Волков ихьӡ зху атеатр Аԥсны агастрольқәа рыҿҳәара инахоуп

11
(ирҿыцуп 20:05 01.09.2021)
2021 шықәса ҭагалан азы Фазиль Искандер ихьӡ зху Аурыс драматә театр аҿы урыстәылатәи атеатр ақәгыларақәа ԥшьба мҩаԥнагараны иҟан.

АҞӘА, цәыббра 2 – Sputnik. Фиодор Волков ихьӡ зху Иарославтәи атеатр агастрольқәа рыҿҳәара еиҭакуп ҳәа Sputnik иазеиҭеиҳәеит РУСДРАМ адиректор Иракли Хынҭәба.

2021 шықәса ҭагалан азы Фазиль Искандер ихьӡ зху Аурыс драматә театр аҿы урыстәылатәи атеатр ԥшьы-қәгыларак мҩаԥнагараны иҟан.
"Сынтәа иазгәаҭан Фиодор Волков ихьӡ зху Иарославтәи атеатр амасштабтә гастрольқәа. Ари аԥсуа хәаԥшҩы изы ихҭыс дуны иҟалон, аиҳаракгьы уажәы, агастрольтә усура хра аманы Урыстәылеиԥш егьырҭ атәылақәа рҿгьы ианымҩаԥырго аамҭазы", - ҳәа иҳәеит Хынҭәба.

Акультуратә усбарҭақәа русура ахьеиҭашьақәыргылоу рацәоуп, русура иахәҭоу ашәарҭадара иақәшәо еиҿыркаауеит ҳәа азгәеиҭеит иара.

"Абри аганахь ала ҳара адунеи зегь ҳҽалаҳкааит. Ҳкультуратә усбарҭақәа аҳаркит, иаҳԥеиԥшугьы макьаназ еилкаам. Убри аан аҵаратә усбарҭақәа русура хыртуп. Иҟало зеиԥшрахаша ахьаҳзымдыруазы иҳаӡбеит агастрольқәа рыҿҳәара ҳнахарц", - ҳәа иҳәеит РУСДРАМ адиректор хада.

Волков итеатр Аԥсныҟа аара аԥаразоужьра мҩаԥнагон апрограмма "Агастроль дуқәа" аҳәаақәа ирҭагӡаны Урыстәылатәи Афедерациа.

"Атеатр аспектакльқәа ԥшьба ықәнаргылараны иҟан. Иаараны ҳарзыԥшын аилазаара хада. Ари ҭоурыхтә хҭысхон, иагьалшон иарбоу асанитар-епидемиологиатә ҭагылазаашьақәа ирықәныҟәаны амҩаԥгара. Адунеи зегьы аҿы усоуп ишыҟарҵо. Ҳаргьы уи аԥышәа ҳамоуп, аха иахьа ҳусура алдыршом", - ҳәа иҳәеит Хынҭәба.

Фиодор Волков итеатр шьаҭаркын 1750 шықәсазы Иарославль, раԥхьатәи зегь зҭаар алшо профессионалтә театрын. Ишьаҭеиркит актиор, арежиссер Фиодор Волков.

Аԥсны акоронавирустә инфекциа инадҳәаланы аԥкырақәа алагалоуп. Ԥхынгәы 12 раахыс акультура аминистрра анапаҵаҟа иҟоу аусҳәарҭақәа русура аанкылоуп.

11
Хибла Герзмава исполняет песню Абхазия моя

Хьыбла Гьерзмааԥҳа аоператә ԥхьахә "Онегин" ахадас дҟалеит

19
(ирҿыцуп 11:44 22.09.2021)
Амилаҭтә оператә ԥхьахә "Онегин" абҵара 11 2021 шықәсазы фынтәны анашьара мҩаԥгахоит Санкт-Петербург.

АҞӘА, цәыббра 22 - Sputnik. Аԥсни Урыстәылеи Жәлар рартистка, акультура аусхк аҟны Урыстәыла Аҳәынҭқарратә аԥхьахә алауреат, Станиславскии Немирович-Данченкои рыхьӡ зху Москватәи академиатә музыкатә театр асолистка Хьыбла Гьерзмааԥҳа аоператә ԥхьахә "Онегин" ахадас дҟалеит, абри атәы аанацҳауеит Аԥсны акультура аминистрра.

