Геннадий Цвижба

Ҵәыџьба: Гагра ахақәиҭтәра аиааира шаҳгоз агәра ҳнаргеит

29
Гагра ахақәиҭтәра иалахәыз аибашьра аветеран Геннади Ҵәыџьба арадио Sputnik аҟны Аԥсны Мраҭашәаратәи ахәҭа аҭарцәра шыҟалаз игәалаиршәеит.
Ҵәыџьба: Гагра ахақәиҭтәра аиааира шаҳгоз агәра ҳнаргеит

"Зегь реиҳа ҳгәы шьҭызхыз, ԥхьаҟа иҳахо агәаҳәара ҳазҭаз, аиааира шаҳгоз агәра ҳзыргаз мшын жьҭаара фба Гагра араион ахақәиҭтәра аналыршаха. Уи иадҳәалоу ахәыцрақәа рацәаӡоуп, избанзар ҳархәҭақәа еиҿкааны иҟамызт. Еибадыруаз, еишьцәаз, еигәылацәаз, еиԥхнагацәаз уҳәа рыла еиҿкаан ҳархәҭақәа. Усҟан Пицунда  ротак аҟынӡа имнеиуаз  взводқәак еиҿкааны Аԥсара ҳәа иахьашьҭоу хыхь амандаринаҭраҟны ахырӷәӷәарҭақәа аанкыланы ҳаҟан. Амза аказы ашьыбжьышьҭахь Гагра ашьха иахьаԥну арыӷьарахьтәи аган игылоу аҩнқәа ҭарцәуа ԥхьаҟа ацара ҳадырҵеит. Ахәылбыҽханӡа Гагра арратә комиссариат аҟынӡа ҳнеит. Адырҩаҽны ҩаԥхьа ажәылара ҟалеит. Мышки бжаки рыла Гагра ақалақь ахы иақәиҭтәын, араион аҭарцәра хәымш-фымш аҭаххеит. Ари ҳажәлар ргәы шьҭнахит. Агәаӷьра ду аарԥшны аибашьратә кәамаҵамақәа зегьы шаҳзымдыруазгьы, уамашәа иубаратәы алҵшәа ҟалеит", — ҳәа азгәеиҭеит Ҵәыџьба.

29

Џьапуа еиҭеиҳәеит археологиахь имоу абзиабара хыҵхырҭас иамоу атәы

5
Аҵарауаҩ, археолог, Аԥснытәи Аҳәынҭқарратә музеи аиҳабы Аркади Џьапуа ԥхынгәы 15 рзы иазгәаиҭоит ииубилеи, иара ихыҵит 65 шықәса. Арадио Sputnik Аԥсны аефир аҿы иара еиҭеиҳәеит археологиа агәыбылра шикыз, насгьы аԥсуаа иреиҳаӡоу шәарҭараны иҳамоу атәы.
Аԥсны еицырдыруа ахьыӡқәа: Џьапуа иԥсҭазааратә мҩа иазкны

"Ҷлоу Аимара аҳаблан сахьиз, сахьааӡаз, ҳаҩны аган аҟынҵәҟьа ииасны ицон Аԥсуа баагәара. Ҳхәыҷқәамзи, убра џьит ҳахәмаруан, ҳаҩуан, ҳаԥон, археологиа аганахьалагьы абзиабара сзыркыз убри ауп. Ҳара ажрақәа мҩаԥаагомызт, аха аԥшаахқәа ҳанрықәшәоз ыҟан, уи аҭоурых ауп бзиа исзырбазгьы. Аҩбатәи – аҭоурых ҳазҭоз арҵаҩы Константин Ԥарулуа уи цәгьа ҳгәы азыҟаҵан Аԥсны аҭоурых ҳзеиҭеиҳәон, иара ибзоуроуп аҭоурых ахь исымоу абзиабара ҳәа исыԥхьаӡоит", - ҳәа еиҭеиҳәеит Џьапуа.

Археолог арадиоефир аҿы иазгәеиҭеит аԥсуаа ҳбызшәа еиуеиԥшым ашықәсқәа рызгьы ауадаҩра ишҭагылаз, аха иахьатәи аамҭа иаҿырԥшны иухәозар, усҟан уи ала ицәажәон ақыҭақәа.

"70-тәи ашықәсқәа рзы ашкол ҳалган аҵара ҳанҭала, Аҟәа ҳанааи, ҳахьнеилакгьы атәым бызшәа ҳаҳауан, сҩызцәеи сареи шәааи-сааи ԥсышәала ада ҳамцәажәап атәымуаа рцас азы ҳәа еибыҳәаны аԥсышәала ҳцәажәауан. Убасҟан саԥхьа иааԥшуа иалагеит абызшәа аҭагылазаашьа, ауадаҩра, аха усҟан ҳқыҭақәа хьчан, иҭәын, уи ҳбызшәа ахьчауан. Иахьа ус еиԥш иҟам. Уахьынтә иалҵны аҿар анаа, ақыҭаҿы иаанхеит абыргцәа. Иахьа абызшәа аҭагылазаашьа аиҳа еиҳау апроблема аибашьра анаҩс иҳамаӡам", - ҳәа азгәеиҭеит Џьапуа.

