Урыстәыла "Ԥсра зқәым архәҭа" амҩанысра арыцхә инахоуп

13
(ирҿыцуп 09:37 17.07.2020)
Аханатә ауснагӡатә мҩаԥыргараны иҟан Аиааира амш аҽны, лаҵара 9 рзы, аха иахыган акоронавирустә пандемиа иахырҟьаны.

АҞӘА, ԥхынгәы 17 - Sputnik. Ԥхынгәы 26 рзы "Ԥсра зқәым архәҭа" амҩанысра арыцхә инахеит аиҿкааҩцәа онлаин-еилатәара ашьҭахь.

"Ауснагӡатә алахәразы арзаҳалқәа рынашьҭра алшоит атәылаҿ аепидемиологиатә ҭагылазаашьа ианалнаршо", - ҳәа аҳәоит арелиз аҟны.

"Ԥсра зқәым архәҭа" амҩанысра арыцхә инахоуп, арыцхә ҿыц макьаназ ирылаҳәам.

Аханатә ауснагӡатә мҩаԥыргараны иҟан Аиааира амш аҽны, лаҵара 9 рзы, аха иахыган апандемиа иахырҟьаны. Владимир Путин ажәалагала ҟаиҵеит Арра-мшынтә флот амш, ԥхынгәы 26 рзы имҩаԥгазарц.

"Урыстәыла ԥсра зқәым архәҭа" аштаб хада ахантәаҩы Васили Лановои иажәаәқа рыла, ауснагӡатә мҩаԥгахар алшоит цәыббра 2 ма 3 рзы мамзаргьы иааиуа ашықәс азы.

Иара убас шәаԥхьар ҟалоит:

 

13

Агәыҳалалра акт: Апарламент аиҳабы амнистиаз аӡбара шрыдыркылаз атәы иҳәеит

6
(ирҿыцуп 09:52 26.09.2020)
Аԥсны Апарламент адепутатцәа цәыббра 24 рзы Аиааиреи Ахьыԥшымреи рымш 27 шықәса ахыҵра ахьӡала амнистиаз ақәҵара рыдыркылеит.

АҞӘА, цәыббра 26 – Sputnik. Аԥсны Апарламент аиҳабы Валери Кәарҷиа арадио Sputnik аинтервиу аҭо иҳәеит амнистиаз аӡбара шрыдыркылаз атәы.

"Мызки бжаки инацны аветерантә еиҿкаара "Аруааи" егьырҭ ауаажәларратә еиҿкаарақәеи ҳаҳәон иҭаку рҭагылазаашьа азхьаԥшра аҳҭарц. Иҟоуп ауаа еиуеиԥшым аҭагылазаашьақәа, иаҳҳәап, амҩатә машәыр аиԥш иҟоу рыла абахҭахь инанагаз, ирықәу ашьауӷа аҿҳәара абжаранӡа зхызгахьоу", - иҳәеит Кәарҷиа.

Иара иажәақәа рыла, Апарламент ахь инеиуеит иҭаку рыуа-рҭахы амнистиа азҵаара аӡбара рыдгало.

"Арахь иаарго ашәҟәқәа азинтә политика аилак ахь инасышьҭуан. Ашәҟәқәа маҷымкәа ианеиза, иалацәажәеит. Алкаагьы ҟарҵеит амнистиа мҩаԥгатәуп ҳәа. Аҵыхәтәантәи амнистиа ыҟан ҩышықәсеи бжаки раԥхьа. Аныҳәа аламҭалаз иҳаӡбеит абасеиԥштәи акциа мҩаԥаагарц", - иҳәеит иара.

Валери Кәарҷиа иазгәеиҭеит адепутатцәа даара иҵыршәшәааны иҭаку ркатегориақәа ишрызнеиз, уи ашьҭахь шакәу амнистиатә сиа анеиҿыркаа.

"Ирацәаҩуп акьыбачымазара змоу, агәыхь, ашьақар чымазара уҳәа реиԥш еиуеиԥшым ачымазарақәа змоу. Аӡәы иҿҳәара шықәсыки бжаки агуп, иҟан иақәшаҳаҭызгьы, иақәшаҳаҭмызгьы, иҟан азҵаара нагӡаны иҭҵаам ҳәа изыԥхьаӡаз ма асеиԥш лассы-лассы амнистиа мҩаԥгалатәым ҳәа изшьаз. Аҿагылара ҟанаҵеит Апрокуратура хада, Ахада иусбарҭа", - ҳәа азгәеиҭеит иара.