"Акраамҭа исыдыргалон ари аҭакԥхықәра зцу аус. Агәаӷьрагь уадаҩын избанзар аамҭа, алшарақәа аҭахуп. Исҭахуп ҿыцрақәак алазгаларц. Абри аганахьгьы аус зулоит. Аԥхьахә жәларбжьаратәи аимадарақәа рыӷәӷәатәуп, ахәаԥшҩцәа қәыԥшцәа адыԥхьалатәуп", - лҳәеит лара.

Аԥхьахә шьаҭаркын 2016 шықәсазы, есышықәса Санкт-Петербург иранаршьоит. Аныҳәатә церемониа мҩаԥгахоит Михаиловтәи атеатр асценаҿы.

Хьыбла Гьерзмааԥҳа – Урыстәылеи Аԥсни Жәлар рартистка, иланашьоуп аԥхьахәқәа "Триумф", "Casta Diva" аноминациа "Иреиӷьӡоу аоператә шәаҳәаҩы" аҟны, амилаҭтә театртә ԥхьахә "Ахьтәы сабрада" аноминациа "Иреиӷьӡоу аԥҳәыс лроль" аҟны, атеатртә ԥхьахә "Ахьы Орфеи" аноминациа "Иреиӷьӡоу ашәаҳәаҩ" аҟны.

Рашәара 12 азы Урыстәыла ахада Владимир Путин Урыстәылатәи Афедерациа Аҳәынҭқарратә премиа лнапы иаиркит аоператә шәаҳәаҩы, Урыстәылеи Аԥсни Жәлар рартистка, Станиславскии Немировичи-Данченкои рыхьӡ зху Москватәи академиатә музыкатә театр асолистка Хьыбла Гьерзмааԥҳа аурыси адунеитәи оператә ҟазара арҿиараҿы иҟалҵаз алагалазы.

19
Ражден Гумба

Ашәа аԥҵара иазҟазаз: Ражьден Гәымба 95 шықәса ихыҵра иазкны

19
(ирҿыцуп 10:33 12.09.2021)
Дырмит Гәлиа ихьӡ зху Аҳәынҭқарратә премиа алауреат, аорден "Ахьӡ-аԥша" II аҩаӡара занашьоу, Аԥсны жәлар рартист, акомпозитор Ражьден Гәымба диижьҭеи иахьа 95 шықәса ҵуеит.

Sputnik

Ражьден Гәымба диит цәыббра 12, 1926 шықәса рзы, Дәрыԥшь ақыҭаҿ. Иара 14 шықәса анихыҵуаз раԥхьатәи иашәақәа иҩуа далагеит, усҟан анотатә грамота издыруамызт, иҷыдоу адыргақәа рыла иаирбон имузыка.

Аԥсуа фольклор акомпозитор итема хадақәа ируакын. Аибашьра атематика акәзар, дышқәыԥшыз ирҿиара иалалеит.

Ражьден Гәымба иабду, жәлар шәаҳәаҩ, ажәабжьҳәаҩ Мамсыр лассы-лассы имоҭа абыргцәа ахьеизоз днеигалон. Усҟан арԥыс иаҳаз ашәақәа изаадыртит ижәлар рҭоурых. Қырҭтәыла жәлар рҟазара Аҩнаҟны ахор адирижиорцәа ркурс даналга ашьҭахь Ражьден Гәымба аусура далагоит Чхорцҟәыл араион аҟны. 1955 шықәса рзы Аԥсныҟа дхынҳәуеит. Жәлар рашәаҳәареи рыкәашареи Аҳәынҭқарратә ансамбль напхгара аҭара далагоит. Усҟантәи аамҭазы иарак акәын профессионалтә коллективны Аԥсны иҟаз.

Ражьден Гәымба ирҿиамҭақәа нарыгӡоит Бырзентәыла, Франциа, Молдавиа рхортә коллективқәа.

Ражден Гумба
© Foto / из архива семьи Гумба
Ражден Гумба

Иахьа шьҭа зыдунеи зыԥсаххьоу акомпозитор, Аԥсны Жәлар рартист атәым тәылаҟа ихырҵәаз аԥсуаа рлахьынҵа еснагь хьаас иман, иаԥҵамҭақәа ирынирԥшуан.

