Юбилей Академии наук Абхазии - 20 лет

Џьапуа: Белоруссиеи Аԥсныи ракадемиақәа русеицуразы шьаҿак ҟаҵоуп

29
(ирҿыцуп 18:53 03.06.2018)
Аԥсны аҭҵаарадыррақәа ракадемиа ахада Зураб Џьапуа Минск дызлахәыз Жәларабжьаратәи аҭҵаарадырратә конференциеи, напы зҵаҩыз аиқәшаҳаҭреи ртәы еиҭеиҳәеит Sputnik аефир аҟны.

"Белоруссиа сымцацызт, убри аҟынтәи фольклорҭҵааҩык иаҳасабала, аҭҵаарадырра аиҿкааҩык иаҳасабала, академиа аганахьала, исҭахын Белоруссиатәи аҭҵаарадыррақәа ракадемиеи сареи ҳаибадырырц, русушьа збарц. Арҭ сыгәҭакқәа нагӡахеит уҳәар ауеит. Ҩаӡара ҳаракыла исԥылеит. Жәлар рлакә аҭҵаара иазкыз Жәларбжьаратәи аконференциа иснарбеит ҳара ҳаҭҵарадырраҿы иԥшаатәу амҩақәа, алакә аҭҵаараҿы аума даҽаџьара. Белоруссиа аҭҵаарадырра аҩаӡара ҳаракуп. Сажәахә азкын аԥстәқәа ирызку аперсонаж хадақәа. Уаанӡа алакә шҭысымҵаауазгьы,  сажәахә ргәаԥхеит. Хаиԥылеит Белоруссиатәи аҭҵаарадыррақәа ракадемиа ахада инапынҵақәа назыгӡози сареи. Ҳаицәажәеит, ԥхьаҟатәи ҳусеицура иацхрааша ахшыҩҵакқәа ҳарзааҭгылеит. Дара рҟынтәи аҵарауаа Аԥсныҟа иаарц, ҳара ҳҵарауаа Белоруссиа иаҭаарц еибаҳҳәеит. Белоруссиеи Аԥсныи рыҭҵараадыррақәа ракадемиақәа реизааигәахаразы даҽа шьаҿак ҟаҵан. Белоруссиатәи акультура аҭҵаара ацентр аиҳабыи сареи аусеицуразы аиқәшаҳаҭра ҳнапы аҵаҳаҩҩит", — ҳәа азгәеиҭеит Џьапуа.

29