Кәарҷиа игәаанагарала, амнистиа гумантә, уаҩрыцҳашьаратә акциоуп.

"Ауаа ацәгьа руит, аха урҭгьы ҳара иаҳтәылауаауп. Абахҭа ачымазарақәа ирыҿкырҭаны иҟаҳҵар иашам. Ацәгьоуцәа ркатегориақәа зегьы џьарак еицҭакуп. Абарҭқәа зегьы азгәаҭаны сара амнистиа садгылаҩуп", - иҳәеит Апарламент аиҳабы.

Амнистиа аҭахрақәа ирхьырԥшны адкылара ҟалоит ҳәа иҳәеит иара.

"Ауаажәларра азҵаара шышьҭырхуеиԥш иазнеитәуп. Асеиԥш аӡбара адкыларазы афакторқәа жәпакы азгәаҭатәуп. Амнистиа амҩаԥгара ҟалоит хәышықәса, жәашықәса ма шықәсык ахь знык", - иҳәеит Кәарҷиа.

Аибашьра ашьҭахь ирыдкылоуп амнистиа актқәа ааба. Актәи амнистиа рылаҳәан Аџьынџьтәылатә еибашьраҿы Аиааира ҩышықәса ахыҵраан.

Амнистиа иара убасгьы ареспубликаҿ ирыларҳәеит 2005, 2008, 2013, 2018 шықәсқәа рзы (Аџьынџьтәылатә еибашьраҿы Аиааираз), 2010 шықәсазы ирылаҳәан Аџьынџьтәылатә еибашьра Ду аҿы аиааира 65 шықәса ахыҵразы.

6
Кабинет министров республики Абхазия

Аминистрцәа Реилазаара ашколқәа акарантин азы иадыркуеит ҳәа ирҳәаз аԥнарҟәҟәааит

31
(ирҿыцуп 22:08 25.09.2020)
Акоронавирус азы атәылаҿы ишьақәгылаз аҭагылазаашьа иахҟьаны Аԥсны ашколқәа зегьы рҟны акарантин алагалоуп ҳәа аинформациа АИХқәа рҿы ирыладырҵәеит ахәаша, цәыббра 25 рзы СЕС аиҳабы Лиудмила Скорик иҟалҵаз аҳәамҭа ҵаҵӷәыс иҟаҵаны.

АҞӘА, цәыббра 25 – Sputnik. Аԥсны Аминистрцәа Реилазаара апресс-маҵзураҿы ииашам ҳәа ахырҳәааит Аԥсны ашколқәа зегьы рҟны цәыббра 25 инаркны жьҭаара 16 рҟынӡа акарантин аларгалоит ҳәа уаанӡа АИХқәа рҟны ицәырҵыз аинформациа.

"Аминистрцәа Реилазаара акәым, Ауааԥсыра акоронавирус рацәыхьчаразы акоординациатә штаб акәым ашколқәа рҟны аҵаратә процесс аанкыларазы азҵаара иалацәажәомызт, аӡбамҭа ҳәагьы акгьы рыдрымкылацт", - ҳәа аанацҳауеит Аминистрцәа Реилазаара асаит.

Акоординациатәи аоперативтәи штабқәа иааиԥмырҟьаӡакәа ичмазаҩхази згәы бзиахази ауаа ирыцклаԥшуеит, иара убасгьы аҵара аусҳәарҭақәа рҟны ачымазара зыхьыз рхыԥхьаӡара гәарҭоит ҳәа аарыцҳаит Аминистрцәа Реилазаара апресс-маҵзураҿы.

"Аиҳабыреи акоординациатә штаби ирыдыркыло аофициалтә ӡбамҭақәа зегьы Аминистрцәа Реилазаара аофициалтә саит аҟны иҟалоит", - ҳәа азгәарҭеит апресс-маҵзураҿы.

Уаанӡа цәыббра 25 ахәылбыҽха Агәабзиарахьчара аминистрра апресс-маҵзура Аԥсны асанитартә ҳақьым хада Лиудмила Скорик адырра ҟалҵеит атәыла ашколқәа зегьы рҟны жьҭаара 16 рҟынӡа акарантин алагалахоит ҳәа.