"Аҳәаанырцә инхо ҳауаажәлари ҳареи уарла-шәарла акәзаргьы аибабарақәа ҳабжьало ҳаналага, аибабара аныҟала, раԥхьатәи Аԥснынтә Ҭырқәтәылаҟа ицоз агәыԥ саргьы салан, еиҳабыс дҳацын Џьон Гәбаз. Уи агәыԥ композиторк иаҳасаб ала сацын", - иҳәеит иара ажурналист Сырма Ашәԥҳаи иареи реицәажәарақәа руак аҿы.

Ражьден Гәымба излазгәаиҭоз ала, Ҭырқәтәыла дыҟанаҵы икарандашьи иқьаади еиқәихуамызт.

"Знык аҳәаа ҳнахыҵны, аҭырқәцәа рымшын аҟәара ҳаннавала нахыс, абри еиԥш агәаанагарақәа соуан: абни ахаҳә аҵаҟа джызар аӡәы, даҽаӡәы аҵла ашьапаҿы джызар, мамзаргьы абни аҵла игылоу ашьапаҿы дшадтәалаз амла дакны дыԥсызар, абри амҩа шаҟаҩ ықәӡыда ҳәа хәыцра шәкы сеимаркуан", - иҳәон Гәымба.

Акомпозитор излаиҳәоз ала, ашьаҭа икит хыхәҭа дукны иҟаз Ораториа, амҳаџьырқәа рышьҭрала. Уи ахоргьы ирҳәоит, асолистцәагьы ирҳәоит, асимфониа аоркестр иазкынгьы иҟоуп.

Ражден Гумба
© Foto / из архива семьи Гумба
Ражден Гумба

Ражьден Џьгәаҭан-иԥа Гәымба иԥсҭазаара далҵит 2007 шықәса нанҳәа 21 рзы. Иара зегьы бзиа дырбон, уаҩышьалагьы, ҟазаралагьы, ҭеиҭԥшлагьы иаарылукаауаз дыруаӡәкын ҳәа дихцәажәон иара иколлега акомпозитор Кәасҭа Ченгьелиа.

Ражьден Гәымба ихьӡ ахуп Аԥснытәи Аҳәынҭқарратә филармониа.

19

Аԥсны даҽа 88-ҩык акоронавирус рыдырбалеит, ҩыџьа рыԥсҭазаара иалҵит

4
Аепидемиа ҟалеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 27353-ҩык рҟынӡа инаӡеит, ргәы бзиахеит 22404-ҩык ауааԥсыра, рыԥсҭазаара иалҵит 413-ҩык.

АҞӘА, цәыббра 25 – Sputnik. Иҳаҩсыз уахыки-ҽнаки рыла COVID-19 азы атестқәа арҭеит 370-ҩык Аԥсны ауааԥсыра, урҭ рахьтә 88-ҩык рцәа акоронавирус шалаз аадырԥшит.

Урыстәылатәи арратә госпиталь аҟны акоронавирус злаз ҩыџьа апациентцәа рыԥсҭазаара иалҵит: 1958 шықәсазы ииз ахаҵеи 1936 шықәсазы ииз аԥҳәыси. 

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 42-а, рҭагылазаашьа бааԥсуп ааҩык, ибжьаратәуп - 28-ҩык. Аҟәатәи аинфекциатә хәшәтәырҭаҿы ирхәышәтәуеит акоронавирус зцәа иалоу 28-ҩык, урҭ рахьтә ааҩык апациентцәа рҭагылазаашьа уадаҩуп. Очамчыра ирхәышәтәуеит 9-ҩык, Гагратәи ахәышәтәырҭаҿы - 15-ҩык, урҭ рахьтә хҩык рҭагылазаашьа уадаҩуп. Тҟәарчалтәи ахәышәтәырҭаҿы - 8-ҩык апациентцәа. Аҟәа иҟоу амобилтә госпиталь аҿы - 64-ҩык апациентцәа, жәаҩык рҭагылазаашьа хьанҭоуп.

Аоперативтә штаб аҳәара ҟанаҵоит ауааԥсыра аҿкы рхы ацәырхьчаларц.

Акоронавирус иадҳәалоу ажәабжьқәа шәрыԥхьар ҟалоит абра>>

4
Атемақәа:
Аҿкычымазара – акоронавирус Аԥсни адунеи аҿи: иалкаау