Иаҳа инеиҵыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

5

Какәыбаа: араион аҿы аспорттә секциақәа шаҟа ирацәоу аҟара, еиҳагьы еиӷьхоит

9
(ирҿыцуп 18:37 14.07.2020)
Гәылрыԥшь араион аспорткомплекс "Агәыӡера" аиҳабы Мурман Какәыбаа арадио Sputnik Аԥсны аефир аҿы еиҭеиҳәеит иарбан спортхкқәоу араион аҿы еиҳарак аҿиара змоу, насгьы ахәыҷқәа разыҟаҵаразы лшарақәас иҟоу атәы.
Раионк аԥсҭазаараҟынтә: Какәыбаа Гәылрыԥшь аспорткомплекс аусура иазкны

"Аспорткомплекс аус ауеит х-спортхкык рыла: ашьапылампыл, акарате, абокс. Ҳахәмарратә зал шьақәҳаргылеижьҭеи еиҭа ҩ-хкык ацаҳҵар ҳҭахуп - анапылампыли, амҵәышәымпыли. Ҳхәыҷқәа аихьӡарақәа рымоуп акарате аҿы, абокс аҿы. Ашьапылампыл акәзар, еиҳа ицәгьоуп, ахәыҷқәа макьана аԥышәа рымам. Рыхә-секциак анаартхалак 150-ҩык, 200-ҩык рҟынӡа ахәыҷқәа ҳадаҳкылартә еиԥш алшара ҳауеит. Асекциақәа шаҟа ирацәоу аҟара, ахәыҷқәа рзы еиҳа еиӷьхоит. Аспорткмплекс аҿы рҽазыҟарҵар ауеит 300-ҩык инарзынаԥшуа ахәыҷқәа сааҭ-сааҭла еихшаны. Азыҟаҵаҩцәа рганахьала ҳаиқәшәоуп, ахәыҷқәагьы бзиа ирбоит, рус иазҟазоуп", - ҳәа еиҭеиҳәеит Какәыбаа.

Иаҳа инеиҵыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

9

Бжьаниа Аԥсни Урыстәылеи рҳәаа ахысразы иҟоу аԥкрақәа ирыциҵеит ԥхынгәы 21 рҟынӡа

14
(ирҿыцуп 13:32 15.07.2020)
Аԥсны Ахада аҳәааҿы аԥкрақәа рыҿҳәара анахаразы аусԥҟа инапы аҵаиҩит Ауааԥсыра акоронавирус рацәыхьчаразы акоординациатә штаб иаднакылаз аӡбамҭа инақәыршәаны.

АҞӘА, ԥхынгәы 15 - Sputnik. Аԥсны ахада Аслан Бжьаниа Аԥсни Урыстәылеи рҳәаа ахысразы иҟоу аԥкрақәа ирыциҵеит ԥхынгәы 21 рҟынӡа, абри атәы аанацҳауеит атәыла ахада ипресс-маҵзура.

Адырраҭараҿы иазгәаҭоуп аԥсуа ган аурыс-аԥсуа ҳәаа ахысразы иҟоу аԥкрақәа раԥыхра алзыршо ажәалагалақәа шышьақәнаргылаз.

Урыстәыла аиҳабыра рхада Михаил Мишустин ихьӡала ашәҟәы нашьҭуп Аԥсны аҳәааҟны аԥкрақәа рахыхра шрылшо, иахәҭоу асанитар-епидемиологиатә усмҩаԥгатәқәа ирықәныҟәозар.

Уажәазы аҩганк реиҳабырақәа рхаҭарнакцәа злахәу аилацәажәарақәа мҩаԥысуеит аҳәааҟны аԥкрақәа раԥыхра алзыршо еицырзеиԥшу аӡбамҭа рыдыркыларц азы.

Ԥхынгәы 3 рзы имҩаԥысуаз апресс-конференциаҟны Аслан Бжьаниа иазгәеиҭеит аҳәаа аартра аепидемиологиатә ҭагылазаашьа ишадҳәалахо, Аԥсны аҳәаа аартра ишазыхиоу, аха атәылақәа рыҩба аамҭак ала рус еиқәдыршәар шакәу.

Урыстәыла ԥхынгәы 15 инаркны иаԥыхуп ихымԥадатәиу ҩымчыбжьатәи акарантин атәылахь иалало рзы.

Аԥсны ауааԥсыра акоронавирус рацәыхьчаразы аштаб адыррала, ареспубликаҿ 38 чымазара хҭыс ыҟан, урҭ рҟынтәи 37-ҩык ргәы бзиахеит, аӡәы лыԥсҭазаара далҵит.

Иахьатәи аамҭазы Аԥсны Аҳәынҭқарраҟны акоронавирустә инфекциа зыхьуа ҳәа аӡәгьы дыҟаӡам.

Иара убас шәаԥхьар ҟалоит:

14