Аслан Кутелия

Қәҭелиа: алагер "Ажәеиԥшьаа" аԥсуа цәа ахҵаны имҩаԥысуеит

84
Аԥсны аҵареи аҭҵаарадырреи рминистрра апресс-маҵзура анапхгаҩы Аслан Қәҭелиа арадио Sputnik аефир аҟны еиҭеиҳәеит ахәыҷтәы лагер "Ажәеиԥшьаа" Риҵатәи Амилаҭтә парк аҟны ишеиҿкаау.

"Аԥсны аҳәынҭқарра асоциалтә ԥгаԥсеи аџьа ахьчареи рфонди ҳминистрреи еицымҩаԥыргоит алагер. Уи х-гәыԥкны еихшоуп. Актәи агәыԥ иаднакылаз ԥхынгәы 29 инаркны нанҳәа 4-нӡа иҟазаауеит алагер аҟны. Ахәыҷқәа мчыбжьык рыԥсы ршьалоит. Ари аамҭа иалагӡаны Риҵатәи аҳәырԥсарраҿы еиуеиԥшым аҭыԥ ԥшӡарақәа рахь иныҟәалоит.

Алагер аԥсуа цәа ахаҵаны имҩаԥысуеит. Аԥсуа хәмаррақәа мҩаԥысуеит, ахәыҷқәа аԥсуа фильмқәа дырбахоит. Алагер Ауадҳара еиҿкаауп. Ахәыҷкәа амшьамбақәа рҟны инхоит. Дара хылаԥшра рырҭоит Аҟәатәи аинтернат арҵаҩцәа, ршәарҭадара акәзар иацклаԥшуеит Аԥсны аҭыгалаазшьа ҷыдақәа рзы аминистрра аусзуҩцәа. Алагер аҟны зынӡа рыԥсы ршьоит 150 –ҩык ахәыҷқәа, 13 инаркны 17 шықәса рҟынӡа зхыҵуа. Гәыԥцыԥхьаӡа  50-ҩык ыҟазаауеит. Алагер ахь инеиуа ахәыҷкәа раионцыԥхьаӡа аҵара аҟәшақәа иалырхыз роуп, ашықәс иалагӡаны аҵараҟны зҽалызкааз, иара убас аҭаацәара дуқәа рҟынтәи ахәыҷқәа", — иҳәеит Қәҭелиа.

84