Аԥсуа тәылауаҩшәҟәы аиушьа

61
(ирҿыцуп 10:50 26.09.2017)
Аԥсуа тәылауаҩшәҟәы ҿыц аиуразы иахәҭаны иҟоу адокументқәеи ашәҟәқәеи анрыдыркыла ашьҭахь заҟа аамҭа иԥштәуи ртәы арбоуп Sputnik Аԥсны аинфографикаҿы.
Иҟаҵатәузеи Аԥсны атәылауаҩшәҟә ҿыц аиуразы
© Sputnik

Аԥсны атәылауаҩ итәылауаҩшәҟәы аԥсахразы иахәҭаны иҟоуп ажәытә тәылауаҩшәҟәы аоригинал, афотосахьақәа ҩба (6х4), аиразы аршаҳаҭга аоригинал, арратә комиссариат аҟынтәи аршаҳаҭга.

Иара убасгьы атәылауаҩ имазароуп аҩнытә шәҟәы мамзаргьы аформа №16 иақәшәо аордер (аҩнусбарҭа аҟынтәи), атәылауаҩшәҟә абланк ахәԥса шахшәаау азы акәтанциа (атәыла абанкқәа руак аҟны).

Атәылауаҩшәҟә аиура алшоит адокументқәа анрыдыркыла ашьҭахь 15 мшы рыҩныҵҟа ихарҭәаау аҭҵаарақәа зҭаху аҭагылазаашьақәа раан ада (усеиԥш аан ҩымз ирхымгакәа).

Адокумент зтәу иганахьала адыррақәа хьчоуп, иара абри адокумент азы хаҭала имҩаԥгоу ахьчарақәагьы нацҵаны.

61

Аԥсуа бызшәа адырра иунаҭо алшарақәа

184
(ирҿыцуп 13:21 16.07.2020)
Аԥсуа бызшәа - ижәытәӡатәиу абызшәақәа рахь иаҵанакуеит. Еигәыцхәу аԥсуа-адыга бызшәақәа зегь зхылҵыз абызшәа-шьагәыҭ аиҿыҵра ианалага инаркны иалагоит аԥсуа бызшәа зхала иҟоу бызшәак аҳасабала аҿиара аҭоурыхгьы.
Аԥсуа бызшәа адырра иунаҭо алшарақәа
© Sputnik Леон Гуния

Ҳера аныҟала ашьҭахь ҭоурыхлатәи аԥсуа бызшәа акзаарахь ахы архо иалагеит, уи зырццакуаз афакторқәа иреиуан Аԥсны Аҳра ашьақәгылара.

Иахьатәи аԥсуа бызшәа иамоуп ихадоу ҩ-диалектк: бзыԥтәи, абжьыуатәи. Асаӡ диалект еиқәханы иҟоуп ҭырқәтәылатәи, баҭымтәи аԥсуа диаспоракәа рҿы.

Аԥсуа бызшәа ҭырҵаауеит Аԥсны — Аҭҵаарадыррақәа ракадемиа иатәу, Дырмит Гәлиа ихьӡ зху Аԥсуаҭҵааратә институти Аԥсуа ҳәынҭқарратә университети рҿы, Шоҭа Арсҭаа, Лидиа Ҷкадуа, Виачеслав Чрыгба уҳәа убас егьырҭгьы аҳәаанырцә аҵарауаа-абызшәадырцәа дуқәа аԥсуа бызшәа аҭҵаара рнапы алакуп, Џьорџь Хьиуитт Џьон Коларуссо уҳәа реиԥш иҟоу.

184
Атемақәа:
Абызшәа. Аҿахәҳәага.

Иҭацәыз аҭыԥқәа рахь: Аԥсны Жәлар Реизарахь алхрақәа

156
Ԥхынгәы 12 рзы имҩаԥгахоит Аԥсны Жәлар Реизараҟны иҭацәыз адепутаттә ҭыԥқәа рахь алхрақәа. Азакәанԥҵаратә мчраҿы амандатқәа ԥшьба ҭацәуп.

Аԥсны алхратә комиссиа хада ԥхынгәы 12 аҽны иҭацәыз адепутаттә ҭыԥқәа рахь алхрақәа рымҩаԥгара ҿҳәарас ишьақәнаргылеит.

Азакәанԥҵаратә мчраҿы амандатқәа ԥшьба ҭацәуп, атәыла ахада Аслан Бжьаниа, аԥыза-министр Александр Анқәаб, Аҩныҵҟатәи аусқәа рминистр Дмитри Дбар, Гагра араион ахада инапынҵақәа назыгӡо Иури Хагәышь рҭыԥқәа.

Лаҵара 4 рзы дара зегьы рнапынҵақәа аанрыжьит.

