДРАМ апресс-маҵзура.

Адырраҭараҿы иазгәаҭоуп апроект шымҩаԥгахо Россотрудничество адгыларала.

Сцена из вечера Чехова. РУСДРАМ
© Foto / Предоставлено РУСДРАМом
Аурыс литература аклассик Антон Павел-иԥа Чехов 160 шықәса ихыҵра инадҳәаланы Ф.А. Искандер ихьӡ зху аурыс драматә театр ахәаԥшцәа ирыднагалоит иҷыдоу атеатралтә проект "Вечер А.П. Чехова"

"Вечер Чехова" аҟны актиорцәа адраматург ипиесақәа: "Предложение", "Вишневый сад", "Чайка" рцыԥҵәахақәа ихәмаруеит, иара убас ирыԥхьоит ашәҟәыҩҩы аҿкчымазараан Мелиховонтә ииҩуаз асаламшәҟәқәа.

РУСДРАМ аҿы ирҳәеит ари апроект арежиссиорцәа - Нина Балаевеи Мариа Романовеи рминиспектакльқәа шракәу.

"Чехов идраматургиа – зегь еицаҳзеиԥшу ҭынхоуп. Аиԥш зеиԥшугьы маҷуп. Ирылацәажәоуп шамахамзар абри аҩыза аконтекст аҿы иналкаан зхы аазырԥшуа ахҭысқәа", - азгәалҭоит актриса Марина Скворцова, Нины Заречнаиа лмонолог аԥхьаҩ ("Чайка").

Аԥсны акультура-массатә уснагӡатәқәа аамҭала рыԥкра инадҳәаланы атеатртә проект "Вечер А.П. Чехова" онлаин-формат ала имҩаԥгахоит.

Ахәылԥаз ателеверсиа аԥхьарбара ҟалоит жьҭаара 27 асааҭ 19.00 рзы РУСДРАМ YouTube-канал аҿы.

Иара убас шәаԥхьар ҟалоит:

11

COVID аҿагыларазы аԥкырацҵақәа алагалахоит Бжьаниа Москва амедусзуҩцәа данырԥыла ашьҭахь

3
(ирҿыцуп 20:25 27.10.2020)
Аслан Бжьаниа Москва иҟазаараан дырԥылеит Москва аус зуа Аԥснытәи амедицинатә усзуҩцәа.

АҞӘА, жьҭаара 27 - Sputnik. Аԥсны COVID-19 аҿагыларазы аԥкырацҵақәа алагалахоит Бжьаниа Москва амедусзуҩцәа данырԥыла ашьҭахь, абри атәы арадио Sputnik иазеиҭеиҳәеит Урыстәыла иҟоу Аԥсны ацҳаражәҳәаҩ Игор Ахба.

"Аиԥылара еиҿнакааит Москва иҟоу Аԥсны Ацҳаражәҳәарҭа. Уахь инаԥхьан акоронавирус зыхьуа рҟны аус заухьаз ҳџьынџьуаа-амедусзуҩцәа: Владимир Аргәын, Викториа Тарԥҳа, Мераб Арӡынба, Астан Мышәба, Едуард Быҭәба. Бжьаниа ирзеиҭеиҳәеит Аԥсны иҟоу аепидемиологиатә ҭагылазаашьа зеиԥшроу. Нас аҳақьымцәа рабжьагарақәа дырзыӡырҩит. Авирус аҿаԥҽра еиҳа хра аманы иҟаларц азы аԥкырацҵақәа алагалахоит", - иҳәеит Ахба.

Иара иажәақәа рыла абжьгарақәа ахәышәтәра апроцесси апациентцәа онлаин-режим ала аконсультациақәа рыҭареи роуп ирыҵаркуа. Ацҳаражәҳәаҩ иҳәеит ишалацәажәаз Москвантәи Аԥсныҟа амедусзуҩцәа ргәыԥ аарагьы.

Аслан Бжьаниа усутә ныҟәарала Москва дыҟоуп жьҭаара 26 раахыс.  Аслан Бжьаниа Москва иҟазаараан дырԥылеит Москва аус зуа Аԥснытәи амедицинатә усзуҩцәа.

Иара убас шәаԥхьар ҟалоит:

3