Скорик ишылҳәаз ала, ари аҩыза аӡбамҭа атәыла аиҳабыра иаднакылеит Агәабзиарахьчара аминистрреи Асанитартә епидемиологиатә маҵзуреи иҟарҵаз абжьгарақәа инрықәыршәаны.

31

"Аԥшӡа" насыԥда дшаанхаз: арԥыс изку ажәабжьк

57
(ирҿыцуп 14:20 26.09.2020)
Анасыԥдара иазку аҭоурых иадыруа ахҭысқәа аиҳарак аҭыԥҳацәа роуп изыхҳәаау, аха уи иаанагаӡом арԥарцәа рразҟы арыцҳара акьысуам ҳәа. Иахьа ишәзеиҭаҳҳәо ажәабжь зызку, қыҭак аҟны "Аԥшӡа" ҳәа жәаҩыла аҭыԥҳацәа илаԥшықәҵаны ирымаз, аԥсҭазаара "злахәмарыз" аҷкәын иоуп.

Саида Жьиԥҳа, Sputnik

"Аԥшӡа" - ари ахьыӡ ҷыда ауп акәымзар, ихьӡ хаҭа аӡәгьы иҳәомызт, уи аҟазшьарбада ари аҷкәын иоура, иҭбаара, ибла иаҵәа, иччаԥшь ихнаххьаз рхаҿы дырзаагомызт азы.

"Аԥшӡа" ажәеизатәи акласс аҿы дтәан, Асовет Еидгыла аррахь иаанаԥхьараны иҟаз арԥарцәа дрыцны амедицинатә гәаҭарақәа данырхысуаз. Убасҟан аҳақьым иабжьеигеит аурологиа аганахьала ихы гәеиҭарц, аха иԥхашьаз, 18 шықәса ирықәыз аҷкәын иҭаацәа рҿы иӡеит ари апроблема атәы.

"Аԥшӡа" Украина арра анихигоз ӡынрак азы ӷәӷәала дычмазаҩхеит. Ишоура акраамҭа имтәо ианалага, арратә ҳақьымцәа агәаҭарақәа жәпакы дырхыжьны, ипроблема аҽшарцәгьаз, наҟ-наҟ ахшара дшимоуа атәы рҳәеит. Хымԥада, ақәыԥшра иҭагылаз арԥыс, арҭ ажәақәа ирыҵаз аразҟыдара ихахьы иаразнак иааимгеит. Аамҭа анца ауп данрызхәыц.

"Аԥшӡа" аишьцәа дреиҵбан азы, аб игәараҭа иазынхоз иара иакәын. Хәҩык ахшара рахьтә иара ида аҭаацәарақәа аԥырҵахьан. "Уқәра цоит, уԥшӡарагьы наӡаӡа иаанхаӡом, аԥҳәыс даага", - ҳәа аӡәаӡәала дыхҭаркуа иалагеит рашьа 35 шықәса рҟынӡа даннеи.

"Бареи сареи ҳаибагар ҟалаӡом, аха бзиа бсамхабеит, ишԥаҟасҵари?" - ҳәа лаиҳәалон "Аԥшӡа" иаҳәшьа ланхәыԥҳа, дара рахь аангылара данцалоз. Аҿар рымаӡақәа анрыҵырх, ирылабжьеит "ари маҳагьароуп" ҳәа раҳәауа. Уи аахыс 20 шықәса ҵит, анхәыԥҳа хаҵа дцеит, ҩыџьа аԥҳацәа лоуит, аха лыԥшәма инапы шьҭихуан азы лычҳара анхыжжыла, лҭаацәагьы "ҳаԥҳа даҳшьума" рҳәан ддәылганы аҩныҟа дааргеит.

"Аԥшӡа" лара лахь хымԥада уажәшьҭа акагьы дақәгәыӷуамызт, аха даҽаӡәгьы длыхәаԥшӡомызт аиҳарак ипроблема иахырҟьаны.

Ныҳәак аҽны, "Аԥшӡа" иаҳәшьаԥа дицны днанагеит ихәыҷреи, иқәыԥшреи ахьихыигоз агәараҭахь.

Аишәа рхианы, "иуҭахыу акыр ыҟоума" ҳәа ивагьежьуаз "анкьатәи ибзиабара" зегь акоуп игәаӷьны ила дҭаԥшуамызт, иаргьы ихы ларҟәны, акәын аҭак шлиҭоз, аха убасҟан илашәыз иоуп изымбаз рҩыџьагьы рцәаныррақәа шҿыхаз.