Аԥсны Апарламент адепутатс дҟалар илшоит дарбанызаалак 25 шықәса ирҭысхьоу,  алхратә зин змоу атәылауаҩ. Депутатс иҟалар ҟалом зус рыӡбахьоу, аҩыжәреи, арыҩшьыгақәеи зыҽрыдызцало ҳәа ишьоу, аԥсихикатә шьақәҟьара змоу. Абжьыҭара азин ырмоуп 18 шықәса ирҭысхьоу атәылауаа.

Иара убас шәаԥхьар ҟалоит:

156

Ашьапылампыл азы ахәмарра, анапылампыл, самбо: Аԥсны амчыбжьтәи аспорттә афиша

2
Аинформациатә маҵзура Sputnik Аԥсны иазнархиеит еиҳа аинтерес зҵоу аспорт хҭысқәа реиқәыԥхьаӡа цәыббра 21-27 рзы.

Иарбан еиндаҭларақәоу ареспубликаҿы иззыԥшу Sputnik Аԥсны аспорттә афишаҿ.

Бадраҟ Аҩӡба, Sputnik

Еизгоу акоманда ахәмарра

Иааиуа амчыбжь азы ашьапылампыл асыҩцәа ирзыԥшуп игәыҟаҵагоу ахҭыс – ашьапылампыл азы амилаҭтә команда Донецктәи жәлар рреспублика акоманда иацыхәмарраны иҟоуп аҟәатәи астадион "Динамо" аҿы цәыббра 25 асааҭ 17:00 рзы.

Аиҩызаратә еицыхәмарра 1992-1993 шықәсқәа рызтәи Аџьынџьтәылатә еибашьраҿы аиааира иазкуп. Аԥсни ДЖәРи ркомандақәа реицыхәмарра 2020 шықәсазы ираԥхьатәиуп. Уи адагьы акоманда азыҟаҵаҩ хадак иаҳасаб ала ари Беслан Гублиа раԥхьатәи ицәырҵроуп. Ахәмарра иалахәхом аҳәаанырцә ихәмаруа аԥсуа шьапылампыласыҩцәа.

Уаанӡа Аԥсни Донецки ркомандақәа Аҟәа хынтә аиԥылара мҩаԥыргахьан. Актәи ахәмарра мҩаԥган 2015 шықәса рзы. Ахәмарра хыркәшахеит Аԥсны аиааирала. Аҩбатәи ахәмарра мҩаԥысит 2017 шықәса рзы. Еиҭахарыла ихыркәшахеит. Ахԥатәи аиԥылара, 2019 шықәса рзы еилгеит ДЖәР аиааирала.

Иара убасгьы ари амчыбжь азы Дәрыԥшьи Ҷлоуи ркомандақәа цәыббра 27 рзы астадион "Учхоз" аҟны асааҭ 16:00 рзы имҩаԥысуеит.

Аҟәа – анапылампыли каратеи, самбо – Афон ҿыц

Еиҭа иналукааша спорттә хҭысхоит XIV Жәларбжьаратәи атурнир анапылампыл азы. Аицлабрақәа ирылахәхоит 2004-2005 шықәсқәа рзы ииз арԥарацәеи аҭыԥҳацәеи. Атурнир мҩаԥгахоит цәыббра 27 –жьҭаара 2 рзы.

Аспорттә мчыбжьы аҟны иалукаартә иҟоуп иара убасгьы IV карате-до Шотокан Казе Ха азы иаарту аицлабра. Уи Аҟәа ахақәиҭтәра иахьӡыншьалоуп. Аицлабрақәа мҩаԥысуеит цәыббра 24-25.

Цәыббра 27 - 29 рзы Афон ҿыц имҩаԥгахоит самбо азы "Аиааира ахраҿа", аибашьцәа-аинтернационалистцәа ирызку. Иалахәхоит 2004 - 2009 шықәсқәа рзы ииз аҷкәынцәеи 2006-2008 шықәсқәа рзы ииз аӡӷабцәеи.

Зых иақәиҭу ақәԥаразы атурнир

Цәыббра 26 - 27 рзы Гәдоуҭатәи ахәыҷтәы спортшкол аҿы имҩаԥысуеит Аԥсны аспорт азҟаза Ҭенгиз Ԥандариа игәалашәара иазку зых иақәиҭу ақәԥаразы атурнир.

Аԥсны ахада ихьчаҩ Александр Анқәаб Ҭенгиз Ԥандариа дҭахеит жәабран 22 2012 шықәса рзы Анқәаб ишьразы аҽазышәараан.

Аԥсны аспорт азҟаза Ҭенгиз Ԥандариа Аацы ақыҭатәин. Ашкол аҿы аҵара аниҵоз инаркны зых иақәиҭу ақәԥара дазҿлымҳан. Гәдоуҭатәи аспортшкол аҿы еицырдыруа азыҟаҵаҩ Ӡука Бениа иҿы иҽазыҟаиҵон. Изныкымкәа Аԥсны дачемпионхахьан.

2