Аҿыҵгақәа ҟаҵо, зны имашьына акы агушәа, ҽазны акы ихашҭызшәа иблахкыга дибарц азы "Аԥшӡа" лассы-лассы амҩа дықәлон уахь.

Шықәсыбжак ааҵуаны, ацәаныррақәа ирзымиааиз "Аԥшӡеи" анхәыԥҳаи маӡала еиқәшәо иалагеит. "Аԥҳәыс дааугар, агәра усыргоит ҳаизыҟазаашьақәа рҵыхәа шыԥҵәо" ҳәа иалҳәалон лара, иахькылнаго еилылкаауан азы. Арҭ ажәақәа "Аԥшӡа" рҭак ҟаиҵомызт, игәалаҟазаара бжьырхуан ауп…

Ҽнак "Аԥшӡа" ибзиабаҩ рымаӡаҭыԥ ахь дымнеиӡеит. Уи акырӡа игәнигеит, машәырк лыхьзар ҳәа дшәан, еиҭа ҿыҵгак ԥшааны дрызцеит. Асас абжьааԥнеиԥш аишәа издырхиеит, аха "иуҭаху акыр ыҟоума" ҳәа уажәтәила ивагьежьуаз иаҳәшьаԥҳа ҳәыҷы лакәын. Аӡәгьы ианимаҳауаз "баҳәшьаду дабаҟоу" ҳәа данлазҵаа, "лгәы бзиам, диоуп" ҳәа иаҭалкит. Арҭ ажәақәа ишоура харгалеит, игәы идырхьит, аха дахьышьҭаз ауадахь дызлаҩналози…

Анхәыԥҳа ақалақьтә џьармыкьа аԥхьа лыԥсы лылшәшәаны данкаҳа, дызбаз ауаа атакси ала ахәшәтәырҭахь дрышьҭит. "Ишакәым бкыдҟьеит, сыӡӷаб, ахәыҷы деиқәымхеит" ҳәа аҳәса рҳақьым зыԥсы ааиз лахь лҿанаалха, анхәыԥҳа еиҭа ахчы лхы нылаҳаит. Ахәылбыҽхан, аԥҳәыс лхьаақәа анеиқәтәа аҩныҟа дааит.

"Сара аҭаацәара сзаламлоз ахшара дсоуӡом, џьоукы рыӡӷаб лыгәнаҳа сықәсымҵап ҳәа акәын, бызлацәажәо схаҿы исзаагом, иҵабыргыцәҟьоума?" - ҳәа ибзиабаҩ лахь изҵаарақәа ҵыхәаԥҵәара рмоуит ианеибаба. Иажәақәа идыргәааз аԥҳәыс, ихаимҵозар дзызҵаашаз аҳақьым дазусҭоу аалырԥшит.

"Нан, угәынамӡара еилыскаауеит, аха аԥҳәыс ус анлыхьуа ыҟоуп, амала алаҳәара сахьымӡеит лцәа ҩыџьа асабицәа шалаз, дыццакцәаны дцеит", - ҳәа ахаҵа ихы иаднамкылоз ажәақәа иалҳәеит.

Хара имгакәа, "Аԥшӡа" иқәыԥшраан изықәгылаз адиагноз аҭҵаара далагеит. Москваҟа дахьцаз: "Ауаҩы ахьҭа илаланы даныҟоу егьа проблема изцәырҵуеит, аха уи иаанагаӡом ачымазарақәа зегьы хәышәтәышьа рымам ҳәа. Уара угәы бзиоуп", - ҳәа иарҳәеит уаатәи аҳақьымцәа.

Ибзиабаҩ лҿаԥхьа ишьамхы арсны аҭамзаара шьҭеиҵеит "Аԥшӡа", аҳақьымцәа ирҭахьаз ақьаадқәагьы лнапы инаиркит. Аха изхәарҭоузеи…

"Аԥшӡа" ибзиабаҩ машәырла лыԥсҭазаара ҿахҵәеит. Иара иахьагьы иԥсы ҭоуп, лара дшиџьабоз уаҳа аҭаацәара даламлеит. Ишьапы дахьынӡананагоз аҿыҵгақәа ԥшааны иаҳәшьаԥацәа рахь дцалон, абаҳча дҭысуашәа ҟаҵаны раҳәшьаду лҳаҭгәын аԥхьа днатәалон…

Илашәыз иакәын урҭ ацәаныррақәа зымбоз…

57